1 Bibɔrb Aabɔr 18 - Uwumbɔr aagbaŋ

David aah nyaŋni butɔb ponn ni pu na

¹ Naah ŋa iwiin ilee na, le David ki buen ti tak Filistia yaab, ki nyaŋ bi. U nan gaa Gaf aatiŋ, ni ntimbim mu bi ki mann goln ki na bi chee.

² U nan nyaŋ Moab yaab mu, le bi kpaln waanaagbiib ki pa lampoo tii u.

³ U nan nyaŋ Siria aatiŋ ki bi yin ki ke Soba aan ki bi gbɔk Hamaf aapepel na; ba pu? kaabɔr Hadadeser nan bi pɔɔni ubaa ke u gaa lipepel li bi Yufrates aapaacham na la.

⁴ David nan chur waataan ni yaatɔroku tiib lichur, ni waajab bi dik itaan pu na ŋichur ŋilole, ni waajab bi chuun kitiŋ na ŋichur moninko. U nan nyan itaan i ga ŋeer itaan aatɔroku tiib nkub na, le ki gaa kpar i gur na aataachur.

⁵ Siria yaab bi bi Damaskus aatiŋ ni na aah nan tun bijab ke bi ti ter Ubɔr Hadadeser na, le David ti tak bi ki ku baajab ŋichur moninko ni ŋilee,

⁶ le ki kaan kaan butɔb aajab baatim ni, le bi kpaln waatutum ki pa lampoo tii u. Uwumbɔr nan tii David linyaŋ, ni kookoo.

⁷ David nan gaa Hadadeser aajab aaninkpiib aah nan joo salmaa aajaak aapen ŋi na, ki di buen Jerusalem.

⁸ U nan ki yoor tikumann mu pam, Hadadeser aatim mu bi yin mu ke Tibhaf ni Kunn na ponn ni. Puwɔb na, Solomonn nan di tikumann ngbaan le ŋa nkin ni jaatɔlk tiib na, ni tikumann aasambil siin Uwumbɔr Aadichal ni.

⁹ Hamaf aatiŋ aabɔr, u bi yin u ke Toi na nan ŋun ke David nyaŋ Hadadeser aajab mɔmɔk.

¹⁰ Kina pu le u nan tun ujapɔɔn Joram ke u ti doon ki pak Ubɔr David waah nyaŋ Hadadeser, u ni uma Toi faa tɔb butɔb sakpen na pu. Joram nan joo salmaa, ni tikunabr, ni tikumann aapiin ti tii David.

¹¹ Ubɔr David nan di ipiin ngbaan, ni tikunabr ni salmaa u u nan gaa Edom, ni Moab, ni Amonn, ni Filistia, ni Amalek yaab chee na, tii Uwumbɔr.

¹² Abisai, u aana nan ye Seruya na nan ti nyaŋ Edom yaab ki ku baajab ŋichur kipiik ni ŋiniin, kifataŋ ki bi yin ki ke N‑yaan Aafataŋ na ni.

¹³ U nan kaan kaan butɔb aajab Edom aatim mɔmɔk ni, le Edom yaab kpaln Ubɔr David aatutum. Uwumbɔr nan tii David linyaŋ, ni kookoo.

¹⁴ David nan joo Israel aanib mɔmɔk le ki nan ŋani waanib mɔmɔk mbamɔm.

¹⁵ Abisai aanaal Joab le nan ye David aajab aaninkpel, le Ahilud aajapɔɔn Jehosafat nan ye ugbaŋmeer,

¹⁶ le Ahitub aajapɔɔn Sadok, ni Abiatar aajapɔɔn Abimelek nan ye bitotoorb, le Safsa nan ye nnaan ngbaan aagbaŋmeer;

¹⁷ le Jehoyada aajapɔɔn Benaya nan ye bijab bi kii David na aaninkpel, le Ubɔr David aajapɔtiib nan ye bininkpiib, waatuln ni.