1 Bibɔrb Aabɔr 12 - Uwumbɔr aagbaŋ

Benjaminn aanibol ni aanib bi nan ye David aajan aadidiliib na

¹ David aah nan san ke u ŋmar Ubɔr Sɔɔl chee, ki ti bi Siklag ni na, le bijab bi nyi butɔb aabɔr mbamɔm na pam dan u chee nima.

² Bi nan ye Sɔɔl aado yaab Benjaminn aanibol ni aanib la. Bi nan ŋmaa too ipiin, le ki ŋmaa joo ŋŋangii, ni ŋŋangan mɔmɔk gbaa ŋifulaatan mu pam.

^3-7 Sema u nyan ni Gibea aatiŋ ni na aajapɔtiib Ahieser ni Joas le nan ye baayidam. Bijab ngbaan aayimbil sɔ: Asmafef aajapɔtiib Jesiel ni Pelet. Beraka, ni Jehu u nyan ni Anatof aatiŋ ni na. Ismaya u nyan ni Gibeonn aatiŋ ni, ki ye uja u nyi butɔb aabɔr mbamɔm na. U nan ye “Piitaa Na” ponn ni aayidaan ubaa la. Jeremia, ni Jahasiel, ni Johanann, ni Josabad u nyan ni Gedera ni na. Elusia, ni Jerimof, ni Bealia, ni Semaria, ni Sefatia u nyan ni Harif ni na. Elkana, ni Isia, ni Asarel, ni Joeser, ni Jasobeam, bi ye Kora aataŋaal pu yaab na. Jeroham u nyan ni Gedor na aajapɔtiib Joela ni Sebadia.

David aadidiliib bi nyan ni Gad aanibol ni na

⁸ Gad aanibol ni aajab bi nyi butɔb aabɔr mbamɔm ki kpa ŋiyimbil ki nan buen ti kpee David ni waajab pu, buyoonn u nan bi nteersakpiin ni, nin chee bi nan kii mbamɔm na sɔ. Bi nan ye bijab bi nyi tikpaatunn ni kijaak aapen aabɔr sakpen na la. Binimbil wɔb nan kpa ijawaan ke ichinn na la, le bi ŋmaa san ke lijool paab aapeeman na.

^9-13 Baaninkpir aah nan paa paa tɔb pu pu na sɔ: Eser, ni Obadia, ni Eliab, ni Mismana, ni Jeremia, ni Atai, ni Eliel, ni Johanann, ni Elsabad, ni Jeremia, ni Makbanai.

¹⁴ Gad aanibol ni aajab bimina bibaa nan ye bijab ŋichur ŋichur aaninkpiib la, le biken mu paa ki ye bijab nkub nkub aaninkpiib.

¹⁵ Libiln libaa aajan aaŋmal ponn ni, n‑yoonn mu Jɔɔdann Aamɔɔl nyan nwam na, le bi nan puur limɔɔl, le ki ti jenn yaa binib bi bi limɔɔl ngbaan aawipuul ni liwilir mɔk aafatann ni na.

David aadidiliib bi nan nyan ni Benjaminn ni Juda aanibol ni na

¹⁶ Bijab nan nyan ni Benjaminn ni Juda aanibol ni, ki buen David aah nan bi nin chee bi kii mbamɔm na.

¹⁷ David nan tooh bi nsan ni le ki ti bui ke, “Ni yaa ye jɔtiib le ki choo ni nan ter mi kan, dan man. Nan kpee ti pu man. Tɔ, maah kaa ŋa nimi nibaa na, ni yaa choo ke ni nan ti di mi kooh maadim pu kan, tiyaajatiib Aawumbɔr ga bee ki ga daa nitafal.”

¹⁸ Le Uwumbɔr Aafuur Nyaan gbiin bi ponn ni ubaa, u bi yin u ke Amasai na. U nan ŋa “Piitaa Na” aayidaan n‑yoonn mubaa, le u teen ke, “Jese aajapɔɔn David, ti si aachaŋ ni la. Linyaŋ ye sin ni binib bi ter si na yaan la. Uwumbɔr bi aa chee.” David nan gaa bi iŋaal ilee, le ki ŋa bi bininkpiib waajab ni.

David aadidiliib bi nan nyan ni Manase aanibol ni na

¹⁹ Manase aanibol ni aajab bibaa nan buen ti kpee David pu, buyoonn u ni Filistia yaab nan cha bi ti faa Ubɔr Sɔɔl butɔb na. Mbamɔn, Filistia aabɔrb nan san ijawaan ke nibaakan David ga di bi kooh waaninkpel Sɔɔl pu, kina le bi nan cha u gir Siklag aatiŋ ni. Kina pu na, David aa nan ter Filistia yaab butɔb ngbaan ni.

²⁰ David aah nan gir cha aan bijab bi nan nyan Manase aanibol ni ki dii u na sɔ: Adna, ni Josabad, ni Jediael, ni Maikel, ni Josabad, ni Elihu, ni Siletai. Bi nan ye bijab ŋichur ŋichur aayidam le Manase aanibol ni.

²¹ Baah nan ye bijab bi nyi butɔb aabɔr mbamɔm na, bi nan ye David aajab ponn ni bininkpiib la. Puwɔb le bi nan ŋa Israel aajab ponn ni bininkpiib.

²² Iwiin mɔmɔk kan, bijab nan moo kpae David aajab pu la, le bi ti wiir ti nyaŋ.

David aajab aakahm

^23-37 David aah nan bi Hebronn aatiŋ ni na, le bijab bi bae ki nyi butɔb aabɔr mbamɔm na dan nan kpee u pu, ke bi nyan Sɔɔl ki di u ŋa ubɔr, Uwumbɔr aah nan puu pu na. Baawiwiir sɔ: Juda aanibol ni aajab bi nan kpa tijawan mbamɔm na, nan ye bijab ŋichur ŋiloob ni ikui iniin la. Bi mɔmɔk nan kpa kijaak aapen ni tikpaatunn la; Simeonn aanibol ni aajab bi nan bae ki nyi butɔb aabɔr mbamɔm na, nan ye bijab ŋichur ŋilole ni nkub la; Liifai yaab nan ye bijab ŋichur ŋinaa ni ikui iloob la; Aaronn aayaabil Jehoyada aadidiliib nan ye bijab ŋichur ŋitaa ni ikui ilole la; Sadok, u nyi kijaak aabɔr pam na aado yaab nan ye bisalolm moninko ni bilee la; Benjaminn aanibol, Sɔɔl ubaa aanibol ni aajab nan ye bijab ŋichur ŋitaa la. Benjaminn aanibol ni aanib pam le nan beenin si Sɔɔl aachaŋ ni; Efraim aanibol ni aajab nan ye bijab ŋichur moninko ni ikui iniin la. Bi mɔmɔk nan ye bijakpaam le baataŋaal ni; Manase aanibol li bi liwilir wɔb na aajab nan ye bijab ŋichur kipiik ni ŋiniin la. Bi nan lee bi ke bi ti ŋa David ubɔr la; Isakar aanibol ni bisalolm nan ye ikui ilee la, le ki joo ni baajab kpee; bisalolm bimina le nan nyi Israel yaab aah ga ŋa pu na, ni buyoonn bi ga ŋa kina na; Sebulunn aanibol ni aajab bi nan bae ki nyi tijawan mɔmɔk aabɔr, aan bi ga ŋmaa nyu bi pu kaafa na, nan ye bijab ŋichur piiŋmu la; Naftali aanibol ni, bisalolm lichur, ni bijab bi kpa kijaak aapen ni tikpaatunn na, ŋichur piitaa ni ŋilole; Dann aanibol ni aajab bi nan nyi butɔb aabɔr mbamɔm na nan ye bijab ŋichur moninko ni ŋiniin ni ikui iloob la. Aser aanibol ni aajab bi nan gor ki kii butɔb na nan ye bijab ŋichur imonko ilee la; Ŋinibol ŋi bi Jɔɔdann aamɔɔl aawipuul wɔb, ki ye Rubenn, ni Gad, ni Manase aanibol li bi nima na aajab bi bae ki nyi tiwan mɔmɔk aabɔr mbamɔm na, nan ye bijab ŋichur nkub ni moninko la.

³⁸ Bijab bee mɔmɔk nan gor ki kii butɔb la, le ki buen David chee Hebronn ni, ki joo gbin gbin ke bi ti ŋa u Israel mɔmɔk aabɔr. Israel aanib bi mɔmɔk nan gur na nan ŋa kimɔbaan, nlandakbaan ngbaan pu la.

³⁹ Bi nan ti bi David chee nima ki ti saa iwiin itaa, ki jin tijikaar ni ŋisubil aadaan mu bido yaab nan ŋa tii bi na aajim.

⁴⁰ Binib nan nyan ni Isakar, ni Sebulunn, ni Naftali aanibol ŋi bi ŋŋangan wɔb dandar na, ki joo ni tijikaar ti ye n‑yon, ni ŋikakan, ni ŋisubil ŋi bi den ŋi aan ŋi kuur na, ni ŋisubil aadaan, ni olif aakpan, ibon, ni laakumii tiib, ni tiwakor ti naahn ibon na, ni inaa pu, nan tii bi. Bi nan ki joo ni inaa ni ipiih ke bi nan li kɔr ŋmɔ. Kitiŋ ngbaan mɔmɔk aanib aapopiin mu bi nan kpa na, le bi nan joo mɔk na.