मरकुस 3 - काँगड़ी

सुक्के हत्थे आल़े माणुये जो खरा करणा

¹ कने यीशु भिरी आराधनालय च गेआ, तित्थु इक्क माणु था जिसदा इक्क हत्थ सुकी गेआ था,

² कने कुच्छ फरीसी माणु तिस पर दोस लगाणे तांई इसा ताड़ा च थे कि दिक्खन, सैह़ बिस्रामे आल़े दिनैं तिसियो खरा करदा ऐ कि नीं।

³ यीशुयैं सुक्के हत्थे आल़े माणुये नैं ग्लाया, “बिच्च खड़ोई जा।”

⁴ कने ताह़लू यीशुयैं तिन्हां नैं ग्लाया, “क्या मूसा दिया व्यबस्था दे मताबक बिस्रामे आल़े दिनैं भलाई दा कम्म करणा ठीक ऐ या बुरा करणा, प्राणा जो बचाणा या मारणा?” अपर सैह़ चुप रैह्।

⁵ कने तिन्हीं तिन्हां दे मने दी कठोरता ते उदास होई नैं, तिन्हां जो गुस्से नैं चौंन्नी पास्से दिख्या, कने तिस माणुये जो ग्लाया, “अपणा हत्थ गांह कर।” जिंआं ई तिन्हीं अपणा हत्थ गांह कित्ता, कने तिसदा हत्थ खरा होई गेआ।

⁶ ताह़लू कुच्छ फरीसी माणु आराधनालय ते बाहर आई नैं यहूदी माणु जेह्ड़े हेरोदेस राजा दे समर्थक थे, तिन्हां सौगी यीशुये दे खलाफ साजस रचणा लग्गे, कि “तिसियो किंआं मारी सकन।”

भीड़ा दा यीशुये पचांह़ चलणा

⁷ कने तिसते बाद यीशु अपणे चेलेयां सौगी गलीले दिया झीला दे पास्से चली गेआ; कने गलील प्रदेसे ते इक्क बड्डी भीड़ तिसदे पचांह़ चली पेई।

⁸ कने यहूदिया, कने यरूशलेम सैहर, कने इदूमिया जिले, कने यरदन नदिया दे पारे दे, कने सूर कने सैदा सैहरे दे अक्खे-बक्खे ते इक्क बड्डी भीड़ एह़ सुणी नैं कि सैह़ कदेय बड्डे-बड्डे कम्म करदा ऐ यीशु अल्ल आई।

⁹ तिन्हीं अपणे चेलेयां नैं ग्लाया, “भीड़ा ते बचणे तांई इक्क छोटी किस्ती मिन्जो तांई त्यार रैह् तांजे सैह़ धक्का-मुक्की करणा नीं लग्गी पोन।”

¹⁰ क्जोकि यीशुयैं मतेआं लोकां जो खरा कित्या था, इसतांई जितणे माणु बमारिया च पैयो थे तिसियो छूणे तांई इक्की दूये जो धक्का-मुक्की करणा लग्गी पोंदे थे।

¹¹ कने दुष्टआत्मां भी, जाह़लू तिसियो दिक्खदियां थियां, तां तिसदे सामणै पेई जादियां थियां, कने जोरे नैं डड्डी करी ग्लादियां थियां, “तू परमात्मे दा पुत्तर ऐ।”

¹² कने यीशुयैं दुष्टआत्मां जो सक्त चतौणी देई नैं ग्लाया, कुसी नैं मत दस्सदियां, कि मैं परमात्मे दा पुत्तर ऐ।

बाराह चेले चुणना

¹³ भिरी तिसते बाद यीशु प्हाड़े पर चढ़ी गेआ, कने जिन्हां जो सैह़ चांह़दा था तिन्हां जो अप्पु अल्ल सद्देया; कने सैह़ तिस अल्ल आये।

¹⁴ ताह़लू यीशुयैं बारांह प्रेरितां जो चुणेया कि सैह़ तिस सौगी-सौगी रैह़न, कने सैह़ तिन्हां जो घल्लैं कि सैह़ प्रचार करन।

¹⁵ कने दुष्टआत्मां जो कड्डणे दा हक्क दित्ता।

¹⁶ कने एह़ सैह़ हन; शमौन जिसदा दूआ नां यीशुयैं पतरस रखेया।

¹⁷ कने जबदिये दा पुत्तर याकूब कने याकूबे दा लोक्का भाऊ यूहन्ना, जिन्हां दे नां यीशुयैं बुअनरगिस कने गर्जन दे पुत्तर रखेया,

¹⁸ कने अन्द्रियास, फिलिप्पुस, बरतुल्मै, मत्ती, थोमा, कने हलफई दा पुत्तर याकूब, कने तद्दै, कने दूआ शमौन कनानी, देसभक्त,

¹⁹ कने यहूदा इस्करियोती जिन्हीं यीशुये जो बादे च धोखे नैं पकड़ुआई भी दित्ता।

यीशु कने बालजबूल (सैतान)

²⁰ ताह़लू यीशु कने तिसदे चेले कुसी दे घरे च आये; कने भिरी इतणी भीड़ कठ्ठरोई, कि तिन्हां जो रोटी खाणे तांई भी बग्त नीं मिला।

²¹ जाह़लू यीशुये दे परवारे आल़ेआं एह़ सुणेया, तां सैह़ तिसियो अपणे घरे जो लेई जाणे तांई गै; क्जोकि सैह़ ग्लांदे थे कि “इसदा होस ठकाणे पर नीं ऐ।”

²² सास्त्री माणु भी जेह्ड़े यरूशलेम सैहरे ते आएयो थे, एह़ ग्लांदे थे, “तिस च सैतान ऐ,” कने “सैह़ दुष्टआत्मां दे प्रधान बालजबूल (सैतान) दी मदत लेई नैं दुष्टआत्मां जो कड्डदा ऐ।”

²³ इसतांई यीशुयैं तिन्हां जो अप्पु अल्ल सद्दी नैं तिन्हां जो उदारण देई नैं ग्लाया, “सैतान किंआं अपणे आप्पे जो कड्डी सकदा ऐ?

²⁴ कने जे कुसी राजे दे राज्जे च बैर पेई जां, तां तिस राजे दा राज किंआं मजबूत होई सकदा ऐ?

²⁵ कने जे कुसी दा परवारे दे माणुआं नैं बैर पेई जां, तां तिस घरे दे माणु किंआं बणी नैं रेई सकदे हन?

²⁶ इसतांई जे सैतान अपणा ई बैरी बणी नैं अपणे लोकां च बैर पां, तां सैह़ किंआं बणी करी रेई सकदा ऐ? क्जोकि इआं करी नैं सैह़ अपणा ई नास करदा ऐ।”

²⁷ “कोई माणु कुसी ताकतवरे दे घरे अंदर जाई नैं तिसदा समान ताह़लू तिकर चोरी नीं सकदा, जाह़लू तिकर सैह़ पैहल्लैं तिस ताकतवरे जो बन्नी नीं लैं; तां तिसदे घरैं चोरी करी सकदा ऐ।”

²⁸ “मैं तुहां नैं सच्च-सच्च ग्लांदा ऐ, कि माणुआं दी औलादी दे जरिये कित्यो सारे पाप कने परमात्मे दी निंदा जेह्ड़ी सैह़ करदे हन, माफ करणे लायक ऐ,

²⁹ अपर जेह्ड़ा कोई पवित्र आत्मा दी निंदा करगा, सैह़ कदी भी माफ नीं कित्ता जांगा, अपर सैह़ सदा दे पाप दा अपराधी हुंदा ऐ।”

³⁰ यीशुयैं एह़ इसतांई ग्लाया, कि सास्त्री माणुआं तिस पर दोस लगाया था, क्जोकि सैह़ एह़ ग्लांदे थे कि “यीशुये च दुष्टआत्मा ऐ।”

यीशु दी माँ कने भाऊ

³¹ तित्थु यीशु दी माँ कने तिसदे भाऊ आये, कने तिन्हां बाहर खड़ोई नैं तिसियो सादा घल्लेया।

³² जेह्ड़ी भीड़ यीशुये दे अक्खे-बक्खे बैठियो थी, कने तिन्हां च कुच्छ लोकां तिस नैं ग्लाया, “दिक्ख तेरी माँ कने तेरे भाऊ बाहर तिज्जो नैं मिलणा चांह़दे हन”

³³ यीशुयैं तिन्हां जो जवाब दित्ता, “मेरी माँ कने मेरे भाऊ कुण हन?”

³⁴ कने यीशुयैं तिन्हां लोकां पर जेह्ड़े तिसदे अक्खे-बक्खे बैठेयो थे, तिन्हां पास्से दिक्खी नैं ग्लाणा लग्गा, “दिक्खा मेरी माँ कने मेरे भाऊ एह़ हन।

³⁵ क्जोकि जेह्ड़ा कोई परमात्मे दी इच्छा पर चलगा, सैई मेरा भाऊ, मेरी बैहण कने मेरी माँ ऐ।”