मत्ती 13 - काँगड़ी

बीई बाणे आल़े दा उदारण

¹ तिस दिन यीशु घरे ते निकल़ी नैं झीला दे कनारे जाई बैठा।

² कने तिस अल्ल इतणी बड्डी भीड़ कठ्ठरोई कि सैह़ किस्तिया पर चढ़ी गेआ, कने सारी भीड़ कनारे पर खड़ोतियो रेई।

³ कने तिन्हीं तिन्हां नैं उदारणा च मतिआं गल्लां ग्लाईयां, “इक्क किसान बीई बाणा चला।

⁴ बांदे बग्त कुच्छ बीई रस्ते पर पै कने पंछियां आई नैं तिन्हां जो चुगी लेआ।

⁵ कुच्छ बीई पथरीलिया जमीना पर पै, जित्थु तिन्हां जो मती कने नरम चिक्क नीं मिल्ली कने सैह़ तौल़े लूंगी पै।

⁶ अपर सूरजे दी तेज धुप पोणे दिया बज़ाह ते सैह़ पल़ी गै, कने जड़ कमजोर होणे ते सुकी गै।

⁷ कुच्छ बीई झुड़ां-बसुन्टां च पै, कने झुड़ां-बसुन्टां बधी नैं तिन्हां जो दब्बी दित्ता।

⁸ अपर कुच्छ बीई खरिया जमीना पर पै, कने फल़ लेई आये, कोई सौ गुणा, कोई सठ गुणा, कने कोई तीई गुणा।

⁹ जेह्ड़े समझी सकदे हन, तिसियो ध्याने नैं सुणन कने मन्नी भी लैन।”

उदारणा दा मकसद

¹⁰ चेले तिस अल्ल आई करी ग्लाणा लग्गे, “तू लोकां नैं उदारणा च क्जो गल्ला करदा ऐ?”

¹¹ तिन्हीं जवाब दित्ता, “तुहां जो सुअर्गे दे राज्जे दे भेतां दी समझ दित्तियो ऐ, अपर तिन्हां जो नीं।

¹² क्जोकि जिस अल्ल ऐ, तिसियो होर दित्ता जाणा, कने तिस अल्ल मता होई जाणा; अपर जिस अल्ल कुच्छ नीं ऐ, तिसते जेह्ड़ा कुच्छ तिस अल्ल ऐ, सैह़ भी लेई लैणां।

¹³ मैं तिन्हां नैं उदारणा च इसतांई गल्लां करदा ऐ कि सैह़ दिक्खदे तां हन, अपर तिन्हां जो कुच्छ नीं दुस्सदा, कने सैह़ सुणदे तां हन अपर समझी नीं पांदे।

¹⁴ तिन्हां दे बारे च यशायाह दी एह़ भविष्यवाणी पूरी हुंदी ऐ: ‘तुहां कन्नां ते तां सुणगे, अपर समझगे नीं; कने अखीं ते तां दिक्खगे, अपर तुहां जो नीं दुस्सगा।

¹⁵ क्जोकि इन्हां लोकां दा मन सुस्त होई गेआ ऐ, कने सैह़ कन्नां ते ऊचा सुणदे हन कने तिन्हां अपणिया अखीं बंद करी लियां हन। कुत्थी इआं ना होये कि सैह़ अखीं नैं दिक्खन, कने कन्नां नैं सुणन कने मने नैं समझन, कने अपणे मनां बदलन, कने मैं तिन्हां जो ठीक करैं।’

¹⁶ “अपर धन हन तुहां दियां अखीं जेह्ड़ियां दिक्खदियां हन; कने तुहां दे कंन्न, कि सैह़ सुणदे हन।

¹⁷ क्जोकि मैं तुहां नैं सच्च ग्लांदा ऐ, कि मते सारे भविष्यवक्तां कने धर्मियां चाया कि जेह्ड़ियां गल्लां तुहां दिक्खा करदे हन, दिक्खन अपर तिन्हां नीं दिक्खियां, कने जेह्ड़ियां गल्लां तुहां सुणदे हन, सुणन अपर तिन्हां नीं सुणियां।”

बीई बाणे आल़े उदारणे दा मतलब

¹⁸ “हुण तुहां बाणे आल़े उदारणे दा मतलब सुणा;

¹⁹ जेह्ड़ा कोई परमात्मे दे राज्जे दा वचन सुणी नैं नीं समझदा, तिसदे मने च जेह्ड़ा कुच्छ बाया था, तिसियो सैह़ सैतान आई नैं खोई लेई जांदा ऐ। एह़ सैई बीई ऐ, जेह्ड़ा बांदे बग्त रस्ते पर पेआ था।

²⁰ कने जेह्ड़ा पथरीलिया जमीना पर बीई बाया, एह़ सैह़ माणु ऐ, जेह्ड़ा वचन सुणी नैं तिसी बग्त खुसिया नैं मन्नी लैंदा ऐ।

²¹ अपर अप्पु च जड़ नीं रखणे दिया बज़ाह ते सैह़ थोड़े ई दिनां दा ऐ, कने जाह़लू वचने दिया बज़ाह ते मुसीबत या दुख हुंदा ऐ, तां झट ठोकर खांदा ऐ।

²² जेह्ड़ा बीई झुड़ां बसुन्टां च बाया, एह़ सैह़ माणु ऐ, जेह्ड़ा वचन तां सुणदा ऐ, अपर इस संसारे दी फिकर कने धन दौलता दा धोखा वचने जो दब्बी दिंदा ऐ, कने सैह़ फल़दा नीं।

²³ जेह्ड़ा बीई खरिया जमीना च बाया, एह़ सैह़ माणु ऐ, जेह्ड़ा वचने जो सुणी नैं समझदा ऐ, कने सैह़ फल़दा ऐ; कोई सौ गुणा; कोई सठ गुणा, कने कोई तीई गुणा।”

जंगली बीऐ दा उदारण

²⁴ यीशुयैं तिन्हां जो इक्क होर उदारण दित्ता; “सुअर्गे दा राज्ज तिस किसाने साइआं ऐ जिन्हीं अपणे खेतां च खरा बीई बाया।

²⁵ अपर जाह़लू लोक सुतेयो थे तां तिसदा दुश्मण आई नैं कणकां बिच्च जंगली बीई बाई नैं चली गेआ।

²⁶ जाह़लू लूंग निकल़ी कने फसल निसरी, तां जंगली दाणे दे बूटे भी दुस्से।

²⁷ इसा गल्ला पर घरे दे दासां आई करी मालके नैं ग्लाया, ‘हे मालक, क्या तैं अपणे खेतां च खरा बीई नीं बाया था? भिरी जंगली दाणे दे बूटे तिस च कतांह ते आये?’

²⁸ तिन्हीं तिन्हां नैं ग्लाया, ‘एह़ कुसी दुश्मणे दा कम्म ऐ।’ दासां तिस नैं ग्लाया, ‘क्या तेरी इच्छा ऐ कि अहां जाई नैं तिन्हां जंगली बूटेयां जो पुटी लैन?’

²⁹ तिन्हीं ग्लाया, ‘इआं मत करदे, कुत्थी इआं ना होये कि जंगली दाणे दे बूटेयां पुटदे-पुटदे तुहां तिन्हां सौगी कणकां भी पुटी लैन।

³⁰ बडणे तिकर दून्नी जो इक्क सौगी बढ़ूणा देआ, कने बडणे दे बग्त मैं बडणे आल़ेआं नैं ग्लांगा कि पैहल्ले जंगली दाणे दे बूटेयां बटीणी नैं फूकणे तांई तिन्हां दे पूल्ले बन्नी लेआ, कने कणकां दे दाणेयां जो मेरे पेड़ूये च कठ्ठेरा।’ ”

राईया दे बीऐ दा उदारण

³¹ तिन्हीं तिन्हां जो इक्क होर उदारण दित्ता, “सुअर्गे दा राज्ज राईया दे दाणे साइआं ऐ, जिसियो इक्की माणुयैं लेई नैं अपणेयां खेतां च बाई दित्ता।

³² सैह़ सारे बीआं ते लोक्का तां हुंदा ऐ अपर जाह़लू बड्डा होई जांदा ऐ ताह़लू सारे साग पात ते बड्डा हुंदा ऐ; कने देहया बूटा बणी जांदा कि अम्बरे दे पंछी आई नैं तिसदियां डाल़िआं पर अपणा बसेरा करदे हन।”

खमीरे दा उदारण

³³ “तिन्हीं इक्क होर उदारण तिन्हां जो सणाया, सुअर्गे दा राज्ज खमीरे साइआं ऐ जिसियो कुणकी जणासा लेई नैं तीई किलो आटे च मलाई दित्ता कने हुंदे-हुंदे सैह़ सारा आटा खमीर बणी गेआ।”

उदारणा दा मतलब

³⁴ एह़ सारियां गल्लां जेह्ड़ियां यीशुयैं लोकां नैं ग्लाईयां, सैह़ तिन्हां गल्लां जो उदारणा च ग्लांदा था।

³⁵ कि जेह्ड़ा वचन भविष्यवक्तां दे जरिये ग्लाया था, सैह़ पूरा होएया: “मैं उदारण ग्लाणे जो अपणा मुँ खोलगा, मैं तिन्हां गल्लां जो जेह्ड़ियां संसारे दे सुरुआत ते छुपी रेईयां, कने इन्हां छुपियां गल्लां जो सारेयां सामणै प्रगट करगा।”

जंगली बीऐ दे उदारणे दा मतलब

³⁶ ताह़लू यीशु भीड़ा जो छड्डी करी घरे च आया, कने तिसदे चेले तिस अल्ल आई नैं ग्लाणा लग्गे, “खेतां दे जंगली बीऐ दा उदारण अहां जो समझाई दे।”

³⁷ तिन्हीं तिन्हां जो जवाब दित्ता, “खरे बीऐ जो बाणे आल़ा किसान माणुये दा पुत्तर ऐ।

³⁸ खेत संसारे दे लोक हन, खरा बीई परमात्मे दे राज्जे दे लोक, कने जंगली बीई बुराई करणे आल़े लोक हन।

³⁹ जिन्हीं दुश्मणे तिन्हां जो बाया सैह़ सैतान ऐ; बड्डाई संसारे दा अन्त ऐ, कने बडणे आल़े सुअर्गदूत हन।

⁴⁰ कने जिंआं जंगली दाणे दे बूटे पुटे कने फूके जांदे हन तिंआं ई संसारे दे अन्त च होणा।

⁴¹ मैं माणु दा पुत्तर अपणे सुअर्गदूतां जो घल्लगा, कने सैह़ परमात्मे दे राज्जे ते सारी ठोकरां दिया बज़ाहां जो कने बुरे कम्म करणे आल़ेआं जो बाहर कड्डगा,

⁴² कने सुअर्गदूत तिन्हां जो अग्गी दे कुंडे च पांगे, जित्थु रोणा कने दंद पिणा हुंगा।

⁴³ तिस बग्त धर्मी माणु अपणे पिता दे राज्जे च सूरजे साइआं चमकगे। जेह्ड़े समझी सकदे हन, तिसियो ध्याने नैं सुणन कने मन्नी भी लैन।

छुपेयो खजाने दा उदारण

⁴⁴ “सुअर्गे दा राज्ज जमीना च छुपेयो खजाने साइआं ऐ, जेह्ड़ा कुसकी माणुये जो मिल्ला कने जमीना च छुपाई दित्ता, कने खुसिया दे मारे जाई नैं अपणा सब कुच्छ बेची दित्ता कने तिसा जमीना जो खरीदी लेआ।”

अनमोल मोतिये दा उदारण

⁴⁵ भिरी सुअर्गे दा राज्ज इक्की बपारिये साइआं ऐ जेह्ड़ा सुच्चे मोतिआं दी तोपा च था।

⁴⁶ जाह़लू तिसियो इक्क कीमती मोती मिल्ला तां तिन्हीं जाई नैं अपणा सब कुच्छ बेची दित्ता कने तिसियो खरीदी लेआ।

जाल़े दा उदारण

⁴⁷ भिरी सुअर्गे दा राज्ज मच्छियां दे जाल़े साइआं ऐ जेह्ड़ा समुंदरे च पाया, कने हर किस्मां दियां मच्छियां जो कठ्ठेरी लेई आया।

⁴⁸ कने जाह़लू जाल़ भरोईया, तां मछुआरे तिसियो कंडे पर खींजी लेई आये, कने बेई नैं खरिया-खरियां मच्छियां तां टोकरुये च कठ्ठेरियां कने खराब-खराब सट्टी दित्तियां।

⁴⁹ संसारे दे अन्त च इआं ई होणा। सुअर्गदूतां आई नैं दुष्ट लोकां जो धर्मियां ते लग्ग करणा ऐ,

⁵⁰ कने दुष्ट लोक अग्गी दे कुंडे च पाणे। जित्थु रोणा कने दंद पिणा होणा।

पराणी कने नौईआ सिक्षा दी कीमत

⁵¹ “क्या तुहां एह़ सारियां गल्लां समझी गै, तिन्हां तिस नैं ग्लाया, हाँ।”

⁵² तिन्हीं तिन्हां नैं ग्लाया, “इसतांई हर इक्क सास्त्री जेह्ड़ा सुअर्गे दे राज्जे दा चेला बणेया ऐ, तिस घरे दे मालके साइआं ऐ जेह्ड़ा अपणे भण्डारे ते नौईआं कने पराणियां चीज्जां कड्डदा ऐ।”

नासरत सैहरे च यीशु दी बेइज्जती

⁵³ जाह़लू यीशु सारे उदारण ग्लाई बैठा, तां तित्थु ते चली गेआ।

⁵⁴ कने अपणे सैहरे च आई नैं तिन्हां दे आराधनालय च जाई नैं तिन्हां जो सिक्षा दैणा लग्गा; कि सुणने आल़े हरान होई नैं ग्लाणे लग्गे, “इसियो एह़ ज्ञान कने सामर्थी दे कम्म कतांह ते मिल्लेयो।

⁵⁵ क्या एह़ तिस तरखाण मिस्रिये दा जागत नीं ऐ? क्या इसदिया माँऊ दा नां मरियम कने इसदे भाऊआं दे नां याकूब, यूसुफ, शमौन कने यहूदा नीं हन?

⁵⁶ कने क्या इसदियां सारियां बैह्णी अहां सौगी नीं रैंह्दियां? भिरी इसियो एह़ सब कतांह ते मिल्लेया?”

⁵⁷ इस तरीके नैं तिन्हां तिसदिया बज़ाह ते ठोकर खादी अपर यीशुयैं तिन्हां नैं ग्लाया, “भविष्यवक्ता दी अपणे देस कने अपणे घरे जो छड्डी नैं सब जगाह इज्जत हुंदी।”

⁵⁸ कने तिन्हीं तित्थु तिन्हां दे बेबसुआसे दिया बज़ाह ते मते सामर्थी दे कम्म नीं कित्ते।