मत्ती 22 - काँगड़ी

ब्याये दा कने धामा दा उदारण

¹ यीशु भिरी तिन्हां नैं उदारणा च ग्लाणा लग्गा,

² “सुअर्गे दा राज्ज तिस राजे साइआं ऐ, जिन्हीं अपणे जागते दा ब्याह कित्ता,

³ कने तिन्हीं अपणे दासां जो घल्लेया कि सद्देयो लोकां जो ब्याह दी धामा च सदन; अपर तिन्हां औणां नीं चाया।

⁴ भिरी तिन्हीं होर दासां जो एह़ ग्लाई नैं घल्लेया, ‘सद्देयो लोकां नैं ग्ला, दिक्खा मैं धाम त्यार करी दित्तियो, मेरे दांद कने पाल़ेयो जानवर धामा तांई मारे गै हन, कने सब कुच्छ त्यार ऐ, ब्याये दिया धामा च ओआ।’

⁵ अपर सैह़ अणदेखी करी नैं चली पै, कोई अपणे खेतां जो, कोई अपणे कम्मे जो चली गेआ।

⁶ होरनी लोकां जेह्ड़े तिसा धामा च बचेयो थे तिसदे दासां जो पकड़ी नैं तिन्हां दा अपमान कित्ता कने मारी दित्ता।

⁷ जाह़लू राजैं एह़ सुणेया तां तिसियो गुस्सा आया, कने तिन्हीं अपणी सेना घल्ली नैं तिन्हां मारने आल़ेआं दा नास कित्ता, कने तिन्हां दे सैहरे जो फुकी दित्ता।

⁸ ताह़लू तिन्हीं अपणे दासां नैं ग्लाया, ‘ब्याये दी धाम तां त्यार ऐ अपर सद्देयो लोक इस लायक नीं ठेहरै।

⁹ इसतांई हुण तुहां हर जगाह जा कने जितणे माणु तुहां जो मिलगे, सबना जो ब्याये दिया धामा च सद्दी लेयोआ।’

¹⁰ तिन्हां दासां हर जगाह जाई नैं क्या बुरे क्या खरे, जितणे मिल्ले, सारेयां जो किठ्ठा कित्ता; कने ब्याये आल़ेआं दा घर परोणेयां नैं भरोईया।

¹¹ “जाह़लू राजा परोणेयां जो दिक्खणा अंदर आया, तां तिन्हीं तित्थु इक्की माणुये जो दिख्या, जिन्हीं ब्याये आल़े कपड़े जेह्ड़े तिन्हीं सारे परोणेयां तांई दित्यो थे, तिन्हीं नीं पैहनेयो थे।

¹² राजैं तिसते पुछया, ‘हे दोस्त; तू ब्याये आल़े कपड़े जेह्ड़े मैं सारे परोणेयां तांई दित्यो थे तू पैहने बगैर ऐत्थु क्जो आई गेआ?’ तिस अल्ल इसदा कोई जवाब नीं था।

¹³ ताह़लू राजैं दासां नैं ग्लाया, ‘इसदे हत्थां पैरां बन्नी नैं तिसियो बाहर नेहरे च पाई देआ, तित्थु रोणा कने दंद पिणा हुंगा।’

¹⁴ क्जोकि सद्देयो तां मत्ते हन अपर चुणेयो थोड़े हन।”

कैसरे जो कर दैणा

¹⁵ ताह़लू फरीसी माणुआं जाई नैं अप्पु च बचार कित्ता कि तिसियो कुणा गल्लां च फसान।

¹⁶ कने तिन्हां अपणे चेलेयां जो यहूदी माणुआं सौगी, जेह्ड़े हेरोदेस राजे दे समर्थक थे, तिस अल्ल एह़ ग्लाणे जो घल्लेया, “हे गुरू अहां जाणदे हन कि तू सच्चा ऐ, कने परमात्मे दा रस्ता सच्चाईया नैं सखांदा ऐ, कने कुसी दी परवाह नीं करदा, क्जोकि तू माणुआं दा मुँ दिक्खी नैं गल्लां नीं करदा।

¹⁷ इसतांई अहां जो दस्स तू क्या सोचदा ऐ? कि कैसर राजे जो चुंगी दैणा ठीक ऐ कि नीं।”

¹⁸ यीशुयैं तिन्हां दी दुष्टता जाणी नैं ग्लाया, “हे पाखंडियों, मिन्जो क्जो परखा दे हन?

¹⁹ करे दे सिक्के मिन्जो दस्सा।” ताह़लू सैह़ तिस अल्ल इक्क दिनारे दा सिक्का लेई आये।

²⁰ तिन्हीं तिन्हां ते पुछया, “एह़ छाप कने नां कुसदा ऐ?”

²¹ तिन्हां तिस नैं ग्लाया, “कैसर राजे दा।” ताह़लू तिन्हीं तिन्हां नैं ग्लाया, “जेह्ड़ा कैसर दा ऐ, सैह़ कैसर जो; कने जेह्ड़ा परमात्मे दा ऐ, सैह़ परमात्मे जो देआ।”

²² एह़ सुणी नैं तिन्हां जो हरानी होई, कने तिसियो छड्डी नैं चली गै।

दुवारा ते जिन्दा होणा कने ब्याह

²³ तिसी दिन सदूकी माणु जेह्ड़ा ग्लांदे हन कि मरेयां दा दुवारी जिन्दा होणा होई नीं सकदा, तिस अल्ल आये कने तिसते पुछया,

²⁴ “हे गुरू, मूसैं व्यबस्था च ग्लाया था, कि जे कोई मरद बगैर औलादी मरी जां, तां तिसदा भाऊ तिसदिया लाड़िया नैं ब्याह करी नैं अपणे भाऊये तांई वंश पैदा करैं।

²⁵ हुण अहां दे ऐत्थु सत भाऊ थे; पैहल्ला भाऊ ब्याह करी नैं मरी गेआ, कने औलाद नीं होणे दिया बज़ाह ते अपणिया लाड़िया जो अपणे भाऊये तांई छड्डी गेआ।

²⁶ इआं ई दूँये भाऊयें कने त्रीयें भी कित्ता, कने सतां तिकर ऐई होएया।

²⁷ सबना दे बाद सैह़ जणांस भी मरी गेई।

²⁸ हुण एह़ दस्सा जे जिन्दे होणे पर सैह़ तिन्हां सतां भाऊआं च कुसदी लाड़ी हुंगी? क्जोकि सैह़ सारेयां दी लाड़ी बणी चुकियो थी।”

²⁹ यीशुयैं तिन्हां जो जवाब दित्ता, तुहां पवित्रशास्त्रे कने परमात्मे दिया सामर्थी जो नीं जाणदे; इसा बज़ाह ते इसा भुल्ला च पैयो हन।

³⁰ क्जोकि जिन्दे होणे पर तिन्हां ना तां ब्याह करणा कने ना ब्याह च दित्ते जांगे अपर सुअर्गे च परमात्मे दे सुअर्गदूतां साइआं हुंगे।

³¹ “अपर मरेयां दे जिन्दे होणे दे बारे च क्या तुहां एह़ वचन नीं पढ़ेया जेह्ड़ा परमात्मैं तुहां नैं ग्लाया:

³² ‘मैं अब्राहमे दा परमात्मा, कने इसहाके दा परमात्मा कने याकूबे दा परमात्मा ऐ?’ सैह़ मरेयां दा नीं, अपर जिन्देया दा परमात्मा ऐ।”

³³ एह़ सुणी नैं माणु तिसदिया सिक्षा ते हरान होये।

सबते बड्डा हुक्म

³⁴ जाह़लू फरीसी माणुआं सुणेया कि यीशुयैं सदूकी माणुआं दा मुँ बंद करी दित्ता, तां सैह़ सारे किठ्ठे होई गै।

³⁵ कने तिन्हां च इक्क व्यवस्थापकें तिसियो परखणे तांई तिसते पुछया,

³⁶ “हे गुरू, व्यबस्था च कुण देहया हुक्म बड्डा ऐ?”

³⁷ तिन्हीं तिस नैं ग्लाया, “तू परमात्मा अपणे प्रभु नैं अपणे सारे मने कने अपणे सारे प्राणा कने अपणिया सरिया अक्ला नैं प्यार रख।

³⁸ बड्डा कने खास हुक्म तां ऐई ऐ।

³⁹ कने तिस साइआं एह़ दूआ हुक्म भी ऐ, कि ‘तू अपणे प्ड़ेसिये नैं अप्पु साइआं प्यार रख।’

⁴⁰ ऐई दो हुक्म सारी व्यबस्था कने भविष्यवक्तां दा आधार हन।”

मसीह कुसदा पुत्तर ऐ?

⁴¹ जाह़लू फरीसी माणु किठ्ठे थे, तां यीशुयैं तिन्हां ते पुछया,

⁴² “मसीह दे बारे च तुहां क्या सोचदे हन? सैह़ कुसदी औलाद ऐ?” तिन्हां तिस नैं ग्लाया, “दाऊदे दी।”

⁴³ तिन्हीं तिन्हां ते पुछया, “तां दाऊद आत्मा च होई नैं तिसियो प्रभु क्जो ग्लांदा ऐ?

⁴⁴ ‘प्रभुयैं, मेरे प्रभुये नैं ग्लाया, मेरे सज्जे पास्से बैठ जाह़लू तिकर कि मैं तेरे बैरियां जो तेरे पैरां थल्लै नीं करी दैं।’

⁴⁵ भला, जाह़लू दाऊद तिसियो प्रभु ग्लांदा ऐ, तां सैह़ तिसदा पुत्तर किंआं होएया?”

⁴⁶ एह़ सुणी करी तिन्हां च कोई भी इक्क सब्द नीं ग्लाई सकेया। तिस दिने ते बाद कुसी जो भी भिरी तिसते कुच्छ पुछणे दी हिम्मत नीं होई।