मत्ती 24 - काँगड़ी

मंदरे दे विनाशे दी भविष्यवाणी

¹ जाह़लू यीशु मंदरे ते निकल़ी नैं जा दा था, तां तिसदे चेले तिसियो मंदरे दी रचणा दस्सणे तांई तिस अल्ल आये।

² तिन्हीं तिन्हां नैं ग्लाया, “तुहां एह़ सब दिक्खा दे हन। मैं तुहां नैं सच्च ग्लांदा ऐ, ऐत्थु इक्की पत्थरे पर दूआ पत्थर टिकेया नीं रैंह्गा। इक्क-इक्क पत्थर ढाई दित्ता जांगा।”

मुसीबत कने दुख

³ जाह़लू सैह़ जैतून प्हाड़े पर बैठेया था, तां चेलेयां पड़दे नैं तिस अल्ल आई नैं ग्लाया, “अहां जो दस्सा कि एह़ गल्लां काह़लू हुंगियां? तेरे ओणे दा कने संसारे दे अन्त दा क्या नसाण हुंगा?”

⁴ यीशुयैं तिन्हां जो जवाब दित्ता, “इसा गल्ला पर चौकन्ने रेह्आ। कोई तुहां जो भकाई नीं पां,

⁵ क्जोकि मत्ते ऐदेय हुंगे जेह्ड़े मेरे नांऐ ते आई करी ग्लांगे, ‘मैं मसीह ऐ,’ कने मतेआं जो भकांगे।

⁶ तुहां लड़ाईयां कने लड़ाईयां दी चर्चा सुणगे, तां घबराई मत जांदे क्जोकि इन्हां दा होणा जरूरी ऐ, अपर तिस बग्त अन्त नीं हुंगा।

⁷ क्जोकि जाति पर जाति राज्जे पर राज्ज चढ़ाई करगा, कने जगाह-जगाह पर अकाल पोणे हन, कने हिल्लण हुंगे।

⁸ एह़ सारियां गल्लां तकलीफां दी सुरुआत होणी ऐ।

⁹ “तिस बग्त दे लोक तुहां जो पकड़ुआई करी बड़ा बरोध कने तुहां जो मारी दिंगे, कने मेरिया बज़ाह ते सारी जातिआं दे लोक तुहां नैं बैर रखगे।

¹⁰ तिन्हां दिनां च मतेआं दा बसुआस जांदा रैंह्गा, कने इक्की दूये जो पकड़ुआंगे, इक्की दूये नैं बैर रखगे।

¹¹ तिस बग्त मते झूठे भविष्यवक्ता आई जांगे, कने मतेआं लोकां जो भकांगे।

¹² बुरे कम्मां बधणे दिया बज़ाह ते मते लोक इक्की दूये नैं प्यार करणा छड्डी दिंगे।

¹³ अपर जेह्ड़ा ज़िन्दगी दे आखरी तिकर बसुआस रखगा, तिसदा ई उद्धार हुंगा।

¹⁴ कने परमात्मे दे राज्जे दा एह़ सुसमाचार सारे संसारे च प्रचार कित्ता जांगा, तांजे सारे देसां दे लोक सुसमाचारे जो ग्रहण करन, भिरी ताह़लू संसारे दा अन्त आई जांगा।”

बड़िया मुसीबता दी सुरुआत

¹⁵ भिरी यीशुयैं तिन्हां नैं ग्लाया, जेह्ड़ा पढ़ैं, सैह़ समझी लैं “इसतांई जाह़लू तुहां तिसा उजाड़णे आल़ी घृणित चीज्जा जो पवित्र जगाह च खड़ोतियो दिक्खन, जिसदी चर्चा दानिय्येल भविष्यवक्तैं कित्तियो थी,

¹⁶ ताह़लू जेह्ड़े यहूदिया प्रदेसे च होन सैह़ प्हाड़ां पर नठ्ठी जान।

¹⁷ कने जेह्ड़े छत्ती पर हुंगे, सैह़ अपणे घरे ते कुच्छ भी लैणे तांई थल्लै नीं लौन, कने अंदर नीं जान।

¹⁸ कने जेह्ड़े खेतां च हुंगे, सैह़ अपणा कपड़े लैणे तांई पचांह़ नीं हटन।

¹⁹ “भिरी यीशुयैं ग्लाया, तिन्हां जणासां तांई खतरनाक बग्त हुंगा, जेह्ड़ियां गर्भवती कने बच्चेयां जो दुद पिलाणे आल़िआं हुंगी, तिस बग्त तिन्हां तांई नठणा बड़ा औखा होई जांगा।

²⁰ कने परमात्मे नैं प्रार्थना करा कि तुहां जो ठंडी च या बिस्रामे आल़े दिन नठणा नीं पोयैं।

²¹ क्जोकि तिस बग्त ऐदेया भारी सताव होणा, जिंआं ना तां संसार दी सुरुआत ते अज्जे तिकर होएया, कने ना ई कदी हुंगा।

²² कने जे सैह़ दिन घटाये नीं जांदे तां कोई भी प्राणी नीं बचदा, अपर चुणेयां दिया बज़ाह ते सैह़ दिन घटाये जांगे।

²³ तिस बग्त जे कोई तुहां नैं ग्लां, ‘दिक्खा, मसीह ऐत्थु ऐ।’ या औत्थू ऐ। तां बसुआस मत करदे।

²⁴ “क्जोकि झूठे मसीह कने झूठे भविष्यवक्ता उठी खड़ोणा, कने बड्डे चमत्कार, कने अनोखे कम्म दस्सगे, कि जे होई सकैं परमात्मे दे चुणेयां लोकां जो भी भटकाई दैन।

²⁵ दिक्खा, मैं पैहल्ले ते तुहां नैं एह़ सब कुच्छ ग्लाई दित्ता ऐ।

²⁶ इसतांई जे सैह़ तुहां नैं ग्लान, ‘दिक्खा, सैह़ सुनसाण जगाह च ऐ’, तां बाहर मत निकल़ी जांदे; ‘दिक्खा, सैह़ कोठियां च ऐ’, तां बसुआस मत करदे।

²⁷ “क्जोकि जिंआं बिजल़ी पूरब ते निकल़ी नैं पशिचमे तिकर चमकदी ऐ, तिंआं ई माणुये दे पुत्तरे दा भी औणां हुंगा।

²⁸ हर इक्क माणु जाणगा, कि एह़ कुत्थू हुंगा, ठीक तिंआं ई जिंआं जित्थु लाह्सां हन, तित्थु इलणी कठ्ठियां हुंदियां हन।

माणुये दे पुत्तरे दा औणां

²⁹ “तिन्हां दिनां दे सताव दे बाद इकदम सूरज नेहरा होई जांगा, कने चन्द्रमे दी लौ चली जांगी, कने तारे अम्बरे ते थल्लै पेई जांगे कने अम्बरे दियां सक्तियां हिलाईयां जागियां।

³⁰ ताह़लू माणु दे पुत्तरे दा नसाण अम्बरे च दुस्सगा, कने ताह़लू धरती दे सारे कुल़ां दे माणु छाती पीटगे; कने माणु दे पुत्तर जो बड्डी सामर्था कने महिमा सौगी अम्बरे बिच्च बदल़ां पर ओंदे दिक्खगे।

³¹ सैह़ तुरही दी बड्डी उआज़ा सौगी अपणे सुअर्गदूतां जो घल्लगा, कने सैह़ धरतिया दे सारे तिसदे चुणेयां लोकां जो किठ्ठा करगे।

धूड़े दे रूखे दा उदारण

³² “धूड़े दे रूखे ते एह़ सिक्षा लेआ; जाह़लू तिसदियां डाल़िआं नरम होई जांदियां कने पत्तर निकल़णा लगदे हन, तां तुहां जाणी लैंदे हन कि गर्मिया दा मौसम ओणे आल़ा ऐ।

³³ इस तरीके नैं जाह़लू तुहां इन्हां सारियां गल्लां जो दिक्खा, तां जाणी लेआ कि सैह़ नेड़े ऐ, अपर दरवाजे पर ई ऐ।

³⁴ मैं तुहां नैं सच्च ग्लांदा ऐ, कि जाह़लू तिकर एह़ सारियां गल्लां पूरी नीं होई लैंन, ताह़लू तिकर इसा पीढ़िया दे लोकां दा अन्त नीं हुंगा।

³⁵ अम्बर कने धरती टल़ी सकदे हन, अपर मेरियां गल्लां कदी नीं टली सकदियां।

जागदे रेह्आ

³⁶ “तिस दिन दे कने तिस बग्त दे बारे च कोई नीं जाणदा, ना सुअर्गे दे सुअर्गदूत कने ना पुत्तर, अपर सिर्फ पिता जाणदा ऐ।

³⁷ जिंआं नूह दे दिन थे तिंआं ई मेरा माणुये दे पुत्तरे दा औणां भी हुंगा।

³⁸ क्जोकि जिंआं जल प्रलयै ते पैहल्ले दे दिनां च, जिस दिन तिकर कि नूह जाह्जे पर नीं चढ़ेया, तिस दिन तिकर लोक खांदे पींदे थे, कने तिन्हां लोकां च ब्याह हुंदे थे।

³⁹ कने जाह़लू तिकर जल प्रलयै आई करी तिन्हां सारेयां जो रढ़ाई नीं लेई गेई, ताह़लू तिकर तिन्हां जो कुच्छ भी पता नीं लगेया; तिंआं ई मेरा माणुये दे पुत्तरे दा औणां भी हुंगा।

⁴⁰ तिस बग्त दो माणु खेतां च हुंगे, इक्क लेई लेआ जांगा कने दूआ छड्डी दित्ता जांगा।

⁴¹ दो जणासां चक्की पिआ दियां हुंगिया, इक्क लेई ली जांगी कने दूई छड्डी दित्ती जांगी।

⁴² इसतांई जागदे रेह्आ, क्जोकि तुहां नीं जाणदे कि तुहां दा प्रभु कुस दिन ओंगा

⁴³ अपर एह़ जाणी लेआ कि जे घरे दा मालक जाणदा हुंदा कि चोर कुस बग्त ओंगा तां जागदा रैंह्दा, कने अपणे घरे च सेंध लगणा नीं दिंदा।

⁴⁴ इसतांई तुहां भी त्यार रेह्आ, क्जोकि जिस बग्त दे बारे च तुहां सोचदे भी नीं हन, तिसी बग्त मैं माणु दा पुत्तर आई जांगा।

बसुआसी कने बेबसुआसी दास

⁴⁵ “कने सैह़ बसुआसे जोग्गा कने अक्लमंद दास कुण ऐ, जिसियो मालकैं अपणे नौकरां चाकरां पर अधिकारी बणाया, कि बग्ते पर तिन्हां जो खाणा दैं?

⁴⁶ धन ऐ सैह़ दास, जिसियो तिसदा मालक आई नैं इआं ई करदे दिक्खैं।

⁴⁷ मैं तुहां नैं सच्च ग्लांदा ऐ, सैह़ तिसियो अपणी सारिया धन दौलता दा हक्कदार बणांगा।

⁴⁸ अपर जे सैह़ दुष्ट दास इसा सोचा रैंह्गा, कि मेरे मालके दे ओणे च देर ऐ।

⁴⁹ कने सैह़ दास अपणे साथी दासां जो मारणा लग्गैं, कने पियक्कड़ां सौगी खां पीयैं।

⁵⁰ तां तिस दासे दा मालक तधैड़ी बापस औणां, जधैड़ी सैह़ तिसदा इन्तजार भी नीं करा दा होणा, कने ऐदेया बग्त जिसियो सैह़ नीं जाणदा होयैं,

⁵¹ ताह़लू मालक आई नैं, तिसियो बड़ी भरी सज़ा दिंगा, कने तिसियो पापियां सौगी काल कोठरिया च पाई दिंगा, जित्थु रोणा कने दंद पीणा हुंगा।”