फिलिप्पियों 2 - काँगड़ी

मसीह दी दीनता कने महानता

¹ इसतांई जे तुहां लोकां च मसीह च जरा भी हौंसला, प्यारे दे जरिये पैदा सबर, आत्मा दी संगति, कुच्छ करूणा कने दया ऐ,

² तां इक्क मन, इक्को ई देहया प्यार, अप्पु च मेल-जोल, कने इक्को ई नेक इरादा रखी नैं मेरिया खुसिया जो पूरा करा।

³ अपणे फायदे तांई कने घमंड नैं कुच्छ भी मत करा, अपर दीनता नैं इक्की दूये जो अपणे ते जादा अच्छा समझा।

⁴ हर इक्क अपणिया भलाई दी नीं, अपर दूयेयां दी भलाई दी भी फिकर करैं।

⁵ जिंआं यीशु मसीह दा सभाव था तिंआं ई तुहां दा सभाव भी इक्की दूये नैं होयैं;

⁶ हलांकि मसीह साक्षात परमात्मा था भिरी भी तिन्हीं कुसी जो मजबूर नीं कित्ता, कि लोक तिस नैं परमात्मे साइआं बर्ताब करन।

⁷ अपर अपणे आप्पे जो देहया जीरो करी दित्ता, कने दासे दा रूप धारण कित्ता, कने सैह़ माणुये साइआं बणी गेआ।

⁸ कने माणुये दे रूपे च प्रगट होई नैं अपणे आप्पे जो दीन कित्ता, कने मौत्ती तिकर आज्ञाकारी बणी गेआ ऐत्थु तिकर कि सूल़िया दी दर्दनाक मौत्त भी झेली लेई।

⁹ इसतांई परमात्मैं तिसियो सबते ऊची पदवी दित्ती, कने तिसियो सैह़ नां दित्ता जेह्ड़ा सारे नां च म्हान ऐ,

¹⁰ कि जेह्ड़े सुअर्ग च कने धरतिया पर कने जेह्ड़े धरतिया थल्लै हन, सैह़ सारे यीशुये दे नांऐ च तिसियो आदर दैणे तांई घुटने टेकन,

¹¹ कने पिता परमात्मे दी महिमा तांई हर इक्क माणु अपणे मुँऐ नैं एह़ मन्नी लैं कि यीशु मसीह ई प्रभु ऐ।

संसारे च जोतिया साइआं चमका

¹² इसतांई हे प्यारे साथी बसुआसियो, जिस तरीके नैं तुहां सदा ते हुक्म मनदे आएयो हन, तिंआं ई हुण भी ना सिर्फ मिन्जो सौगी रैंह्दे होये अपर खास करी नैं हुण मेरे दूर रैहणे पर भी डरदे कने कम्मदे होये, लगातार खरे कम्म करदे रेह्आ, जेह्ड़े तुहां दे उद्धारे ते ओंदे हन।

¹³ क्जोकि परमात्मा ई ऐ, जेह्ड़ा अपणिया आत्मा दे जरिये तुहां दे मने च तिसदी भली इच्छा कने खरे कम्मां जो करणे दी हिम्मत दिंदा ऐ।

¹⁴ सारा कम्म बगैर बुड़बुड़ाये कने बगैर झगड़े दे करदे रेह्आ,

¹⁵ तांजे तुहां बेकसूर कने भोल़े होई नैं टेढे कने बेइमान लोकां दे बिच्च परमात्मे दी बेदाग औलाद बणी रेह्आ, कने जिन्हां बिच्च तुहां ज़िन्दगिया दा वचन लेई करी संसारे च अम्बरे दे तारेयां साइआं चमकदे दुस्सा दे हन।

¹⁶ तांजे मसीह दे बापस ओणे दे दिन मिन्जो घमंड करणे दी बज़ाह होयैं, कने ना मेरी नठ्ठ-भज्ज कने ना मेरी कड़ी मेहनत करणा बेकार होई।

¹⁷ तुहां दा मसीह च बसुआस कने तुहां दी सेवा परमात्मे तांई चढ़ाईया बल़िया साइआं ऐ। जे सैह़ मिन्जो मारी भी दैन, तमी मैं खुस ऐ, कने तुहां सबना सौगी खुसी मनांदा ऐ।

¹⁸ तिंआं ई तुहां भी खुस होआ, कने मिन्जो सौगी खुसी मना।

तीमुथियुस कने इपफ्रुदीतुस

¹⁹ मिन्जो प्रभु यीशु च आसा ऐ कि मैं तीमुथियुसे जो तुहां अल्ल तौल़ी घल्लगा, तांजे तुहां दी हालत सुणी नैं मेरा हौंसला बधें।

²⁰ क्जोकि मिन्जो अल्ल देहय् सभावे दा कोई नीं जेह्ड़ा सुद्ध मने नैं तुहां दी फिकर करैं।

²¹ क्जोकि सारे अपणे मतलबे दिया तोपा च रैंह्दे हन, ना कि यीशु मसीह दी।

²² अपर तुहां तां तीमुथियुसे दिया काबलियता जो जाणदे हन कि जिंआं पुत्तर बुढ़े सौगी करदा ऐ, तिंआं ई तिन्हीं सुसमाचार फैलाणे च मिन्जो सौगी कड़ी मेहनत कित्ती।

²³ इसतांई मिन्जो आसा ऐ कि जिंआं ई मिन्जो पता लग्गी जांगा कि मेरी क्या हालत हुंगी, तिंआं ई मैं तिसियो तिसी बग्त घल्ली दिंगा।

²⁴ कने मिन्जो प्रभु च भरोसा ऐ कि मैं अप्पु भी तौल़ी ओंगा।

²⁵ अपर मैं इपफ्रुदीतुसे जो तुहां अल्ल बापस घल्लणा जरूरी समझेया। जेह्ड़ा मेरा बसुआसी भाऊ, कने मिन्जो सौगी कम्म करणे आल़ा, संगी सपाई, कने तुहां दा संदेस पजाणे आल़ा, कने जरूरी गल्लां च मेरी सेवा टहल करणे आल़ा ऐ।

²⁶ क्जोकि तिसदा मन तुहां सारेयां च लगेया था, कने सैह़ बचैन रैंह्दा था क्जोकि तुहां तिसदिया बमारिया दा हाल सुणेया था।

²⁷ सच्ची च सैह़ बमार तां होई गेआ था ऐत्थु तिकर कि मरने पर था, अपर परमात्मैं तिस पर दया कित्ती, कने ना सिर्फ तिस पर अपर मिन्जो पर भी, कि मिन्जो होर जादा दुखी ना होणा पोयैं।

²⁸ इसतांई मैं तिसियो घल्लणे दी होर भी कोसस कित्ती कि तुहां तिस नैं मिल्ली नैं खुस होई जा कने मेरी फिकर भी कम होई जां।

²⁹ इसतांई तुहां प्रभु च तिस नैं बड़िया खुसिया नैं मिलणा, कने तुहां जो तिसदा कने जेह्ड़े तिस साइआं हन आदर करणा चाइदा,

³⁰ क्जोकि सैह़ मसीह दे कम्मे तांई अपणे प्राणा जो खतरे च पाई नैं मौत्ती नेड़े आई गेआ था तांजे जेह्ड़ी कमी तुहां दे पास्से ते मेरी सेवा च होई तिसायो पूरी करैं।