1 Bibɔrb Aabɔr 25 - Uwumbɔr aagbaŋ

Uwumbɔr Aadichal ponn ni aalahngaab ni biwangbaab aabɔr

¹ Ubɔr David ni Liifai yaab aasalolm le nan lee Liifai aataŋaal imina ke i li lolni nsan Uwumbɔr aadoon ni; bima le nan ye Asaf, ni Hemann, ni Jedutunn. Baatuln le nan ye ke bi moon Uwumbɔr aabɔr, ki gbaa tibar ki yakr ichayakrtuun. Binib bi bi nan lee ke bi li lolni nsan idoon ni na, ni baatuln aah ye pu na sɔ:

² Asaf aajapɔtiib binaa bimina; Sakur, ni Josef, ni Netania, ni Asarela. Bite Asaf le nan lolni bi pu nsan ki mooni Uwumbɔr aabɔr n‑yoonn mu ubɔr ti siin na.

³ Jedutunn aajapɔtiib biloob bimina; Gedalia, ni Seri, ni Jesaya, ni Simei, ni Hasabia, ni Matitia. Bite le nan lolni bi pu nsan le bi mooni Uwumbɔr aabɔr ki gbaa tibar, ki gaa ilahn, ki pak ki dooni Uwumbɔr.

⁴ Hemann aajapɔtiib kipiik ni binaa bimina; Bukia, ni Matania, ni Usiel, ni Sebuel, ni Jerimof, ni Hanania, ni Hanani, ni Eliata, ni Gidalti, ni Romamti‑Eser, ni Josbekasa, ni Maloti, ni Hotir, ni Mahasiof.

⁵ Uwumbɔr aah nan puu ke u ga cha waabɔnabr Hemann u joo waabɔr nabr ubɔr na kan mpɔɔn na, le u nan tii u mbijabim kipiik ni binaa mue ni mpiibim mutaa mu.

⁶ Bite le nan lolni mbijabim ngbaan pu nsan le bi mɔmɔk gbaa tibar ki yik ichayakrtuun ki dii Uwumbɔr Aadichal ponn ni aadoon. Ubɔr le nan tii Asaf, ni Jedutunn, ni Hemann baatun.

⁷ Bijab moninko ni binaa bee mɔmɔk nan ye binib bi nyi baatuln mbamɔn na la; le biŋeen aatɔtiib, Liifai yaab biken mu nan ye binib bi bae liwangbaal ni lilahngaal mbamɔm na. Bi nan ti kpaan bijab ikui ilee ni imonko inaa, ni biniin la.

⁸ Bi nan ti too inaan le ki kan baatun. Baa nan dii tininkpir ni nwanyim.

^9-31 Bijab ikui ilee ni imonko inaa ni biniin bimina nan yakr ki ti saa ŋidichal moninko ni ŋinaa la, ligetekr bee lidichal mɔk ponn ni nan ye bijab kipiik ni bilee la, le ligetekr mɔk kpa usaloln. Baah nan tun baatun ki paa tɔb pu pu na sɔ: 1. Josef u nyan ni Asaf aadichal ni na 2. Gedalia 3. Sakur 4. Seri 5. Netania 6. Bukia 7. Asarela 8. Jesaya 9. Matania 10. Simei 11. Usiel 12. Hasabia 13. Sebuel 14. Matitia 15. Jerimof 16. Hanania 17. Josbekasa 18. Hanani 19. Maloti 20. Eliata 21. Hotir 22. Gidalti 23. Mahasiof 24. Romamti‑Eser.