1 Bibɔrb Aabɔr 20 - Uwumbɔr aagbaŋ

David aah nyaŋ ki gaa Raba aatiŋ pu na

¹ Unaalan u paa na yoonn, n‑yoonn mu bibɔrb to tɔb butɔb libiln mɔmɔk ni na, le Joab di waajab ti tak Amonn yaab; Ubɔr David ma nan gaar Jerusalem ni. Bi nan ti gob Raba aatiŋ ki tak, ki kuln ki.

² Amonn aatiŋ aabɔr nan kpa salmaa aabɔryikpupuk ki aanyunyuun nan ga pii ndibim libɔtɔgeln aanyunyuun na, le ki kpa litakpanyaan ki ponn ni. David nan nyan litakpanyaan ngbaan ki di tam ubaa aabɔryikpupuk pu. U nan ki yoor tiwan kitiŋ ngbaan ponn ni pam.

³ U nan cha kaanib joo tikur aakuu, ni nchɔkm, ni kpaacha tiib tun lituln. U nan ŋa Amonn aatim muken mɔmɔk aanib kina la. Le u ni waajab gir kun Jerusalem aatiŋ ni.

Israel yaab ni Filistia aawɔk na aatɔb

⁴ Puwɔb le butɔb nan ki fii Israel yaab ni Filistia yaab bi bi Geser ni na aakaasisik ni. Butɔb ngbaan ni le Sibekai u ye Husa aatiŋ aanii na nan ku liwɔkl li bi yin li ke Sipai na; bi nan nyaŋ Filistia yaab.

⁵ Butɔb buken nan ki fii Filistia yaab ni Israel yaab aakaasisik ni, le Jair aajapɔɔn Elhanann ku Goliaf u nyan ni Gaf na aanaal Lami, u aakpaatuŋ aakpaal filk ke ukpaluul aadɔ mu pu iŋmin paani na.

⁶ Kijaak kiken nan ki fii Gaf aatiŋ ni, le liwɔkl libaa nan bi nima chee ki kpa ŋŋanbim muloloob ni ntaŋanbim muloloob. U nan ye n‑yaayoonn na aawɔk aayaabil la.

⁷ U nan seei Israel yaab, le David aakpel Sama aajapɔɔn Jonatann ku u.

⁸ Ŋiwɔk ŋitaa ŋee nan ye Gaf aatiŋ aawɔk aayaabitiib la, le David ni waajab nan ku bi.