मत्ती 23 - काँगड़ी

सास्त्रियां कने फरीसियां ते चौकन्ने रेह्आ

¹ ताह़लू यीशुयैं लोकां दिया भीड़ा कने अपणे चेलेयां नैं ग्लाया,

² सास्त्री कने फरीसी माणु मूसा दिया व्यबस्था दा बखान करणे आल़े हन।

³ इसतांई सैह़ तुहां नैं जेह्ड़ा कुच्छ ग्लांन तिन्हां जो करा भी कने मन्ना भी, अपर तिन्हां साइआं कम्मां मत करा; क्जोकि सैह़ सिक्षा तां दिंदे हन अपर तिसा पर चलदे नीं।

⁴ सैह़ मते भरी कायदे कानून बणांदे हन, जिन्हां जो लोकां तांई मन्नणा बड़ा औखा ऐ। अपर अपणे बणाएयो कायदे कानूना जो मन्नणे दी तां सैह़ जरा भी कोसस नीं करदे।

⁵ सैह़ अपणे सारे कम्म लोकां जो दस्सणे तांई करदे हन, सैह़ पवित्रशास्त्रे दे वचन ताबीजां च लिखी नैं अपणे गल़े च कने हत्थां च पांदे हन, कने अपणे कपड़ेयां दे पल्लेयां जो लम्बा करदे हन।

⁶ धामा च खास-खास जगाह कने आराधनालय च खास-खास आसणा च बैठणा पंसद करदे हन,

⁷ कने बजारां च नमस्कार, कने माणु तिन्हां जो गुरू ग्लांन सैह़ तिन्हां जो बड़ा खरा लगदा ऐ।

⁸ अपर तुहां लोकां जो एह़ मौका नीं दैणा कि सैह़ तुहां जो गुरू ग्लांन, क्जोकि तुहां दा इक्को ई गुरू ऐ, कने तुहां सारे भाऊ-बैह्णी इक्क बराबर हन।

⁹ धरती पर कुसी भी धार्मिक गुरू जो अपणा पिता नीं ग्लाणा, क्जोकि तुहां दा इक्को ई पिता ऐ, जेह्ड़ा सुअर्गे च ऐ।

¹⁰ अपर तुहां लोकां जो एह़ मौका भी नीं दैणा कि सैह़ तुहां जो मालक ग्लांन, क्जोकि तुहां दा इक्को ई मालक ऐ, मतलब मसीह।

¹¹ जेह्ड़ा तुहां च बड्डा होयैं, सैह़ तुहां दा दास बणैं।

¹² जेह्ड़ा कोई अपणे आप्पे जो बड्डा बणांगा, सैह़ छोटा कित्ता जांगा, कने जेह्ड़ा कोई अपणे आप्पे जो छोटा बणांगा, सैह़ बड्डा कित्ता जांगा।

सास्त्री कने फरीसी माणुआं दी निंदा

¹³ “हे पाखंडी सास्त्री कने फरीसी माणुओ, तुहां पर हाय। तुहां माणुआं तांई सुअर्गे दे राज्जे दा रस्ता बंद करदे हन, ना तां तुहां अप्पु तिस च जांदे हन कने ना तिस च जाणे आल़ेआं जो जाणा दिंदे।

¹⁴ हे पाखंडी सास्त्री कने फरीसी माणुओ, तुहां पर हाय। तुहां बिधवां दे घरां जो चलाकिया नैं हड़पी लेई जांदे हन, कने दस्सणे तांई लमियां-लमियां प्रार्थना करदे हन। इसतांई तुहां जो मती सज़ा मिलणी ऐ।

¹⁵ “हे पाखंडी सास्त्री कने फरीसी माणुओ, तुहां पर हाय। तुहां इक्की जणे जो अपणे मत च लेयोणे तांई हर जगाह घूमदे हन, कने जाह़लू सैह़ मत च आई जांदा ऐ, तां तिसियो तुहां अपणे ते दुगणा नरके दा हिस्सेदार बणाई दिंदे हन।

¹⁶ “हे अन्ने अगुओ, तुहां पर हाय। तुहां जेह्ड़ी एह़ सिक्षा दिंदे हन, कि ‘जे कोई मंदरे दी कसम खां तां कोई फर्क नीं, अपर जे कोई मंदरे दे सोन्ने दी खां तां तिसा कसमा नैं बन्नूई जांदा ऐ।’

¹⁷ हे मूर्खो कने अन्नेयो, कुण बड्डा ऐ; सोन्ना या सैह़ मंदर जिसते सोन्ना पवित्र हुंदा ऐ।”

¹⁸ भिरी एह़ सिक्षा देई नैं ग्लांदे हन कि जे कोई वेदी दी कसम खां तां कोई फर्क नीं, अपर जेह्ड़ा चढ़ावा तिस पर ऐ, जे कोई तिसदी कसम खां तां तिसा कसमा नैं बन्नूई जांदा ऐ।

¹⁹ “हे अन्नेयो, कुण बड्डा ऐ, चढ़ावा या वेदी जिसते चढ़ावा पवित्र हुंदा ऐ।

²⁰ इसतांई जेह्ड़ा वेदी दी कसम खांदा ऐ, सैह़ तिसदी कने जेह्ड़ा कुच्छ तिस पर ऐ, तिसदी भी कसम खांदा ऐ।

²¹ जेह्ड़ा मंदरे दी कसम खांदा ऐ, सैह़ मंदरे दी कने तिस च रैहणे आल़े परमात्मे दी भी कसम खांदा ऐ,

²² जेह्ड़ा सुअर्गे दी कसम खांदा ऐ, सैह़ परमात्मे दे सिंहासणे दी कने तिस पर बैठणे आल़े दी भी कसम खांदा ऐ।

²³ “हे पाखंडी सास्त्री कने फरीसी माणुओ, तुहां पर हाय, तुहां पुदीने, कने सौंफ, कने जीरे दा दसमा हिस्सा दिंदे हन, अपर तुहां व्यबस्था दियां गम्भीर गल्लां जो मतलब न्याय, दया कने बसुआसे जो छड्डी दित्ता ऐ; अपर खरा हुंदा कि इन्हां जो भी करदे रैंह्दे, कने तिन्हां जो भी नीं छड्डदे।

²⁴ हे अन्ने अगुओ, तुहां छोटे-छोटे कायदे कानून तां बड़े ध्याने नैं मनदे हन, जिंआं मच्छरे जो पांणिये ते छानणा। अपर परमात्मे दे खास हुक्मां कने कानूना जो टाल़ी दिंदे हन, जिंआं ऊँटे जो निगल़णा।

²⁵ “हे पाखंडी सास्त्री कने फरीसी माणुओ, तुहां पर हाय, तुहां तिन्हां कटोरे कने थाल़िया साइआं हन, जेह्ड़ियां बाहरे ते साफ कने अंदरे ते गंदियां हन, तिंआं ई तुहां दे मन अंदरे ते लालची कने मतलबी हन।

²⁶ हे अन्ने फरीसी माणु, पैहल्ले कटोरे कने थाल़िया जो अंदरे ते मांज कि सैह़ बाहरे ते भी साफ होन।

²⁷ “हे पाखंडी सास्त्री कने फरीसी माणुओ, तुहां पर हाय। तुहां तां ऐदेय दुस्सदे हन कि जिंआं कब्रा च सफेदी कित्तियो होयैं जेह्ड़ी ऊपरे ते छैल़ दुस्सदी ऐ, अपर अंदर मुड़देयां दी हड्डियां कने हर किस्मा दिया गन्दगियां नैं भरोईयां हन।

²⁸ इस तरीके नैं तुहां भी ऊपरे ते माणुआं जो धर्मी दुस्सदे हन, अपर अंदर कपट कने बुरे कम्मां नैं भरोयो हन।

सास्त्री कने फरीसी माणुआं पर सज़ा दी भविष्यवाणी

²⁹ “हे पाखंडी सास्त्री कने फरीसी माणुओ, तुहां पर हाय। तुहां भविष्यवक्तां दियां कब्रां जो सवारंदे कने धर्मियां दियां कब्रां जो आदर दैणे तांई बणांदे हन,

³⁰ कने ग्लांदे हन, जे अहां अपणे पूर्वजां दे दिनां च हुंदे तां भविष्यवक्तां दी हत्या च तिन्हां दे गवाह नीं हुंदे।

³¹ इसते तां तुहां लोक अप्पु ई अपणे खलाफ गवाही दिंदे हन, कि तुहां तिन्हां दी औलाद हन जिन्हां भविष्यवक्तां दा खून कित्या था।

³² मैं जाणदा ऐ, तुहां तिसा बुराईया दा खात्मा करणे आल़े हन, जेह्ड़ी तुहां दे पूर्वजां सुरू कित्तियो थी।

³³ हे सर्पां साइआं जेहरिलै कने दगाबाज लोको तुहां नरके दिया सज़ा ते नठ्ठी करी बची नीं सकदे।

³⁴ इसतांई मेरी सुणा, मैं तुहां अल्ल भविष्यवक्तां कने अक्लमंदा कने सास्त्री माणुआं जो घल्लदा ऐ। तिन्हां च कुच्छ लोकां दा तुहां खून करगे, कने कुच्छ लोकां जो सूल़िया पर टूंगगे, कने कुच्छ लोकां जो अपणे आराधनालयां च कोड़े मारगे कने इक्की सैहरे ते दूये सैहरे जो खदेड़दे फिरगे।

³⁵ जिसते धर्मी हाबिले ते लेई नैं बिरिक्याह दे पुत्तर जकरियाह तिकर, जिसियो तुहां मंदरे कने वेदी दे बिच्च मारी दित्या था, जितणे धर्मी लोकां दा खून धरतिया पर बहाया ऐ, सैह़ सारा इल्जाम तुहां दे सिरे पर पोणा ऐ।

³⁶ मैं तुहां नैं सच्च ग्लांदा ऐ, एह़ सब गल्लां इस बग्त दे लोकां पर आई पोंगियां।

यरूशलेम सैहरे दे लोकां तांई विलाप

³⁷ “हे यरूशलेम सैहरे दे लोको, तुहां जेह्ड़े भविष्यवक्तां मारी दित्ते हन, कने जेह्ड़े तुहां अल्ल घल्लेयो, तिन्हां पर पत्थर मारदे हन। कितणी ई बरी मैं एह़ सोचेया कि जिंआं कुक्ड़ी अपणे बच्चेयां जो अपणे पंखा थल्लैं किठ्ठा करी नैं सम्भाल़ी करी रखदी ऐ, तिंआं मैं भी तुहां दे जागतां जो किठ्ठा करी सम्भाल़ी लैं, अपर तुहां लोकां नीं चाया।

³⁸ दिक्खा, तुहां दा घर तुहां तांई उजाड़ छड्डी जांदा ऐ।

³⁹ क्जोकि मैं तुहां नैं ग्लांदा ऐ, कि हुण ते जाह़लू तिकर तुहां नीं ग्लांगे, ‘धन हन सैह़, जेह्ड़े प्रभु दे नांऐ ते ओंदे हन,’ ताह़लू तिकर तुहां मिन्जो भिरी कदी नीं दिक्खगे।”