प्रकाशितवाक्य 19 - काँगड़ी

¹ इसते बाद मैं सुअर्गे च मन्ना जिंआं इक्क बड्डिया भीड़ा जो जोरे नैं एह़ ग्लांदे सुणेया, “हाल्लेलूय्याह। उद्धार कने महिमा कने सामर्थ अहां दे परमात्मे दी ऐ।

² क्जोकि तिसदे फैसले सच्चे कने ठीक हन। इसतांई कि तिन्हीं तिसा बड्डिया वैश्या दा, जेह्ड़ी अपणे ब्यभिचारे नैं धरतिया जो बदनाम करदी थी, न्याय कित्ता कने तिसाते अपणे दासां दे खूने दा बदला लेआ ऐ।”

³ भिरी दूई बरी तिन्हां ग्लाया, “हाल्लेलूय्याह। तिसादे फकौणे दा धुआं जुगा-जुग उठदा रैंह्गा।”

⁴ ताह़लू चौबी स्याणेयां कने चौंन्नी प्राणियां गोड्डेयां दे भार आई नैं परमात्मे दी अराधना कित्ती, जेह्ड़ा सिंहासणे पर बैठेया था, कने ग्लाया, “आमीन। हाल्लेलूय्याह।”

मेम्ने दा ब्याह

⁵ कने ताह़लू सिंहासणे ते इक्क उआज़ा आई, “हे अहां दे परमात्मे ते डरणे आल़े दासो, क्या छोटे, क्या बड्डे; तुहां सारे तिसदी स्तुति करा।”

⁶ भिरी मैं बड़िया भीड़ा साइआं, कने मते पांणिये साइआं कने गड़ाकेयां साइआं जोरे दी उआज़ सुणी: “हाल्लेलूय्याह! क्जोकि प्रभु अहां दा परमात्मा सर्वशक्तिमान राज्ज करदा ऐ।

⁷ ओआ अहां खुस कने मग्न होन, कने तिसदी स्तुति करन, क्जोकि मेम्ने दा ब्याह आई रेह्आ ऐ, कने तिसदिया दुल्हना अपणे आप्पे जो त्यार करी लेआ ऐ।

⁸ तिसा जो साफ-चिट्टे कने चमकदार मलमल पैहनणे दा हुक्म दित्ता गेआ, क्जोकि तिस मलमले दा मतलब परमात्मे दे लोकां दे धार्मिक कम्म हन।”

⁹ ताह़लू सुअर्गदूतैं मिन्जो ग्लाया, “एह़ लिख कि धन सैह़ हन, जेह्ड़े मेम्ने दे ब्याये दिया धामा च सद्देयो हन।” भिरी तिन्हीं मिन्जो ग्लाया, “एह़ वचन परमात्मे दे सच्चे वचन हन।”

¹⁰ ताह़लू मैं तिसदी अराधना करणे तांई तिसदे पैरां पेई गेआ। तिन्हीं मिन्जो ग्लाया, “दिक्ख, इआं मत कर, मैं तेरा कने तेरे भाऊआं दा संगी दास ऐ जेह्ड़े यीशुये दे गवाह पक्के हन। परमात्मे दी अराधना कर। क्जोकि यीशु दी गवाही भविष्यवाणी दी आत्मा ऐ।”

चिट्टे घोड़े पर सवार

¹¹ भिरी मैं सुअर्गे जो खुलेया दिख्या, कने तित्थु इक्क चिट्टा घोड़ा दिख्या; कने तिस पर इक्क सवार ऐ, जिस पर तुहां बसुआस करी सकदे हन, जेह्ड़ा सच्च ग्लांदा ऐ; कने सैह़ धार्मिकता नैं न्याय कने लड़ाई करदा ऐ।

¹² तिसदियां अखीं अग्गी साइआं हन, कने तिसदे सिरे पर मते सारे मुकट हन। तिस पर इक्क नां लिख्या ऐ, जिसियो तिसियो छड्डी होर कोई नीं जाणदा।

¹³ तिन्हीं खूने नैं गुआचेया कपड़ा पैहनेया ऐ, कने तिसदा नां परमात्मे दा वचन ऐ।

¹⁴ सुअर्गे दी सेना चिट्टे घोड़ेयां पर सवार कने चिट्टे कने साफ मलमल पैहनी करी तिसदे पचांह़-पचांह़ हन।

¹⁵ जाति-जाति दे लोकां जो मारने तांई तिसदे मुँऐ ते इक्क तेज तलवार निकल़ादी ऐ। सैह़ लोहे दा बैंत लेई करी तिन्हां पर राज्ज करगा, कने सर्वशक्तिमान परमात्मे दे खतरनाक गुस्से दिया मदिरा दे कोलूये च दाख दरड़गा।

¹⁶ तिसदे कपड़े कने जंघा पर एह़ नां लिख्या ऐ, “राजेयां दा राजा कने प्रभुआं दा प्रभु।”

¹⁷ भिरी मैं इक्की सुअर्गदूते जो सूरजे पर खड़ोत्यो दिख्या। तिन्हीं जोरे नैं डड्डी करी अम्बरे च उडणे आल़े सारे पंछियां जो ग्लाया, “ओआ, परमात्मे दिया धामा तांई किठ्ठे होई जा,

¹⁸ जिसते तुहां राजेयां दा, अधिकारियां दा, ताकतवर मर्दां दा, घोड़ेयां दा, तिन्हां पर सवारां दा, कने क्या अजाद, क्या दास, क्या छोटे क्या बड्डे, सारेयां माणुआं दा मांस खा।”

¹⁹ भिरी मैं तिस जंगली जानवरे कने धरतिया दे राजेयां कने तिन्हां दी सेना जो तिस घोड़े दे सवारे कने तिसदिया सेना सौगी लड़णे तांई किठ्ठे दिख्या।

²⁰ सैह़ जंगली जानवर, कने तिस सौगी सैह़ झूठा भविष्यवक्ता पकड़ेया गेआ जिन्हीं तिसदे सामणै ऐदेय चमत्कार दस्सेयो थे जिन्हां दे जरिये तिन्हीं तिन्हां जो भटकाया जिन्हां पर तिस जंगली जानवरे दी मोहर थी कने जेह्ड़े तिसदिया मूर्तिया दी अराधना करदे थे। एह़ दोयो जिन्दे जी तिसा अग्गी दी झीला च पाई दित्ते, जेह्ड़ी गंधका नैं बल़दी ऐ।

²¹ कने बाक्कि लोक तिस घोड़े पर सवारे दी तलवारा नैं, जेह्ड़ी तिसदे मुँऐ ते निकल़ादी थी, मारी दित्ते गै, कने सारे पंछी तिन्हां दा मांसे खाई नैं रज्जी गै।