मत्ती 21 - काँगड़ी

यीशुये दा यरूशलेम सैहरे च विजय प्रवेश

¹ जाह़लू सैह़ यरूशलेम सैहरे दे नेड़े पुज्जे कने जैतून प्हाड़े पर बैतफगे ग्रांऐ अल्ल आये, तां यीशुयैं दूँ चेलेयां जो एह़ ग्लाई नैं घल्लेया;

² “सामणै आल़े ग्रांऐ च जा। कने तिस ग्रांऐ च पुजदेयां ई इक्क गधी कने तिसा सौगी बच्चा तुहां जो बन्नेया मिलगा। तिन्हां जो खोली नैं मिन्जो अल्ल लेई ओआ।

³ जे तुहां नैं कोई कुच्छ ग्लांगा, तां ग्लानेयों कि प्रभु जो इन्हां दी जरूरत ऐ, सैह़ तिसी बग्त तिन्हां जो घल्ली दिंगा।”

⁴ एह़ इसतांई होएया कि जेह्ड़ा वचन भविष्यवक्ता दे जरिये ग्लाया गेआ था, सैह़ पूरा होयैं

⁵ “यरूशलेम सैहरे दे लोकां नैं ग्लानेयों, ‘दिक्खा तुहां दा राजा तुहां अल्ल ओआ दा ऐ, सैह़ नम्र ऐ, कने गधे पर बैठेया ऐ; अपर गधिया दे बच्चे पर।’ ”

⁶ चेलेयां जाई नैं, जिंआं यीशुयैं तिन्हां नैं ग्लाया था, तिंआं ई कित्ता।

⁷ कने गधी कने बच्चे जो अंणी करी, तिन्हां पर अपणे कपड़े सट्टे, कने सैह़ तिस पर बेई गेआ।

⁸ ताह़लू मतेआं लोकां अपणे कपड़े रस्ते च बछाये, कने होरनी लोकां रूखां ते डाल़िआं बड्डी नैं रस्ते च बछाईआं।

⁹ जेह्ड़ी भीड़ गांह-गांह चलियो कने पचांह़-पचांह़ चली ओआ दी थी, डड्डी-डड्डी ग्लांदी थी, “दाऊदे दे वंशे जो होशाना, धन ऐ सैह़ जेह्ड़ा प्रभु दे नांऐ ते ओंदा ऐ, परमात्मे दी स्तुति करा जेह्ड़ा सुअर्गे च ऐ।”

¹⁰ जाह़लू तिन्हीं यरूशलेम सैहरे च प्रवेश कित्ता, तां सारे सैहरे च भगदड़ मची गेई, कने माणु ग्लाणा लग्गे, “एह़ कुण ऐ?”

¹¹ लोकां ग्लाया, एह़ गलील प्रदेसे दे नासरत सैहरे दा भविष्यवक्ता यीशु ऐ।

यरूशलेम सैहरे दे मंदरे ते बपारियां जो बाहर कड्डणा

¹² यीशुयैं परमात्मे दे मंदर च जाई नैं तिन्हां सारेयां जो, जेह्ड़े मंदरे च पैसेयां दा लैण-दैण करा दे थे कड्डी दित्ता, कने अड़तिआं दे तख्ते कने कबूतर बेचणे आल़ेआं दियां चौकिआं पलटी दित्तियां।

¹³ कने तिन्हां नैं ग्लाणा लग्गा, “पवित्रशास्त्रे च लिख्या ऐ, ‘मेरा मंदर प्रार्थना दे मंदरे दे नांऐ जाणेयां जांगा।’ अपर तुहां तां इसियो डाकुआं दा अड्डा बणा दे हन।”

¹⁴ ताह़लू अन्ने कने लंगड़े, मंदरे च तिस अल्ल आये, कने तिन्हीं तिन्हां जो खरा कित्ता।

¹⁵ अपर जाह़लू प्रधान याजकां कने सास्त्री माणुआं इन्हां अनोखे कम्मां जो, जेह्ड़े तिन्हीं कित्यो, कने जागतां जो मंदरे च दाऊद दे वंशे जो होशाना ग्लांदे होये दिख्या, तां सैह़ गुस्सा होये,

¹⁶ कने तिस नैं ग्लाणा लग्गे, “क्या तू सुणा दा ऐ कि एह़ क्या ग्लांदे हन?” यीशुयैं तिन्हां नैं ग्लाया, “हाँ क्या तुहां एह़ पवित्रशास्त्रे च कदी नीं पढ़ेया; ‘जागतां कने दुद पींदे बच्चेयां दे मुँऐ ते तैं अपार स्तुति कराई?’”

¹⁷ ताह़लू सैह़ तिन्हां जो छड्डी नैं सैहर दे बाहर बैतनिय्याह ग्रांऐ जो गेआ कने तित्थु रात कट्टी।

बगैर फल़ां धूड़े दा रूख

¹⁸ भ्यागा जाह़लू सैह़ सैहरे जो हटी करी बापस ओआ दा था तां तिसियो भुख लग्गी।

¹⁹ सड़का कनारे धूड़े दे इक्की रूखे जो दिक्खी नैं सैह़ तिस बक्खे गेआ, कने पत्तरां जो छड्डी तिस च होर कुच्छ नीं मिल्लेया कने तिस नैं ग्लाया, “अज्जे ते तिज्जो च भिरी कदी फल़ नीं लग्गन।” कने धूड़े दा रूख ताह़लू ई सुकी गेआ।

²⁰ एह़ दिक्खी नैं चेलेयां जो हरानी होई कने तिन्हां ग्लाया, “एह़ धूड़े दा रूख तिसी बग्त किंआं सुकी गेआ?”

²¹ यीशुयैं तिन्हां जो जवाब दित्ता, “मैं तुहां नैं सच्च ग्लांदा ऐ, जे तुहां बसुआस रखन, कने शक नीं करन, तां ना सिर्फ एह़ करगे जेह्ड़ा इस धूड़े दे रूखे नैं कित्ता ऐ, अपर जे इस प्हाड़े नैं भी ग्लांगे, पटौई जा, कने समुंदरे च जाई पो, तां एह़ होई जांगा।

²² कने जेह्ड़ा कुच्छ तुहां प्रार्थना च बसुआसे नैं मंगगे सैह़ सब कुच्छ तुहां जो मिलगा।”

यीशुये दे हक्के दा सवाल

²³ सैह़ मंदरे च जाई नैं सिक्षा दै दा था, तां प्रधान याजकां कने लोकां दे स्याणे माणुआं तिस अल्ल आई नैं पुछया, “तू एह़ कम्म कुस हक्के नैं करदा ऐ? कने तिज्जो एह़ हक्क कुणी दित्या ऐ?”

²⁴ यीशुयैं तिन्हां जो जवाब दित्ता, “मैं भी तुहां ते इक्क गल्ल पुछदा ऐ; जे सैह़ मिन्जो दस्सगे, तां मैं भी तुहां जो दस्सगा कि एह़ कम्म कुस हक्के नैं करदा।

²⁵ यूहन्ने दा बपतिस्मा कुत्थू ते था? सुअर्गे दे पास्से ते या माणुआं दे पास्से ते? ताह़लू सैह़ अप्पु च सवाल जवाब करणा लग्गे, जे अहां ग्लांगे ‘सुअर्गे दे पास्से ते तां इन्हीं अहां नैं ग्लाणा, कि भिरी तुहां यूहन्ने पर बसुआस क्जो नीं कित्ता?’

²⁶ कने जे ग्लांगे ‘माणुआं दे पास्से ते तां अहां जो भीड़ा दा डर ऐ, क्जोकि सैह़ सारे यूहन्ने जो भविष्यवक्ता मनदे हन।’ ”

²⁷ तिन्हां यीशुये जो जवाब दित्ता, “अहां नीं जाणदे।” तिन्हीं भी तिन्हां नैं ग्लाया, “तां मैं भी तुहां जो नीं दस्सदा कि एह़ कम्म कुस हक्के नैं करदा ऐ।”

दूँ जागतां दा उदारण

²⁸ “तुहां इस उदारणे दे बारे च क्या समझदे हन? कुसकी माणुये दे दो जागत थे; तिन्हीं पैहल्ले आल़े अल्ल जाई नैं ग्लाया, ‘हे जागता, अज्ज अंगूरा दे बागे च कम्म कर।’

²⁹ तिन्हीं जवाब दित्ता, मैं नीं जांदा, अपर बादे च पछताई नैं चली गेआ।

³⁰ भिरी बुढ़ैं दूये अल्ल जाई नैं इआं ई ग्लाया, तिन्हीं जवाब दित्ता, जी हाँ जांदा, अपर नीं गेआ।

³¹ इन्हां दून्नी च कुणी बुढ़े दी इच्छा पूरी कित्ती?” तिन्हां ग्लाया, “पैहल्ले आल़ैं।” यीशुयैं तिन्हां नैं ग्लाया, “मैं तुहां नैं सच्च ग्लांदा ऐ, कि चुंगी लैणे आल़े कने वैश्यां तुहां ते पैहल्लैं परमात्मे दे राज्जे च प्रवेश करदे हन।

³² क्जोकि बपतिस्मा दैणे आल़ा यूहन्ना धार्मिकता दे रस्ते च होई नैं तुहां अल्ल आया, कने तुहां तिसदा बसुआस नीं कित्ता, अपर चुंगी लैणे आल़ेआं कने वैश्यां तिसदा बसुआस कित्ता। कने तुहां एह़ दिक्खी नैं बादे च भी नीं पछताये कि तिसदा बसुआस करी लैंदे।

दुष्ट किसानां दा उदारण

³³ “इक्क होर उदारण सुणा; इक्क घरे दा मालक था, जिन्हीं अंगूरा दा बाग लगाया, तिसदे चौंन्नी पास्सेयां बाड़ लगाया। कने तिस च रसे जो कठ्ठेरणे तांई जमीना च खड्डा खोदी नैं पत्थरे दी बड्डी उखली रखी, कने देखभाल करणे तांई टपरी बणाई, कने किसानां जो तिसदा ठेका देई नैं परदेस चली गेआ।

³⁴ जाह़लू फल़े दे सीजने दा बग्त नेड़े आया, तां तिन्हीं अपणे दासां जो तिसदा फल़ लैणे तांई किसानां अल्ल घल्लेया।

³⁵ अपर किसानां तिसदे दासां जो पकड़ी नैं कुच्छ दासां जो कुटेया, कने कुच्छ दासां जो मारी दित्ता, कने कुच्छ दासां पर पत्थर मारे।

³⁶ भिरी तिन्हीं पैहल्ले ते जादा होर दासां जो घल्लेया, कने इन्हां नैं भी तिन्हां तिंआं ई कित्ता।

³⁷ आखरी च तिन्हीं अपणे जागते जो तिन्हां अल्ल एह़ सोची नैं घल्लेया कि सैह़ मेरे जागते दा लैआज करगे।

³⁸ अपर किसानां जागते जो दिक्खी नैं अप्पु च ग्लाया, ‘एह़ तां वारस ऐ, ओआ, इसियो मारी दिंदे कने इसदिया मलकीता लेई लैंदे।’

³⁹ कने तिन्हां तिसियो पकड़ेया कने अंगूरा दे बागे ते बाहर कड्डी नैं मारी दित्ता।

⁴⁰ इसतांई जाह़लू अंगूरा दे बागे दा मालक ओंगा तां तिन्हां किसानां सौगी क्या करगा?”

⁴¹ तिन्हां तिस नैं ग्लाया, “सैह़ तिन्हां बुरे लोकां जो बुरे तरीके नैं खत्म करगा; कने अंगूरा दे बागे दा ठेका दूये किसानां जो दिंगा, जेह्ड़े बग्ते पर तिसियो फल़ देआ करगे।”

⁴² यीशुयैं तिन्हां नैं ग्लाया, “क्या तुहां कदी पवित्रशास्त्रे च एह़ नीं पढ़ेया: ‘जिस पत्थरे जो राजमिस्त्रियां नकम्मा समझी लेआ था, सैई कुणे दे सिरे दा पत्थर होई गेआ? एह़ प्रभु दे पास्से ते होएया, कने अहां दिया नजरा च कितणा अनोखा ऐ।’

⁴³ “इसतांई मैं तुहां नैं ग्लांदा ऐ, कि परमात्मे दा राज्ज तुहां ते लेई लेआ जांगा कने ऐदई जातिया जो जेह्ड़ा तिसदा फल़ लेई नैं औयें, दित्ता जांगा।

⁴⁴ जेह्ड़ा इस पत्थरे पर पोंगा, सैह़ चकनाचूर होई जांगा; कने जिस पर सैह़ पोंगा, तिसियो पित्थी दिंगा।”

⁴⁵ प्रधान याजक कने फरीसी माणु तिसदे उदारणा जो सुणी नैं समझी गै, कि सैह़ तिन्हां दे बारे च ग्ला दा ऐ।

⁴⁶ कने तिन्हां तिसियो पकड़णा चाया, अपर लोकां ते डरी गै क्जोकि सैह़ तिसियो भविष्यवक्ता मनदे थे।