1 Bibɔrb Aabɔr 14 - Uwumbɔr aagbaŋ

David aah nan tun pu Jerusalem ponn ni na

¹ Taya aatiŋ Aabɔr Hiram nan tun ni kitiirk aatuun David chee, ki nan tii ni u santina aadɔ, ni bikpikpiib, ni binib bi kpir ŋitakpal na, ke bi nan maa libɔrdichal tii u.

² Kina pu le David nan bee ke Uwumbɔr sil kaan u Israel aanaan, ki bi tii waanaan ngbaan liwangol sakpeln, waanib pu.

³ Jerusalem ni, le u moo yoor bipiib, ki ma mbijabim ni mpiibim kpee.

⁴ Mbim mue le u nan ma Jerusalem ponn ni; Samua, ni Sobab, ni Natann, ni Solomonn,

⁵ ni Ibhar, ni Elisua, ni Elpelet,

⁶ ni Noga, ni Nefeg, ni Jafia,

⁷ ni Elisama, ni Beeliada ni Elifelet.

David aah nyaŋ Filistia yaab pu na

⁸ Filistia yaab aah ŋun ke David le gur ye Israel aatiŋ mɔmɔk aabɔr na, le baajab gor bibaa ke bi ti tak ki chuu u. Le David nyan ke bi ti pii tɔb.

⁹ Filistia yaab nan fuu ni Refaim Aafataŋ ponn ni ki gaa nima.

¹⁰ Le David baa Uwumbɔr ke, “M buen ti tak Filistia yaab aa? Aa ga cha m nyaŋ bi ii?” Le Uwumbɔr kii u ke, “Een, buen ti tak bi. M ga cha aa nyaŋ bi.”

¹¹ Kina pu le David ni waajab nan buen nin chee bi yin ni ke Baal Perasim na, le ki ti nyaŋ bi nima. U nan bui ke, “Uwumbɔr cha m bɔ jer bidim ni ke nwam na.” Kina pu le bi yin libuul ngbaan ni ke Baal Perasim.

¹² Filistia yaab aah san na, le bi san cha baawaa, le David cha waajab see ŋi mmii.

¹³ Naa nan yunn, le Filistia yaab ki gir buen Refaim Aafataŋ ni, ki ti ki gaa ki.

¹⁴ David nan ki gir baa Uwumbɔr, le u kii u ke, “Taa dii do ki ti tak bi, buen bipuwɔb ki ti gor ke aa tak bi lipepel ngbaan wɔb, tichacheer aasui na chee.

¹⁵ Aa yaa nan ŋun ni bi ke binib le aah chuun isui ngbaan paab na kan, buen ti tak bi; ba pu? m ga loln ni pu nsan ki ti nyaŋ Filistia yaab aajab.”

¹⁶ David nan ŋa Uwumbɔr aah bui u pu na, le ki ŋman ki jenn dii Filistia yaab aajab ki nyan Gibeonn kina ki ti saa Geser.

¹⁷ David aayimbil nan yaa ni kookoo, le Uwumbɔr cha ŋitimbol mɔmɔk san u ijawaan.