मरकुस 14 - काँगड़ी

यीशुये जो जान्नी ते मारने दी साजस

¹ दूँ दिनां बाद फसह कने अखमीरे दी रोटिया दा त्योहार होणे आल़ा था। तां प्रधान याजक कने सास्त्री माणु इसा ताड़ा च थे कि किंआं यीशुये जो धोखे नैं पकड़ी नैं जान्नी ते मारन।

² अपर ग्लांदे थे, “त्योहारे दे दिने इआं करणा ठीक नीं, क्जोकि लोकां च बड़ा बवाल मची जांगा।”

बैतनिय्याह ग्रांऐ च यीशुये दा अभिषेक

³ तिस बग्त यीशु कने तिसदे चेले बैतनिय्याह ग्रांऐ च शमौने दे घरैं थे, जिसियो कोढ़े ते खरा कित्या था, जाह़लू सैह़ खाणा खा दे थे, ताह़लू इक्क जणांस संगमरमरे दिया सीसिया च जटामानसिया दा बड़ा ई मैंह्गा कने सुच्चा इत्तर लेई नैं आई; कने सीसिया जो भन्नी नैं इत्तरे जो तिसदे सिरे पर मल़ी दित्ता।

⁴ अपर तिन्हां च कुच्छ लोक गुस्सा होई नैं ग्लाणा लग्गे, “कि एह़ इत्तर क्जो बरबाद करी दित्ता?

⁵ क्जोकि इस इत्तरे दी कीमत इतणी ऐ, जितणा इक्क माणु इक्की साल्ले च कम्मांदा ऐ, इसियो भी इतणी कीमता च बेची नैं गरीबां दी मदत करी सकदे थे।” कने सैह़ लोक तिसा जणासा जो झिड़कणा लग्गे।

⁶ अपर यीशुयैं ग्लाया, “इसा जो बक्शी देआ। इसा जो क्जो झिड़का दे हन? इन्नै तां मिन्जो सौगी भलाई कित्ती ऐ।

⁷ गरीब तुहां अल्ल हमेसा रैंह्दे हन, कने तुहां जाह़लू चान तिन्हां नैं भलाई करी सकदे हन। अपर मैं तां तुहां अल्ल हमेसा नीं रैहणा ऐ।

⁸ जेह्ड़ा कुच्छ सैह़ करी सकी, इन्नै कित्ता। इन्नै मेरे अन्तिम संस्कारे ते पैहल्ले ई मेरे सरीरे च इत्तर मल़ी दित्ता ऐ।

⁹ मैं तुहां नैं सच्च ग्लांदा ऐ, कि सारे संसारे च जित्थु कुत्थी सुसमाचार प्रचार कित्ता जांगा, तित्थु इसादे इस कम्मे दी चर्चा भी तिसा दिया यादा च कित्ती जांगी।”

यहूदा इस्करियोतिये दा धोखा

¹⁰ ताह़लू यहूदा इस्करियोती जेह्ड़ा बाराह चेलेयां च इक्क था, सैह़ प्रधान याजकां अल्ल गेआ, कने ग्लाणा लग्गा, मैं यीशुये जो तुहां दे हुआले करणे तांई मदत करगा।

¹¹ सैह़ एह़ सुणी नैं खुस होये, कने इस्करियोती जो पैसे दैणे दा करार कित्ता। कने तिसी बग्ते ते सैह़ मौका तोपणा लग्गा, मैं किंआं यीशुये जो तिन्हां दे हुआलैं करैं।

यीशुये दा चेलेयां सौगी फसह दा आखरी खाणा

¹² अखमीरी रोटिया दे त्योहारे दे पैहल्ले दिने, जिस च सैह़ फसह दा बलिदान करदे थे, यीशुये दे चेलेयां तिसते पुछया, “तू कुत्थू चांह़दा ऐ कि अहां जाई नैं तिज्जो तांई फसह खाणे दी त्यारी करन?”

¹³ तिन्हीं अपणे दूँ चेलेयां जो एह़ ग्लाई नैं घल्लेया कि “यरूशलेम सैहरे जो जा, तित्थु इक्क माणु पांणिये दा घड़ा चुक्की नैं चलेया तुहां जो मिलगा, तिसदे पचांह़ चली जान्नेयों।

¹⁴ कने सैह़ जिस घरे च जांगा, तिस घरे दे मालके नैं ग्लानेयों, ‘गुरू ग्लांदे हन कि “मेरा कमरा कुत्थू ऐ, जिस च मैं अपणे चेलेयां सौगी फसह खाई सकैं?” ’

¹⁵ भिरी सैह़ तुहां जो इक्क सज्जियो सज्जाइयो, कने त्यार कित्तियो बड्डी बौड़ दस्सगा। तित्थु अहां तांई फसह दा खाणा त्यार करा।”

¹⁶ ताह़लू दो चेले निकल़ी नैं यरूशलेम सैहरे च आये, कने जिंआं यीशुयैं तिन्हां जो ग्लाया था, तिंआं ई होएया, कने फसह दा खाणा त्यार कित्ता।

¹⁷ जाह़लू संझ होई, तां यीशु बारांह चेलेयां सौगी तिस घरे जो आया।

¹⁸ जाह़लू सैह़ बैठी नैं खाणा खा दे थे, तां यीशुयैं ग्लाया, “मैं तुहां नैं सच्च ग्लांदा ऐ, कि तुहां च इक्क जेह्ड़ा मिन्जो सौगी खाणा खा दा ऐ, तिन्हीं मिन्जो पकड़ुआंणा।”

¹⁹ एह़ सुणी करी तिन्हां चेलेयां दा मुँ उतरी गेआ कने सैह़ इक्क-इक्क करी नैं तिसियो ग्लाणा लग्गे, “क्या सैह़ मैं ऐ?”

²⁰ यीशुयैं तिन्हां नैं ग्लाया, “सैह़ बारांह च इक्क ऐ, जेह्ड़ा मिन्जो सौगी इक्की थाल़िया च खा दा ऐ।

²¹ मिन्जो माणु दा पुत्तर जो मरना ई ऐ, क्जोकि एह़ पवित्रशास्त्रे च लिख्या ऐ। अपर हाय तिस माणु पर जिसदिया बज़ाह ते मैं माणु दा पुत्तर पकड़ुआया जांदा ऐ। तां तिस माणुये तांई खरा हुंदा कि सैह़ इस संसारे च पैदा ई नीं हुंदा।”

प्रभु भोज

²² जाह़लू सैह़ खाणा खा दे थे, ताह़लू यीशुयैं रोटी लेई कने परमात्मे आसीष मंगी नैं तोड़ी, कने अपणे चेलेयां जो दित्ती, कने ग्लाणा लग्गा, “लेआ, कने खा, एह़ मेरा सरीर ऐ।”

²³ भिरी तिन्हीं कटोरे च अंगूरा दा रस लेई नैं परमात्मे दा धन्यावाद कित्ता, कने अपणे चेलेयां जो दित्ता, कने तिन्हां सारेयां तिसते पीत्ता।

²⁴ कने ताह़लू यीशुयैं तिन्हां जो ग्लाया, “इस कटोरे च अंगूरा दा रस तिस वादे दा मेरा सैह़ खून ऐ, जेह्ड़ा मतेआं देयां पापां तांई बहाया जांदा ऐ।

²⁵ मैं तुहां नैं सच्च ग्लांदा ऐ, कि मैं भिरी अंगूरा दा रस कदी नीं पींगा। जाह़लू तिकर परमात्मे दे राज्जे च ताजा अंगूरा दा रस पी नीं लैं।”

²⁶ भिरी यीशु कने तिसदे चेले भजन गाई नैं बाहर जैतूने दे प्हाड़े पर चली गै।

पतरसे दे मुकरी जाणे दी भविष्यवाणी

²⁷ ताह़लू यीशु रस्ते च तिन्हां नैं ग्लाणा लग्गा, “तुहां सबना मिन्जो छड्डी करी नठ्ठी जाणा ऐ, क्जोकि पवित्रशास्त्रे च लिख्या ऐ: ‘मैं अपणे लोकां दी रखवाल़ी करणे आल़े जो मारगा, कने सैह़ भेड्डां साइआं रुआंह-परांह बिछड़ी जांगियां।’

²⁸ अपर मैं मरेयां ते जिन्दे होणे दे बाद तुहां ते पैहल्ले गलील प्रदेसे जो जांगा।”

²⁹ पतरस यीशुये नैं ग्लाणा लग्गा, “जे सारे तिज्जो छड्डी नैं नठ्ठी भी जान तां जान, अपर मैं तिज्जो छड्डी करी नीं जांगा।”

³⁰ एह़ सुणी करी यीशु पतरसे नैं ग्लाणा लग्गा, “मैं तिज्जो नैं सच्च ग्लांदा ऐ, कि अज्ज ई इसा राती जो कुक्ड़े दे दो बरी बांग दैणे ते पैहल्ले, तैं त्रै बरी मिन्जो पणछैणने ते मुकरना।”

³¹ अपर पतरसैं होर जोर देई नैं ग्लाया, “जे मिन्जो तिज्जो सौगी मरना भी पोयैं, तमी मैं तिज्जो पणछैणने ते कदी नीं मुकरगा।” होरनी चेलेयां भी इआं ई ग्लाया।

गतसमनी च यीशु दी प्रार्थना

³² जाह़लू यीशु कने तिसदे गतसमनी नांऐ दे इक्की बागे च आये, कने यीशुयैं अपणे चेलेयां नैं ग्लाया, “ऐत्थु बेई रेह्आ, जाह़लू तिकर मैं प्रार्थना करी नैं ओंदा ऐ।”

³³ कने यीशु अपणे बारांह चेलेयां ते त्रीं चेलेयां जो पतरस, याकूब कने यूहन्ने जो अपणे सौगी लेई गेआ। कने यीशु बड़ा ई दुखी कने बेचैन होणा लग्गा।

³⁴ कने यीशुयैं तिन्हां त्रीं चेलेयां नैं ग्लाया, “मेरा मन बड़ा दुखी ऐ, इआं लगदा ऐ जिंआं मैं मरने आल़ा ऐ। तुहां ऐत्थु रुका, कने जागदे रेह्आ।”

³⁵ भिरी सैह़ थोड़ा गांह जाई करी, धरतिया पर गोड्डेयां भार आई नैं प्रार्थना करणा लग्गा, “कि जे होई सकैं तां जेह्ड़ा दुखे दा बग्त मिन्जो पर ओणे आल़ा ऐ तिस दुखे जो मिन्जो ते दूर करी दे।”

³⁶ कने ग्लाया, “हे अब्बा, हे पिता, तिज्जो ते सब कुच्छ होई सकदा ऐ। इस दुखे दे बग्ते जो मिन्जो ते दूर करी दे। तमी जिंआं मैं चांह़दा ऐ, तिंआं नीं, अपर जेह्ड़ा तू चांह़दा ऐ सैई होयैं।”

³⁷ जाह़लू यीशु प्रार्थना करी नैं बापस आया, ताह़लू तिन्हीं त्रीं चेलेयां जो सुतेयो दिक्खी नैं पतरसे जो ग्लाया, “हे शमौन पतरस तू सुतेया ऐ? क्या तू मिन्जो सौगी इक्क घड़ी भी नीं जागी सकेया?

³⁸ तुहां सारे जागदे कने प्रार्थना करदे रेह्आ कि तुहां परीक्षा च नीं पोन। तुहां दी आत्मा तां त्यार ऐ, अपर सरीर कमजोर ऐ।”

³⁹ यीशु भिरी चली गेआ कने तिंआं ई प्रार्थना कित्ती।

⁴⁰ भिरी दूई बरी आई नैं तिन्हां जो सुतेया दिख्या, क्जोकि तिन्हां दियां अखीं निंदरा नैं भरोईयां थियां; कने नीं जाणदे थे कि तिसियो क्या जवाब दैन।

⁴¹ भिरी यीशुयैं त्री बरी आई नैं ग्लाया, “हुण तुहां अरामे नैं सोई रेह्आ, क्जोकि सैह़ बग्त आई ढुकेया ऐ। दिक्खा, मैं माणु दा पुत्तर पापियां दे हुआलैं कित्ता जाणे आल़ा ऐ।

⁴² उठा चला। दिक्खा, मिन्जो पकड़ुआणे आल़ा नेड़े आई रेह्आ ऐ।”

यीशुये जो धोखे नैं पकड़णा

⁴³ जाह़लू यीशु एह़ ग्ला दा था, तिसी बग्त यहूदा आया, जेह्ड़ा बारांह चेलेयां च इक्क था। कने अपणे सौगी प्रधान याजकां कने सास्त्री कने स्याणे माणुआं दिया तरफा ते इक्क बड्डी भीड़ तलवारां कने डांगा लेई करी आई रेह्आ।

⁴⁴ यीशुये जो पकड़ुआणे आल़ैं यहूदैं तिन्हां जो एह़ नसाणी दित्ती कि “जिसियो मैं गल़ें लगांगा सैई यीशु ऐ, तिसियो पकड़ी नैं ध्याने नैं लेई जान्नेयों।”

⁴⁵ कने यहूदा आया, कने यीशु जो नमस्कार कित्ता, कने तिस अल्ल आई नैं ग्लाणा लग्गा, “हे गुरू।” कने तिसदे गल़ें मिल्ला।

⁴⁶ ताह़लू तिन्हां लोकां तिस पर हत्थ पाई नैं यीशुये जो पकड़ी लेआ।

⁴⁷ तिन्हां बारांह चेलेयां च जेह्ड़े यीशु दे बक्खे खड़ोत्यो थे, इक्की चेलैं झट तलवार खींजी कने महायाजके दे दासे पर चलाई, कने तिसदा कंन्न बड्डी दित्ता।

⁴⁸ यीशुयैं तिन्हां नैं ग्लाया, “क्या तुहां डाकू समझी नैं मिन्जो पकड़णे तांई तलवारां कने डांगा लेई नैं आएयो हन?

⁴⁹ जाह़लू मैं हर रोज मंदरे च तुहां सौगी रेई नैं तुहां जो सिक्षा दिंदा था, ताह़लू तां तुहां मिन्जो पकड़ेया नीं। अपर एह़ इसतांई होएया ऐ कि पवित्रशास्त्रे दियां लिखियां गल्लां पूरियां होन।”

⁵⁰ एह़ सब दिक्खी करी सारे चेले यीशुये जो छड्डी नैं नठ्ठी गै।

⁵¹ तिसी रस्ते च इक्क नौजुआन माणु अपणे नंगे सरीरे पर चादर उढी नैं यीशुये पचांह़ चला। कने लोकां तिसियो चेला समझी नैं पकड़णा लग्गे।

⁵² अपर सैह़ चादरा छड्डी नैं नंगा नठ्ठी गेआ।

महासभा दे सामणै यीशु

⁵³ भिरी सैह़ यीशुये जो पकड़ी करी महायाजके दे घरे जो लेई गै; कने सारे प्रधान याजक कने स्याणे कने सास्त्री माणु तित्थु कठ्ठरोई गै।

⁵⁴ पतरस डरदा-डरदा तिसदे पचांह़-पचांह़ महायाजके दे घरे दे अँगणे तिकर चली गेआ, कने चौकीदारां सौगी बेई नैं अग्गी तपणा लग्गी पेआ।

⁵⁵ प्रधान याजक कने सारी यहूदी महासभा यीशुये जो मारने तांई तिसदे खलाफ गवाहिया दिया तोपा च थे, अपर नीं मिल्ली।

⁵⁶ क्जोकि मते सारे लोक तिसदे खलाफ झूठी गवाही दै दे थे, अपर तिन्हां दी गवाही इक्क देहई नीं थी।

⁵⁷ ताह़लू कुच्छ लोकां उठी नैं यीशुये दे खलाफ एह़ झूठी गवाही दित्ती,

⁵⁸ “अहां इसियो एह़ ग्लांदे सुणेया ऐ, ‘मैं इस हत्थे दे बणायो मंदरे जो ढाई दिंगा, कने त्रीं दिनां च दूआ बणाई दिंगा, जेह्ड़ा लोकां दे हत्थे नैं नीं बणया होयैं।’ ”

⁵⁹ इसा गल्ला पर भी एह़ गवाही तिन्हां दी इक्क देहई नीं थी।

⁶⁰ ताह़लू महायाजक लोकां बिच्च खड़ोई नैं यीशु ते पुछणा लग्गा, “तैं कोई जवाब नीं दैणा? एह़ माणु तेरे खलाफ क्या गवाही दै दे हन?”

⁶¹ अपर यीशु चुप ई रेह्आ, कने कुच्छ जवाब नीं दित्ता। महायाजकैं तिसियो भिरी पुछया, “क्या तुहां तिस परम प्रधान परमात्मे दे पुत्तर मसीह हन?”

⁶² यीशुयैं ग्लाया, “हाँ मैं ऐ: कने तुहां मिन्जो माणु दे पुत्तरे जो सर्वशक्तिमान परमात्मे दे सज्जे पास्से बैठेयो, कने सुअर्गे ते अम्बरे दे बदल़ां सौगी ओंदे दिक्खगे।”

⁶³ इसा गल्ला जो सुणी नैं महायाजक गुस्सा होएया, कने अपणे बाहरे आल़े चोल़े फाड़ी नैं ग्लाणा लग्गा, “हुण अहां जो होर गवाहिया दी जरूरत नीं ऐ?

⁶⁴ तुहां एह़ निंदा सुणी। तुहां दी क्या राय ऐ?” तिन्हां सारेयां लोकां ग्लाया, कि “एह़ जान्नी ते मारने जोग्गा ऐ।”

⁶⁵ ताह़लू कुच्छ लोक तां तिस पर थुकणा, कने तिसदा मुँ ढक्की नैं यीशुये जो घसुन मारणा लग्गे, कने तिसियो ग्लाणा लग्गे, “हे गुरू भविष्यवाणी करी नैं दस्स कुणी मारेया।” कने सपाईयां तिसियो पकड़ी नैं चपैड़ां मारियां।

पतरसे दा मुकरना

⁶⁶ जाह़लू पतरस थल्लै अँगणे च अग्गी तपणा बैठेया था, तां महायाजके दियां दासियां च इक्क दासी औत्थू आई,

⁶⁷ कने पतरसे जो अग्गी तपदे तिसियो बड़िया गौरा नैं दिक्खी करी ग्लाणा लग्गी, “तू भी तां तिस नासरी यीशु सौगी था।”

⁶⁸ पतरस मुकरी गेआ, कने ग्लाणा लग्गा, “मैं ना ई जाणदा, ना ई समझदा ऐ, कि तू क्या ग्ला दी ऐ।” भिरी सैह़ अँगणे बाहर गेआ, कने कुक्ड़े बांग दित्ती।

⁶⁹ सैह़ दासी पतरसे जो दिक्खी करी तिन्हां नैं जेह्ड़े लोक बक्खे खड़ोत्यो थे, भिरी ग्लाणा लग्गी, “एह़ तिन्हां च इक्क ऐ।”

⁷⁰ अपर पतरस दूई बरी भिरी मुकरी गेआ। थोड़िया देरा बाद तिन्हां लोकां जेह्ड़े बक्खे खड़ोत्यो थे भिरी पतरसे जो ग्लाया, “पक्का तू तिन्हां च इक्क ऐ, कने तेरियां गल्लां ते पता लग्गा दा कि तू गलीली ऐ।”

⁷¹ ताह़लू पतरस अपणे आप्पे जो कोसणा कने कसम खाई करी ग्लाणा लग्गा, “मैं सच्च ग्ला दा ऐ तिस माणुये जो, जिसदी तुहां चर्चा करा दे हन, मैं नीं जाणदा।”

⁷² तिसी बग्त दूई बरी कुक्ड़ैं बांग दित्ती। ताह़लू पतरसे जो सैह़ गल्ल याद आई जेह्ड़ी यीशुयैं तिसियो ग्लाईयो थी, “कुक्ड़े दे दो बरी बांग दैणे ते पैहल्लैं तैं त्रै बरी मिन्जो पणछैणने ते मुकरना।” कने सैह़ इसा गल्ला जो सोची करी जोरे-जोरे नैं रोणा लग्गा।