रोमियो 7 - काँगड़ी

सादीशुदा ज़िन्दगी दा उदारण

¹ हे प्यारे साथी बसुआसियो, क्या तुहां एह़ नीं जाणदे कने मैं व्यबस्था दे जाणने आल़ेआं नैं ग्लांदा ऐ, कि जाह़लू तिकर माणु जिन्दा रैंह्दा ऐ, ताह़लू तिकर तिस पर व्यबस्था दा अधिकार रैंह्दा ऐ?

² ब्याई जणांस व्यबस्था दे मताबक अपणे लाड़े दे जींदे जी तिस नैं बन्नूईयो ऐ, अपर जे लाड़ा मरी जां, तां सैह़ कानूनी तरीके ते अपणे लाड़े ते छुटी गेई।

³ इसतांई जे लाड़े दे जींदे जी सैह़ कुसी दूये मर्दे नैं ब्याह करी लैं, तां ब्यभिचारिणी हुंगी, अपर जे लाड़ा मरी जां, तां सैह़ कानूनी तरीके दे मताबक छुटी गेई, ऐत्थु तिकर कि जे कुसी दूये मर्दे नैं ब्याह करी लैंदी ऐ, ताह़लू ब्यभिचारिणी नीं हुंगी।

⁴ हे मेरे प्यारे साथी बसुआसियो, तिंआं ई तुहां भी मसीह दी मौत्ती दे जरिये व्यबस्था तांई मरेयो देहय् बणी गियो हन, कि तिस दूये दे होई जा, मतलब मसीह दे जेह्ड़ा मरेयां ते जिन्दा होईया, तांजे अहां परमात्मे तांई फल़ लेयोन।

⁵ क्जोकि जाह़लू अहां पापी सभावे दे बसे च थे, तां पापी इच्छां जेह्ड़ियां व्यबस्था दे जरिये अहां दे अंदर जागियां, मौत्ती दा फल़ पैदा करणे तांई अहां दे सरीरां च कम्म करदियां थियां।

⁶ अपर अहां जिसा व्यबस्था दे बंधने च पैहल्ले थे तिस तांई मरी नैं, हुण व्यबस्था ते इआं छुटी गै, कि हुण लिखियो नियमां दे पराणे तरिकेयां मताबक नीं, अपर पवित्र आत्मा दे जरिये इक्की नौये तरीके नैं परमात्मे दी सेवा करदे हन।

व्यबस्था कने पाप

⁷ तां अहां क्या ग्लान? क्या व्यबस्था पाप ऐ? नीं, कदी भी नीं। अपर व्यबस्था दे जरिये मैं पापे दे बारे जाणी सकेया। व्यबस्था ग्लांदी ऐ, कि “लालच मत करा,” तां मिन्जो लालचे दे बारे च पता लग्गा।

⁸ अपर पापें मौका पाई नैं तिस हुक्मे दे जरिये मिन्जो च हर इक्क तरांह दा लालच पैदा कित्ता, क्जोकि बगैर व्यबस्था ते पाप मुड़दा ऐ।

⁹ इक्क बग्त था जाह़लू मैं व्यबस्था दे बगैर ज़िन्दगी जींदा था, अपर जाह़लू मैं व्यबस्था जो जाणेया, ताह़लू मेरे अंदर पाप करणे दियां इच्छां जागियां, कने मैं परमात्मे ते दूर होई गेआ।

¹⁰ कने सैई हुक्म जेह्ड़ा ज़िन्दगिया तांई था, अपर मेरे तांई मौत्ती दी बज़ाह बणी गेआ।

¹¹ क्जोकि पापें मौका पाई नैं तिस हुक्मे दे जरिये मिन्जो धोखा दित्ता, कने तिसदे जरिये मिन्जो परमात्मे ते दूर कित्ता।

¹² इस तरीके नैं अहां दिक्खदे हन, कि व्यबस्था पवित्र ऐ, कने हुक्म भी पवित्र, धर्मी कने खरा ऐ।

¹³ तां क्या व्यबस्था जेह्ड़ी खरी थी, मिन्जो तांई मौत्ती दी बज़ाह बणी? नीं, कदी भी नीं। तिसा भलाईया दे जरिये पापें मिन्जो च मौत्त पैदा करी दित्ती, कि पापे जो पापे दे ई रूपे च प्रगट कित्ता जां, कने हुक्म दे जरिये एह़ होर भी जादा पाप आल़ा बणेया।

माणुये दा पाप

¹⁴ क्जोकि अहां जाणदे हन कि व्यबस्था तां आत्मिक ऐ, अपर मैं माणु ऐ कने पापे दे बसे च ऐ।

¹⁵ कने जेह्ड़ा मैं करदा ऐ तिसियो नीं जाणदा, क्जोकि जेह्ड़ा मैं चांह़दा ऐ सैह़ नीं करदा, अपर जिसते मिन्जो नफरत हुंदी ऐ सैई करदा ऐ।

¹⁶ कने जेह्ड़ा मैं नीं करणा चांह़दा सैई करदा ऐ, तां मैं मन्नी लैंदा ऐ कि व्यबस्था खरी ऐ।

¹⁷ इसतांई एह़ कम्म मैं नीं, अपर मिन्जो च बसेया पाप करदा ऐ।

¹⁸ क्जोकि मैं जाणदा ऐ, कि मिन्जो च मतलब मेरे सरीरे च कोई खरी चीज्ज वास नीं करदी। खरे कम्मां करणे दी तां इच्छा मिन्जो च ऐ, अपर खरे कम्म मिन्जो ते हुंदे नीं।

¹⁹ क्जोकि जिस खरे कम्मे दी मैं इच्छा करदा ऐ, सैह़ नीं करदा, अपर जिन्हां बुरे कम्मां दी इच्छा नीं करदा, सैई करदा ऐ।

²⁰ कने जे मैं सैई करदा ऐ जिसदी इच्छा नीं करदा, तां तिसदा करणे आल़ा मैं नीं, अपर पाप जेह्ड़ा मिन्जो च बसेया करदा ऐ।

²¹ तां मिन्जो इआं मसूस हुंदा ऐ, कि जाह़लू मैं भलाई करणे दी इच्छा करदा ऐ, तां मिन्जो ते बुराई हुंदी ऐ।

²² क्जोकि मैं अपणे पूरे मने ते तां परमात्मे दिया व्यबस्था ते बड़ा खुस रैंह्दा ऐ।

²³ अपर मिन्जो अपणे सरीरे दे अंगा च होर तरीके दी व्यबस्था मसूस हुंदी ऐ, जेह्ड़ी मेरे मने दे बचारां नैं लड़दी ऐ, कने एह़ ताकत मिन्जो पापे दा गुलाम बणादी ऐ जेह्ड़ी हुण भी मेरे सरीरे दे अंगा च ऐ।

²⁴ मेरी बड़ी बुरी हालत ऐ! कुण मिन्जो इस मौत्ती दे सरीरे ते बचांगा?

²⁵ मैं परमात्मे दा धन्यावाद करदा ऐ। जिन्हीं मिन्जो यीशु मसीह दे जरिये बचाई लेआ, इसतांई मैं अपणे मने नैं तां परमात्मे दिया व्यबस्था दा, अपर सरीरे ते पापे दिया व्यबस्था दा पालण करदा ऐ।