1 Bibɔrb Aabɔr 27 - Uwumbɔr aagbaŋ

Butɔb ni ŋitun ŋiken aabɔr

¹ Israel aadichadam, ni itaŋaal aayidam, ni baaninkpiib bi lik nnaan ngbaan aatuln na sɔ: Uŋmal mɔk ponn ni, libiln ponn ni kan, bijab ŋichur moninko ni ŋinaa le nan tun ŋitun uŋmal ngbaan ni. Le uŋmal ngbaan aaninkpel lik bi.

^2-15 Uŋmal mɔk aaninkpel aayimbil sɔ: Njan aaŋmal, Sabdiel aajapɔɔn Jasobeam le nan ye uninkpel. U ye Peres aataŋaal mu bi Juda aanibol ni na aanii la. Ŋmalee ni, Ahohi aayaabil Dodai le nan ye uninkpel, le Miklof paa u pu. Ŋmataa ni, utotoor Jehoyada aajapɔɔn Benaya, u nan ye “Piitaa Na” aasaloln na, le nan ye uninkpel. Ujapɔɔn Amisabad le nan gaa waabuul ni. Ŋmanaa ni, Joab aanaal Asahel le nan ye uninkpel. Ujapɔɔn Sebadia le nan gaa waabuul ni. Ŋmaŋmu ni, Isar aayaabil Samhuf le nan ye uninkpel. Ŋmaloob ni, Ikes u nyan ni Tekoa aatiŋ ni na aajapɔɔn Ira le nan ye uninkpel. Ŋmalole ni, Heles u ye Efraim aanii ki nyan ni Pelonn aatiŋ ni na, le nan ye uninkpel. Ŋmaniin ni, Sibekai u nyan ni Husa aatiŋ ni ki ye Sera aataŋaal ni aanii na, le nan ye uninkpel. Ntaŋaal ngbaan ye Juda aanibol ni aataŋaal mubaa la. Ŋmawae ni, Abieser u nyan ni Anatof aatiŋ ki bi Benjaminn aanibol aapepel ni na, le nan ye uninkpel. Ŋmapiik ni, Maharai u nyan ni Netofa ki ye Sera aataŋaal ni aanii na, le nan ye uninkpel. Ŋmapiik ni ubaa ni, Benaya u nyan ni Piratonn aatiŋ ni, Efraim aanibol aapepel ni na, le nan ye uninkpel. Ŋmapiik ni ilee ni, Otniel aayaabil Heldai u nyan ni Netofa na, le nan ye uninkpel.

Israel aanibol aayidam

^16-22 Israel aanibol aayidam aayimbil sɔ: Rubenn aayidaan: Sikri aajapɔɔn Elieser Simeonn aayidaan: Maaka aajapɔɔn Sefatia Liifai aayidaan: Kemuel aajapɔɔn Hasabia Aaronn aayidaan: Sadok Juda aayidaan: Ubɔr David aakpel ubaa Elihu Isakar aayidaan: Maikel aajapɔɔn Omri Sebulunn aayidaan: Obadia aajapɔɔn Ismaya Naftali aayidaan: Asriel aajapɔɔn Jeremof Efraim aayidaan: Asasia aajapɔɔn Hosea Manase ligeln li bi liwilir na aayidaan: Pedaya aajapɔɔn Joel Manase ligeln li bi liwipuul na aayidaan: Sekaria aajapɔɔn Ido Benjaminn aayidaan: Abner aajapɔɔn Jaasiel Dann aayidaan: Jeroham aajapɔɔn Asarel

²³ Uwumbɔr aah nan puu ke u ga cha Israel aanib li wiir ke iŋmabi i bi kitaapaak na aah wiir pu na, Ubɔr David aa nan kahn binib bi aabin aa fuu moninko na.

²⁴ Joab u aana nan ye Seruya na, nan piin ki bi kahn binib, tɔ, u mu aa nan kahn bi doo. Uwumbɔr nan daa Israel aanib aatafal binib aakahm mue pu, kina pu na, nkahm ngbaan aaŋmeen aa nan bi ubɔr David aatuln aagbann ni.

Nnaan aawangol aayidam

^25-31 Binib bi nan lik nnaan aawangol na aayimbil sɔ: Nnaan aajikaar ni tiwan niken aadir: Adiel aajapɔɔn Asmafef le nan ye uyidaan. Tijikaar ni tiwan niken aadir ti bi ntim ntim mu na ni: Usia aajapɔɔn Jonatann le nan ye uyidaan. Bikpaab: Kelub aajapɔɔn Esri le nan ye uyidaan. Ŋisubil aasar: Simei u nyan ni Rama aatiŋ ni na le nan ye uyidaan. Ŋisubil aadaan aabuu: Sabdi u nyan ni Sefam aatiŋ ni na le nan ye uyidaan. Olif ni ŋikakan aasui i bi liwilir wɔb aagongon ni na: Baal Hanann u nyan ni Geder aatiŋ ni na le nan ye uyidaan. Olif aakpan aakin: Joas le nan ye uyidaan. Inaa i nan bi Saronn aamoŋmɔpaan ni na: Sitrai u nyan ni Saronn aatiŋ ni na le nan ye uyidaan. Tifatann ponn ni aanaa: Adlai aajapɔɔn Safat le nan ye uyidaan. Laakumii tiib: Ismael yaab aanii Obil le nan ye uyidaan. Ibon: Jedeya u nyan ni Meronof aatiŋ ni na le nan ye uyidaan. Ipiih ni iŋoob: Hagar yaab aanii Jasis le nan ye uyidaan.

David aasusurb

³² Ubɔr David aaweeja Jonatann nan ye unii u kpa nlan ki ŋmaa sur binib sakpen ki bae mbaem na la. Uma ni Hakmoni aajapɔɔn Jehiel le nan ye ubɔr aajapɔtiib aamɔmɔkb.

³³ Ahitofel le nan ye ubɔr aasusur, le Husai u ye Ak aatiŋ aanii na ye ubɔr aajɔ ki mɔk u ni ŋan ke u ŋa na.

³⁴ Ahitofel aah kpo na, le Abiatar ni Benaya aajapɔɔn Jehoyada ŋa bisusurb. Joab le nan ye nnaan aajab aayidaan.