रोमियो 3 - काँगड़ी

¹ तां भला यहूदी होणे दा क्या फायदा या खतणे दी क्या कीमत?

² हाँ, इसदी बड़ी कीमत ऐ। सबते पैहल्ले तां एह़ कि यहूदी लोकां जो मूसा कने भविष्यवक्तां दे लिख्यो सारे परमात्मे दे वचन दित्ते गै।

³ जे कुच्छ यहूदी लोकां परमात्मे पर बसुआस नीं कित्ता तां क्या होएया? क्या तिन्हां दा बसुआसघात परमात्मे दी सच्चाईया जो नास करी दिंदा ऐ?

⁴ नीं! कदी भी नीं। अपर परमात्मा हमेसा सच्च ग्लांदा ऐ, कने संसारे दा हर इक्क माणु झूठा साबित होयैं, जिंआं पवित्रशास्त्रे च लिख्या ऐ, “जिसते तू अपणियां गल्लां च धर्मी बणैं कने न्याय करदे बग्त तू जीत्त हासल करैं।”

⁵ इसतांई जे अहां दे बुरे कम्म परमात्मे दी धार्मिकता जो दस्सदे हन, तां अहां क्या ग्लान? क्या एह़ परमात्मे तांई गलत ऐ कि सैह़ गुस्सा होई नैं अहां जो सज़ा दिंदा ऐ? एह़ तां मैं माणुये दे नजरिये नैं ग्लांदा ऐ।

⁶ नीं! कदी भी नीं। नीं तां परमात्मा किंआं संसारे दे लोकां दा न्याय करगा?

⁷ अपर परमात्मा किंआं इक्क पापिये साइआं मेरा न्याय कने निंदा करी सकदा ऐ, जे मेरी बेमानिया नैं तिसदी सच्चाईया जो चमका कने तिसियो होर भी महिमा दैं?

⁸ कने भिरी क्जो नीं ग्लान, “चला! अहां बुरे कम्म करन, जिसते भलाई प्रगट होई जां?” जिंआं कुच्छ लोक अहां दी निंदा करी नैं अहां पर दोस लगांदे हन, कने कुच्छ लोक ग्लांदे हन कि अहां जो ऐई सखांदे हन। ऐदेय लोक सज़ा दे हक्कदार हुंदे हन।

कोई भी धर्मी नीं

⁹ तां भिरी क्या होएया? क्या अहां यहूदी लोक दूयेयां ते जादा खरे हन? नीं! कदी नीं। क्जोकि अहां यहूदी कने यूनानी लोक दून्नी पर एह़ दोस लगाई चुके हन कि सैह़ सारे दे सारे पापां दे बसे च हन।

¹⁰ जिंआं पवित्रशास्त्रे च लिख्या ऐ: “परमात्मे दे सामणै कोई भी धर्मी नीं, इक्क भी नीं।

¹¹ कोई भी माणु ऐदेया नीं; जेह्ड़ा समझी सके कि क्या ठीक ऐ, कोई भी परमात्मे जो जाणना नीं चांह़दा।

¹² सारे परमात्मे ते दूर होई गियो हन, सारे दे सारे नकम्मे बणी गियो हन; कोई भलाई करणे आल़ा नीं, इक्क भी नीं।

¹³ तिन्हां दियां गल्लां खुलिया कब्रा दिया गंदी मुस्का साइआं हन, तिन्हां दियां जीभां झूठे नैं भरोईयां हन, तिन्हां दे बोल जेहरिलै सर्पां दे जैहरे साइआं हन।

¹⁴ तिन्हां दे भाषणा च श्राप कने कौड़ा पन ऐ।

¹⁵ सैह़ दूयेयां जो दुख दैणे कने खत्म करणे तांई बड़े तेज हन।

¹⁶ सैह़ जित्थु कुत्थी भी जांदे हन, बुराई कने मुसीबत लेई ओंदे हन।

¹⁷ सैह़ दूयेयां लोकां सौगी सांतिया नैं जीणा नीं जाणदे।

¹⁸ तिन्हां च परमात्मे दा डर एह़ ई नीं।”

¹⁹ अहां जाणदे हन, कि मूसा दी व्यबस्था जेह्ड़ा कुच्छ ग्लांदी ऐ तिन्हां नैं ग्लांदी ऐ, जेह्ड़ा व्यबस्था दे बसे च ऐ; इसतांई कि हर इक्की माणुये जो भाने बणाणे ते दूर रखैं कने संसारे दे सारे लोक परमात्मे सामणै अपराधी होन।

²⁰ क्जोकि मूसा दिया व्यबस्था जो मन्नणे दे जरिये कोई भी माणु तिस सामणै धर्मी साबित नीं हुंगा, क्जोकि व्यबस्था अहां जो साफ-साफ दस्सदी ऐ कि अहां पापी हन।

बसुआसे दे जरिये ते धार्मिकता

²¹ अपर हुण हालात एह़ हन कि व्यबस्था दे बगैर ई परमात्मे दी धार्मिकता प्रगट होई गेई ऐ, जिसादे बारे च पवित्रशास्त्र कने भविष्यवक्ता दस्सदे थे,

²² मतलब परमात्मे दी सैह़ धार्मिकता जेह्ड़ी यीशु मसीह पर बसुआस करणे ते सारे बसुआस करणे आल़ेआं तांई ऐ। क्जोकि सारे लोक इक्क बराबर हन;

²³ इसतांई कि सबना पाप कित्या ऐ कने परमात्मे दी महिमा ते दूर होई गियो हन,

²⁴ अपर परमात्मे दे अनुग्रह ते तिस छुटकारे दे जरिये जेह्ड़ा यीशु मसीह च ऐ, मुफ्ते च धर्मी बणाये जांदे हन।

^25-26 परमात्मैं यीशु मसीह जो अहां दी खातर बलिदान होणे तांई घल्लेया, कने मसीयैं अपणा बलिदान इसतांई दित्ता। तांजे तिस पर बसुआस करी नैं अहां परमात्मे दे नेड़े आई सकन। बड़ी पैहल्ले परमात्मैं एह़ दस्सणे तांई कित्ता कि सैह़ सबर रखणे च कने पापियां जो माफ करणे च सही था। इसते एह़ भी पता चलदा ऐ कि परमात्मा सही ऐ, जाह़लू सैह़ मसीह पर बसुआस करणे आल़ेआं जो अपनांदा ऐ।

²⁷ इसतांई क्या ऐदेया कुच्छ ऐ, जिसदे बारे अहां घमंड करी सकन? तिस तांई तां कोई जगाह ऐ ई नीं। कुण देहय् नियमां दिया बज़ाह ते? क्या इसतांई कि अहां व्यबस्था जो मनदे हन? नीं, अपर यीशु मसीह पर बसुआस करणे दिया बज़ाह ते।

²⁸ इसतांई अहां इस नतीजे पर पुज्जदे हन, कि माणु व्यबस्था दे कम्मां ते बगैर ई, बसुआसे करणे दे जरिये धर्मी बणदा ऐ।

²⁹ क्या परमात्मा सिर्फ यहूदी लोकां दा ई ऐ? क्या होरनी जातिआं दे लोकां दा नीं? हाँ, होरनी जातिआं दे लोकां दा भी ऐ।

³⁰ क्जोकि इक्को ई परमात्मा ऐ, जेह्ड़ा खतणा आल़ेआं जो भी बसुआसे ते कने बगैर खतणा कित्तेयां जो भी बसुआसे दे जरिये धर्मी बणांदा ऐ।

³¹ तां क्या अहां व्यबस्था जो बसुआसे दे जरिये बेकार समझदे हन? नीं! कदी भी नीं। अपर बसुआसे दे जरिये अहां व्यबस्था जो पूरा करदे हन।