प्रकाशितवाक्य 17 - काँगड़ी

बड्डी वैश्या

¹ जिन्हां सत सुअर्गदूतां अल्ल सैह़ सत कटोरे थे, तिन्हां च इक्की आई करी मिन्जो नैं एह़ ग्लाया, “ऐत्थु आ, मैं तिज्जो तिस बड्डी वैश्या दी सज़ा दस्सें, जेह्ड़ी मते पांणिये च बैठियो ऐ,

² जिसा सौगी धरतिया दे राजेयां ब्यभिचार कित्या; कने संसारे दे लोक तिसादे ब्यभिचारे दिया मदिरा नैं मतवाल़े होई गियो थे।”

³ ताह़लू सैह़ मिन्जो पवित्र आत्मा च सुनसाण जगाह जो लेई गेआ, तित्थु मैं लाले रंगे दे जंगली जानवरे पर इक्की जणासा जो बैठेया दिख्या, जेह्ड़ा निंदा दे सब्दां नैं भरोया था कने जिसदे सत सिर कने दस सींग थे।

⁴ एह़ जणांस बैंजनी कने लाले रंगे दे कपड़े पैहनी करी बैठियो थी, कने सोन्ने कने बड़े कीमती मणियां कने मोतिआं नैं सजियो थी, कने तिसादे हत्थां च इक्क सोन्ने दा कटोरा था जेह्ड़ा घृणित चीज्जां नैं कने तिसदे ब्यभिचारे दी बुरी चीज्जां नैं भरोया था।

⁵ तिसादे मत्थे पर इक्क नां, इक्क भेत लिख्या था, “बड्डा बेबीलोन सैहर धरतिया पर वैश्यां कने घृणित चीज्जां दी माँ।”

⁶ मैं तिसा जणासा जो परमात्मे दे लोकां दा खून कने यीशुये दे गवाहां दा खून पीणे ते मतवाल़ी दिख्या; तिसा जो दिक्खी करी मैं हरान होई गेआ।

⁷ ताह़लू सुअर्गदूतैं मिन्जो नैं ग्लाया, “तू क्जो हरान होएया? मैं इसा जणासा कने तिस जंगली जानवरे दा, जिस पर सैह़ सवार ऐ कने जिसदे सत सिर कने दस सींग हन, तिज्जो भेत दस्सदा।

⁸ जेह्ड़ा जंगली जानवर तैं दिख्या ऐ, सैह़ पैहल्लैं तां था पर हुण नीं ऐ, कने अथाह कुंडे ते निकल़ी करी विनाशे च पोंगा; कने संसारे दे लोक जिन्हां दे नां सृष्टिया दे सुरू होणे दे बग्ते ते तिसा ज़िन्दगिया दिया कताबा च लिखे नीं गै, इस जंगली जानवरे दी एह़ हालत दिक्खी करी कि पैहल्ले था कने हुण नीं ऐ कने भिरी आई जांगा, हरान हुंगे।

⁹ “एह़ समझणे तांई ज्ञान होणा जरूरी ऐ, सैह़ सत सिर सत प्हाड़ हन जिन्हां पर सैह़ जणांस बैठियो ऐ।

¹⁰ सैह़ सत राजे भी हन, पंज तां मरी चुकेयो हन, कने तिन्हां च इक्क अह्ल्ली भी राजा ऐ, कने आखरी आल़ा अह्ल्ली तिकर बापस आया नीं, अपर जाह़लू सैह़ ओंगा तां सैह़ थोड़े बग्त तिकर ई राज्ज करगा।

¹¹ जेह्ड़ा जंगली जानवर पैहल्ले था, कने हुण नीं ऐ, सैह़ अप्पु अठमा ऐ कने तिन्हां सत्तां च पैदा होएया, कने विनाशे च पोंगा।

¹² जेह्ड़े दस सींग तैं दिक्खे सैह़ दस राजे हन जिन्हां जो अह्ल्ली तिकर राज्ज नीं मिल्ला, अपर तिस जंगली जानवरे सौगी कुच्छ बग्ते तांई राजेयां साइआं राज्ज करगे।

¹³ एह़ सब इक्क मन हुंगे, कने सैह़ अपणी सामर्थ कने राज्ज तिस जंगली जानवरे जो दिंगे।

¹⁴ “सैह़ मेम्ने सौगी लड़गे, कने मेम्ना तिन्हां जो जीत्ती लैंगा, क्जोकि सैह़ प्रभुआं दा प्रभु कने राजेयां दा राजा ऐ, कने जेह्ड़े सद्देयो कने चुणेयो कने बसुआसी हन सैह़ तिस सौगी हन; सैह़ भी जीत्ती लैंगे।”

¹⁵ भिरी तिन्हीं मिन्जो नैं ग्लाया, “जेह्ड़ा पाणी तू दिख्या, जिस पर वैश्या बैठियो ऐ, सैह़ तां लोक, देस, जातिआं कने भासां हन।

¹⁶ जेह्ड़े दस सींग तू दिख्यो, सैह़ कने जंगली जानवर तिसा वैश्या सौगी बैर रखगे, कने तिसा जो बेबस कने नंगी करी दिंगे, कने तिसादा मांस खाई जांगे, कने तिसा जो अग्गी च फुकी दिंगे।

¹⁷ क्जोकि परमात्मा तिन्हां दे मने च एह़ पांगा कि सैह़ तिसा दिया इच्छा पूरी करन, कने जाह़लू तिकर परमात्मे दा वचन पूरा नीं होई लैं ताह़लू तिकर इक्क मन होई करी अपणा-अपणा राज्ज तिस जंगली जानवरे जो देई दैन।

¹⁸ सैह़ जणांस, जिसा जो तैं दिख्या ऐ, सैह़ बड्डा सैहर ऐ जेह्ड़ा धरतिया दे राजेयां पर राज करदा ऐ।