1 Bibɔrb Aabɔr 10 - Uwumbɔr aagbaŋ

Ubɔr Sɔɔl aakun aabɔr

¹ Filistia yaab nan ti faa Israel yaab butɔb Gilboa Aajool paab la. Bi nan ku Israel yaab pam nima, le bi gur na, ni Ubɔr Sɔɔl, ni ujapɔtiib san.

² Filistia yaab nan jenn chuu bi, ki ku Sɔɔl aajapɔtiib bitaa, Jonatann, ni Abinadab, ni Malkisua.

³ Butɔb ngbaan nan ti pɔɔ Sɔɔl aah bi nin chee na sakpen, le bidim bibaa aapiin yun Sɔɔl ki tii u titotonn pam.

⁴ Le u bui unachipɔɔn u joo waajawan na ke, “Nyan saajaak aajuk ki ku mi, aan Filistia yaab bi kaa san Uwumbɔr na taa nan di kinanaŋ ku mi.” Le ijawaan nan chuu unachipɔɔn ngbaan sakpen, le waa kaa u ŋa kina. Kina pu le Sɔɔl nyan ubaa aajaak aajuk ki lir ki pu ki ku ubaa.

⁵ Unachipɔɔn ngbaan nan kan ke Sɔɔl kpo a, le u mu lir waajuk pu ki kpo dii Sɔɔl.

⁶ Kina le Sɔɔl ni ujapɔtiib bitaa mɔmɔk nan kpoi le waanaan kuln.

⁷ Israel yaab bi nan bi Jesreel Aafataŋ ni na aah ŋun ke Israel aajab san, ki ŋun Sɔɔl ni ujapɔtiib aakun pu na, le bi nyan cha baatim ki san. Le Filistia yaab dan nan koo mu ni.

⁸ Butɔb ngbaan aawiin aah jer aan Filistia yaab buen bi ti yoor ŋinikpol ngbaan aawan na, le bi kan Sɔɔl ni ujapɔtiib bitaa na aanikpol dɔ Gilboa Aajool paab.

⁹ Bi nan gii Sɔɔl aayil, ki peer waajaak aabɔkul, ki di tun Filistia aatim mɔmɔk ni, ki tuk baawaa, ni baanib tibɔnyaan ngbaan.

¹⁰ Bi nan di waajawan bil baawaadiik kibaa ni, le ki di uyil ti leen baawaal li bi yin li ke Dagonn na aawaadiik ni.

¹¹ Jabes aatiŋ ki bi Gilead aapepel ni na aanib aah ŋun ke Filistia yaab ŋa Sɔɔl kina na,

¹² le baapobidam fii ti yoor Sɔɔl ni ujapɔtiib aawon ki di gir buen Jabes aatiŋ ni. Bi nan ti sub bi likpaln aasub bubaa taab la, le ki lul bumɔb ti saa iwiin ilole.

¹³ Sɔɔl aah kaa nan dii Uwumbɔr mbamɔm na, le u nan kpo. U nan yii Uwumbɔr aakaal, le ki tee ban bitekpiib chee nsurm,

¹⁴ kaa ban Uwumbɔr chee nsurm. Kina pu le Uwumbɔr nan ku u, ki di waanaan tii Jese aajapɔɔn David.