1 Bibɔrb Aabɔr 22 - Uwumbɔr aagbaŋ

¹ Le David bui ke, “Tidindaan Uwumbɔr Aadichal aah ga sil nin chee na sɔ. Kitork aabimbiln li pu Israel aanib ga li joo baapiin seer mmii ni tii Uwumbɔr na sɔ.”

Baah gor pu ke bi maa Uwumbɔr Aadichal na

² Ubɔr David nan cha biwɔwɔm bi mɔmɔk bi kitiŋ ngbaan pu na kuun, le u tii bi lituln. Bi ponn ni bibaa le ga nan kpir ŋitakpal ŋi bi ga di ma Uwumbɔr Aadichal na.

³ U nan ban tikur ti bi ga di ŋa ikupiin ni ibuenŋmaankaan i bi ga di ŋmaan ibisamɔi aadɔ na mu pam, le ki ban tikumann ti wiir aan ubaa aan ŋmaa ŋaŋ taanyunyuun na mu.

⁴ U nan ban isan ke Taya ni Saidonn yaab li joo ni u santina aadɔja i li wiir.

⁵ David nan dakl ke, “Ni ŋan ke Uwumbɔr Aadichal li njapɔɔn Solomonn ga nan maa na li ŋan ki kpa liyimbil dulnyaa wee ni. Tɔ, u mu laa par, kaa kee kpa lituln aanimbiwoln, kina pu na, ni ŋan ke m gor isan siin u.” Kina pu na, David nan ban tiwan pam bil le ki nin kpo.

⁶ U nan tun yin ni ujapɔɔn Solomonn le ki nan bui u ke u maa Uwumbɔr Aadichal tii Israel yaab Aadindaan Uwumbɔr.

⁷ David nan bui u ke, “Maabo, m nan ban ke m maa Uwumbɔr Aadichal ki di nyuŋ Ndindaan Uwumbɔr la,

⁸ le Uwumbɔr nan bui mi ke m ku binib sakpen ki to butɔb mu sakpen. Kina pu na, maah ku binib bi mɔmɔk na pu, waan kii ke m maa lidichal tii u.

⁹ Tɔ, u nan tee puu tipuur tii mi. U nan bui mi ke, ‘Aa ga maa ubijabo u ga joo waanib nsuudoon ni na, ba pu? maan cha waadim muk u. Aa ga yin u ke Solomonn, ba pu? waanaan yoonn le m ga tii Israel yaab nsuudoon ni ŋŋmarm.

¹⁰ Uma le ga maa lidichal tii mi. U ga li ye maabo, le m mu ye ute. Waanaanjiliib ga li joo Israel yaab ki ti saa n‑yoonn mu kaa kpa ndoon na.’”

¹¹ David nan ki len ke, “Maabo, Tidindaan Uwumbɔr li bi aa chee, ki cha waah puu tipuur ti ke aa ga maa lidichal tii u na gbiin kina.

¹² Tidindaan Uwumbɔr tii si nlan ni mbaem mu aa ga di joo Israel aanib, waakaal aah mɔk pu na.

¹³ Aa yaa dii ikaal i mɔmɔk Uwumbɔr nan di tii Moses ke u di tii Israel yaab na kan, aa ga nyaŋ. Cha aanimbil li man ki li si chob, ki taa san nibaa ijawaan.

¹⁴ Uwumbɔr Aadichal ngbaan pu, m pɔɔn mbaa ki kan salmaa u aanyunyuun ga pii ndibim bɔtɔ ŋichur ŋiniin na, ki kan tikunabr ti mu aanyunyuun ga pii bɔtɔ ŋichur ikui iniin na, ke bi di maa li. Ki kpee nee pu na, tikumann ni tikur ti kaa kpa nkahm na mu bi. Ŋitakpal ni idɔ mu bi, tɔ, aa mu tee ga ban tiwan kpee ni pu.

¹⁵ Bitutum pam bi aa chee. Bijab bi, ki ga li kpir ŋitakpal, le bidimaab ni bikpikpiib mu bi, le ki kpee biwanŋab mɔmɔk aabɔŋ mu bi.

¹⁶ Binib bi nyi salmaa, ni tikunabr, ni tikumann, ni tikur aatuln na mɔmɔk bi. Piin lituln ngbaan, aan Uwumbɔr li bi aa chee.”

¹⁷ David nan bui Israel aayidam mɔmɔk ke bi ter Solomonn.

¹⁸ U nan bui ke, “Tidindaan Uwumbɔr bi ni chee le ki tii nimi nsuudoon ŋipepel mɔmɔk pu. U cha m nyaŋ binib bi mɔmɔk nan bi kitiŋ kee pu na, le bi kpaln nimi ni Uwumbɔr aatutum.

¹⁹ Kina pu na, li dii man Tidindaan Uwumbɔr ni nisui mɔmɔk. Piin man Uwumbɔr Aadichal aamaam, aan ki ŋmaa di Uwumbɔr Aakaal Aadakaa, ni tiwan ni mɔmɔk ye waadoon aawan ki bi chain na siin li ponn ni.”