1 Bibɔrb Aabɔr 23 - Uwumbɔr aagbaŋ

¹ David aah nan ti por sakpen na, le u di ujapɔɔn Solomonn kaan Israel aabɔr.

Liifai Yaab aatuln aabɔr

² Ubɔr David nan kuun Israel aayidam mɔmɔk, ni bitotoorb, ni Liifai yaab mɔmɔk.

³ U nan kahn Liifai aajab bi ye ŋibin piitaa ni ipaar na mɔmɔk. Bi nan ti saa bijab ŋichur piitaa ni ŋiniin la.

⁴ Ubɔr David nan cha bi ponn ni ŋichur moninko ni ŋinaa le ye Uwumbɔr Aadichal ponn ni aatutum, le ŋichur ŋiloob ye bi ŋmee Uwumbɔr Aadichal ponn ni aatuln mɔmɔk aabɔr bilni, ki toor binib bi kpa kijaak na aabɔr,

⁵ le ŋichur ŋinaa mu ye bikikiib, ŋichur ŋinaa ŋi gur na le nan ye bi gaa ilahn ki gbaa tiwan ki pak Uwumbɔr na. Bi nan joo tiwangbaakaan ni ubɔr di tii bi na le tun kina aatuln.

⁶ David nan yakr Liifai yaab ngbaan nfum mutaa pu la. U nan yakr bi itaŋaal itaa imina pu la, ima le ye Gesonn, ni Kohaf, ni Merari aataŋaal.

⁷ Gesonn nan ma mbijabim mulee la. Bima le nan ye Ladann ni Simei.

⁸ Le Ladann mu nan ma mbijabim mutaa. Bima le nan ye Jehiel, ni Setam, ni Joel.

⁹ Bima le nan ye itaŋaal i ye Ladann aayaabitiib na aayidam. Simei nan ma mbijabim mutaa la, Selomof, ni Hasiel, ni Harann.

^10-11 Simei nan ma mbijabim munaa la. Baayimbil sɔ: Jahaf, ni Sina, ni Jeus, ni Beria. Bi nan paa paa tɔb pu tininkpir ni kina la. Jeus ni Beria aayaabitiib aah kaa nan wiir na, le bi nan di kpaan ki ye ntaŋaal mubaa.

¹² Kohaf nan ma mbijabim munaa la. Baayimbil sɔ: Amram, ni Isar, ni Hebronn, ni Usiel.

¹³ Ujapɔpol Amram le nan ma Aaronn ni Moses. Uwumbɔr le nan nyan Aaronn ni uyaabitiib ke bi li joo Uwumbɔr Aadichal ni aawan ni bi chain na, ki ti saa n‑yoonn mu kaa kpa ndoon na. Bima le nan ki joo tulalee aayon ŋani mmii ni, ki dooni Uwumbɔr, ki tun waatuln na. Bima le mee Uwumbɔr aanyoor ŋani binib pu waayimbil ni.

¹⁴ Uwumbɔr aanii Moses aajapɔtiib ma nan kpee Liifai yaab pu la.

¹⁵ Moses nan ma mbijabim mulee la. Bima le ye Gesom ni Elieser.

¹⁶ Sebuel le nan ye Gesom aajapɔtiib aasaloln.

¹⁷ Elieser ma nan ma ubijabo ubaa la. Bi nan yin u ke Rehabia la, le uma nan kpa yaabitiib sakpen.

¹⁸ Kohaf aajapɔɔn uleler, u bi yin u ke Isar na, nan ma Selomif la. Uma le nan ye baataŋaal aayidaan.

¹⁹ Kohaf aajapɔɔn utatar u bi nan yin u ke Hebronn na, nan ma mbijabim munaa la. Baayimbil sɔ: Jeria, ni Amaria, ni Jehasiel, ni Jekameam.

²⁰ Kohaf aajapɔɔn unanar u bi nan yin u ke Usiel na, nan ma mbijabim mulee: Maika, ni Isia.

²¹ Merari nan ma mbijabim mulee la. Bima le nan ye Mali, ni Musi. Mali mu nan ma mbijabim mulee la, Eleasar ni Kis,

²² le Eleasar ma nan kpo kaa kpa ubijabo. U nan ma mpiibim ŋmeen la. Ubisatiib nan mɔn bitewaa Kis aajapɔtiib la.

²³ Merari aajapɔɔn uleler u bi nan yin u ke Musi na, nan ma mbijabim mutaa la. Baayimbil sɔ: Mali, ni Eder, ni Jeremof.

²⁴ Liifai aayaabitiib, ni baataŋaal, ni ŋidichal sɔ: Bi nan ŋmee bi mɔmɔk aayimbil bil la. Uyaabil umɔk nan ye ŋibin moninko ni ipaar na nan kpa lituln Uwumbɔr Aadichal ni u tun.

²⁵ David nan bui ke, “Israel yaab Aadindaan Uwumbɔr tii waanib nsuudoon, le uma ubaa ga li koo Jerusalem ponn ni ki ti saa n‑yoonn mu kaa kpa ndoon na.

²⁶ Kina pu na, Liifai yaab aan ki li chuun tu Uwumbɔr Aabool, ni tiwan ni ti joo dooni u na.”

²⁷ Liifai aanii umɔk nan ti saa ŋibin moninko na nan ŋmee waayimbil ki kpa waatuln, David aakookoo aabɔr aah nan siin pu na la.

²⁸ Baah nan siin bi ŋitun ŋi na sɔ: libaa le nan ye ke bi li ter Aaronn aayaabitiib bi ye bitotoorb na, aan bi li tun Uwumbɔr aadoon aatuln, ki li toor Uwumbɔr Aadichal aachiln, ni tidir ni, ki li kii tiwan nimɔk bi chain na, tijɔŋ taa meeh ni,

²⁹ ki li yeh boroboro u bi joo tii Uwumbɔr na aatuln, ni n‑yon mu bi joo tii ipiin na, ni maab u bi ken u aan waa kpa boroboro aanyɔk na, ni ipiin i bi ken i na, ni n‑yon mu bi di olif aakpan buun mu na aatuln; ki li ŋaŋni Uwumbɔr Aadichal ni aapiin,

³⁰ ki li pak ki nyuŋni Uwumbɔr kichakpiik ni, ni kijook mɔk,

³¹ ni n‑yoonn mumɔk bi di ipiin see mmii ni tii Uwumbɔr, Likpaakool daal, ni Uŋmapɔɔn aajim daal, ni njim mu mɔmɔk gur na aayoonn na. Bi nan siin ikaal ki mɔk Liifai aanib aah ga li wiir pu ki tun lituln mɔk aabɔŋ n‑yoonn n‑yoonn na. Liifai yaab aatuln le nan ye ke bi li dooni Uwumbɔr n‑yoonn mɔmɔk.

³² Baatuln le nan ki ye ke bi li lik Uwumbɔr Aabool, ni Uwumbɔr Aadichal, ki li ter bido yaab bi ye Aaronn aayaabitiib ki ye bitotoorb, ki bi Uwumbɔr Aadichal aadoon ponn ni na.