मत्ती 27 - काँगड़ी

पिलातुसे दे सामणै यीशु

¹ जाह़लू भ्याग होई तां सारे प्रधान याजकां कने लोकां दे स्याणे माणुआं यीशुये जो मारने दी योजना बणाई।

² कने सैह़ यीशुये जो बन्नी करी तित्थु ते लेई गै, कने जाई नैं पिलातुस हाकमे दे हुआलैं करी दित्ता।

यहूदा दा आत्महत्या करणा

³ जाह़लू तिसदे पकड़ुआणे आल़े यहूदैं दिख्या कि सैह़ मौत्ती तांई आरोपी ठैहराया गेआ ऐ तां तिसियो पछतावा होएया कने सैह़ तीई चाँदिया दे सिक्के प्रधान याजकां कने स्याणे माणुआं अल्ल बापस लेई आया।

⁴ कने ग्लाणा लग्गा, “मैं बेकसूर माणुये जो मारने तांई पकड़ुआई नैं पाप कित्ता ऐ।” तिन्हां ग्लाया, “अहां जो क्या लैणां दैणा? तू ई जाण।”

⁵ ताह़लू सैह़ तिन्हां सिक्केयां जो मंदरे दे अँगणे च सट्टी करी चली गेआ, कने जाई नैं अपणे आप्पे जो गल़फा लगाई लेआ।

⁶ प्रधान याजकां तिन्हां सिक्केयां जो लेई नैं ग्लाया, “क्जोकि जेह्ड़ी कीमत अहां कुसी दा खून करवाणे तांई दित्तियो थी। इसा जो खजाने च रखणा ठीक नीं”

⁷ तिन्हां सलाह करी नैं तिन्हां सिक्केयां ते परदेसी माणुआं जो दब्बणे तांई कुम्हारे दा जमीन खरीदी लेई।

⁸ इसा बज़ाह ते सैह़ खेत अज्जे तिकर खूने दा खेते दे नांऐ ते जाणेयां जांदा ऐ।

⁹ ताह़लू जेह्ड़ा वचन यिर्मयाह भविष्यवक्ता दे जरिये ग्लाया गेआ था सैह़ पूरा होएया, “तिन्हां सैह़ तीई सिक्के मतलब तिसा ठैहराईयो कीमता जो (जिसा जो इस्राएल देसे दिया औलादी च कितणेयां ठैहराया था) लेई लेआ,

¹⁰ कने जिंआं प्रभुयैं मिन्जो हुक्म दित्या था, तिंआं ई तिन्हां सिक्केयां नैं कुम्हारे दा खेत खरीदी लेआ।”

पिलातुस कने यीशु

¹¹ जाह़लू यीशु पिलातुस हाकमे सामणै खड़ोत्या था तां पिलातुसैं तिसते पुछया, “क्या तू यहूदियां दा राजा ऐ?” यीशु तिस नैं ग्लाणा लग्गा, “तू अप्पु ई तां ग्ला दा ऐ।”

¹² जाह़लू प्रधान याजक कने स्याणे माणु तिस पर आरोप लगा दे थे, तां तिन्हीं कुच्छ जवाब नीं दित्ता।

¹³ इसा गल्ला पर पिलातुस तिस नैं ग्लाणा लग्गा, “क्या तू नीं सुणदा कि एह़ तेरे खलाफ कितणियां गवाहियां देआ दे हन?”

¹⁴ अपर यीशुयैं तिसियो इक्की गल्ला दा भी जवाब नीं दित्ता, ऐत्थु तिकर कि हाकमे जो बड़ी हरानी होई।

मौत्ती दी सज़ा दा हुक्म

¹⁵ पिलातुसे दी एह़ रीत थी कि तिस त्योहारे च लोकां तांई कुसी इक्की कैदिये जो जिसियो सैह़ चांह़दे थे, छड्डी दिंदा था।

¹⁶ तिस बग्त तिन्हां दे ऐत्थु बरअब्बा नांऐ दा इक्क मन्नेया तनेया कैदी था।

¹⁷ कने जाह़लू सैह़ किठ्ठे होये, तां पिलातुस तिन्हां नैं ग्लाणा लग्गा, “तुहां कुसियो चांह़दे हन कि मैं तुहां तांई छड्डी दैं? बरअब्बा जो, या यीशुये जो जेह्ड़ा मसीह नांऐ ते जाणेयां जांदा ऐ?”

¹⁸ क्जोकि सैह़ जाणदा था कि सैह़ यीशुये नैं जल़ण रखदे थे, इसतांई तिन्हां तिसियो पकड़ुआया ऐ।

¹⁹ जाह़लू सैह़ न्याय दी गद्दिया पर बैठेया था तां तिसदिया लाड़िया तिसियो सद्दी घल्लेया, “तू तिस धर्मिये दे मामले च हत्थ मत पांदा, क्जोकि मैं अज्ज सुपणे च तिसदिया बज़ाह ते बड़ा दुख झेलेया ऐ।”

²⁰ प्रधान याजकां कने स्याणे माणुआं लोकां जो भड़काया कि सैह़ बरअब्बा जो छड्डी दैं, कने यीशुये जो मरवाई दैं।

²¹ पिलातुसैं तिन्हां ते पुछया, “इन्हां दून्नी च कुसियो चांह़दे हन कि मैं तुहां तांई छड्डी दैं?” तिन्हां ग्लाया, “बरअब्बा जो।”

²² पिलातुसैं तिन्हां ते पुछया, “भिरी यीशुये जो, जेह्ड़ा मसीह नांऐ ते जाणेयां जांदा ऐ क्या करैं?” तां सारे तिस नैं ग्लाणा लग्गे, “सैह़ सूल़िया पर टूंगेया जां

²³ पिलातुसैं ग्लाया, क्जो तिन्हीं क्या गुनाह कित्या ऐ?” अपर सैह़ होर भी जोरे नैं डड्डी-डड्डी करी ग्लाणा लग्गे, “सैह़ सूल़िया पर टूंगेया जां।”

²⁴ जाह़लू पिलातुसैं दिख्या कि कुच्छ बणी नीं सकदा अपर इसदे उल्ट हल्ला बधदा जा दा ऐ, तां तिन्हीं पाणी लेआ कने भीड़ा सामणै अपणे हत्थ धोते कने ग्लाया, “मैं इस धर्मिये दे खून ते बेकसूर ऐ; तुहां ई जाणा।”

²⁵ सारेयां लोकां जवाब दित्ता, “इसदा खून अहां पर कने अहां दिया औलादी पर होयैं।”

²⁶ इसा गल्ला पर तिन्हीं बरअब्बा जो तिन्हां तांई छड्डी दित्ता, कने यीशुये जो कोड़े लगुआई नैं तिन्हां दे हुआलैं करी दित्ता, कि सूल़िया पर टूंगेया जां।

सपाईयां ते यीशु दी बेज्जती

²⁷ ताह़लू पिलातुसे दे सपाईयां यीशुये जो किले च अंणी नैं सारी पलटन तिसदे चौंन्नी बक्खे किठ्ठी कित्ती,

²⁸ कने तिसदे कपड़े खोली नैं तिसियो बैजनी रंगे दा चोल़ा लौआया,

²⁹ कने कन्डेयां दा मुकट बणाई नैं तिसदे सिरे पर रखी दित्ता, तिसदे सज्जे हत्थ च कनेड़े दा डंडा दित्ता कने तिसदे गांह गोड्डेयां भार बेई नैं तिसदा मजाक करी नैं ग्लाणा लग्गे, “हे यहूदियां दे राजा, नमस्कार।”

³⁰ कने तिस पर थुकेया; कने सैई कनेड़े दा डंडा लेई नैं तिसदे सिरे पर मारणा लग्गे।

³¹ जाह़लू सैह़ तिसदा मजाक करी बैठे, तां सैह़ चोल़ा तिसते खोली नैं भिरी तिसदे कपड़े तिसियो लौआई दित्ते, कने सूल़िया पर टूंगणे तांई लेई चल्ले।

यीशुये जो सूल़िया पर टुंगणा

³² बाहर जांदे-बग्त तिन्हां जो शमौन नांऐ दा इक्क कुरेनी माणु मिल्ला। तिन्हां तिसियो बेकार च पकड़ेया कि यीशुये दिया सूल़िया चुक्की नैं लेई चल्लैं।

³³ जाह़लू सैह़ सारे गुलगुता नांऐ दिया जगाह च पुज्जे, जिसा जगाह जो खोपड़ी दी जगाह भी ग्लांदे हन,

³⁴ तिन्हां पित्त मिल्लाई करी अंगूरा दा रस यीशुये जो पीणे जो दित्ता, तिन्हीं चखी तां लेआ अपर पीता नीं।

³⁵ ताह़लू तिन्हां यीशुये जो सूल़िया पर टूंगेया कने पर्चियां पाई नैं तिसदे कपड़े बंडी लै,

³⁶ कने तित्थु बेई नैं पैहरा दैणा लग्गे।

³⁷ कने तिसदा दोसपत्र तिसदे ऊपर सूल़िया पर लगाई दित्ता, कि “एह़ यहूदियां दा राजा यीशु ऐ।”

³⁸ ताह़लू तिस सौगी दूँ डाकुआं जो इक्क सज्जे कने इक्क खब्बे पास्से, सूल़िया पर टुंगी दित्ते।

³⁹ कने ओणे जाणे आल़े सिरे हिलाई-हिलाई नैं तिसदी निंदा करदे थे,

⁴⁰ कने एह़ ग्लांदे थे, “हे मंदरे ढाणे आल़ेया कने त्रीं दिनां च बणाणे आल़ेया, अपणे आप्पे जो तां बचा। जे तू परमात्मे दा पुत्तर ऐ, तां सूल़िया ते लौई आ।”

⁴¹ इस तरीके नैं प्रधान याजक भी सास्त्री कने स्याणे माणुआं सौगी मजाक करी-करी नैं ग्लांदे थे,

⁴² “इन्हीं होरनी माणुआं जो तां बचाया, अपर अपणे आप्पे जो नीं बचाई सकदा। ‘एह़ तां इस्राएल देसे दा राजा ऐ।’ हुण जे एह़ सूल़िया ते लौई औयें तां अहां तिस पर बसुआस करन।

⁴³ तिन्हीं परमात्मे पर भरोसा रखेया; जे सैह़ इसियो चांह़दा, तां हुण इसियो छड्डाई लै, क्जोकि इन्हीं ग्लाया था, ‘मैं परमात्मे दा पुत्तर ऐ।’ ”

⁴⁴ कने डाकू भी जेह्ड़ा तिस सौगी सूल़िया पर टूंगेयो थे तिसदी निंदा करदे थे।

यीशुये दा प्राण छड्डणा

⁴⁵ दोपैरा दे बाराह बजे ते लेई नैं दोपैरा दे त्रै बजे तिकर तिस सारे देसे च नेहरा छाई रेह्आ।

⁴⁶ त्रीये पैहर दे नेड़े यीशु बड़े जोरे नैं डड्डी करी ग्लाणा लग्गा, “ऐली, ऐली, लमा शबक्तनी?” मतलब “हे मेरे परमात्मा, हे मेरे परमात्मा, तैं मिन्जो क्जो छड्डी दित्ता?”

⁴⁷ जेह्ड़े माणु तित्थु खड़ोत्यो थे, तिन्हां च कुच्छ लोक एह़ सुणी नैं ग्लाणा लग्गे, “सैह़ तां एलिय्याह जो हक्कां पा दा ऐ।”

⁴⁸ तिन्हां च इक्क ताह़लू ई दौड़ेया कने स्पंज लेई नैं सिरके च डुबाया, कने कनेड़े दे डंडे पर रखी नैं यीशुये जो चुसणे जो दित्ता।

⁴⁹ भिरी होर माणु ग्लाणा लग्गे “रुकी जा, दिक्ख, एलिय्याह इसियो बचाणा ओंदा ऐ कि नीं।”

⁵⁰ ताह़लू यीशुयैं जोरे नैं डड्डी करी प्राण छड्डी दित्ते।

⁵¹ कने दिक्खा मंदरे दा पड़दा ऊपरे ते लेई नैं थल्लै तिकर फटी नैं दो टुकड़े होई गेआ, कने धरती हिल्ली गेई कने चट्टाना तिड़की गियां,

⁵² कने कब्रां खुली गियां, कने मरेयो पवित्र लोकां दी मतिआं लाह्सा जिन्दियां होई गियां,

⁵³ कने तिसदे जिन्दे होणे ते बाद सैह़ कब्रां ते निकल़ी नैं पवित्र सैहर च गै कने मतेआं जो दुस्से।

⁵⁴ ताह़लू सूबेदार कने जेह्ड़े तिस सौगी यीशुये दा पैहरा दै दे थे, हिल्लण कने जेह्ड़ा कुच्छ होएया था तिसियो दिक्खी नैं बड़े भरी डरी गै कने ग्लाणा लग्गे, “सच्च-बिच्च एह़ परमात्मे दा पुत्तर था।”

⁵⁵ तित्थु मतिआं जणासा जेह्ड़ियां गलील प्रदेसे ते यीशु दी भक्ति करदियां तिस सौगी आईआं थियां, सैह़ दूरे ते एह़ सब दिक्खा दियां थियां।

⁵⁶ तिन्हां च मरियम मगदलीनी, कने लोक्के भाऊ याकूबे कने योसेसे दी माँ मरियम, कने जबदिये दे पुत्तरां दी माँ थी।

यीशुये जो कब्रा च रखणा

⁵⁷ जाह़लू संझ होई तां यूसुफ नांऐ दा अरिमतिया सैहरे दा इक्क अमीर माणु आया, जेह्ड़ा यीशुये दा चेला था।

⁵⁸ तिन्हीं पिलातुसे अल्ल जाई नैं यीशु दी लाह्स दफनाणे तांई मंगी। इसा गल्ला पर पिलातुसैं लाह्सा जो देई दैणे दा हुक्म दित्ता।

⁵⁹ यूसुफैं लाह्स लेई, कने तिसियो चिट्टिया चादरा च लपेटया,

⁶⁰ कने यीशु दिया लाह्सा जो अपणिया नौईआं कब्रा च रखेया, जेह्ड़ी तिन्हीं चट्टाना च कोरियो थी, कने कब्रा दे मुँऐ पर भारी पत्थर खसकाई नैं चली गेआ।

⁶¹ मरियम मगदलीनी कने दूई मरियम तित्थु कब्रा दे सामणै बैठियां थियां।

कब्रा पर पैहरा

⁶² दूआ दिन जेह्ड़ा बिस्रामे आल़े दिन दे बाद दा दिन था, प्रधान याजक कने फरीसी माणु पिलातुसे अल्ल किठ्ठे होई नैं ग्लाणा लग्गे,

⁶³ “हे महाराजा, अहां जो याद ऐ, कि तिन्हीं भरमाणे आल़ैं माणुयैं, जाह़लू सैह़ जिन्दा था, तुहां जो ग्लाया था, कि मेरे मरने दे बाद मैं त्रीये दिने भिरी जिन्दा होई जाणा।

⁶⁴ इसतांई सपाईयां जो हुक्म देआ कि सैह़ त्रै दिन लगातार कब्रा दी रखवाल़ी करन। इआं ना होयैं कि तिसदे चेले आई नैं तिसदिया लाह्सा जो चोरी लेई जान कने लोकां नैं ग्लान, कि ‘सैह़ मरेयां च जिन्दा होई गेआ ऐ।’ ताह़लू पिछला धोखा पैहल्ले ते भी बुरा होणा।”

⁶⁵ पिलातुस तिन्हां नैं ग्लाणा लग्गा, “तुहां अल्ल अपणे पैहरेदार हन। तां जा, अपणिया समझा दे मताबक कब्रा दी रखवाल़ी करा।”

⁶⁶ सैह़ पैहरेदारां जो अप्पु सौगी लेई नैं गै, कने पत्थरे पर मोहर लगाई नैं कब्रा दी रखवाल़ी कित्ती।