प्रकाशितवाक्य 18 - काँगड़ी

बेबीलोने सैहरे दा नास

¹ “इसते बाद मैं इक्क होर सुअर्गदूते जो सुअर्गे ते लौंदे दिख्या, सैह़ बड़ा सामर्थी था; कने धरती तिसदे तेजे नैं चमकी गेई।

² तिन्हीं जोरे नैं डड्डी करी ग्लाया, नास होई गेआ, बड्डा बेबीलोन सैहर नास होई गेआ सैह़ दुष्टआत्मां दा घर कने हर इक्क बुरिआ आत्मा दा अड्डा, कने हर इक्क बुरे कने घृणित पंछिये दा अड्डा बणी गेआ।

³ क्जोकि तिसादे ब्यभिचार दे खतरनाक मदिरा दिया बज़ाह ते सारियां जातिआं नास होई गियां हन, कने धरतिया दे राजेयां तिसा सौगी ब्यभिचार कित्या ऐ, कने धरतिया दे बपारी तिसादे सुख विलासे दिया बज़ाह ते बड़े अमीर होये हन।”

⁴ भिरी मैं सुअर्गे ते इक्क होर उआज़ सुणी, हे मेरे लोको, “तिसते निकल़ी ओआ कि तुहां तिसदे पापां च साझी मत होएया, कने तिसदे खतरेयां ते कोई तुहां पर आई नीं पोयैं।

⁵ क्जोकि तिसदे पापां दा ढेर इतणा ऊचा होई गेआ ऐ जितणा ऊचा सुअर्गे ऐ क्जोकि परमात्मे तिसदे कम्मां जो याद कित्ता ऐ।

⁶ जिंआं तिन्हीं तुहां जो दित्या ऐ तिंआं ई तिसियो देआ, कने तिसदे कम्मां मताबक तिसियो दो गुणा जादा देआ; जिस कटोरे च तिन्हीं भरी करी दित्या था तिस च ई तिस तांई दो गुणा भरी देआ।

⁷ जितणी तिन्हीं अपणी तारीफ कित्ती कने सुख विलास कित्ता, तितणी तिसियो पीड़ा कने दुख देआ; क्जोकि सैह़ अपणे मने च ग्लांदी ऐ, ‘मैं राणिया साइआं विराजमान ऐ, बिधवा नीं, कने सोग कदी नीं मनांगी।’

⁸ इसा बज़ाह ते चाणचक तिसी बग्त तिसा पर खतरा आई पोंगा, अपर मौत्त, सोग, अकाल, कने सैह़ अग्गी च भस्म करी दित्ती जांगी, क्जोकि तिसादा न्यायी प्रभु परमात्मा शक्तिमान ऐ।

⁹ “धरतिया दे राजेयां जिन्हां तिसा सौगी ब्यभिचार कने सुख विलास कित्ता, जाह़लू तिसादे जल़णे दा धुआं दिक्खगे, तां तिसा तांई रोंगे कने छातिया पिट्टगे।

¹⁰ तिसा दिया पीड़ा दे डरे दे मारे सैह़ बड़ी दूर खड़ोई नैं ग्लांगे, ‘हे बड्डे सैहर, बेबीलोन। हे मजबूत सैहर हाय! हाय! चाणचक तिज्जो सज़ा मिल्ली गियो ऐ।’

¹¹ “धरतिया दे बपारी तिसा तांई रोंगे कने विलाप करगे, क्जोकि हुण तिन्हां दियां चीज्जां जो कोई नीं खरीदगा;

¹² मतलब सोन्ना, चाँदी, नग, मोती, मलमल, बैजनी, रेशमी, लाले रंगे दे कपड़े, हर किस्मा दी खुसबुदार लकड़ी, हाथिये दे दंदे दी बणियां होईयां हर किस्मा दियां चीज्जां, कीमती लकड़ी, पित्तल़, लोहे कने संगमरमरे नैं बणियां होईयां हर किस्मा दियां चीज्जां,

¹³ कने दाल चीनी, मसाले, धूप, इत्तर, लोबान, मदिरा, तेल, मैदा, कणक, गाय-दांद, भेड्ड-बकरियां, घोड़े, रथ, दास, कने माणुआं दे प्राण।

¹⁴ हुण तेरे मने जो खरे लगणे आल़े फल़ तिज्जो ते जांदे रैह्, कने एसो-अराम कने सानो-सौकत दियां चीज्जां तिज्जो ते दूर होईयां हन, कने सैह़ भिरी तिज्जो कदी नीं मिलगियां।

¹⁵ इन्हां चीज्जां दे बपारी जेह्ड़े तिसा दिया बज़ाह ते अमीर होएयो थे, तिसा दिया पीड़ा दे डरे दे मारे दूर खड़ोंगे, कने रोंदे कने सोग मनांदे एह़ ग्लांगे,

¹⁶ ‘हाय। हाय। एह़ बड्डा सैहर जेह्ड़ा मलमल, बैगणी कने लाले रंगे दे कपड़े पैहनेयो था, कने सोन्ने, नगां कने मोतिआं नैं सज्जया था;

¹⁷ चाणचक ई तिसदी इतणी भारी धन-दौलत नास होई गेई।’ कने हर इक्क समुंदरी जाह्जे दा कप्तान कने तिस च यात्रा करणे आल़े, किस्तिया चलाणे आल़े, कने जितणे समुंदरे ते पैसा कम्मांदे हन, सारे दूर खड़ोई नैं,

¹⁸ कने तिसादे फकौणे दे धूयें जो दिक्खी नैं डड्डी करी ग्लांगे, ‘कुण देहया सैहर इस बड्डे सैहरे साइआं ऐ?’

¹⁹ कने अपणे-अपणे सिरां पर धूड़ पांगे, कने रोंदे, सोग मनांदे होये डड्डी-डड्डी करी ग्लांगे, ‘हाय। हाय। एह़ बड्डा सैहर चाणचक ई उजड़ी गेआ, जिसदिया धन-दौलता दे जरिये सारे समुंदरी जाह्जे आल़े अमीर होई गियो थे।’

²⁰ तुहां जेह्ड़े सुअर्गे च रैंह्दे हन, कने हे परमात्मे दे लोको, प्रेरितो, भविष्यवाणी करणे आल़ेयो, तिस पर खुसी मनाआ, क्जोकि परमात्मैं न्याय करी नैं तिसते तुहां दा बदला लेई लेआ ऐ।”

²¹ भिरी इक्क ताकतवर सुअर्गदूतैं बड्डिया चक्किया दिया सिल्ला साइआं इक्क पत्थर चुकेया, कने एह़ ग्लाई करी समुंदरे च सट्टी दित्ता, “बड्डा सैहर बेबीलोन इआं बड़िया ताकता नैं नास कित्ता जांगा, कने भिरी तिसदा कदी भी कोई पता नीं लगगा।

²² बीण बजाणे आल़ेआं दी, गीत गाणे आल़ेआं दी, बंसरी बजाणे आल़ेआं दी, कने तुरही बजाणे आल़ेआं दी उआज़ भिरी कदी भी तिज्जो नीं सुम्मगी; कने हुण ते कुसी भी कारीगरे दा कम्म भिरी कदी तिज्जो च नीं मिलगा; कने चक्किया चलणे दी उआज़ भिरी कदी तिज्जो नीं सुम्मगी;

²³ कने दीय्ये दी लौ भिरी कदी तिज्जो च नीं चमकगी, कने लाड़े कने लाड़िया दिया उआज़ भिरी कदी तिज्जो नीं सुम्मगी; क्जोकि तेरे बपारी धरतिया दे प्रधान थे, कने तेरे टूणे ते सारियां जातिआं भटकाईयां गियां थियां।

²⁴ भविष्यवक्तां कने परमात्मे दे लोकां, कने धरतिया पर सारे खत्म कित्तेयां दा खून बेबीलोने च ई मिल्ला।”