मरकुस 1 - काँगड़ी

यूहन्ना बपतिस्मा दैणे आल़े दा प्रचार

¹ एह़ यीशु मसीह दे सुसमाचार दे बारे दी सुरुआत ऐ, जेह्ड़ा परमात्मे दा पुत्तर ऐ।

² जिंआं यशायाह भविष्यवक्ता दिया कताबा च लिख्या ऐ: दिक्ख, “मैं अपणा संदेस दैणे आल़े जो तिज्जो ते पैहल्लैं घल्लदा, जेह्ड़ा तिज्जो तांई लोकां देयां मनां जो त्यार करगा।”

³ “सुनसाण जगाह च इक्क हक्कां पाणे आल़े दी उआज़ सुम्मां दी कि ‘प्रभु तांई लोकां देयां मनां जो त्यार करा, कने अपणे आप्पे जो सुधारा।’ ”

⁴ यूहन्ना आया, जेह्ड़ा सुनसाण जगाह च बपतिस्मा दिंदा था, कने पापां दी माफी तांई मने जो बदलणे दे बपतिस्मे दा प्रचार करदा था।

⁵ यहूदिया प्रदेसे दे, कने यरूशलेम सैहरे दे रैहणे आल़े मते सारे लोक घरे ते निकल़ी नैं यूहन्ने अल्ल आये, कने अपणे पापां जो मन्नी नैं यरदन नदिया च यूहन्ने ते बपतिस्मा लेआ।

⁶ यूहन्ना ऊँटे दे बाल़ां दे कपड़े बणाई नैं लगांदा था, कने अपणे लक्के च चमड़े दा पटका बन्नी रखदा था। कने सैह़ टिड्डियां कने जंगली मखीर खांदा था।

⁷ कने एह़ प्रचार करदा था, “मिन्जो ते बाद जेह्ड़ा ओणे आल़ा ऐ, सैह़ मिन्जो ते भी बड़ा सामर्थी ऐ। मैं इस जोग्गा नीं कि झुकी नैं तिसदे जूत्तेयां दे तस्मेआं दियां गठ्ठी भी खोली सकैं।

⁸ मैं तां तुहां जो पांणिये नैं बपतिस्मा दित्ता ऐ अपर सैह़ तुहां जो पवित्र आत्मा नैं बपतिस्मा दिंगा।”

यीशुये दा बपतिस्मा कने परख

⁹ तिन्हां दिनां च यीशुयैं गलील प्रदेसे दे नासरत सैहरे ते आई नैं, यरदन नदिया च यूहन्ने ते बपतिस्मा लेआ।

¹⁰ कने जाह़लू यीशु पांणिये ते निकल़ी नैं बाहर आया, ताह़लू तिन्हीं सुअर्गे जो खुलदे कने पवित्र आत्मा जो कबूतरे साइआं अप्पु ऊपर लौंदे दिख्या।

¹¹ कने परमात्मे सुअर्गे ते ग्लाया, “तू मेरा पुत्तर ऐ, जिस नैं मैं प्यार रखदा ऐ, तिज्जो ते मैं बड़ा खुस ऐ।”

¹² तिसी बग्त पवित्र आत्मा यीशुये जो सुनसाण जगाह दे पास्सेयो घल्लेया।

¹³ सुनसाण जगाह च चाल़ी दिन कने रात सैताने यीशुये दी परख कित्ती, कने तित्थु सैह़ जंगली जानवरा सौगी रेह्आ। कने सुअर्गदूत आई नैं तिसदी सेवा करदे रैह्।

यीशु दी सेवा दे कम्म सुरू

¹⁴ यूहन्ना जो पकड़ी करी जेला च पाणे ते बाद यीशु गलील प्रदेसे च आई नैं परमात्मे दे राज्जे दा सुसमाचार प्रचार करणा लग्गा।

¹⁵ कने ग्लाया, “बग्त पूरा होईया, कने परमात्मे दा राज्ज नेड़े आईआ ऐ। मने जो बदला कने परमात्मे दे सुसमाचारे पर बसुआस करा।”

मच्छियां पकड़णे आल़ेआं जो अप्पु अल्ल सदणा

¹⁶ गलील प्रदेसे दिया झीला दे कनारे चलदे-चलदे यीशुयैं दूँ मछुवारे भाऊआं जो झीला च जाल़ पांदे दिख्या, इक्क शमौन कने दूआ तिसदा भाऊ अन्द्रियास; क्जोकि सैह़ मच्छियां पकड़णे आल़े थे।

¹⁷ कने यीशु तिन्हां नैं ग्लाणा लग्गा, “मिन्जो पचांह़ चली ओआ; क्जोकि अज्जे ते बाद तुहां माणुआं जो परमात्मे तांई सिष्य बणांगे।”

¹⁸ सैह़ तिसी बग्त जाल़ां जो छड्डी नैं यीशुये पचांह़ चली पै।

¹⁹ थोड़ी गांह जाई नैं भिरी यीशुयैं जबदिये दे दूँ जागतां जो याकूबे, कने तिसदे लोक्के भाऊये यूहन्ने जो, किस्तिया पर जाल़ां जो ठीक करदे दिख्या।

²⁰ तिन्हीं तिसी बग्त तिन्हां जो सद्देया; कने सैह़ अपणे बुढ़े जबदिये जो मजदूरां सौगी किस्तिया पर छड्डी नैं, यीशुये पचांह़ चली पै।

दुष्टआत्मा दे सतायो माणुये जो ठीक करणा

²¹ ताह़लू यीशु कने तिसदे चेले कफरनहूम सैहरे च आये, कने यीशु तिसी बग्त बिस्रामे आल़े दिनैं आराधनालय च जाई नैं सिक्षा दैणा लग्गा।

²² कने लोक तिसदिया सिक्षा ते हरान होई गै; क्जोकि सैह़ तिन्हां जो सास्त्री माणुआं साइआं नीं, अपर सैह़ सच्चे अधिकारे नैं सिक्षा दिंदा था।

²³ जाह़लू यीशु तिन्हां दे आराधनालय च सिक्षा दै दा था, तां तित्थु इक्क माणु था, जिसदे अंदर इक्क दुष्टआत्मा थी।

²⁴ तिन्हीं जोरे नैं डड्डी नैं ग्लाया, “हे यीशु नासरी, तू अहां ते क्या चांह़दा? क्या तू अहां दा नास करणा आया ऐ? मैं तिज्जो जाणदा ऐ, तू कुण ऐ? तू परमात्मे दा घल्लेया पवित्र पुत्तर ऐ।”

²⁵ यीशुयैं तिसा दुष्टआत्मा जो झिड़की नैं ग्लाया, “चुप रैह्; कने इस माणु ते निकल़ी जा।”

²⁶ ताह़लू दुष्टआत्मा तिसियो मरोड़ी नैं, कने जोरे नैं डड्डी करी तिसदे अंदरे ते निकल़ी गेई।

²⁷ “एह़ दिक्खी करी सारे माणु हरान होई नैं, अप्पु च सवाल-जवाब करणा लग्गे, एह़ क्या गल्ल ऐ? एह़ तां कोई नौई सिक्षा ऐ। सैह़ अधिकारे नैं दुष्टआत्मां जो भी हुक्म दिंदा ऐ, कने सैह़ तिसदा हुक्म मनदियां हन।”

²⁸ कने तिसदा नां तिसी बग्त गलील प्रदेसे दे अक्खे-बक्खे दे सारे प्रदेसे च फैली गेआ।

मते बमारां जो खरा करणा

²⁹ कने तिसी बग्त यीशु आराधनालय ते निकल़ी करी याकूब कने यूहन्ने सौगी शमौन कने अन्द्रियासे दे घरे जो गेआ।

³⁰ शमौने दी सस्सु जो बड़ा भरी बुखार चढ़ेया था, कने मंजोल़ूये पर सुतियो थी, कने तिन्हां तिसी बग्त तिसादे बारे च यीशुये जो दस्सेया।

³¹ ताह़लू यीशुयैं बक्खे जाई नैं तिसादा हत्थ पकड़ी नैं तिसायो ठुआल़ेया; कने तिसादा बुखार उतरी गेआ, कने सैह़ तिसी बग्त तिन्हां दी आदर-खातर करणा लग्गी।

³² संझा दे बग्त जाह़लू दिन ढल़िया तां लोक बमारां जो कने तिन्हां माणुआं जो, जिन्हां च दुष्टआत्मां थियां, यीशुये अल्ल लेई आये।

³³ कने सैहरे दे मते भरी लोक घरे दे दरवाजे पर कठ्ठरोई गै।

³⁴ कने यीशुयैं तिन्हां मते माणुआं जो जेह्ड़े कईआं किस्मां दियां बमारियां ते दुखी थे, खरा कित्ता, मतिआं दुष्टआत्मां जो कड्डेया, कने दुष्टआत्मां जो ग्लाणा नीं दित्ता, क्जोकि दुष्टआत्मां यीशुये जो पणछैणदियां थियां कि एह़ परमात्मे दा पुत्तर ऐ।

किल्ले च यीशुये दा प्रार्थना करणा

³⁵ कने भ्यागा दिन निकल़णे ते बड़ी पैहल्लैं यीशु उठी नैं इक्क सुनसाण जगाह जो गेआ, कने तित्थु प्रार्थना करणा लग्गा।

³⁶ ताह़लू शमौने कने तिसदे साथियां दिख्या कि यीशु घरैं नीं ऐ, ताह़लू सैह़ तिसियो तोपणा गै।

³⁷ जाह़लू यीशु मिल्ली गेआ, तां तिन्हां तिस नैं ग्लाया, “मते भरी लोक तिज्जो तोपा दे हन।”

³⁸ यीशुयैं तिन्हां नैं ग्लाया, “ओआ; अहां होर कुत्थी अक्खे-बक्खे देयां ग्रां च जान, क्जोकि मैं संसारे च इसतांई आया ऐ, तांजे मैं तित्थु भी प्रचार करी सकैं।”

³⁹ यीशु कने तिसदे चेले सारे गलील प्रदेसे च गै, कने यीशु तिन्हां दे आराधनालयां च जाई नैं प्रचार करदा कने दुष्टआत्मां जो कड्डदा रेह्आ।

कोढ़ी माणुये जो खरा करणा

⁴⁰ इक्क कोढ़ी यीशु अल्ल आई करी तिस नैं विणती करणा लग्गा, कने सैह़ तिसदे गांह गोड्डेयां दे भार बेई नैं ग्लाणा लग्गा, “हे प्रभु जे तू चां तां मिन्जो खरा करी सकदा ऐ।”

⁴¹ यीशुयैं तिस पर तरस खाई नैं तिस पर हत्थ रखेया, कने छुई नैं तिस नैं ग्लाया, “हाँ, मैं चांह़दा कि तू खरा होई जां।”

⁴² कने तिसी बग्त तिसदे कोढ़े दे दाग साफ होई गै, कने सैह़ बिलकुल खरा होई गेआ।

⁴³ कने तिसी बग्त तिन्हीं तिसियो समझाई नैं घल्ली दित्ता,

⁴⁴ कने तिसियो ग्लाया, “दिक्ख कुसी नैं कुच्छ मत ग्लांदा, कि मैं तिज्जो खरा कित्या ऐ, अपर जाई नैं अप्पु जो याजके जो दस्स, कने अपणे खरे होणे दे बारे च जेह्ड़ा कुच्छ मूसैं भविष्यवक्तैं दस्सेया ऐ तिसियो भेंट चढ़ा तांजे तिन्हां लोकां जो पता लग्गी जां कि तू खरा होई गेआ।”

⁴⁵ भिरी सैह़ मंदरे बाहर आई नैं इसा गल्ला दा बड़ा प्रचार करणा कने इस तरीके नैं फैलाणा लग्गा कि यीशु भिरी सरेआम सैहरे च नीं जाई सकेया, अपर बाहर बणां-बाड़ियां च रेह्आ कने चौंन्नी पास्से दे लोक तिस अल्ल ओंदे रैह्