1 Bibɔrb Aabɔr 15 - Uwumbɔr aagbaŋ

David aah nan gor ke u ti yoor Uwumbɔr Aakaal Aadakaa pu na

¹ David nan maa ubaa aadichal baah yin nin chee ke David Aatiŋ na. U nan ki toor nin chee Uwumbɔr Aakaal Aadakaa ga li si na, le ki ŋa libool ke u di u siin li ponn ni,

² le ki bui ke, “Liifai yaab baanja le ga tun Uwumbɔr Aakaal Aadakaa ngbaan, bima le Uwumbɔr nan lee ke bi li tui ki tun waatuln ki ti saa n‑yoonn mu kaa kpa ndoon na.”

³ David nan kuun Israel aanib mɔmɔk dan Jerusalem ni, ke bi ti yoor Uwumbɔr Aakaal Aadakaa kunn ni udo.

⁴ U nan ki tun yin ni Aaronn aayaabitiib ni Liifai yaab.

⁵ Liifai yoo, Kohaf aataŋaal pu, Uriel le nan dan ki joo ni udo yaab binib nkub ni moninko,

⁶ le Asaya nyan ni Merari aataŋaal ni ki joo ni binib ikui ilee ni moninko;

⁷ le Joel nyan ni Gesonn aataŋaal ni ki joo ni binib nkub ni piitaa;

⁸ le Semaya nyan ni Elisafann aataŋaal ni ki joo ni binib ikui ilee,

⁹ le Eliel nyan ni Hebronn aataŋaal ni ki joo ni binib imonko inaa,

¹⁰ le Aminadab nyan ni Usiel aataŋaal ni ki joo ni binib nkub ni kipiik ni bilee.

¹¹ David nan yin ni bitotoorb Sadok ni Abiatar, ni Liifai yaab biloob bimina: Uriel, ni Asaya, ni Joel, ni Semaya, ni Eliel, ni Aminadab.

¹² U nan bui Liifai yaab ngbaan ke, “Nimi le ye Liifai aataŋaal aasalolm. Toor nibaa ni niŋeen aatɔtiib Liifai yaab biken, aan ki ŋmaa yoor Israel yaab Aadindaan Uwumbɔr Aakaal Aadakaa nan siin maah toor libuul li tii u na.

¹³ Naah kaa nan bi ki tun u njan na, le Tidindaan Uwumbɔr nan daa titafal, taah kaa nan dooni u waah ban pu na pu.”

¹⁴ Le bitotoorb ni Liifai yaab ngbaan toor bibaa ke bi ti yoor Israel yaab Aadindaan Uwumbɔr Aakaal Aadakaa.

¹⁵ Liifai yaab ngbaan nan tun u idɔ pu, bibɔgbin pu, ke Uwumbɔr aah nan mɔk Moses pu na.

¹⁶ David nan tuk Liifai yaab aasalolm ke bi yakr Liifai yaab biken ki cha bi li gaa ilahn i mɔ na, ki gbaa tibar, ki yak ichayakrtuun.

^17-21 Bi nan nyan bilahngaab aataŋaal ni, binib bimina le ke bi li yak tikumann aachayakrtuun: Joel aajapɔɔn Hemann, ni udo yoo Berekia aajapɔɔn Asaf, ni Kusaya, u nyan ni Merari aataŋaal pu na aajapɔɔn Etann. Bi nan lee Liifai yaab bimina le ke bi li gbaa tibar ti aaneel pɔɔ na ki ter bi. Bima le ye Sekaria, ni Jaasiel, ni Semiramof, ni Jehiel, ni Uni, ni Eliab, ni Maaseya, ni Benaya. Baah nan lee bi mu ke bi li gbaa tibar ti aaneel diin na sɔ: Matitia, ni Elifelehu, ni Mikneya, ni Asasia, ni Uwumbɔr Aadichal aakikiib ponn ni bilee, Obed Edom ni Jeyel.

²² Kenania aah nan nyi liwangbaal ni lilahngaal aabɔr mbamɔm na, uma le bi nan di ŋa Liifai aawangbaab ni bilahngaab aaninkpel.

^23-24 Bi nan nyan Berekia ni Elkana, ki di kpee Obed Edom ni Jehia pu, le bi kii Uwumbɔr Aakaal Aadakaa. Bitotoorb bi bi nan lee ke bi li pii ikpiin Uwumbɔr Aakaal Aadakaa aanimbiin ni na sɔ: Sebania, ni Josafat, ni Netanel, ni Amasai, ni Sekaria, ni Benaya, ni Elieser.

Baah yoor Uwumbɔr Aakaal Aadakaa buen Jerusalem ponn ni pu na

²⁵ Ubɔr David, ni Israel yaab aasalolm, ni butɔb aajab aayidam le nan buen Obed Edom aadichal ni, bi ti yoor Uwumbɔr Aakaal Aadakaa, le ki nan toor kitork sakpeŋ nima.

²⁶ Bi nan kɔr inaaja ilole, ni ipiih ilole, Uwumbɔr aah ter Liifai yaab bi tu Nkaal Aadakaa ngbaan na pu na.

²⁷ David nan di ŋitanyaan aawanpeenkaan le peen, kina le biwangbaab ni bilahngaab, ni baasaloln Kenania, ni Liifai yaab bi nan tu Dakaa ngbaan na, mu nan pee. David nan ki gbab Uwumbɔr aatotoor aakekengeŋ uchaŋ ni.

²⁸ Kina le Israel yaab mɔmɔk nan di Nkaal Aadakaa ngbaan buen Jerusalem ponn ni, ki tar mpopiin pu, ki pii kakaan, ni ikpiin, ki yak ichayakrtuun, ki gbaa tibar.

²⁹ Baah joo Dakaa ngbaan bi di koo ni kitiŋ ngbaan ponn ni buyoonn na, le Sɔɔl aabisal Mikal lik takolu ni ki kan Ubɔr David aah bi yukr ki waa liwaal mpopiin pu pu na, le u lik seen u usui ni.