प्रकाशितवाक्य 8 - काँगड़ी

सतमी सील्ल कने सोन्ने दा धूपदान

¹ जाह़लू मेम्नैं सतमी सील्ल खोली, तां जेह्ड़े सुअर्गे थे, सैह़ अधे घंटे तिकर सांत होई गै।

² ताह़लू मैं तिन्हां सत्तां सुअर्गदूतां जो दिख्या जेह्ड़े परमात्मे सामणै खड़ोत्यो रैंह्दे हन, कने तिन्हां जो सत तुरहियां दित्तियां गियां।

³ भिरी इक्क होर सुअर्गदूत सोन्ने दा धूपदान लेई करी आया, कने वेदिया बक्खे खड़ोई गेआ; कने मता धूप दित्ता गेआ कि सब पवित्र लोकां दिया प्रार्थना सौगी सोन्ने दिया तिसा वेदिया पर चढ़ान, जेह्ड़ी सिंहासणे सामणै ऐ।

⁴ तिस धूपे दा धूँ पवित्र लोकां दिया प्रार्थना समेत सुअर्गदूते दे हत्थे नैं परमात्मे सामणै पुज्जी गेआ।

⁵ ताह़लू सुअर्गदूतैं धूपदान लेई करी तिस च वेदिया ते भखदे क्योले भरे कने धरतिया पर सट्टी दित्ते; कने बदल़ां दे गड़ाके, बिजल़ी चमकणा कने हिल्लण होणा लग्गे।

सत तुरहियां

⁶ ताह़लू तिन्हां सत्तां सुअर्गदूतां जिन्हां अल्ल सत तुरहियां थियां तिन्हां जो बजाणे तांई त्यार होये।

⁷ पैहल्ले सुअर्गदूतैं तुरही बजाई, कने तिसी बग्त आणी दी बरखा कने खूने नैं मिल्लेयो अंगारे धरतिया पर पै; इसा बज़ाह ते धरतिया दा त्रीआ हिस्सा फकौई गेआ, कने रूखां दा भी त्रीआ हिस्सा फकौई गेआ, कने सारा सैला घाह भी जल़ी गेआ।

⁸ दूये सुअर्गदूतैं तुरही बजाई, तां मन्ना अग्गी नैं जल़दा इक्क बड्डा प्हाड़ समुंदरे च पेई गेआ; इसा बज़ाह ते समुंदरे दा त्रीआ हिस्सा खून बणी गेआ,

⁹ कने समुंदरे दे त्रीये हिस्से दे सारे जन्तु मरी गै कने त्रीये हिस्से दे जाह्ज नास होई गै।

¹⁰ त्रीयें सुअर्गदूतैं तुरही बजाई, कने इक्क बड्डा तारा जेह्ड़ा मशाला साइआं जल़दा था सुअर्गे ते टूटेया, जिसदिया बज़ाह ते सैह़ नदियां दे त्रीये हिस्से पर कने पांणिये दे झरने पर आई पेआ।

¹¹ तिस तारे दा नां नागदौना ऐ। कने पांणिये दा त्रीआ हिस्सा नागदौने साइआं कौड़ा होई गेआ, कने बड़े माणु तिस पाणी दे कौड़े होई जाणे ते मरी गै।

¹² चौथे सुअर्गदूतैं तुरही बजाई, कने सूरजे दा त्रीआ हिस्सा, कने चन्द्रमे दा त्रीआ हिस्सा कने तारेयां दे त्रीये हिस्से पर मुसीबत आई, जिसदिया बज़ाह ते तिन्हां त्रीआ हिस्सा नेहरा होई गेआ कने दिने दा त्रीआ हिस्सा परगड़ा नीं रेह्आ, कने तिंआं ई राती भी।

¹³ जाह़लू मैं भिरी दिख्या, तां अम्बरे च इक्क बाज्जे जो उड़दे कने जोरे-जोरे नैं एह़ ग्लांदे सुणेया, “तिन्हां सुअर्गदूतां दी तुरहिया दिया बज़ाह ते जिसा दा बजाणा अह्ल्ली बाक्कि ऐ धरतिया दे रैहणे आल़ेआं पर हाय, हाय, हाय।”