मत्ती 20 - काँगड़ी

बागे दे मजदूरां दा उदारण

¹ “सुअर्ग दा राज्ज कुसी अंगूरा दे बागे दे मालके साइआं ऐ, जिन्हीं भ्यागा निकल़ी नैं अपणे अंगूरा दे बागे च मजदूर लगाये

² तिन्हीं मजदूरां नैं इक्क दीनार रोजे दी दिहाड़ी कित्ती कने तिन्हां जो अपणे अंगूरा दे बागे च घल्लेया।

³ भिरी भ्यागा नौ बजे तिन्हीं निकल़ी नैं होरनी लोकां जो बजारे च बेल्ले खड़ोत्यो दिख्या,

⁴ कने तिन्हां नैं ग्लाया, ‘तुहां भी अंगूरा दे बागे च जा, कने जेह्ड़ा कुच्छ ठीक ऐ, तुहां जो दिंगा, सैह़ भी कम्म करणा गै।’

⁵ दुवारी भिरी तिन्हीं मालकैं दोपैरा कने त्रै बजे निकल़ी नैं तिंआं ई कित्ता।

⁶ तिसते बाद कोई संझा दे पंज बजे तिन्हीं भिरी निकल़ी नैं होरनी लोकां जो खड़ोत्या दिख्या, कने तिन्हां नैं ग्लाया, ‘तुहां क्जो ऐत्थु दिन भर बेल्ले खड़ोत्यो रैह्?’ तिन्हां तिस नैं ग्लाया, इसतांई कि कुणी भी अहां जो दिहाड़िया पर नीं लगाया।

⁷ तिन्हीं तिन्हां नैं ग्लाया, तुहां भी कम्म करणा अंगूरा दे बागे च जा कने कम्म करा।”

⁸ “संझा जो अंगूरा दे बागे दे मालकैं अपणे खजानचिये नैं ग्लाया, ‘सारे मजदूरां जो सद्दी करी, जेह्ड़े संझा आएयो सैह़ भी कने जेह्ड़े भ्यागा आएयो सैह़ भी सबना जो दिहाड़ी देई दे।’

⁹ जाह़लू सैह़ आये जिन्हां पूरे दिने च इक्क घंटा लगाया था, तिन्हां जो इक्क-इक्क दीनार मिल्ला।

¹⁰ जेह्ड़े लोक भ्यागा दे नौ बजे कम्म करणा आएयो थे तिन्हां एह़ समझेया कि अहां जो जादा मिलगा, अपर तिन्हां जो भी इक्क दीनार ई मिल्ला।

¹¹ जाह़लू मिल्ला तां घरे दे मालके पर बुड़बुड़ाई नैं ग्लाणा लग्गे,

¹² ‘जेह्ड़े पंज बजे आएयो थे, तिन्हां बागे च इक्क ई घंटा कम्म कित्ता, कने तैं तिन्हां जो अहां दे बराबर दिहाड़ी दित्ती, जिन्हां दिन भरदा बोझ चुकेया कने धूप झेलदे रैह्?’

¹³ तिन्हीं तिन्हां च इक्की जो जवाब दित्ता, ‘हे साथी मैं तिज्जो नैं कोई बेइमानी नीं करा दा। क्या तैंईं मिन्जो नैं इक्क दीनार नीं कित्या था?

¹⁴ अपणी दिहाड़ी लेआ कने जा। मैं इस इक्क घंटा कम्म करणे आल़े मजदूरे जो भी तुहां जितणा ई दैणा चांह़दा ऐ।

¹⁵ क्या एह़ ठीक नीं कि मैं अपणे माले ते जेह्ड़ा चांह़दा सैह़ करां? क्या मेरे खरे होणे दिया बज़ाह पर तू मिन्जो पर जल़स करा दा ऐ?’

¹⁶ इस तरीके नैं जेह्ड़े इस संसारे च अपणे आप्पे जो म्हान समझदे हन, सैह़ परमात्मे दिया नजरा च नीच हुंगे; कने जिन्हां जो संसारे दे लोक नीच समझदे हन, सैह़ परमात्मे दिया नजरा च म्हान हुंगे।”

अपणिया मौत्ती दे बारे च त्री बरी भविष्यवाणी

¹⁷ यीशु यरूशलेम सैहरे जो जांदे बग्त बारांह चेलेयां जो सुनसाण जगाह च लेई गेआ, कने रस्ते च तिन्हां नैं ग्लाणा लग्गा,

¹⁸ दिक्खा, हुण अहां यरूशलेम सैहरे जो चलेयो हन; कने मैं माणु दा पुत्तर प्रधान याजकां कने सास्त्री माणुआं हुआलैं कित्ता जांगा, कने तिसियो मौत्ती दा दोसी ठैहराई दिंगे।

¹⁹ कने तिसियो होरनी जातिआं दे हुआलैं करी दिंगे, कि सैह़ तिसदा मजाक करन, कने कोड़े मारन, कने सूल़िया पर टूंगन, कने सैह़ त्रीये दिने मरेयां ते भिरी जिन्दा होई जांगा।

इक्की माँऊ दी विणती

²⁰ ताह़लू जबदिये दे जागतां दिया माँऊ अपणे जागतां सौगी यीशु अल्ल आई नैं प्रणांम कित्ता कने तिसते कुच्छ मंगणा लग्गी,

²¹ यीशु तिसा नैं ग्लाणा लग्गा, “तू क्या चांह़दी ऐ?” सैह़ तिस नैं ग्लाणा लग्गी, “एह़ वचन दे कि मेरे एह़ दो जागत तेरे राज्जे च इक्क तेरे सज्जे कने इक्क तेरे खब्बे बैठैं।”

²² यीशुयैं जवाब दित्ता, “तुहां नीं जाणदे कि क्या मंगा दे हन। जेह्ड़ा दुख मैं झेलणे आल़ा ऐ, क्या तुहां मिन्जो सौगी बराबर दुख झेली सकदे हन?” तिन्हां तिस नैं ग्लाया हाँ, झेली सकदे हन।

²³ यीशु तिन्हां नैं ग्लाणा लग्गा, “तुहां मिन्जो सौगी बराबर दुख तां झेलगे, अपर अपणे सज्जे कने अपणे खब्बे कुसी जो बठाणा मेरा कम्म नीं, अपर जिन्हां तांई मेरे पिता दे पास्से ते त्यार कित्या, तिन्हां तांई ऐ।”

²⁴ एह़ सुणी नैं दसों चेले याकूबे कने तिसदे लोक्के भाऊ यूहन्ने पर गुस्सा करणा लग्गे।

²⁵ यीशुयैं तिन्हां जो अप्पु अल्ल सद्दी नैं ग्लाया, “तुहां जाणदे हन कि होरनी जातिआं दे हाकम तिन्हां पर हक्क जता दे हन; कने जेह्ड़े बड्डे हन, सैह़ तिन्हां पर हक्क जतांदे हन।

²⁶ अपर तुहां च ऐदेया नीं हुंगा, अपर जेह्ड़ा कोई तुहां च बड्डा होणा चां, सैह़ तुहां दा सेवक बणैं,

²⁷ कने जेह्ड़ा तुहां च प्रधान होणा चांह़दा, सैह़ तुहां दा दास बणैं;

²⁸ जिंआं कि मैं माणुये दा पुत्तर इसतांई नीं आया कि अपणी सेवा करवां, अपर इसतांई आया कि अप्पु सेवा करैं, कने मतेआं जो छड्डाणे तांई अपणे प्राण दैं।”

दूँ अन्नेयां जो ठीक करणा

²⁹ जाह़लू यीशु कने तिसदे चेले यरीहो सैहरे ते निकल़ा दे थे, तां इक्क बड्डी भीड़ तिसदे पचांह़ चली पेई।

³⁰ कने दो अन्ने जेह्ड़े सड़का कंडे बैठेयो थे, एह़ सुणी नैं कि यीशु जा दा ऐ, हक्कां पाई नैं ग्लाणा लग्गे, “हे प्रभु, दाऊदे दे वंश, अहां पर दया कर।”

³¹ लोकां तिन्हां जो झिड़केया कि चुप रेह्आ; अपर सैह़ होर भी जोरे नैं डड्डी करी ग्लाणा लग्गे, “हे प्रभु, दाऊदे दे वंश, अहां पर दया कर।”

³² ताह़लू यीशुयैं खड़ोई नैं तिन्हां जो सद्देया कने ग्लाया, “तुहां क्या चांह़दे हन कि मैं तुहां तांई करां?”

³³ तिन्हां तिस नैं ग्लाया, “हे प्रभु, एह़ कि अहां दियां अखीं खुली जान।”

³⁴ यीशुयैं तरस खाई नैं तिन्हां दियां अखीं छूईयां, कने सैह़ तिसी बग्त दिक्खणा लग्गी पै, कने तिसदे पचांह़ चली पै।