मरकुस 6 - काँगड़ी

नासरत सैहरे च यीशुये दा अपमान

¹ यीशु कफरनहूम सैहरे ते निकल़ी करी अपणे सैहर नासरते च आया, कने तिसदे चेले भी पचांह़ आये।

² बिस्रामे आल़े दिन सैह़ आराधनालय च जाई नैं सिक्षा दैणा लग्गा, कने मते लोक सुणी नैं हरान होये कने ग्लाणा लग्गे, “इसियो एह़ गल्लां कुत्थू ते आई गियां? एह़ कुण देआ ज्ञान ऐ जेह्ड़ा इसियो दित्या ऐ? सामर्थी दे कम्म किंआं इसदे हत्थां ते हुंदे हन?

³ क्या एह़ सैई तरखाण नीं, जेह्ड़ा मरियम दा पुत्तर, कने याकूबे, योससे, यहूदा कने शमौने दा भाऊ ऐ? क्या तिसदियां बैह्णी अहां सौगी नीं रैंह्दियां?” इसतांई तिन्हां तिसियो नीं अपनाया।

⁴ यीशुयैं तिन्हां नैं ग्लाया, “भविष्यवक्ता दा अपणे लाक्के, कने अपणे रिस्तेदारां च, कने अपणे घरे जो छड्डी नैं सब जगाह आदर हुंदा।”

⁵ यीशु अपणे सैहर नासरते च कोई सामर्था दा कम्म नीं करी सकेया, सिर्फ थोड़े दे बमारां पर हत्थ रखी नैं तिन्हां जो खरा कित्ता।

⁶ कने यीशु तिन्हां दे बेबसुआसे जो दिक्खी करी हरान होएया, ताह़लू सैह़ अक्खे-बक्खे दे ग्रां-ग्रां च जाई-जाई करी सिक्षा दिंदा रेह्आ।

बारांह चेलेयां जो घल्लणा

⁷ यीशुयैं बारांह चेलेयां जो अप्पु अल्ल सद्देया कने तिन्हां जो दो-दो करी नैं घल्लणा लग्गा; कने तिन्हां जो दुष्टआत्मां जो कड्डणे दा हक्क दित्ता।

⁸ तिन्हीं चेलेयां जो हुक्म दित्ता, “कि रस्ते तांई सोठिया जो छड्डी नैं होर कुच्छ मत लेआ; ना तां रोटी, ना झोल़ी, ना तां बटुए च पैसे,

⁹ कने जूत्तेयां पैहना अपर अप्पु सौगी दूई कपड़ेयां दी जोड़ी मत रखा।”

¹⁰ कने यीशुयैं तिन्हां जो ग्लाया, “जिस सैहरे च तुहां कुसी दे घरे च जान, तां जाह़लू तिकर तिस सैहरे ते तुहां जो ना घल्लन, ताह़लू तिकर तिसी घरे च परोणा बणी नैं रेह्आ।

¹¹ जे तिसा जगाह दे लोक तुहां दा आदर ना करन, कने तुहां दी नीं सुणन, औत्थू ते निकल़दे ई अपणे पैरां दिया धूड़ी झाड़ी देआ, तांजे एह़ तिस सैहरे दे लोकां जो दस्सगा कि परमात्मा तिन्हां दा न्याय करगा।”

¹² ताह़लू तिन्हां चेलेयां जाई नैं एह़ प्रचार कित्ता कि मने जो बदला,

¹³ कने मतेआं लोकां दियां दुष्टआत्मां जो कड्डेया, कने मतेआं बमारां पर तेल मल़ी नैं तिन्हां जो खरा कित्ता।

यूहन्ना बपतिस्मा दैणे आल़े दी हत्या

¹⁴ कने हेरोदेस राजैं लोकां ते यीशुये दे बारे च सुणेया, क्जोकि तिसदे नांऐ दी चर्चा हर जगाह होआ दी थी, कने तिन्हां च कुच्छ लोकां ग्लाया, “यूहन्ना बपतिस्मा दैणे आल़ा मरेयां ते जिन्दा होईया ऐ, इसतांई तिसते एह़ सामर्थी दे कम्म प्रगट हुंदे हन।”

¹⁵ तिन्हां च कुच्छ लोकां ग्लाया, “एह़ यीशु एलिय्याह ऐ।” अपर कुच्छ लोक ग्लाणा लग्गे, “भविष्यवक्ता या भविष्यवक्तां च कुसी इक्की साइआं ऐ।”

¹⁶ एह़ सुणी नैं हेरोदेस राजैं ग्लाया, “जिस यूहन्ने दा सिर मैं कटवाया था, सैह़ मरेयां ते जिन्दा होईया ऐ।”

^17-18 हेरोदेस राजैं अपणे भाऊ फिलिप्पुसे दिया लाड़िया हेरोदियासा नैं ब्याह करी लेआ था, इसतांई यूहन्ने हेरोदेस राजे जो ग्लाया था, “व्यबस्था दे मताबक तिज्जो अपणे भाऊये दिया लाड़िया नैं ब्याह करणा ठीक नीं ऐ इसा गल्ला पर यूहन्ने हेरोदेस राजे जो झिड़केया।” इसतांई हेरोदेस राजैं सपाईयां जो घल्ली नैं यूहन्ने जो पकड़ुआई नैं जेला च पाई दित्या था।

¹⁹ इसतांई हेरोदियास यूहन्ने नैं बैर रखदी थी कने सैह़ तिसियो मरुवाणा चांह़दी थी; अपर इआं नीं होई सकेया।

²⁰ क्जोकि हेरोदेस राजा यूहन्ने जो धर्मी कने पवित्र माणु जाणी नैं तिसते डरदा था, कने तिसदी हिफाजत करदा था, कने तिसदियां गल्लां सुणी नैं बड़ा घबरांदा था, अपर तिन्हां जो खुसिया नैं सुणदा था।

²¹ कने आखर च हेरोदियासा जो ठीक मौका मिल्ली गेआ जाह़लू हेरोदेसैं अपणे जन्मदिने च अपणे प्रधानां, कने सेनांपतियां जो, कने गलील प्रदेसे दे बड्डे-बड्डे लोकां तांई धाम लगाई।

²² तां हेरोदियासा दी कुड़ी अंदर आई, कने नची नैं हेरोदेसे जो कने तिस सौगी बैठणे आल़ेआं लोकां जो खुस कित्ता। ताह़लू राजैं कुड़िया जो ग्लाया, “तू जेह्ड़ा चांह़दी मिन्जो ते मंग मैं तिज्जो दिंगा।”

²³ भिरी हेरोदेस राजैं तिसा कुड़िया जो वादा करी नैं ग्लाया, “मैं अपणे अधे राज्ज तिकर जे कुच्छ तू मिन्जो ते मंगगी मैं तिज्जो दिंगा।”

²⁴ तिन्नै बाहर जाई नैं अपणिया माँऊ ते पुछया, “मैं क्या मंगे?” सैह़ ग्लाणा लग्गी, “यूहन्ना बपतिस्मा दैणे आल़े दा सिर।”

²⁵ सैह़ तिसी बग्त राजे अल्ल अंदर आई कने तिस नैं विणती कित्ती, “मैं चांह़दी ऐ कि तू इसी बग्त यूहन्ना बपतिस्मा दैणे आल़े दा सिर इक्की थाल़िया च मिन्जो तांई मंगवाई दे।”

²⁶ ताह़लू राजा बड़ा दुखी होएया, अपर अपणे वादे मताबक कने सौगी बैठणे आल़ेआं दिया बज़ाह ते तिस वादे जो टाल़ी नीं सकेया।

²⁷ राजैं तिसी बग्त इक्की सपाईये जो हुक्म देई नैं घल्लेया कि यूहन्ने दे सिरे जो कटी करी लियो।

²⁸ कने सपाईयें जेलखाने च जाई नैं तिसदा सिर कटया, कने इक्की थाल़िया च रखी नैं लेई अंदा कने कुड़िया जो देई दित्ता, कने कुड़िया अपणिया माँऊ जो देई दित्ता।

²⁹ इसा बुरिआ खबरा जो सुणी नैं यूहन्ने दे चेले आये, कने तिसदिया लाह्सा जो लेई गै कने कब्रा च दब्बी दित्ता।

चेलेयां दा बापस औणां कने सुनसाण जगाह च वास

³⁰ जेह्ड़े यीशुयैं दो-दो करी नैं सेवा जो बाराह चेले घल्लेयो थे बापस आये, जेह्ड़ा कुच्छ तिन्हां कित्या कने सखाया था, सब कुच्छ तिसियो दस्सी दित्ता।

³¹ तित्थु मते लोक ओंदे जांदे थे, कने तिन्हां जो खाणे दा मौका भी नीं मिलदा था। ताह़लू यीशुयैं तिन्हां चेलेयां जो ग्लाया, “तुहां जाई नैं कुसी सुनसाण जगाह च चली नैं थोड़ा अराम करा।”

³² इसतांई यीशु कने तिसदे चेले किस्तिया पर चढ़ी नैं, सुनसाण जगाह जो पड़दे नैं चली गै।

पंज हज़ार लोकां जो रोटी खुआणा

³³ मतेआं लोकां यीशु कने तिसदे चेलेयां जो जांदे दिक्खी नैं पणछैणी लेआ, कने सारे सैहरां ते कठ्ठरोई नैं तित्थु ते पैदल दौड़े कने तिन्हां ते पैहल्ले जाई पुज्जे।

³⁴ यीशुयैं कने तिसदे चेलेयां किस्तिया ते उतरी नैं मती सारी भीड़ दिक्खी, कने तिन्हां पर तरस खादा, क्जोकि सैह़ तिन्हां भेड्डां साइआं थे, जिन्हां दा कोई रखवाल़ा नीं होयैं; कने सैह़ तिन्हां जो मतिआं गल्लां सखाणा लग्गा।

³⁵ जाह़लू दिन बड़ा ढली गेआ, तां तिसदे चेले यीशु अल्ल आई नैं ग्लाणा लग्गे, “एह़ सुनसाण जगाह ऐ, कने दिन ढलणा लगेया ऐ।

³⁶ लोकां जो जाणा दे कि अक्खे-बक्खे देयां ग्रां कने बस्तियां च जाई करी, अपणे तांई कुच्छ खाणे जो खरीदी लैंन।”

³⁷ यीशुयैं जवाब दित्ता, “तुहां ई इन्हां जो खाणे जो देआ।” तिन्हां यीशुये नैं ग्लाया, “इतणे लोकां दे खाणे तांई दो सौ दिनां दी मजदूरिया बराबर पैसे लगणे। क्या तुहां चांह़दे हन कि अहां जाई नैं इतणा सारा खाणा लेई करी ओन?”

³⁸ यीशुयैं तिन्हां जो ग्लाया, “जाई नैं दिक्खा तुहां अल्ल कितणियां रोटियां हन?” तिन्हां पता करी नैं ग्लाया, “पंज रोटियां कने दो मच्छियां हन।”

³⁹ भिरी यीशुयैं चेलेयां जो हुक्म दित्ता, “कि सारेयां लोकां जो सैले घाऐ पर भुइआं इक्क पंगत लगाई नैं बठाल़ी देआ।”

⁴⁰ सैह़ सौ-सौ कने पजांह़-पजांह़ करी नैं लैणी च बेई गै।

⁴¹ यीशुयैं तिन्हां पंजा रोटियां जो कने दूँ मच्छियां जो लेआ, कने सुअर्गे दे पास्सेयो दिक्खी नैं धन्यावाद कित्ता, कने रोटियां तोड़ी-तोड़ी नैं चेलेयां जो दिंदा गेआ कि सैह़ लोकां जो बंडन, कने सैह़ दो मच्छियां भी तिन्हां सारेयां जो बंडी दित्तियां।

⁴² सारे खाई नैं रज्जी गै,

⁴³ कने तिन्हां बचियां रोटियां दे बाराह टोकरु भरी नैं किठ्ठे कित्ते, कने कुच्छ मच्छियां दे भी।

⁴⁴ जिन्हां लोकां रोटियां खादियां, तिन्हां च लगभग पंज हज़ार मरद ई थे।

यीशुये दा पांणिये ऊपर चलणा

⁴⁵ यीशुयैं तिसी बग्त अपणे चेलेयां जो किस्तिया च बठाई नैं बैतसैदा सैहरे जो घल्ली दित्ता, जेह्ड़ा गलील झीला दी पारली तरफ था, जाह़लू तिकर कि सैह़ भीड़ा दे लोकां जो घल्ली लैं।

⁴⁶ कने लोकां दिया भीड़ा जो घल्लणे ते बाद यीशु प्रार्थना करणे तांई प्हाड़े पर चली गेआ।

⁴⁷ जाह़लू संझ होई, तां चेलेयां दी किस्ती झीला दे बिच्च थी, कने यीशु प्हाड़े ते लौई करी किल्ला झीला दे कनारे आई गेआ।

⁴⁸ तां यीशुयैं झीला दी तरफ दिख्या, कि हौआ उल्टी दिसा च चलणे दिया बज़ाह ते चेलेयां जो किस्ती जो ठीक ढंगे नैं चलाणे च बड़ी मेहनत करणा पौ दी थी, क्जोकि चेले बड़े डरी गियो थे, तां अधिया राती बाद यीशु झीला पर चली करी तिन्हां अल्ल आया; कने तिन्हां दे बक्खे ते निकल़ी जाणा चांह़दा था।

⁴⁹ अपर तिन्हां चेलेयां तिसियो झीला पर चलदे दिक्खी नैं समझेया कि भूत ऐ, कने डड्डी पै।

⁵⁰ क्जोकि सारे चेले यीशुये जो दिक्खी नैं डरी गियो थे। अपर तिन्हीं तिसी बग्त तिन्हां नैं गल्लां कित्तियां कने ग्लाया, “हौंसला रखा। मैं यीशु ऐ। डरा मत।”

⁵¹ ताह़लू सैह़ तिन्हां अल्ल किस्तिया पर आया, कने हौआ रुकी गेई, कने चेले बड़े हरान होई गै।

⁵² हलांकि तिन्हां यीशु दिया सामर्थी जो दिख्या था, जाह़लू तिन्हीं पंज हज़ार लोकां जो रोटी खुआई थी, अपर सैह़ अह्ल्ली तिकर समझी नीं पाएयो थे, कि यीशु सच्ची च कुण था। तिन्हां दे मन हुण भी इसा गल्ला पर बसुआस नीं करा दे थे।

गन्नेसरते सैहरे च बमारां जो खरा करणा

⁵³ जाह़लू यीशु कने तिसदे चेले किस्तिया च झीला पार गन्नेसरत सैहरे च पुज्जे, कने किस्ती कनारे पर खरेड़ी।

⁵⁴ जाह़लू सैह़ किस्तिया ते लौत्थे तां तिस सैहरे दे लोकां यीशुये जो पणछैणी लेआ,

⁵⁵ कने अक्खे-बक्खे दे सारे लाक्के दे लोक तौल़ी गै, कने बमारां जो मंजोल़ूयां पर पाई करी जित्थु-जित्थु खबर सुणी कि यीशु ऐ, तित्थु-तित्थु लेई नैं गै।

⁵⁶ कने जित्थु कुत्थी सैह़ ग्रांऐ, सैहरां, या बस्तियां च जांदा था, लोक बमारां जो बजारां च रखी नैं तिस नैं विणती करदे थे, कि सैह़ तिन्हां जो अपणे कपड़े दे पल्लूये ई जो छूणा दैं। कने जितणे लोक तिसियो छुंदे थे, सारे खरे होई जांदे थे।