1 Bibɔrb Aabɔr 21 - Uwumbɔr aagbaŋ

David aah nan kahn binib pu na

¹ Kinimbɔŋ nan ban tibɔr tii Israel yaab, kina le ki nan cha David ŋa nlandak ke u kahn waanib.

² David nan bui waajab aaninkpel Joab ni waaninkpiib biken ke, “Bɔ dii man Israel aatiŋ ni, ki nya kitiŋ ngbaan aapepel libaa mɔk ki ti saa liken mɔk ki kahn binib ngbaan.”

³ Le Joab gar u ke, “Uwumbɔr cha Israel aanib li wiir nfum nkub ki jer baah bi pu dandana wee na. Mpɔɔndaan, bi mɔmɔk ye saatutum la. Ba ŋa aa ban ke aa ŋa kina ki bii litimbomɔln ngbaan aabɔr?”

⁴ Tɔ, ubɔr nan yii ki cha Joab ŋa uma ubɔr aah siin pu na. Joab nan nyan nsan, ki bɔ dii Israel aatiŋ mɔmɔk pu, le ki gir ni Jerusalem ni.

⁵ U nan bui Ubɔr David bijab bi ŋeer bi buen butɔb na aah nan ti kpaan pu na. Israel aajab nan ye ŋichur lichur libaa ni ŋichur nkub la, le Juda yaab ye ŋichur ikui inaa ni imonko itaa, ni kipiik.

⁶ Joab aah kaa nan gee ubɔr aah siin pu na, waa nan kahn Liifai aanibol ni Benjaminn aanibol.

⁷ Uwumbɔr aasui aa nan piin lituln ngbaan pu, le u daa Israel yaab aatafal.

⁸ David nan bui Uwumbɔr ke, “M tun titunwanbir ti bir sakpen na, lituln li m tun na ponn ni. M gaŋ si, di cha pinn mi. M tun kijɔrk aatuln la.”

⁹ Le Uwumbɔr bui waabɔnabr Gad u nan bi David aayoonn na ke,

¹⁰ “Li cha ki ti bui David ke maah ga daa utafal pu na, m ga cha u lee ntafadaan mutaa ponn ni, ki ga ŋa u waah lee pu na.”

¹¹ Le Gad nan buen David chee ki ti bui u Uwumbɔr aah len pu na, le ki baa u ke, “Nilani aa gee?

¹² Aa ban nkon lir saatiŋ pu ŋibin ŋitaa, bee iŋmal itaa ponn ni nimi aadim aajab li san dii nimi, bee iwiin itaa ponn ni Uwumbɔr di waajaak aajuk tak nimi ki cha iween lir saatiŋ pu, ki cha waatuun di nkun lii ni Israel aatiŋ mɔmɔk pu? M ga ti bui Uwumbɔr ke ba?”

¹³ Le David gar Gad ke, “M bi limukl aayoonn ni le na. Tɔ, maa gee ke unibɔn daa ntafal. Uwumbɔr le ye unimbaasaln daan, cha uma le daa ntafal.”

¹⁴ Kina pu le Uwumbɔr cha iween lir Israel yaab pu, le bi ponn ni ŋichur imonko itaa ni kipiik kpo,

¹⁵ le ki tun waatuun ke mu ti bii Jerusalem, tɔ, u nan kpeln waalandak le ki bui ntuun ngbaan ke, “Sil nima. Ni ŋeer kina.” Uwumbɔr aatuun ngbaan nan ti si Jebus aatiŋ aanii Arauna aadipoipaal chee la.

¹⁶ David nan kan ntuun ngbaan gaar si libuln ni paacham, ki joo kijaak aajuk uŋaal ni ki gor ke u ti bii Jerusalem. Le David ni binib ngbaan aasalolm, bi mɔmɔk nan pee tiwanpeenkaan ni saak kuub na, gbaan le ki di binimbil chiŋ kitiŋ.

¹⁷ David nan mee limeel ke, “Uwumbɔr, min le tun taani. Min le bui ke bi kahn binib ngbaan. Bigiim bee mu ŋa ba? Ndindaan Uwumbɔr, daa m ni maadichal baanja aatafal, ki di cha saanib.”

¹⁸ Uwumbɔr aatuun nan bui Gad ke u ti cha David maa kitork aabimbiln tii Uwumbɔr, Arauna aadipoipaal pu.

¹⁹ David nan kii Uwumbɔr aah bui u pu na, le ki buen ti ŋa Gad aah nan tuk u pu na.

²⁰ Lidipoipaal pu nima, Arauna ni ujapɔtiib binaa nan bi poi idi, le baah kan Uwumbɔr aatuun ngbaan na, le ujapɔtiib ngbaan san ti bɔr.

²¹ Arauna aah kan Ubɔr David choo u chee na, le u siir lidipoipaal ngbaan pu ki tar lir kitiŋ, ki di unimbil chiŋ kitiŋ.

²² Le David bui u ke, “Di saapaal lee kooh tii mi, aan m maa kitork aabimbiln tii Uwumbɔr aan iween i bi ku binib na doo. M ga pa si saah ban aa kooh li pu na mɔmɔk.”

²³ Le Arauna bui u ke, “Mpɔɔndaan, m di li tii si ke aa di ŋa saah ban pu na. Aa ga ŋmaa di inaa imina see mmii ni, kitork aabimbiln ngbaan pu, ki di ŋidabil ŋimina tuur mmii. Idi mu sɔ, aa di tii ipiin. M di ni mɔmɔk tii si la.”

²⁴ Tɔ, ubɔr nan yii ki bui u ke, “Aayii, m ga pa si li pu la. Maan di tiwan ni ye saawan na tii Uwumbɔr. Maan di tiwan ni maa pan ni pu na toor kitork tii u,”

²⁵ le ki pan Arauna lidipoipaal ngbaan pu salmaa aakur aamombil ikui iloob.

²⁶ U nan maa kitork aabimbiln tii Uwumbɔr nima, ki toor kitork ki bi ga di see mmii ni na, ni kimɔbaan aatork mu. U nan mee Uwumbɔr, le Uwumbɔr nan kii waameel ngbaan ki cha mmii nyan ni paacham ki nan wun kitork ngbaan, libimbiln ngbaan paab.

²⁷ Uwumbɔr nan bui waatuun ngbaan ke u di waajuk ngbaan bil, le u kii ki ŋa kina.

²⁸ David aah kan nimina na le u bee ke Uwumbɔr kii waameel, le ki toor kitork, Arauna aadipoipaal pu aatork aabimbiln ngbaan pu.

²⁹ Uwumbɔr Aabool li Moses nan ŋa nteersakpiin ni na, ni kitork aabimbiln li pu bi nan see kitork mmii ni, ki dooni Uwumbɔr, Gibeonn aatiŋ ni na, nan beenin bi nima n‑yoonn mue,

³⁰ le David aah san Uwumbɔr aatuun aajuk na, waa nan ŋmaa chaa nima ti dooni Uwumbɔr.