1 Bibɔrb Aabɔr 26 - Uwumbɔr aagbaŋ

Uwumbɔr Aadichal aakikiib

¹ Liifai yaab bi nan ye Uwumbɔr Aadichal aakikiib na aatuln aah nan ye pu na sɔ: Kora aataŋaal ponn ni aanii Kore aajapɔɔn Meselemia. Baadichadaan le nan ye Asaf.

² U nan ma mbijabim mulole la. Baah nan paa paa tɔb pu tininkpir ni pu na sɔ: Sekaria, ni Jediael, ni Sebadia, ni Jatniel,

³ ni Elam, ni Jehohanann, ni Eliehoenai.

⁴ Uken le nan ye Obed Edom, u Uwumbɔr nan ŋa tinyoor ŋa u pu ki tii u mbijabim muniin na. Baah nan paa paa tɔb pu tininkpir ni pu na sɔ: Semaya, ni Jehosabad, ni Joa, ni Sakar, ni Netanel,

⁵ ni Amiel, ni Isakar, ni Peuletai.

^6-7 Obed Edom aajapɔpol Semaya nan ma mbijabim muloob la. Baayimbil sɔ: Otni, ni Refael, ni Obed, ni Elsabad, ni Elihu, ni Semakia. Baah nan kpa nlan sakpen pu na, bi nan ye binikpaam le baataŋaal ni. Bilee bi gbiln puwɔb na ma aalan nan ti ki bi mubaa.

⁸ Obed Edom aadichal nan kpa bijab bi nyi lituln limina mbamɔm na bijab imonko itaa ni bilee la.

⁹ Meselemia aadichal ni aajab nan ye kipiik ni biniin le ki nyi lituln ngbaan mbamɔm.

¹⁰ Hosa, u ye Merari aataŋaal ni aanii na mu nan ye uken. U nan ma mbijabim munaa la. Baayimbil sɔ: Simri, tɔ, waa nan ye ute aajapɔpol le ute nan tee di u ŋa baasaloln,

¹¹ ni Hilkia, ni Tebalia, ni Sekaria. Hosa aadichal ponn ni aajab nan ti kpaan kipiik ni bitaa, le ki ye Uwumbɔr Aadichal ni aakikiib.

¹² Bi nan yakr Uwumbɔr Aadichal ni aakikiib ŋigetek, le ŋi ye ŋidichal ŋidichal, le ki tii bi ŋitun ke Liifai yaab biken na.

¹³ Lidichal mɔk nan too inaan le ki bee mbisamɔb mu ga li kiir na. Bitafal aa nan bi nwiwiir ni.

¹⁴ Selemia nan too inaan le ki gaa liwipuul wɔb aabisamɔb, le ujapɔɔn Sekaria, u nyi binib aasurm sakpen na too inaan ki gaa ŋŋangan wɔb aabisamɔb.

¹⁵ Obed Edom le nan yeh ŋŋangii wɔb aabisamɔb, le ujapɔtiib ye tijikaar aadir aakikiib.

¹⁶ Supim ni Hosa le nan kii liwilir wɔb ni mbisamɔb mu bi paacham aasan ni aan bi yin mu ke Salekef na. Bi nan kiir ki gaal tɔb la.

¹⁷ Bikikiib biloloob le nan kiir liwipuul wɔb iwiin mɔk, le binaa kiir ŋŋangan wɔb, le binaa mu kiir ŋŋangii wɔb. Bikikiib binaa le nan kii tijikaar aadir. Kidiik mɔk nan kpa bikikiib bilee nwiin mɔk la.

¹⁸ Bikikiib binaa le nan si duun ki kii liwilir wɔb aanambuŋ aasan, le bikikiib bilee kii kinambuŋ ngbaan kibaa.

¹⁹ Baah nan yakr lituln pu tii Kora ni Merari aataŋaal na le bi na.

Uwumbɔr Aadichal ni aatun ŋiken

²⁰ Biŋeen aatɔtiib Liifai yaab biken nan yeh ŋimombil ni tijikaar aadir ti bi joo ipiin i bi di tii Uwumbɔr na aatun.

²¹ Gesonn aajapɔɔn Ladann le nan ye ŋidichal aagetek pam aayaaja, ki di kpee ujapɔɔn Jehiel aadichal mu.

²² Ladann aajapɔtiib bilee bimina mu, Setam ni Joel, le nan yeh Uwumbɔr Aadichal ponn ni aamombil ni tijikaar aadir aatuln.

²³ Amram, ni Isar, ni Hebronn, ni Usiel aayaabitiib mu nan kpa baatun.

²⁴ Moses aayaabil Sebuel, u aate nan ye Gesom na le nan ye Uwumbɔr Aadichal ponn ni aamombil aatuln aaninkpekpaan.

²⁵ Gesom aanaal Elieser pu le u nan ye Selomif aado yoo. Elieser le ma Rehabia, le u mu ma Jesia, le Jesia mu ma Joram, le u mu ma Sikri, le Sikri mu ma Selomif.

²⁶ Selomif ni waadichal le nan ye bi lik ipiin i Ubɔr David, ni bidichadam, ni itaŋaal aagetek aasalolm, ni butɔb aajab aaninkpiib di tii Uwumbɔr na.

²⁷ Bi nan di baah gaa tiwan ni butɔb ponn ni na tii ke bi li joo tun Uwumbɔr Aadichal ponn ni aatun.

²⁸ Selomif ni waadichal le nan ye binib bi lik tiwan ni mɔmɔk bi di tii ke bi li joo tun Uwumbɔr Aadichal ponn ni aatuln na, ki di kpee ipiin i Uwumbɔr aabɔnabr Samuel, ni Ubɔr Sɔɔl, ni Ner aajapɔɔn Abner, ni Seruya aajapɔɔn Joab nan joo nan tii na pu.

Liifai yaab biken aatun

²⁹ Isar aayaabitiib ponn ni, Kenania ni ujapɔtiib le nan ye bi lik ŋitun mɔmɔk pu na; bima le nan ŋmee ŋitun ni tiwan ni mɔmɔk ŋani na aabɔr bilni, le ki toor Israel aanib aakaasisik ni tibɔr.

³⁰ Hebronn aayaabitiib ponn ni, Hasabia ni udo yaab lichur ni ikui ilole bi ye binikpaam na, le nan ye Uwumbɔr aasan aadiim Israel yaab bi bi Jɔɔdann Aamɔɔl aawilir wɔb na, ni baatun mɔmɔk aaninkpiib.

³¹ Jeria le nan ye Hebronn aayaabitiib ngbaan aasaloln. David aah nan ye ubɔr pu na aabin imonko ilee ni, le bi nan fiir ki lik Hebronn aayaabitiib aadichal ponn ni aabɔr, le ki kan ke bijakpaam bi ye waadichal ponn ni aanib na koo Jaser aatiŋ ki bi Gilead aapepel na ni.

³² Ubɔr David nan nyan binikpaam ŋichur ŋilee ni ikui ilole Jeria aadichadam ponn ni, le ki cha bi lik Israel aanib bi bi Jɔɔdann Aamɔɔl aawipuul wɔb na Aawumbɔr aasan aadiim, ni ŋitun mɔmɔk aayidam. Ŋipepel ngbaan le yeh Rubenn, ni Gad, ni Manase aageln li bi liwipuul wɔb na.