1 Bibɔrb Aabɔr 11 - Uwumbɔr aagbaŋ

David aah nab Israel ni Juda aanaan pu pu na

¹ Le Israel aanibol mɔmɔk buen David chee Hebronn aatiŋ ni ki ti bui u ke, “Timi ni sin ye lipubaan ni aanib la.

² N‑yoonn mu jer na, hali Sɔɔl aah nan beenin ye timi aabɔr na, sin le nan lolni Israel aajab pu nsan butɔb ni, le Aadindaan Uwumbɔr nan puu ke sin le ga loln waanib pu nsan ki li ye baajojoor.”

³ Kina pu le Israel yaab aayidam mɔmɔk dan Ubɔr David chee Hebronn aatiŋ ni. U ni biyidam ngbaan nan ŋa kimɔbaan Uwumbɔr aanimbiin ni, le bi di nkpan kpir uyil pu, ki kaan u Israel aatiŋ aanaan, ke Uwumbɔr aah nan puu pu tii Samuel na.

⁴ Ubɔr David ni Israel yaab mɔmɔk nan buen le ki ti tak Jerusalem aatiŋ. Bi nan yin ki n‑yaayoonn ngbaan ke Jebus la, le Jebus yaab, bi nan naan ki na, koo nima.

⁵ Jebus yaab ngbaan nan bui David ke waan ŋmaa koo ni baatiŋ ni daalbaadaal. Tɔ, David nan nyaŋ baapɔɔn aajool Sionn, le bi gur yin kitiŋ ngbaan ke “David Aatiŋ.”

⁶ David nan bui ke, “Uja u loln nsan ki ku Jebus aanii na kan, uma le ga li ye butɔb aajab aaninkpel.” Joab, u aana nan ye Seruya na, le nan loln nsan le ki kpaln baaninkpel.

⁷ David aah nan ti koo mpɔɔn aatiŋ ngbaan ni na, le bi gur yin ki ke “David Aatiŋ.”

⁸ U nan piin liwipuul wɔb nin chee kitiŋ dɔ ligongoln ngbaan pu na, le ki gir maa maln goln kitiŋ ngbaan pu ki kpee. Le Joab mu gir maa kitiŋ ngbaan ni gur na.

⁹ Uwumbɔr Mpɔɔnsakpiindaan aah nan bi David chee na, le u nan moo pɔɔk n‑yoonn mɔmɔk.

David aajakpaam

¹⁰ David aajakpaam na aayimbil sɔ: Bi ni Israel aanib bi gur na le nan ter u le u ŋa ubɔr, ke Uwumbɔr aah nan puu pu na, le bi nan cha waanaan kpa mpɔɔn.

¹¹ Njan yoo le nan ye Jasobeam, u nan ye Hakmonn aataŋaal pu aanii na. Uma le nan ye “Bitaa na” aayidaan. U nan di waakpaatuŋ ton butɔb bijab ikui itaa ponn ni, ki ku bi mɔmɔk butɔb bubaa ni.

¹² Uleler bitaa kpaam na ni le nan ye Dodo aajapɔɔn Eleasar, u nyan ni Aho aataŋaal pu na.

¹³ U ni David nan faa Filistia yaab butɔb Pas Damim ni. U nan bi idi aakpaakon mubaa ni, le Israel aajab piin ki bi san,

¹⁴ le u ni waajab nan nyal sil bukpaab ngbaan aakaasisik ni ki to Filistia yaab ngbaan butɔb. Uwumbɔr nan cha u nyaŋ bi pel pel.

¹⁵ Daalbaadaal le bijab bitaa, “Piitaa Na” ponn ni, nan buen David aah nan bi kitakpaluŋ ki bi Adulam ni na, le Filistia aajab bibaa mu nan bi Refaim Aafataŋ ni.

¹⁶ N‑yoonn ngbaan na, David nan bi ligongoln li bi kii li mbamɔm na le pu, le Filistia aajab bibaa nan ti gaa Betlehem aatiŋ.

¹⁷ David aalaasaab nan gur bi linampal ni la, le u bui ke, “Ubaa yaa ba joo ni mi nnyun mu nyan Betlehem aabisamɔb aanyunbun na ponn ni na kan, m ba gee.”

¹⁸ Le bijakpaam ngbaan bɔ dii Filistia aajab ni, ki ti lun ni nnyunbun ngbaan ponn ni aanyun, ki di gir ni nan tii David. Le u nan yii, kaa nyun mu; u nan di mu tii Uwumbɔr la,

¹⁹ le ki bui ke, “Uwumbɔr, maan ŋmaa nyu nnyun mue. Ni ga li bi ke m bi nyu bijab bi di baamɔfal ŋa biŋaal ni ki ti lun ni mu na aasin la,” le ki yii, kaa nyun mu. Bijakpaam bitaa ngbaan aah nan tun lipobil aatun ŋi na le bi na.

²⁰ Joab aanaal Abisai le nan ye “Piitaakpaam Na” aayidaan. U nan di waakpaatuŋ ton butɔb bijab ikui itaa ni, ki ku bi, le ki kan liyimbil “Piitaa Na” ni.

²¹ Uma le nan kpa liyimbil “Piitaa Na” ni, le ki kpaln baayidaan, u mu aa nan tee kpa liyimbil ke “Bitaa Na” na.

²² Jehoyada, u nyan ni Kabseel na aajapɔɔn Benaya mu le nan ye uja u kpa liyimbil na; u nan tun lipobil aatun pam, u nan ku Moab aapobidam bilee bibaa. Daalbaadaal, u nan koo mbuu ni, nwiin mundaal ntaanal nan lir na, ki ti ku uchinn.

²³ U nan ki ku Ijipt aatiŋ aawɔkl li nan joo kikpaatuŋ fɔfɔŋ na mu. Liwɔkl ngbaan aafɔfɔk ga nan li pii ŋitaa ŋilole ni ligeln. Benaya nan di lichakukul le tak u, le ki daa gaa kikpaatuŋ ngbaan Ijipt aanii ngbaan chee, ki di ki ku u.

²⁴ Benaya u nan ye “Piitaa Na” ni ubaa na aapobil aatun ŋi u nan tun na le bi na.

²⁵ U nan kpa liyimbil “Piitaa Na” ponn ni, le ki mu aa nan tee pii “Bitaa Na.” David nan di u ŋa waajab bi kii u na aayidaan la.

^26-47 “Piitaa Na” ni biken aayimbil sɔ: Joab aanaal Asahel. Betlehem aanii Dodo aajapɔɔn Elhanann. Harod aatiŋ aanii Samof. Heles u nyan ni Pelet aatiŋ ni na. Tekoa aatiŋ aanii Ikes aajapɔɔn Ira. Abieser u nyan ni Anatof aatiŋ ni na. Sibekai u nyan ni Husa aatiŋ ni na. Ilai u nyan ni Aho aatiŋ ni na. Maharai u nyan ni Netofa aatiŋ ni na. Netofa aatiŋ aanii Baana aajapɔɔn Heled. Benjaminn aanibol aatiŋ Gibea aanii Ribai aajapɔɔn Itai. Benaya u nyan ni Piratonn aatiŋ ni na. Hurai u nyan ni tifatann ti bi duun Gaas na. Abiel u nyan ni Aba aatiŋ ni na. Asmafef u nyan ni Baharum aatiŋ ni na. Eliaba u nyan ni Saalbonn aatiŋ ni na. Hasem u nyan ni Gisonn aatiŋ ni na. Sagee u nyan ni Harar na aajapɔɔn Jonatann. Sakar u nyan ni Harar na aajapɔɔn Ahiam. Ur aajapɔɔn Elifal. Hefer u nyan ni Mekera ni na. Ahija u nyan ni Pelonn ni na. Hesro u nyan ni Kamel ni na. Esbai aajapɔɔn Naarai. Natann aanaal Joel. Hagri aajapɔɔn Mibar. Selek u nyan ni Amonn ni na. Naharai u nyan ni Beerof aatiŋ ni ki ye Joab aajawan aajojoor na. Ira ni Gareb bi nyan ni Jatir aatiŋ ni na. Uria u nan ye Hef aanii na. Alai aajapɔɔn Sabad. Sisa aajapɔɔn Adina u nan ye Rubenn aanibol ni aayimbidaan ubaa ki joo ubaa aajab piitaa na. Maaka aajapɔɔn Hanann. Josafat u nyan ni Mitann ni na. Usia u nyan ni Astera ni na. Hotam u nyan ni Aroer aatiŋ ni na aajapɔtiib Sama ni Jeyel. Simri u nyan ni Tis aatiŋ ni na aajapɔtiib Jediael ni Joha. Eliel u nyan ni Mahafa ni na. Elnaam aajapɔtiib Jeribai ni Josafia. Itma u nyan ni Moab ni na. Eliel, ni Obed, ni Jaasiel bi nyan ni Mesoba aatiŋ ni na.