1 Bibɔrb Aabɔr 2 - Uwumbɔr aagbaŋ

Juda aayaabitiib aayimbil

¹ Jakob nan ma mbijabim kipiik ni bilee la. Baayimbil sɔ: Rubenn, ni Simeonn, ni Liifai, ni Juda, ni Isakar, ni Sebulunn,

² ni Dann, ni Josef, ni Benjaminn, ni Naftali, ni Gad, ni Aser.

³ Juda aajapɔtiib nan ye biŋmu la. U ni upuu Bafsua, u nan ye Kanaann aanii na, nan ma mbijabim mutaa la. Baayimbil le nan ye Er, ni Onann, ni Sela. Ujapɔpol Er nan tun titunwanbir sakpen, le Uwumbɔr ku u.

⁴ Juda nan ma ujapɔɔn aapuu Tamar chee mbijabim mulee kpee. Bima le nan ye Peres ni Sera.

⁵ Peres nan ma mbijabim mulee, le ki yin bi ke Hesronn ni Hamul.

⁶ Unaal Sera ma nan ma mbijabim muŋmu la. Baayimbil le nan ye Simri, ni Etann, ni Hemann, ni Kalkol, ni Darda.

⁷ Kami aajapɔɔn Akann, u ye Sera aayaabitiib ni ubaa na, nan di tiwan ni bi gaa butɔb ni ki ga di tii Uwumbɔr na ŋa ubaa aawan, le ki joo ni tibɔbir nan lii Israel yaab pu.

⁸ Etann nan ma ubijabo ubaa, le ki yin u ke Asaria.

Ubɔr David aamaal

⁹ Hesronn nan ma mbijabim mutaa la. Baayimbil le nan ye Jerameel, ni Ram, ni Kaleb.

¹⁰ Mmaal ngbaan ki nyan Ram mɔk ki ti saa Jese mɔk na aayimbil sɔ: Ram, ni Aminadab, ni Nasonn, (Nasonn nan ye Juda aanibol ni aanikpaan ubaa la,)

¹¹ ni Salmonn, ni Boas,

¹² ni Obed, ni Jese.

¹³ Jese nan ma mbijabim mulole la. Baah nan paa paa tɔb pu na sɔ: Eliab, ni Abinadab, ni Sama,

¹⁴ ni Netanel, ni Radai,

¹⁵ ni Osem, ni David.

¹⁶ U nan ki ma mpiibim mulee mu. Baayimbil le nan ye Seruya, ni Abigail. Jese aabisal Seruya nan ma mbijabim mutaa la. Bima le nan ye Abisai, ni Joab, ni Asahel.

¹⁷ Ubisal Abigail na nan mɔn Jeter, u aayaaja nan ye Ismael na, le bi ma bijapɔɔn Amasa.

Hesronn aayaabitiib aayimbil

¹⁸ Hesronn aajapɔɔn Kaleb nan yoor Asuba le ki ma upiibo ki yin u ke Jeriof. U nan ma mbijabim mutaa la. Baayimbil le nan ye Jeser, ni Sobab, ni Aadonn.

¹⁹ Asuba aakun aapuwɔb, le Kaleb yoor Efraf, le bi ma ubijabo ki yin u ke Hur.

²⁰ Hur le nan ma Uri, le Uri mu ma Besalel.

²¹ Hesronn aah nan ti saa ŋibin imonko itaa na, le u yoor Makir aabisal, u aaninja nan ye Gilead na. Bi nan ma ubijabo, le ki yin u ke Segub.

²² Le Segub mu ma ubijabo ki yin u ke Jair. Jair nan joo Gilead aapepel aatim moninko ni mutaa la.

²³ Le Gesur ni Aram aanaan nan nyaŋ ntim imonko itaa nima, le Jair ni Kenaf aatim ni ntim mu bi duun nima na nan ŋmal mu ni. Binib bi mɔmɔk nan koo nima chee na nan ye Gilead aate Makir aayaabitiib la.

²⁴ Hesronn aah kpo na, le ujapɔɔn Kaleb di waakpopii Efraf di kpan. Bi nan ma ubijabo le ki yin u ke Asur. Uma le nan naan Tekoa aatiŋ.

Jerameel aayaabitiib aayimbil

²⁵ Hesronn aajapɔpol Jerameel nan ma mbijabim muŋmu la. Baayimbil sɔ: Ram le nan ye upol, le Buna paa u pu, le Orenn, ni Osem, ni Ahija paa bi pu.

^26-27 Ram nan ma mbijabim mutaa la. Maas le nan ye upol, le Jaminn ni Eker paa u pu. Jerameel nan ki kpa upii uken. Bi nan yin u ke Atara, le u ni u ma ubijabo, le ki yin u ke Onam.

²⁸ Onam nan ma mbijabim mulee la. Ubaa le nan ye Samai, le uken ye Jada. Samai mu nan ma mbijabim mulee la, Nadab ni Abisur.

²⁹ Abisur aah nan yoor upii u na aayimbil le nan ye Abihail, le u ni u ma mbijabim mulee, ki yin bi ke Abann ni Molid.

³⁰ Abisur aanaal Nadab nan ma mbijabim mulee la. Seled le nan ye upol, le Apaim paa. Tɔ, Seled ma nan kpo, kaa kpa ubo.

³¹ Apaim le nan ma Isi, le u mu ma Sesann, le Sesann mu ma Alai.

³² Samai aanaal Jada nan ma mbijabim mulee la, Jeter ni Jonatann, le Jeter nan kpo, kaa kpa ubo.

³³ Jonatann nan ma mbijabim mulee la. Ubaa le nan ye Pelef, le uken ye Sasa. Bimina mɔmɔk nan ye Jerameel aayaabitiib la.

³⁴ Sesann aa nan kpa mbijabim, u nan ma mpiibim ŋmeen la. U nan kpa unaagbiija u nyan ni Ijipt aatiŋ ni aan bi yin u ke Jara na.

³⁵ U nan di ubisal ubaa tii u. Bi nan ma ubijabo le ki yin u ke Atai;

³⁶ ki nyan Atai mɔk ki ti saa Elisama mɔk na mmaal ngbaan sɔ: Atai, ni Natann, ni Sabad,

³⁷ ni Eflal, ni Obed,

³⁸ ni Jehu, ni Asaria,

³⁹ ni Heles, ni Eleasa,

⁴⁰ ni Sismai, ni Salum,

⁴¹ ni Jekamia, ni Elisama.

Kaleb aayaabitiib biken aayimbil

⁴² Kaleb aajapɔpol Jerameel aanaal aayimbil le nan ye Mesa. Mesa le nan ma Sif, le Sif mu ma Maresa. Le u mu ma Hebronn.

⁴³ Hebronn le nan ma Kora, ni Tapua, ni Rekem, ni Sema. Bi nan ye mbijabim munaa la.

⁴⁴ Sema le nan ma Raham, le Raham mu ma Jokeam. Sema aakpel Rekem le nan ma Samai,

⁴⁵ le u mu ma Maonn. Le Maonn mu ma Bef Sur.

⁴⁶ Kaleb nan kpa unaagbiipii ubaa. Bi nan yin u ke Efa la. U ni u nan ma mbijabim bitaa la. Baayimbil le nan ye Harann, ni Mosa, ni Gases. Harann mu nan ma ubijabo ki yin u ke Gases.

⁴⁷ Uja u bi nan yin u ke Jadai na mu nan ma mbijabim muloob. Baayimbil le ye Regem, ni Jotam, ni Gesann, ni Pelet, ni Efa, ni Saaf.

⁴⁸ Kaleb nan ki kpa unaagbiipii uken, le bi yin u ke Maaka. U nan ma u chee mbijabim mulee la. Bima le ye Seber ni Tirana.

⁴⁹ U nan ki ma mbijabim mulee kpee. Ubaa le ye Saaf, u nan naan Madmana aatiŋ na; uken le nan ye Sefa u mu nan naan Makbena ni Gibea aatim na. Kaleb nan ki kpa bisal ubaa mu kpee, le bi yin u ke Aksa.

⁵⁰ Bi mɔmɔk nan ye Kaleb aayaabitiib la. Hur le nan ye Kaleb ni upuu Efraf aajapɔpol. Hur aajapɔɔn Sobal le nan naan Kiriaf Jearim aatiŋ,

⁵¹ le ujapɔɔn Salma, u paa na, nan naan Betlehem aatiŋ. Le utatar, u bi nan yin u ke Haref na, mu naan Bef Gader aatiŋ.

⁵² Sobal, u nan naan Kiriaf Jearim aatiŋ na, le nan ye Haroe aanib, ni Menuhof aanib ligeln,

⁵³ ni imaal i nan koo Kiriaf Jearim ni ki ye Ifer yaab, ni Puf yaab, ni Sumaf yaab, ni Misra yaab na aayaaja. (Sora ni Estaol aatim aanib mu nan nyan ni imaal imina ni la.)

⁵⁴ Salma, u nan naan Betlehem aatiŋ na, le nan ye Netofaf aanib, ni Atrof Bef Joab, ni Sor aanib aayaaja. Sor aanib nan ye Manahaf aatiŋ aataŋaal ilee na ponn ni mubaa la.

⁵⁵ Imaal imina, Tiraf, ni Simeaf, ni Sukaf yaab, bi nan koo Jabes aatiŋ ni na, nan ye biwanyib bi ŋmaa ŋmee ki ki lik binib aaŋmeen ki ŋmee ŋani tigbann ni na la. Bi nan ye Kenn yaab la, le ki yoor Rekab aapiib.