1 Bibɔrb Aabɔr 17 - Uwumbɔr aagbaŋ

Uwumbɔr aabɔnabr Natann aah nan tuk David pu na

¹ Ubɔr David nan gur kaa waabɔrdichal ni la. Daalbaadaal le u nan tun ti yin ni Uwumbɔr aabɔnabr Natann ki nan bui u ke, “Min le ka do, lidichal li bi di santina aadɔ maa li na ponn ni na, le Uwumbɔr Aakaal Aadakaa tee bi igban aabool ponn ni.”

² Le Natann gar u ke, “Ŋa saah dak pu na; ba pu? Uwumbɔr bi aa chee.”

³ Kinyeek ngbaan le Uwumbɔr bui Natann ke,

⁴ “Buen ti tuk maatutunn David ke m bui u ke, ‘Naa ye sin le ga maa lidichal tii mi ke m li koo li ponn ni.

⁵ Ki nyan nwiin mundaal m nyan ni Israel yaab Ijipt aatiŋ ni ki nan saa din wee na, maa kee koo lidichal ponn ni, m chuun kpak ki gonni ki bi igban aabool ni la.

⁶ Maasachun mɔmɔk Israel aanib ponn ni, maa kee baa biyidam bi m lee bi na ponn ni ubaa ke ba ŋa baa di santina aadɔ maa lidichal tii mi.’

⁷ “Kina pu na, bui maatutunn David ke min, Uwumbɔr Mpɔɔnsakpiindaan le bui u ke, ‘Aa nan ye upihdaan le ki lik ipiih timoor ni, le m lee si ki di si ŋa maanib Israel yaab aajojoor.

⁸ Nin chee mɔk aa buen na, m dii si, le ki nyaŋ saadim mɔmɔk buyoonn aa cha bi chee na. M ga tii si liyimbil sakpeln ke dulnyaa wee aayidam na.

^9-10 Min le lee nin chee maanib Israel yaab ga kal aan ubaa taa ki muk bi na, le ki di bi kaan nima. Ki nyan bundaal bi koo ni kitiŋ kee pu na, binib bi bir na tak bi, le kina ngbaan aan ki ŋa. M puu ke m ga nyaŋ saadim mɔmɔk ki ga tii si yaabitiib.

¹¹ Aa yaa nan kpo aan bi sub si aayaajatiib chee kan, le m ga ŋa aajapɔɔn ubaa ubɔr, ki cha waanaan li pɔɔ.

¹² Uma le ga nan maa lidichal tii mi, le m ga kan ke waanaanjiliib aan doo.

¹³ Min le ga li ye ute, le u li ye maabo. Maan tee nyan maaterm u chee ke maah nyan maaterm Sɔɔl chee pu na. M nan nyan uma Sɔɔl nnaan ni ke aa ji nnaan ngbaan.

¹⁴ M ga cha saabo ngbaan li ye maanib ni maanaan aajojoor, ki ti saa n‑yoonn mu kaa kpa ndoon na. Waanaanjiliib ga li bi n‑yoonn mɔmɔk.’”

¹⁵ Natann nan bui David tibɔr timɔk Uwumbɔr kpiir mɔk u na.

David aah doon Uwumbɔr pu na

¹⁶ Ubɔr David nan buen Uwumbɔr aanimbiin ni, igban Aabool ngbaan ni, ki ti kal ki mee ke, “Ndindaan Uwumbɔr, m ni maadichal aa ŋeer saah puen ŋa tiwan ni tii mi na,

¹⁷ Ndindaan Uwumbɔr, le aa ki bi ŋani mi ni jer kina na, aa puu tipuur n‑yaabitiib bi baa kee ma bi na pu, le ki kpaan bi ŋani mi ke unikpaan ubaa na.

¹⁸ M ga ki ŋmaa len kinye aa pu. Aa nyi mi mbamɔm, le ki nyuŋ mi saatutunn.

¹⁹ Ni nan ye saageehn ni saah ban pu na le aa ŋa kina tii mi, le ki di maayoonn mu choo na aapɔɔn mɔk mi.

²⁰ Uwumbɔr, ubaa aa bi ke sin na, ti puun nyi n‑yoonn mɔmɔk ke sin baanja le ye Uwumbɔr.

²¹ Litimbol libaa aa ki bi kitiŋ kee pu ke Israel aatimbol li aa nyan li tinaagbiir ni, ki di li ŋa aabaa aanib na. Saah tun lijinjiir ni litusakpeln li tii bi na cha saayimbil yaa koo dulnyaa wee mɔmɔk ni. Saanib bi aa nyan ni bi Ijipt ni ke bi nan li ye saanib na, yaa paan cha kan, le aa jenn ŋitimbol ŋiken.

²² Aa di Israel yaab ŋa saanib n‑yoonn mɔmɔk, le sin Uwumbɔr ŋa Bidindaan.

²³ “Uwumbɔr, cha saah puu tipuur ti m ni n‑yaabitiib pu na gbiin kina n‑yoonn mɔmɔk, ki ŋa saah bui ke aa ga ŋa pu na.

²⁴ Saayimbil ga nyaŋ, le binib ga li len n‑yoonn mɔmɔk ke, ‘Uwumbɔr Mpɔɔnsakpiindaan le ye Uwumbɔr u lik Israel pu na.’ Le aa ga cha maanib bi ji nnaan na li bi n‑yoonn mɔmɔk.

²⁵ Maawumbɔr, naah ŋa pu aan m kpa lipobil ke m mee si limeel limina na le ye ke sin le kpiir nimina mɔmɔk mɔk mi saatutunn, le ki bui mi ke n‑yaabitiib ga li ye bibɔrb la.

²⁶ Sin Uwumbɔr le ye Ndindaan, le ki puu iwaan aapuur tee tii mi.

²⁷ M mee si ke aa biin n‑yaabitiib pu aan bi ji saah lik ki faar bi pu na aamɔɔn. Sin Uwumbɔr le biin bi pu, le saanyoor ga li bi bi pu ki ti saa n‑yoonn mu kaa kpa ndoon na.”