रोमियो 1 - काँगड़ी

नमस्कार

¹ मैं पौलुस इसा चिठ्ठिया लिखा दा ऐ, जेह्ड़ा यीशु मसीह दा दास ऐ, कने प्रेरित होणे तांई परमात्मे दे जरिये चुणेया ऐ, कने तिस सुसमाचारे दा प्रचार करणे तांई लग्ग कित्या ऐ, जेह्ड़ा परमात्मे दे पास्से ते ऐ।

² जिस सुसमाचारे तांई तिन्हीं पैहल्ले ते ई अपणे भविष्यवक्तां दे जरिये पवित्रशास्त्रे च,

³ अपणे पुत्तर अहां दे प्रभु यीशु मसीह दे बारे च वादा कित्या था। सैह़ सरीरे मताबक तां दाऊद राजे दे वंशे ते पैदा होएया।

⁴ कने पवित्र आत्मा दिया सामर्थी नैं सैह़ मरेयां ते जिन्दा होई गेआ। इसते एह़ साबित होएया कि सैह़ परमात्मे दा पुत्तर ऐ, कने सैई यीशु मसीह अहां दा प्रभु ऐ।

⁵ मसीह दे जरिये मिन्जो अनुग्रह कने प्रेरित दी सेवकाई मिल्ली कि तिसदे नांऐ दिया बज़ाह ते सारी जातिआं दे लोक मसीह पर बसुआस करी नैं तिसदी मनन,

⁶ जिन्हां च तुहां भी यीशु मसीह दे होणे तांई सद्देयो हन।

धन्यावाद दी प्रार्थना

⁷ एह़ चिठ्ठी रोम सैहरे दे तिन्हां सारेयां दे नां पर ऐ, जेह्ड़े परमात्मे दे प्यारे हन, कने पवित्र लोक होणे तांई सद्देयो हन, मैं प्रार्थना करदा ऐ, कि अहां दे पिता परमात्मा कने प्रभु यीशु मसीह दे पास्से ते तुहां जो अनुग्रह कने सांति मिलदी रैंह्।

⁸ पैहल्ले मैं तुहां सारेयां तांई यीशु मसीह दे जरिये अपणे परमात्मे दा धन्यावाद करदा ऐ, क्जोकि तुहां दे बसुआसे दी चर्चा सारे संसारे दे लोकां च होआ दी ऐ।

⁹ परमात्मा जिसदी सेवा मैं अपणे पूरे मने नैं तिसदे पुत्तरे दे सुसमाचार दे बारे च करदा ऐ, सैई मेरा गवाह ऐ, कि मैं तुहां लोकां जो अपणिया प्रार्थना च लगातार याद करदा रैंह्दा ऐ,

¹⁰ कने हर रोज अपणियां प्रार्थनां च विणती करदा ऐ, कि जे होई सकैं तां परमात्मे दिया इच्छा मताबक मैं तुहां नैं मिलणा औयें।

¹¹ क्जोकि मैं तुहां नैं मिलणे दी बड़ी इच्छा करदा ऐ, तांजे मैं तुहां जो बसुआसे च मजबूत करणे तांई कोई आत्मिक वरदान दैं;

¹² मेरा मतलब एह़ ऐ कि मैं तुहां बिच्च होई नैं तुहां सौगी तिस बसुआसे दे जरिये जेह्ड़ा मिन्जो च ऐ, कने तिस बसुआसे दे जरिये जेह्ड़ा तुहां च ऐ, इक्की दूये जो बसुआसे च मजबूत करदे रैह़न।

¹³ कने हे प्यारे साथी बसुआसियो, मैं नीं चांह़दा कि तुहां इसा गल्ला ते अणजाण रेह्आ कि मैं बार-बार तुहां अल्ल ओणे दी योजना बणाई, कि जिंआं मैं होरनी जातिआं च मसीह तांई चेले बणाये, तिंआं ई तुहां च भी बणन, अपर अह्ल्ली तिकर इसा योजना च रुकावट ओंदी रेई।

¹⁴ मैं यूनानी कने पखलियां भासां ग्लाणे आल़ेआं, कने अक्लमंदा कने वेअक्लेयां लोकां जो सुसमाचार सणाणे दा कर्जदार ऐ।

¹⁵ कने मैं तुहां लोकां जो भी जेह्ड़े रोम सैहरे च रैंह्दे हन, सुसमाचार सणाणे जो पूरा त्यार ऐ।

सुसमाचार दी सामर्थ

¹⁶ क्जोकि मैं पूरे मने नैं यीशु मसीह दे सुसमाचारे पर भरोसा रखदा ऐ। एह़ तिन्हां सबना दे उद्धारे तांई परमात्मे दी सामर्थ ऐ, जेह्ड़े इस च बसुआस करदे हन। सबना ते पैहल्ले यहूदी लोकां तांई भिरी होरनी जातिआं दे लोकां तांई भी।

¹⁷ क्जोकि तिस सुसमाचारे च परमात्मे दी धार्मिकता बसुआसे ते कने बसुआसे तांई प्रगट हुंदी ऐ, जिंआं पवित्रशास्त्रे च लिख्या ऐ, “सैह़ माणु जेह्ड़ा बसुआसे दे जरिये धर्मी बणेया ऐ, जिन्दा रैंह्गा।”

माणु जाति दा पाप

¹⁸ परमात्मे दा कोप सुअर्गे ते तिन्हां लोकां पर जेह्ड़े अभक्ति कने बुरे कम्म करदे हन प्रगट हुंदा ऐ, जेह्ड़े बुरे कम्मां करणे दे जरिये लोकां जो परमात्मे दिया सच्चाईया जो जाणने तांई रोकदे हन।

¹⁹ इसतांई कि परमात्मे दे बारे दा ज्ञान तिन्हां दे मनां च प्रगट ऐ, क्जोकि परमात्मैं अप्पु ई एह़ तिन्हां पर प्रगट कित्ता ऐ।

²⁰ परमात्मे दी सदा दी सामर्थ कने तिसदे गुण नीं दिक्खे जाई सकदे, अपर इसा सृष्टिया जो बणाणे ते पैहल्ले ई तिन्हीं दस्सी दित्ता, कि एह़ चीज्जां कुस साइआं हन, इसतांई तिन्हां लोकां अल्ल इसा गल्ला दे बारे च कोई भाना नीं ऐ, “कि अहां परमात्मे जो नीं जाणदे।”

²¹ ऐत्थु तिकर तिन्हां परमात्मे जो जाणी करी भी तिसियो इज्जत मान कने धन्यावाद नीं कित्ता, जिसदे सैह़ काबल ऐ, अपर वेबकूफी आल़िआं गल्लां सोचणा लग्गे, ऐत्थु तिकर कि तिन्हां तिंआं नीं सोचेया, जिंआं तिन्हां जो सोचणा चाइदा था।

²² सैह़ अपणे आप्पे जो अक्लमंद बणाई नैं मूर्ख बणी गै,

²³ कने तिन्हां हमेसा जिन्दे रैहणे आल़े प्रतापी परमात्मे दिया महिमा जो छड्डी करी, नास होणे आल़े माणुआं, पंछियां, चिड़ियां, कने रैंगणे आल़े जन्तुआं दी मूर्तिया दी महिमा कित्ती।

²⁴ इसा बज़ाह ते परमात्मैं तिन्हां जो तिन्हां दे मने दिया इच्छां दे मताबक बेसर्मी दे कम्मां तांई छड्डी दित्ता कि सैह़ अप्पु च बेसर्मी दे कम्मां च अपणे सरीरां दी बेइज्जती करन।

²⁵ क्जोकि तिन्हां परमात्मे दी सच्चाईया जो बदली नैं झूठ बणाई दित्या, कने सृष्टिया दी अराधना कने सेवा कित्ती, कने ना कि तिसदी जिन्हीं सारी सृष्टिया जो बणाया ऐ, जेह्ड़ा सदा महिमा दे काबल ऐ। आमीन।

²⁶ इसतांई परमात्मैं तिन्हां जो बेसर्मी दे कम्मां तांई छड्डी दित्ता; ऐत्थु तिकर कि तिन्हां दियां जणासां भी जायज रिस्तेयां जो नाजायज रिस्तेयां च बदली दित्ता।

²⁷ तिंआं ई मरद भी जणासां सौगी जायज रिस्तेयां जो छड्डी नैं अप्पु च उत्तेजित होई नैं जल़णा लग्गे, कने मरद मर्दां सौगी बेसर्मी दे कम्म करी नैं अपणिया गलतिया दी ठीक सज़ा पाई।

²⁸ जाह़लू तिन्हां परमात्मे दा सच्चा ज्ञान पाणा ठीक नीं समझेया, इसतांई परमात्मैं तिन्हां जो तिन्हां दी भरष्ठ अक्ला पर छड्डी दित्ता कि जिसते सैह़ बेकार दियां गल्लां सोचणा लग्गे।

²⁹ इसतांई सैह़ हर किस्मां दे बुरे कम्म, दुष्टता, लालच, बैरभाव नैं भरोई गै; जल़स, हत्या, झगड़े, छल कपट, रिस करणा, कने चुगलखोर,

³⁰ बदनाम करणे आल़े, परमात्मे नैं नफरत करणे आल़े, दूयेयां दा अपमान करणे आल़े, घमंडी, डींगमार, बुरिआं-बुरिआं गल्लां बणाणे आल़े, माँऊ बुढ़े दा हुक्म नीं मन्नणे आल़े,

³¹ बेअक्ले, बसुआसे च धोखा दैणे आल़े, कने बेरैहम होई गै।

³² सैह़ तां परमात्मे दी एह़ विधि जाणदे हन कि देहय्-देहय् कम्म करणे आल़े मौत्ती दी सज़ा दे हक्कदार हन, तमी ना सिर्फ अप्पु ई देहय् कम्म करदे हन अपर करणे आल़ेआं ते खुस भी हुंदे हन।