1 Bibɔrb Aabɔr 1 - Uwumbɔr aagbaŋ

Ki nyan Adam aayoonn ki ti saa Abraham aayoonn na aabɔr

¹ Sef aate le nan ye Adam, le Sef mu ma Enos, le Enos mu ma Kenann.

² Kenann mu aajapɔɔn le nan ye Mahalalel u nan ma Jared na.

³ Jared le nan ma Enok, le Enok mu ma Metusela, u nan ma Lamek na,

⁴ le Lamek mu ma Nowa. Nowa nan ma mbijabim mutaa la. Bima le nan ye Sem, ni Ham, ni Jafef.

⁵ Jafef aajapɔtiib le nan ye Gomer, ni Magog, ni Madai, ni Jafann, ni Tubal, ni Mesek, ni Tiras. Bima le ye binib bi beenin joo baayimbil na aayaajatiib.

⁶ Gomer aayaabitiib le nan ye Askenas, ni Rifaf, ni Togama aanib.

⁷ Jafann aayaabitiib le nan ye Elisa, ni Speenn, ni Saiprus, ni Rodes aanib.

⁸ Ham aajapɔtiib le nan ye Kus, ni Ijipt, ni Libia, ni Kanaann aanib. Bima le ye binib bi beenin joo baayimbil na aayaajatiib.

⁹ Kus aayaabitiib le nan ye Seba, ni Hafila, ni Sabta, ni Raama, ni Sabteka aanib. Raama mu aayaabitiib le nan ye Seba, ni Dedann aanib.

¹⁰ Kus aajapɔɔn u bi nan yin u ke Nimrod na le nan puen ye dulnyaa wee ni aanii u nan nyaŋni butɔb ni pam na.

¹¹ Ijipt aayaabitiib le nan ye Lidia, ni Anam, ni Lehab, ni Naftu,

¹² ni Patrus, ni Kaslu, ni Krete aanib, (Krete aanib le ye Filistia yaab aayaajatiib).

¹³ Kanaann aajapɔtiib le nan ye Saidonn, u nan ye upol na, ni Hef. Bima le ye binib bi beenin joo baayimbil na aayaajatiib.

¹⁴ Kanaann le nan ki ye Jebus ni Amor, ni Girgas,

¹⁵ ni Hif, ni Arka, ni Sinn,

¹⁶ ni Afad, ni Semar, ni Hamaf aanib aayaaja.

¹⁷ Sem aajapɔtiib le nan ye Elam, ni Asur, ni Apaksad, ni Lud, ni Aram, ni Us, ni Hul, ni Geter, ni Mesek. Bima le ye binib bi beenin joo baayimbil na aayaajatiib.

¹⁸ Apaksad aajapɔɔn le nan ye Sela u nan ma Eber na.

¹⁹ Eber nan ma mbijabim mulee la. Ubaa aayimbil le ye Peleg. Baah nan ma u buyoonn na dulnyaa aanib nan yakr yakr la. Uken na aayimbil le nan ye Joktann.

²⁰ Joktann aayaabitiib le nan ye Almodad, ni Selef, ni Hasamafef, ni Jera,

²¹ ni Hadoram, ni Usal, ni Dikla,

²² ni Ebal, ni Abimael, ni Seba,

²³ ni Ofir, ni Hafila, ni Jobab aanib.

²⁴ Mmaal ngbaan aah nan dii pu ki nyan Sem mɔk ki ti saa Abram mɔk na sɔ: Sem, ni Apaksad, ni Sela,

²⁵ ni Eber, ni Peleg, ni Reu,

²⁶ ni Serug, ni Nahor, ni Tera,

²⁷ ni Abram, (Abram le bi ki yin u ke Abraham na).

Ismael aayaabitiib aayimbil

²⁸ Abraham nan ma mbijabim mulee la. Bima le nan ye Aisak, ni Ismael.

²⁹ Ismael aajapɔtiib le nan nan kpaln ŋinibol kipiik ni ŋilee ŋee. Bima le ye Nebayof (Ismael aajapɔpol), ni Kedar, ni Adbeel, ni Mibsam,

³⁰ ni Misma, ni Duma, ni Masa, ni Hadad, ni Tema,

³¹ ni Jetur, ni Nafis, ni Kedema.

³² Abraham aapuu uken u bi nan yin u ke Ketura na nan ma u chee mbijabim muloob la. Bima le ye Simrann, ni Joksann, ni Medann, ni Midiann, ni Isbak, ni Sua. Joksann nan ma mbijabim mulee la. Bima le nan ye Seba, ni Dedann.

³³ Midiann mu nan ma mbijabim muŋmu la. Bima le nan ye Efa, ni Efer, ni Hanok, ni Abida, ni Eldaa.

Esɔ aayaabitiib aayimbil

³⁴ Abraham aajapɔɔn Aisak nan ma mbijabim mulee la, Esɔ ni Jakob.

³⁵ Esɔ aajapɔtiib le nan ye Elifas, ni Rewel, ni Jeus, ni Jalam, ni Kora.

³⁶ Elifas le nan ye Temann, ni Omar, ni Sefi, ni Gatam, ni Kenas, ni Timna, ni Amalek aanibol aayaaja.

³⁷ Rewel mu le nan ye Nahaf, ni Sera, ni Sama, ni Misa aanibol aayaaja.

Edom aajan aatindam aayimbil

^38-42 Seir aajapɔtiib bi aayimbil paan ni na le nan ye Edom aatindam: Lotann le nan ye Hori ni Homam aataŋaal pu aayaaja. (Lotann nan kpa ninkpan ubaa, le bi yin u ke Timna.) Sobal mu le nan ye Alfann, ni Manahaf, ni Ebal, ni Sefi, ni Onam aataŋaal pu aayaaja. Sibeonn nan ma mbijabim mulee la, Aya ni Ana. Ana mu nan ma Disonn, le Disonn nan ye Hamrann, ni Esbann, ni Itrann, ni Kerann aataŋaal pu aayaaja. Eser mu le nan ye Bilhann, ni Saafann, ni Jaakann aataŋaal pu aayaaja. Le ujapɔɔn Disann mu nan ye Us ni Arann aataŋaal pu aayaaja.

Edom aatiŋ aabɔrb aayimbil

^43-50 Bibɔrb bimina le nan joo Edom aatiŋ ki paa paa tɔb pu. N‑yaayoonn ngbaan Israel aa nan kee kpa bibɔrb. Beor, u nyan ni Dinhaba aatiŋ ni na aajapɔɔn Bela le nan puen jin nnaan. Le Sera, u nyan ni Bosra aatiŋ ni na aajapɔɔn Johab nan paan u pu. Husam, u nyan ni Temann aapepel ni na, mu le nan paan. Bedad, u nyan ni Afif aatiŋ ni na aajapɔɔn Hadad le nan paan Husam pu. (Uma le nan nyaŋ Midiann yaab butɔb ni, Moab aatingbaln pu na.) Samla, u nyan ni Mosreka na, le nan paan. Saul, u nan nyan ni Rehobof, ni bi limɔɔl chee na, le nan paan Samla pu. Akbor aajapɔɔn Baal Hanann mu le nan paan. Hadad, u nyan ni Pau aatiŋ ni na, mu le nan paan Baal Hanann pu. (Upuu le nan ye Mehetabel. Mehetabel aate le nan ye Matred, le uyaaja ye Mesahab.)

⁵¹ Edom aanib aah nan yakr ŋinibol ŋinibol pu na sɔ: Timna, ni Alfa, ni Jetef,

⁵² ni Oholibama, ni Ela, ni Pinonn,

⁵³ ni Kenas, ni Temann, ni Mibsar,

⁵⁴ ni Magdiel, ni Iram aanibol.