1 Bibɔrb Aabɔr 16 - Uwumbɔr aagbaŋ

¹ Bi nan di Uwumbɔr Aakaal Aadakaa ngbaan ti siin libool li ponn ni David nan ŋa siin na. Bi nan toor kitork ni kimɔbaan aatork tii Uwumbɔr.

² David aah nan toor kitork ngbaan doo na, le u mee tinyoor ŋa binib ngbaan pu Uwumbɔr aayimbil pu,

³ le ki yakr tijikaar tii bi mɔmɔk. U nan tii Israel aaja ni upii mɔmɔk liboroboro kpiln, ni linankpiln, ni ŋisubikuun.

⁴ David nan nyan Liifai yaab bibaa ke bi li gaa ilahn ki pak Israel yaab Aadindaan Uwumbɔr, Nkaal Aadakaa ngbaan aanimbiin ni, waadoon yoonn.

⁵ U nan lee Asaf le u li ye usaloln, le Sekaria paa u pu. Jeyel, ni Semiramof, ni Jehiel, ni Matitia, ni Eliab, ni Benaya, ni Obed Edom, ni Jeyel le nan gbaa tibar. Le Asaf yak ichayakrtuun,

⁶ le bitotoorb bilee bimina, Benaya ni Jahasiel pii kakaan tiib iwiin mɔmɔk Uwumbɔr Aakaal Aadakaa aanimbiin ni.

⁷ N‑yoonn ngbaan le David nan puen tii Asaf ni udo yaab Liifai yaab biken lituln, ke bi li gaa ilahn ki pak Uwumbɔr.

Kipak Aalahn

⁸ Di idoon tii Uwumbɔr, moon waah kpa mpɔɔn pu na man; bui ŋitimbol waah tun ŋitun ŋi na man.

⁹ Gaa ilahn ki pak Uwumbɔr man, ki tuk binib waah tun ŋitukpaan ŋi na.

¹⁰ Taah ye waanib pu na, cha tisui li piin man. Cha binib bimɔk dooni u na li kpa mpopiin.

¹¹ Li cha Uwumbɔr chee ki ti ban nterm man, ki li dooni u n‑yoonn mɔmɔk.

^12-13 Nimi waatutum Jakob aayaabitiib, nimi Israel aayaabitiib, bi Uwumbɔr lee bi na, teer Uwumbɔr aah tun lijinjiir aatun ŋi na, ni waah nan jin binib tibɔr pu na man.

¹⁴ Uwumbɔr le ye Tidindaan, waakaal ye dulnyaa wee mɔmɔk aakaal la.

¹⁵ Taa suln Uwumbɔr aah puu tipuur ti aan taa kpa ndoon na bɔr,

¹⁶ U nan puu ti tii Abraham le ki puu tii Aisak mu.

¹⁷ Uwumbɔr puu tipuur ti kaa kpa ndoon na tii Jakob.

¹⁸ U bui ke, “M ga di Kanaann aatiŋ tii si. Ki ga li ye saawan la.”

¹⁹ Uwumbɔr aanib aa nan wiir, le ki ye biwɔwɔm Kanaann aatiŋ ni.

²⁰ Bi nan chuun yiini ki ti nya kitiŋ kee ni, ki ti saa kee ni, ki nya nnaan mue ni, ki ti saa mue ni.

²¹ Uwumbɔr aa nan cha ubaa muk bi; waah nan ban ke u li kii bi pu na, le u nan sak bibɔrb ke:

²² “Taa tii maatutum titotonn man; taa meeh maabɔnabtiib man.”

²³ Dulnyaa wee mɔmɔk, gaa ilahn tii Uwumbɔr. Iwiin mɔmɔk kan, ni li mooni waah gaa timi lii pu na aabɔnyaan.

²⁴ Moon waah kpa kipak pu na ki tuk ŋitimbol, ki moon waah tun ŋitukpaan pu na tuk binib mɔmɔk.

²⁵ Uwumbɔr aapɔɔn nyaŋ sakpen, le ni ŋan ke ti pak u sakpen; ti ga nyuŋ u ki taa ki nyuŋ ŋiwaa ma.

²⁶ Ŋitimbol ŋiken na mɔmɔk aawaa po ye tiwan ni bi naan ni na la, Uwumbɔr le naan paacham.

²⁷ Kipak ni nnaan aapɔɔn le mann goln u; le mpɔɔn ni mpopiin gbii Waadichal ni.

²⁸ Kitiŋ kee aanib mɔmɔk, li pak Uwumbɔr man; pak man waapɔɔn, ni waah kpa kinyuŋ sakpen pu na.

²⁹ Pak Uwumbɔr aayimbil li kpa kinyuŋ na man; li joo ni ipiin ki di dan waadichal ponn ni man. Uwumbɔr u aabimbin bi chain na yaa choo kan, ni gbaan unimbiin ni.

³⁰ Kitiŋ kee mɔmɔk, li jii unimbiin ni. Kitiŋ si kaabuul ni chob, kaan ŋmaa foor daalbaadaal.

³¹ Kitiŋ ni kitaapaak, li mɔɔni man. Tuk ŋitimbol mɔmɔk ke Uwumbɔr le ye ubɔr.

³² Nnyusakpem, ni tiwanfuurkaan nimɔk bi aa ponn ni na, faa kifuuk man; ikpaakon, ni tiwan nimɔk bi i ponn ni na, li mɔɔni man.

³³ Uwumbɔr yaa nan dan ke u nan joo kitiŋ kan, isui i bi kichook ni na ga di mpopiin teen mpɔɔn pu.

³⁴ Doon Uwumbɔr man, ba pu? u kpa tiŋann; waageehm aa kpa ndoon.

³⁵ Ni bui u ke, “Uwumbɔr, timi Aaŋmaŋmardaan, gaa timi lii; kuun timi nan kpaan, ki nyan ni timi ŋitimbol ni, aan ti ga li kpa idoon ki pak saayimbil li bi chain na.”

³⁶ Pak Israel yaab Aadindaan Uwumbɔr man. Li pak u man dandana, ni n‑yoonn mu kaa kpa ndoon na. Le binib mɔmɔk bui ke, “Amii,” le ki pak Uwumbɔr.

Jerusalem ni Gibeonn yaab aah dooni Uwumbɔr pu na

³⁷ Ubɔr David nan di Asaf ni udo yaab Liifai yaab biken le siin ke bi li yeh Uwumbɔr aadoon aatuln, Nkaal Aadakaa aah si nin chee na. Bima le nan ye binib bi tun lituln nima chee iwiin mɔmɔk na.

³⁸ Jedutunn aajapɔɔn Obed Edom, ni waataŋaal pu yaab bijab imonko itaa ni biniin le nan ter bi. Hosa ni Obed Edom le nan ye binib bi kiir ibisamɔi na.

³⁹ Utotoor Sadok ni utotoor ŋeen aatɔtiib le nan tee ye bi lik Uwumbɔr aadoon pu, baah dooni u nin chee Gibeonn aatiŋ ni na.

⁴⁰ Kichakpiik ni, ni kijook mɔk, see bi di kitormɔŋ see mmii ni, kitork aabimbiln paab, ki dii Uwumbɔr aah nan di ikaal i tii Israel yaab na aah nan ŋmee pu na.

⁴¹ Hemann ni Jedutunn, ni baah nan lee bi ke bi li gaa ilahn pak Uwumbɔr, waageehm mu kaa kpa ndoon na pu na, mu nan bi nima ki kpee bi pu.

⁴² Hemann ni Jedutunn le nan ye bi pii kakaan tiib, ki yak ichayakrtuun ni tiwangbaakaan niken na, n‑yoonn mu bi gaa kipak aalahn na. Jedutunn aataŋaal pu yaab le nan ye bi kiir ibisamɔi na.

⁴³ Nee aapuwɔb, le binib mɔmɔk kun, le David mu gir kun ke u ti mee Uwumbɔr aanyoor waadichal pu.