मत्ती 8 - काँगड़ी

कोढ़ी माणुये जो खरा करणा

¹ जाह़लू यीशु प्हाड़े ते लौई करी थल्लैं आया, तां इक्क बड़ी बड्डी भीड़ तिसदे पचांह़ चली पेई।

² कने दिक्खा इक्की कोढ़ियें बक्खे आई नैं तिसियो प्रणांम कित्ता कने ग्लाया, “हे प्रभु, जे तू चां तां मिन्जो खरा करी सकदा ऐ।”

³ यीशुयैं हत्थ गांह करी नैं तिसियो छुता, कने ग्लाया , “हाँ, मैं चांह़दा ऐ, तू खरा होई जां।” कने सैह़ तिसी बग्त कोढ़े ते खरा होई गेआ।

⁴ भिरी यीशु तिस नैं ग्लाणा लग्गा, “दिक्ख, इसा गल्ला दे बारे च कुसी नैं मत ग्लांदा, अपर जाई नैं अप्पु जो याजके जो दस्स कने जेह्ड़ा चढ़ावा मूसैं भविष्यवक्तैं दस्सेया ऐ तिसियो भेंट चढ़ा तांजे तिन्हां लोकां जो पता लग्गी जां कि तू खरा होई गेआ।”

सूबेदारे दा बसुआस

⁵ जाह़लू यीशु कफरनहूम सैहरे च आया तां इक्क रोमी सूबेदारैं तिस अल्ल आई करी तिस नैं विणती कित्ती,

⁶ “हे प्रभु, मेरा दास घरैं अधरंगे दिया बमारिया नैं बड़ा दुखी पेआ ऐ।”

⁷ तिन्हीं तिस नैं ग्लाया, “मैं आई नैं तिसियो खरा करगा।”

⁸ सूबेदारैं जवाब दित्ता, “हे प्रभु, मैं इस जोग्गा नीं कि तू मेरे घरैं औयें, अपर सिर्फ मुँऐ ते ग्लाई दे तां मेरा दास ठीक होई जांगा।

⁹ मिन्जो पता ऐ, कि मैं भी कुसी अधिकारिये थल्लैं कम्म करणे आल़ा माणु ऐ, कने मिन्जो थल्लैं भी कुच्छ सपाई कम्म करदे हन, जाह़लू मैं इक्की जो हुक्म देई नैं ग्लांदा ऐ, कि जा, तां सैह़ चली जांदा ऐ। कने दूये नैं, ‘आ,’ तां सैह़ आई जांदा ऐ। कने जाह़लू अपणे दासे नैं ग्लांदा ऐ, एह़ कम्म कर। तां सैह़ तिस कम्मे करदा ऐ।”

¹⁰ एह़ सुणी नैं यीशु बड़ा हरान होएया, कने जेह्ड़े तिसदे पचांह़ ओआ दे थे तिन्हां नैं ग्लाणा लग्गा, “मैं तुहां नैं सच्च ग्लांदा ऐ, कि मैं इस्राएल देसे दे लोकां च भी ऐदेया बसुआस नीं दिख्या।

¹¹ कने मैं तुहां नैं ग्लांदा ऐ, कि संसारे ते दूईआं जातिआं दे मते सारे लोक आई नैं अब्राहमे कने इसहाके कने याकूबे सौगी सुअर्गे दे राज्ज च बैगें।

¹² अपर यहूदी लोक बाहर नेहरे च पाई दित्ते जांगे तित्थु रोणा कने दंदा दा पीणा होणा।”

¹³ ताह़लू यीशुयैं रोमी सूबेदारे नैं ग्लाया, “घरेयो जा, कने जिंआं तेरा बसुआस ऐ तिंआं तिज्जो तांई होयैं।” कने तिसदा दास तिसी बग्त खरा होईया।

मते सारे बमार लोकां जो खरा करणा

¹⁴ यीशु जाह़लू पतरसे दे घरे आया, तां तिन्हीं तिसदिया सस्सु जो बड़ा भरी बुखार नैं बमार पेईयो दिख्या।

¹⁵ तिन्हीं तिसादा हत्थ छुता कने तिसादा बुखार उतरी गेआ, कने सैह़ उठी नैं तिन्हां दी आदर-खातर करणा लग्गी।

¹⁶ जाह़लू संझ होई ताह़लू सैह़ तिस अल्ल मतेआं लोकां जो लेई नैं आये जिन्हां च दुष्टआत्मां थियां कने तिन्हीं तिन्हां आत्मा जो अपणे वचने नैं कड्डी दित्ता; कने सारे बमारां जो खरा कित्ता।

¹⁷ तांजे जेह्ड़ा वचन यशायाह भविष्यवक्तैं ग्लाया था सैह़ पूरा होयैं: “तिन्हीं अप्पु पर अहां दियां कमजोरियां जो लेई लेआ कने अहां दियां बमारियां जो चुक्की लेआ।”

यीशुये दा चेला बणने दी कीमत

¹⁸ यीशुयैं जाह़लू अपणे चौंन्नी पास्सेयां ते लोकां दी इक्क बड़ी बड्डी भीड़ दिक्खी नैं अपणे चेलेयां जो झीला दे पारली तरफ जाणे दा हुक्म दित्ता।

¹⁹ जिंआं ई सैह़ तित्थु ते जाणे दे त्यारी करा दे थे, ताह़लू इक्क सास्त्री माणु तिस अल्ल आई नैं तिस नैं ग्लाणा लग्गा, “हे गुरू, जित्थु कुत्थी तू जांगा, मैं तिज्जो पचांह़-पचांह़ चलगा।”

²⁰ यीशुयैं तिस नैं ग्लाया, “गीदड़ीं दियां झोरीं कने अम्बरे दे पंछियां दे अल्ले हुंदे हन, अपर मैं माणुये दा पुत्तर होई नैं भी मिन्जो अल्ल रैहणे तांई घर नीं ऐ।”

²¹ इक्क होर चेलैं तिस नैं ग्लाया, “हे प्रभु मिन्जो पैहल्लैं घरेयो जाणा दे, तांजे मैं अपणे बुढ़े दे मरने ते बाद तिसियो दब्बी करी, भिरी तिज्जो पचांह़ चलगा।”

²² यीशुयैं तिस नैं ग्लाया, “तू मिन्जो पचांह़ चली पो, कने जेह्ड़े आत्मिक रूप ते मुड़दे हन, तिन्हां जो अपणे मुड़दे दब्बणा दे।”

तफाने जो सांत करणा

²³ जाह़लू सैह़ किस्तिया पर चढ़ेया, तां तिसदे चेले तिसदे पचांह़ चली पै।

²⁴ कने दिक्खा, झीला च इक्क देहया बड़ा तफान आया कि किस्ती लैहरां नैं डुबणा लग्गी, कने यीशु सुतेया था।

²⁵ ताह़लू चेलेयां तिसदे बक्खे आई नैं यीशुये जो जगाया कने ग्लाया, “हे प्रभु अहां जो बचा, अहां डुबी चलेयो हन।”

²⁶ यीशुयैं तिन्हां नैं ग्लाया, “हे बेबसुआसियो, क्जो डरा दे हन?” ताह़लू तिन्हीं उठी करी तफाने कने पांणिये जो झिड़केया, कने सब कुच्छ सांत होई गेआ।

²⁷ कने सैह़ हरान होई नैं ग्लाणा लग्गे, “एह़ कदेया माणु ऐ कि तफान कने पांणिये दियां लैहरां कने दुष्टआत्मां भी इसदा हुक्म मनदियां हन।”

दुष्टआत्मां दे सतायो माणुआं जो खरा करणा

²⁸ जाह़लू यीशु तिस पार गिरासेनियां दे प्रदेसे च पुज्जा, तां दो माणु जिन्हां च दुष्टआत्मां थियां कब्रां च रैंह्दे थे सैह़ तिसियो मिल्ले। सैह़ इतणे खतरनाक थे कि तिस रस्ते च कोई भी नीं जाई सकदा था।

²⁹ तिन्हां जोरे नैं डड्डी करी ग्लाया, “हे परमात्मे दे पुत्तर, अहां दा तिज्जो नैं क्या कम्म? क्या तू बग्ते ते पैहल्ले अहां जो दुख दैणे तांई ऐत्थु आईआ ऐ?”

³⁰ तिन्हां ते थोड़िया दूरिया पर मते भरी सूअरां दा झुंड चुगा दा था।

³¹ दुष्टआत्मां तिस नैं एह़ ग्लाई नैं विणती कित्ती, “जे तू अहां जो कड्डगा, तां इन्हां सूअरां च घल्ली दे।”

³² तिन्हीं तिन्हां नैं ग्लाया, “जा।” कने दुष्टआत्मां निकल़ी नैं सूअरां अंदर समाईयां कने दिक्खा सारे सूअर खड़िया भेठी ते रिड़की नैं पांणिये च जाई पै, कने डुबी करी मरी गै।

³³ कने तिन्हां सूअरां दे गुआले नठ्ठी गै, कने सैहरे च जाई नैं एह़ सारियां गल्लां कने जिन्हां च दुष्टआत्मां थियां तिन्हां दा सारा हाल सणाई दित्ता।

³⁴ ताह़लू सारे सैहरे दे लोक यीशुये नैं मिलणा चली आये, कने तिसियो दिक्खी नैं विणती कित्ती कि अहां दे लाक्के ते बाहर चली जा।