1 Bibɔrb Aabɔr 13 - Uwumbɔr aagbaŋ

Baah nan nyan Uwumbɔr Aakaal Aadakaa, Kiriaf Jearim Aatiŋ ni pu na

¹ Ubɔr David ni waajab bi ye bijab ŋichur ŋichur na aaninkpiib, ni bi ye bijab nkub nkub na aaninkpiib nan kpokl tɔb.

² Nee aapuwɔb le u bui Israel aanib mɔmɔk ke, “Ni yaa kii aan ni ye Tidindaan Uwumbɔr aageehn kan, ni cha ti tun timi aatiŋ aanib mɔmɔk, ni bitotoorb ni Liifai yaab chee baatim ni, ke bi kuun dan ti chee do.

³ Ti ga buen ti yoor ni Uwumbɔr Aakaal Aadakaa, u bi nan suln u bɔr Sɔɔl aah nan ye ubɔr buyoonn na.”

⁴ Nlandak ngbaan nan piir binib ngbaan aasui, le bi kii tii u.

⁵ David nan kuun Israel aanib litingbaln ngbaan mɔmɔk pu. U nan kuun bi nyan ni ŋŋangii wɔb, Ijipt aatinaanmɔk ki di ti saa Hamaf Aasan mu bi ŋŋangan wɔb na, ke bi ti yoor Uwumbɔr Aakaal Aadakaa, Kiriaf Jearim aatiŋ ni ki di giin Jerusalem ni.

⁶ David ni binib ngbaan nan buen Baala aatiŋ ni, kima le ye Kiriaf Jearim, ki bi Juda aapepel ni na, bi ti yoor Uwumbɔr Aakaal Aadakaa, u Uwumbɔr aayimbil bi u pu, aan waanaan aajal bi tiwanfuurkaan aapaacham na.

⁷ Bi nan ti yoor Uwumbɔr Aakaal Aadakaa ngbaan, Abinadab aadichal ni, le ki di u toŋ tɔroku pɔɔn pu. Usa ni Ahio le nan kii tɔroku ngbaan,

⁸ le David ni binib bi mɔmɔk gur na nan gaa ilahn ki waa liwaal mpɔɔn pu ki nyuŋni Uwumbɔr. Bi nan gaa ilahn ki gbaa tibar, ni ŋigangan, ki yak ichayakrtuun, ki pii ikpiin.

⁹ Baah nan ti fuu Kidonn aadipoipaal chee na, le inaa i dar tɔroku ngbaan na gbeer, le Usa taln uŋaal ki chuu Uwumbɔr Aakaal Aadakaa ngbaan ke u taa lir.

¹⁰ Libuul ngbaan ni, le Uwumbɔr aaŋuul fii Usa pu, le u ku u, waah meeh dakaa ngbaan pu na. U nan kpo Uwumbɔr aanimbiin ni, nima chee la.

¹¹ Kina pu le bi gur yin nima chee ke Peres Usa, ki nan saa din. Uwumbɔr aah daa Usa aatafal liŋuul ni na, le David aaŋuul nan fii sakpen.

¹² David nan san Uwumbɔr ijawaan le ki bui ke, “M ga ŋa kinye ki di Uwumbɔr Aakaal Aadakaa ngbaan buen?”

¹³ Kina pu le David aa nan di u buen Jerusalem ponn ni. U nan di u paal buen uja u bi yin u ke Obed Edom, aan u ye Gaf aatiŋ aanii na do la.

¹⁴ Dakaa ngbaan nan bi nima ki ti saa iŋmal itaa, le Uwumbɔr nan ŋa tinyoor ŋa Obed Edom, ni waadichal, ni waawan mɔmɔk pu.