प्रकाशितवाक्य 16 - काँगड़ी

परमात्मे दे गुस्से दे सत कटोरे

¹ तिसते बाद भिरी मैं मंदरे च कुसी जो जोरे नैं तिन्हां सत सुअर्गदूतां जो एह़ ग्लांदे सुणेया, “जा, परमात्मे दे गुस्से दे सतां कटोरेयां जो धरती पर डोली देआ।”

² तां पैहल्ले सुअर्गदूतैं जाई करी अपणा कटोरा धरती पर डोली दित्ता। तिसदा नतीजा एह़ होएया कि तिन्हां माणुआं दे जिन्हां पर तिस पैहल्ले जंगली जानवरे दी मोहर थी कने जेह्ड़े तिसदिया मूर्तिया दी अराधना करदे थे, इक्क दुख दैणे आल़ा कने जान्नलेवा फोड़ा निकल़ेया।

³ दूँये सुअर्गदूतैं अपणा कटोरा समुंदरे पर डोली दित्ता, कने सैह़ मरेयो माणुआं दे खूने साइआं बणी गेआ, कने समुंदरे दी हर इक्क चीज्ज जिन्हां च प्राण थे मरी गेई।

⁴ त्रीये सुअर्गदूतैं अपणा कटोरा नदियां च कने पांणिये दे झरनेयां च डोली दित्ता, कने सैह़ खून बणी गै।

⁵ ताह़लू मैं सुअर्गदूते जो एह़ ग्लांदे सुणेया, जिस अल्ल सारे पांणिये पर हक्क ऐ, “हे पवित्र परमात्मा, जेह्ड़ा ऐ कने जेह्ड़ा हमेसा था, तू न्यायी ऐ कने तैंईं एह़ न्याय कित्ता।

⁶ क्जोकि तिन्हां परमात्मे दे लोकां कने भविष्यवक्तां दा खून बहाया था, कने तैंईं तिन्हां जो खून पिलाया; क्जोकि सैह़ इसी जोग्गे हन।”

⁷ भिरी मैं वेदिया ते एह़ उआज़ सुणी, “हाँ, हे सर्वशक्तिमान प्रभु परमात्मा, तेरे फैसले ठीक कने सच्चे हन।”

⁸ चौथे सुअर्गदूतैं अपणा कटोरा सूरजे पर डोली दित्ता, कने तिस सूरजे जो एह़ हक्क दित्ता कि लोकां जो अपणिया गर्मिया नैं झुल़साई दैं।

⁹ लोक बड़ी तेज गर्मिया नैं झुल़सी गै, कने परमात्मे दे नांऐ दी जिसियो इन्हां खतरेयां पर हक्क ऐ, निंदा कित्ती पर परमात्मे दी महिमा करणे तांई मन नीं बदलेया।

¹⁰ पजमें सुअर्गदूतैं अपणा कटोरा तिस पैहल्ले जानवरे दे सिंहासणे पर डोली दित्ता, कने तिसदे पूरे राज्जे पर नेहरा छाई गेआ। लोक पीड़ा दिया बज़ाह ते अपणिया-अपणिया जीभा चबाणा लग्गे,

¹¹ कने अपणियां पीड़ां कने फोड़ेयां दिया बज़ाह ते सुअर्गे दे परमात्मे दी निंदा कित्ती; अपर अपणे-अपणे कम्मां ते मन नीं बदलेया।

¹² छेमें सुअर्गदूतैं अपणा कटोरा बड्डी नदी फराता पर डोली दित्ता, कने तिसादा पाणी सुकी गेआ कि पूरब दिसा दे राजेयां तांई रस्ता त्यार होई जां।

¹³ भिरी मैं तिस अजगरे दे मुँऐ ते, कने तिस पैहल्ले जानवरे दे मुँऐ ते, कने तिस झूठे भविष्यवक्ता दे मुँऐ ते तीन दुष्टआत्मां जो मेंढकां दे रूपे च निकल़दे दिख्या।

¹⁴ एह़ चमत्कार दस्सणे आल़िआं दुष्टआत्मां हन, जेह्ड़ियां सारे संसारे ते निकल़ी करी राजेयां अल्ल इसतांई जांदियां हन कि तिन्हां जो सर्वशक्तिमान परमात्मे दे तिस न्याय दे दिने दी लड़ाईया तांई किठ्ठा करन।

¹⁵ तां प्रभु यीशुयैं ग्लाया, “दिक्ख, मैं चोरे साइआं ओंदा ऐ; धन सैह़ ऐ जेह्ड़ा जागदा रैंह्दा ऐ, कने अपणे कपड़ेयां दी रखवाल़ी करदा ऐ कि नंगा नीं घूमे, कने लोक तिसदा नंगापन नीं दिक्खन।”

¹⁶ कने तिन्हां राजेयां जो तिसा जगाह किठ्ठा कित्ता, जिसियो इब्रानी च हर-मगिदोन ग्लांदे हन।

¹⁷ सतमें सुअर्गदूतैं अपणा कटोरा हौआ पर डोली दित्ता, कने मंदरे दे सिंहासणे ते एह़ उआज़ आई, “पूरा होई गेआ।”

¹⁸ भिरी बिजल़ी चमकी, कने उआज़ कने गड़ाके होये, कने इक्क इतणा बड्डा हिल्लण होएया, कि जाह़लू ते माणुये सुरुआत धरतिया पर होई, ताह़लू ते इतणा बड्डा हिल्लण कदी नीं होएया था।

¹⁹ इसते बाद तिस बड्डे सैहरे दे त्रै टुकड़े होईये, सारे देस नास होई गै; परमात्मे बेबीलोन सैहरे जो याद कित्ता कि तिसियो अपणे गुस्से दी मदिरा पिलां।

²⁰ कने हर इक्क टापू अपणिया जगाह ते गायब होई गेआ, कने प्हाड़ां दा पता नीं लग्गा।

²¹ अम्बरे ते लोकां पर मणे-मणे दा सणाट पेआ कने इसतांई कि खतरे बड़े ई भारी थे, लोक सणाटे दिया बज़ाह ते परमात्मे दी निंदा करणा लग्गे क्जोकि एह़ खतरा झेलणे ते बाहर था।