मरकुस 15 - काँगड़ी

पिलातुसे दा यीशु ते सवाल

¹ कने भ्यागा तड़कैं झटपट प्रधान याजकां, स्याणेयां कने सास्त्री माणुआं कने सारिया महासभा दे लोकां सलाह मशवरा कित्ता। भिरी यीशुये जो बन्नी नैं लेई गै, कने न्याय करणे तांई तिसियो पिलातुस हाकमे दे हुआले करी दित्ता।

² कने पिलातुसैं तिसते पुछया, “क्या तू यहूदियां दा राजा ऐ?” यीशुयैं तिसियो जवाब दित्ता, “तू अप्पु ई तां ग्ला दा ऐ।”

³ कने प्रधान याजक यीशु पर मतिआं गल्लां दा आरोप लगा दे थे।

⁴ पिलातुसैं यीशु ते भिरी पुछया, “क्या तू कुच्छ जवाब नीं दिंदा? दिक्ख एह़ तिज्जो पर कितणियां गल्लां दा आरोप लग्गा दे हन।”

⁵ यीशुयैं भिरी कुच्छ जवाब नीं दित्ता। ऐत्थु तिकर कि पिलातुस जो बड़ी हरानी होई।

मौत्ती दी सज़ा दा हुक्म

⁶ पिलातुस हाकम तिस त्योहारे च कुसी इक्की कैदिये जो जिसियो लोक चांह़दे थे, तिन्हां लोकां तांई छड्डी दिंदा था।

⁷ तिस बग्त बरअब्बा नांऐ दा इक्क मन्नेया तनेया कैदी तिन्हां बलवाईआं सौगी जेला च बंद था, जिन्हां दंगे च खून कित्या था।

⁸ कने ताह़लू भीड़ा दे लोक ऊपर जाई नैं पिलातुसे नैं विणती करणा लग्गे, कि “जिंआं तू अहां तांई करदा आया तिंआं ई कर।”

⁹ पिलातुसैं तिन्हां जो जवाब दित्ता, “क्या तुहां चांह़दे हन कि मैं तुहां तांई यहूदियां दे राजे जो छड्डी दैं?”

¹⁰ सैह़ जाणदा था, कि प्रधान याजक यीशुये नैं जल़ण रखदे थे, इसतांई तिन्हां तिसियो पकड़ुआया था।

¹¹ अपर प्रधान याजकां भीड़ा दे लोकां जो एह़ ग्लाई नैं भड़काया, कि सैह़ बरअब्बा जो ई तिन्हां तांई छड्डी दैं।

¹² एह़ सुणी नैं पिलातुसैं तिन्हां ते भिरी पुछया, “तां जिसियो तुहां यहूदियां दा राजा ग्लांदे हन, तिसदा मैं क्या करैं?”

¹³ लोक भिरी डड्डी-डड्डी ग्लाणा लग्गे, “यहूदियां दे राजे जो सूल़िया पर टुंगी देआ।”

¹⁴ पिलातुसैं तिन्हां नैं ग्लाया, “क्जो, इन्हीं क्या गुनाह कित्या ऐ?” अपर लोक होर भी जोरे नैं डड्डी नैं ग्लाणे लग्गे, “इसियो सूल़िया पर टुंगी देआ।”

¹⁵ ताह़लू पिलातुसैं भीड़ा दे लोकां जो खुस करणे दी इच्छा ते, बरअब्बा जो तिन्हां लोकां तांई छड्डी दित्ता, कने यीशुये जो कोड़े लगुआई नैं तिन्हां दे हुआले करी दित्ता, कि सूल़िया पर टुंगी दैन।

रोमी सपाईयां दे जरिये यीशु दी बेज्जती

¹⁶ रोमी सपाई यीशुये जो किले दे अंदरे आल़े अँगणे च लेई गै, जेह्ड़ा प्रीटोरियुम नांऐ ते जाणेया जांदा ऐ, कने सारी सेना दिया पलटना जो सद्दी नैं लेई आये।

¹⁷ ताह़लू सपाईयां यीशुये जो बैजनी कपड़े दा चोल़ा लौआया कने कन्डेयां दा मुकट बणाई नैं तिसदे सिरे पर रखी दित्ता।

¹⁸ कने एह़ ग्लाई नैं यीशुये दा मजाक करणा लग्गे, “हे यहूदियां दे राजे जो, अहां दा नमस्कार।”

¹⁹ कने सपाई यीशुये दे सिरे पर कनेड़े दे डंडे नैं मारदे, कने तिस पर थुकदे, कने गोड्डे टेक्की नैं तिसियो प्रणांम करणा लग्गे।

²⁰ जाह़लू सैह़ यीशुये दा मजाक करी बैठे, तां तिसदा बैजनी कपड़े दा चोल़ा खोली नैं तिसदे कपड़े लौआई करी तिसी बग्त यीशुये जो सूल़िया पर टूंगणे तांई सैहरे ते बाहर लेई गै।

यीशुये जो सूल़िया पर टुंगणा

²¹ जाह़लू सैह़ यीशुये जो सूल़िया पर टूंगणे तांई सैहरे ते बाहर लेई करी जा दे थे, तां तिसी बग्त सिकन्दर कने रूफुसे दा बुढ़ा शमौन नांऐ दा इक्क कुरेनी माणु, जेह्ड़ा दूये ग्रांऐ ते ओआ दा था। सपाईयां तिसियो जबरदस्ती पकड़ी नैं ग्लाया, यीशु दी सूल़िया चुक्की नैं लेई चल।

²² कने ताह़लू सैह़ तिसियो गुलगुता नांऐ दिया जगाह च लेई आये, जिसा दा मतलब ऐ खोपड़ी दी जगाह ऐ।

²³ सूल़िया पर टूंगणे ते पैहल्लैं दर्द मिटाणे तांई यीशुये जो मुर्र नांऐ दी जड़ी बूटी अंगूरा दे रसे च मलाई नैं दैणा लग्गे, अपर यीशुयैं नीं पीता।

²⁴ ताह़लू तिन्हां यीशुये जो सूल़िया पर टूंगेया, कने तिसदे कपड़ेयां तांई पर्चियां पाईयां कि कुसियो क्या मिल्लैं, तिन्हां जो बंडी लेआ।

²⁵ ताह़लू भ्यागा नौ बजे दा बग्त था, जाह़लू तिन्हां यीशुये जो सूल़िया पर टूंगेया।

²⁶ कने तिसदा दोसपत्र लिखी नैं तिसदे ऊपर सूल़िया पर लगाई दित्ता कि “यहूदियां दा राजा”।

²⁷ कने सपाईयां यीशुये सौगी दूँ डाकुआं जो इक्क तिसदे सज्जे कने इक्क तिसदे खब्बे पास्से सूल़िया पर टंगाई दित्ते।

²⁸ ताह़लू पवित्रशास्त्रे दा सैह़ वचन पूरा होएया: कि “तिसदी गिणती अपराधियां सौगी कित्ती गेई।”

²⁹ कने तित्थु रस्ते च ओणे जाणे आल़े सिरे हिलाई-हिलाई करी कने एह़ ग्लाई नैं तिसदी निंदा करदे थे, “वाह। मंदरे ढाणे आल़ेया, कने त्रीं दिनां च बणाणे आल़ेया,

³⁰ सूल़िया ते लौई नैं अपणे आप्पे जो बचाई लै।”

³¹ तिंआं ई प्रधान याजक भी, सास्त्री माणुआं सौगी अप्पु च मजाक करी नैं ग्लांदे थे, “इन्हीं होरनी माणुआं जो तां बचाया, अपर अपणे आप्पे जो नीं बचाई सकदा।

³² एह़ तां इस्राएल देसे दा राजा, कने मसीह, जे हुण एह़ सूल़िया पर ते लौई औयें, तां अहां भी दिक्खी नैं बसुआस करन।” कने जेह्ड़े दो डाकू यीशु सौगी सूल़िया पर टूंगेयो थे, सैह़ तिसदी निंदा करा दे थे।

यीशुये दा प्राण छड्डणा

³³ कने दोपैरा दे बाराह बजे ते लेई नैं दोपैरा दे त्रै बजे तिकर सारे देसे च नेहरा छाई रेह्आ।

³⁴ तकरीब त्रै बजे यीशुयैं बड़े जोरे नैं डड्डी करी ग्लाया, “इलोई-इलोई, लमा शबक्तनी?” जिसदा मतलब एह़ ऐ, कि “हे परमात्मा, हे मेरे परमात्मा, तैं मिन्जो क्जो छड्डी दित्ता?”

³⁵ जेह्ड़े लोक बक्खे खड़ोत्यो थे, तिन्हां च कुच्छ लोक एह़ सुणी नैं ग्लाणा लग्गे, “दिक्खा, एह़ तां एलिय्याह जो हक्कां पा दा ऐ।”

³⁶ इतणे च इक्क सपाई दौड़ी नैं गेआ स्पंजे जो सिरके च डुबाया, कने कनेड़े दे डंडे पर बन्नी नैं यीशुये जो चुसणे जो दित्ता। कने तिन्हीं ग्लाया, “चला थोड़ा इन्तजार करी नैं दिक्खी तां लैंदे ऐ कि एलिय्याह इसियो लीणा ओंदा ऐ कि नीं।”

³⁷ ताह़लू यीशुयैं जोरे नैं डड्डी नैं प्राण छड्डी दित्ते।

³⁸ तिसी बग्त मंदरे दा पड़दा ऊपरे ते लेई नैं थल्लै तिकर फटी करी दो टुकड़े होई गेआ।

³⁹ जाह़लू तित्थु सामणै खड़ोई नैं सूबेदारैं यीशुये जो इस तरीके नैं डड्डदे कने प्राण छड्डदे दिख्या, तां तिन्हीं ग्लाया, “सच्च-बिच्च एह़ माणु, परमात्मे दा पुत्तर था।”

⁴⁰ तित्थु कुच्छ जणासां दूरा ते दिक्खा दियां थियां; तिन्हां च मरियम मगदलीनी, कने लोक्के भाऊ याकूब कने योसेसे दी माँ मरियम, कने सलोमी थी,

⁴¹ जाह़लू यीशु गलील प्रदेसे च था तां एह़ जणासां यीशु सौगी रेई नैं तिसदी सेवा-टहल करदियां थियां। कने होर भी मतिआं जणासां थियां, जेह्ड़ियां तिस सौगी यरूशलेम सैहरे च आईआं थियां।

यीशुये जो कब्रा च रखेया जाणा

⁴² कने जाह़लू संझ होई, तां इसतांई कि त्यारी दा दिन था, जेह्ड़ा बिस्रामे आल़े दिन ते इक्क दिन पैहल्ले हुंदा ऐ,

⁴³ इसा बुरिआ खबरा जो सुणी करी अरिमतिया सैहरे दा रैहणे आल़ा यूसुफ आया जेह्ड़ा महासभा दा खास सदस्य था कने अप्पु भी परमात्मे दे राज्जे दे इन्तजारे च था। सैह़ हिम्मत करी नैं पिलातुस हाकमे अल्ल गेआ कने यीशु दी लाह्स दफनाणे तांई मंगी।

⁴⁴ पिलातुस हाकम बड़ा हरान होएया कि सैह़ इतणी तौल़ी मरिया। कने तिन्हीं सूबेदारे जो सद्दी नैं पुछया, “क्या यीशु मरी चुकेया ऐ?”

⁴⁵ जाह़लू तिन्हीं सूबेदारे ते पैहल्लैं सारा हाल जाणी लेआ, ताह़लू यीशु दी लाह्स यूसुफे जो दुआई दित्ती।

⁴⁶ ताह़लू तिन्हीं मलमले दा इक्क कफन मुल्लैं लेआ, कने यीशु दिया लाह्सा जो सूल़िया ते लौआई नैं तिस कफने च लपेटी करी इक्की कब्रा च रखी दित्ती, जेह्ड़ी चट्टाना पर कोरियो थी। कने कब्रा दे मुँऐ पर इक्क बड़ा भारी पत्थर खसकाई नैं रखी दित्ता।

⁴⁷ मरियम मगदलीनी कने योसेसे दी माँ मरियम दिक्खा दियां थियां कि यीशु दी लाह्स कुत्थू रखियो ऐ।