मत्ती 12 - काँगड़ी

यीशु बिस्रामे आल़े दिने दा प्रभु

¹ तिस बग्त यीशु बिस्रामे आल़े दिन खेतां च होई नैं जा दा था, कने तिसदेयां चेलेयां जो भुख लग्गी तां सैह़ सिल्लेयां जो तोड़ी-तोड़ी नैं खाणा लग्गे।

² एह़ दिक्खी नैं कुच्छ फरीसी माणु तिस नैं ग्लाणा लग्गे, “दिक्ख तेरे चेले सैह़ कम्म करा दे हन, जेह्ड़ा बिस्रामे आल़े दिनैं एह़ कम्म करणा ठीक नीं।”

³ यीशुयैं तिन्हां फरीसी माणुआं नैं ग्लाया, “क्या तुहां पवित्रशास्त्रे च नीं पढ़ेया, कि दाऊदैं, जाह़लू सैह़ कने तिसदे साथियां जो भुख लग्गी तां क्या कित्ता?

⁴ सैह़ किंआं परमात्मे दे घरे च गेआ, कने तित्थु चढ़ावे दियां रोटियां खादियां, जिन्हां जो खाणा ना तां दाऊदे जो कने ना तिसदे साथियां जो, अपर सिर्फ याजकां जो ठीक था?

⁵ क्या तुहां व्यबस्था च नीं पढ़ेया कि मंदरे च कम्म करणे आल़े याजक बिस्रामे आल़े दिने दी बिधि जो तोड़णे पर भी बेकसूर रैंह्दे हन?

⁶ अपर मैं तुहां नैं ग्लांदा ऐ, कि ऐत्थु सैह़ ऐ जेह्ड़ा मंदरे ते भी बड्डा ऐ।

⁷ जे तुहां पवित्रशास्त्रे दा मतलब जाणदे, कि ‘मैं बलिदाने दी नीं अपर दया दी कामना करदा ऐ,’ तां तुहां भी बेकसूरां जो दोसी नीं ठैहरांदे।

⁸ इसतांई मैं माणुये दा पुत्तर बिस्रामे आल़े दिने पर भी अधिकार रखदा ऐ।”

सुक्के हत्थ आल़े माणुये जो खरा करणा

⁹ तित्थु ते चली नैं यीशु तिन्हां दे आराधनालय च आया।

¹⁰ तित्थु इक्क माणु था, जिसदा इक्क हत्थ सुक्केया था। तिन्हां यीशु पर दोस लगाणे तांई तिसते पुछया, “क्या बिस्रामे आल़े दिनैं कुसी जो खरा करणा ठीक ऐ।”

¹¹ तिन्हीं तिन्हां ते पुछया, “तुहां च ऐदेया कुण ऐ जिसदी इक्क ई भेड्ड होयैं, कने सैह़ बिस्रामे आल़े दिन खड्डे च पेई जां, तां तिसायो पकड़ी नैं नीं कड्डगा?

¹² तां एह़ खरा ऐ, कि माणु दा मुल्ल भेड्डां ते कितणा बधी नैं ऐ, इसतांई बिस्रामे आल़े दिने मूसा दिया व्यबस्था मताबक लोकां दी भलाई करणा ठीक ऐ।”

¹³ ताह़लू यीशुयैं तिस माणुये जो ग्लाया, “अपणे हत्थे गांह कर।” जिंआं ई तिन्हीं गांह कित्ता, कने तिसदा हत्थ दूये हत्थे साइआं खरा होई गेआ।

¹⁴ ताह़लू फरीसी माणु बाहर जाई नैं तिसदे खलाफ साजस रचणा लग्गे कि तिसियो किंआं मारी सकन।

परमात्मे दा चुणेया दास

¹⁵ एह़ जाणी नैं यीशु तित्थु ते चली गेआ। कने मते सारे माणु तिसदे पचांह़ चली पै, कने तिन्हीं सबना जो ठीक कित्ता,

¹⁶ कने तिन्हां जो चतौणी देई नैं ग्लाया, कि मेरे बारे च मत दस्सदे,

¹⁷ तांजे जेह्ड़ा वचन यशायाह भविष्यवक्ता दे जरिये ग्लाया था, सैह़ पूरा होयैं,

¹⁸ “दिक्खा, एह़ मेरा सेवक ऐ, जिसियो मैं चुणेया ऐ; मेरा प्यारा, जिसते मेरा मन खुस ऐ, मैं अपणा पवित्र आत्मा तिसियो दिंगा, कने सैह़ होरनी जातिआं दे लोकां जो न्याय दा समाचार दिंगा।

¹⁹ सैह़ ना झगड़ा करगा, कने ना धूम मचांगा, कने ना बजारां च ऊचिया उआज़ा च डींगा मारी नैं भाषण दिंगा।

²⁰ सैह़ ताह़लू तिकर कुचले कनेड़े जो तोड़ी करी नीं सट्टगा कने ना बुझदे होये दीय्ये जो बुझांगा, जाह़लू तिकर सैह़ न्याय जो जीत्ता च ना बदली दैं।

²¹ कने होरनी जातिआं दे लोकां तिस पर आस रखणी ऐ।”

यीशु कने बालजबूल

²² ताह़लू लोक इक्क अन्ने-जफ्फे जो जिस च दुष्टआत्मा थी, यीशु अल्ल लेई आये। कने तिन्हीं तिसियो खरा कित्ता, कने सैह़ ग्लाणा कने दिक्खणा लग्गी पेआ।

²³ एह़ सब दिक्खी करी सारे लोक हरान होई नैं ग्लाणा लग्गे, “क्या एह़ दाऊदे दा वंश ऐ?”

²⁴ अपर फरीसी माणु एह़ सुणी नैं ग्लाणा लग्गे, “एह़ तां दुष्टआत्मां जो कड्डणे तांई दुष्टआत्मां दे प्रधान बालजबूल सैतान दी मदत लैंदा ऐ।”

²⁵ यीशुयैं तिन्हां दे मने दी गल्ल जाणी करी तिन्हां नैं ग्लाया, जिस राजे दे राज्जे च बैर पेई जां, तां सैह़ उजड़ी जांदा ऐ; कने कोई सैहर या परवार जिस च बैर हुंदा ऐ, तां तिस सैहरे दे या परवारे दे माणु किंआं बणी करी रेई सकदे हन।

²⁶ कने जे सैतान ई सैतान बणी करी अपणे लोकां दा बैरी होई गेआ ऐ। तां भिरी तिसदा राज्ज किंआं बणी रैंह्गा?

²⁷ अच्छा, जे मैं बालजबूल सैताने दिया मदता ते दुष्टआत्मां जो कड्डदा ऐ, तां तुहां दे वंश कुसदी मदत लेई नैं कड्डदे हन? इसतांई सैई तुहां दा न्याय करगे।

²⁸ अपर जे मैं परमात्मे दे आत्मा दी मदत लेई नैं दुष्टआत्मां जो कड्डदा ऐ, तां परमात्मे दा राज्ज तुहां अल्ल आई रेह्आ ऐ।

²⁹ किंआं कोई माणु कुसी ताकतवरे दे घरे अंदर जाई नैं तिसदा समान चोरी करी सकदा ऐ जाह़लू तिकर कि सैह़ पैहल्ले तिस ताकतवरे जो बन्नी ना लैं? कने ताह़लू सैह़ तिसदे घरैं चोरी करी सकदा ऐ।

³⁰ “जेह्ड़ा मिन्जो सौगी नीं सैह़ मेरे खलाफ ऐ, कने जेह्ड़ा मिन्जो सौगी नीं बटीणदा सैह़ रंगाड़दा ऐ।

³¹ इसतांई मैं तुहां नैं ग्लांदा ऐ, कि माणु दे हर किस्मां दे पाप कने निंदा माफ कित्ती जांगी अपर पवित्र आत्मा दी निंदा माफ नीं कित्ती जाणी ऐ।

³² जेह्ड़ा कोई माणुये दे पुत्तरे दे खलाफ कोई गल्ल ग्लांगा, तिसदा एह़ अपराध माफ कित्ता जांगा, अपर जेह्ड़ा कोई पवित्र आत्मा दे खलाफ कुच्छ ग्लांगा, तिसदा अपराध ना तां इस लोक च कने ना परलोक च माफ कित्ता जाणा ऐ।

सिदेया रूख तिदेया फल़

³³ “जे रूखे जो खरा ग्लांदे हन, तां तिसदे फल़े जो भी खरा ग्ला, या रूखे जो नकम्मा ग्लांदे हन, तां तिसदे फल़े जो भी नकम्मा ग्ला; क्जोकि रूखे दी पणछैण तिसदे फल़े ते ई हुंदी ऐ।

³⁴ हे सर्पां साइआं जेहरिलै लोको, तुहां बुरे होई नैं किंआं खरियां गल्लां ग्लाई सकदे हन, क्जोकि जेह्ड़ा मने च भरोया ऐ, सैई मुँऐ पर ओंदा ऐ।

³⁵ इक्क खरा माणु खरे मने दे भण्डारे ते खरियां गल्लां कड्डदा ऐ, कने बुरा माणु बुरे भण्डारे ते बुरिआं गल्लां कड्डदा ऐ।

³⁶ कने मैं तुहां नैं सच्च ग्लांदा ऐ, कि जेह्ड़ियां-जेह्ड़ियां बुरिआं गल्लां माणु ग्लांगे, न्याय दे दिन हर इक्की गल्ला दा लेखा दिंगे।

³⁷ क्जोकि परमात्मा तेरियां गल्लां दिया बज़ाह ते जेह्ड़ियां तू ग्लांदा ऐ, तिज्जो बेकसूर कने अपराधी ठैहरांगा।”

सुअर्गीय नसाणे दी मांग

³⁸ इसा गल्ला पर कुच्छ सास्त्री कने फरीसी माणुआं तिस नैं ग्लाया, “हे गुरू अहां तिज्जो ते इक्क नसाण दिक्खणा चांह़दे हन।”

³⁹ यीशुयैं तिन्हां जो जवाब दित्ता, “इस जुगे दे बुरे कने ब्यभिचारी माणु नसाण तोपदे हन, अपर योना भविष्यवक्ता दे नसाणे जो छड्डी नैं कोई होर नसाण तिन्हां जो नीं दित्ता जाणा।

⁴⁰ जिंआं योना त्रै दिन कने त्रै रात पांणिये च बड्डिया मच्छिया दे पेट च रेह्आ तिंआं ई मैं माणुये दा पुत्तर त्रै दिन कने त्रै रात धरतिया दे अंदर रैंह्गा।

⁴¹ नीनवे दे माणु न्याय दे दिन इस जुगे दे लोकां सौगी उठी नैं तिन्हां जो अपराधी ठैहरांगे, क्जोकि तिन्हां योना दा प्रचार सुणी नैं मन बदलेया; कने दिक्खा, ऐत्थु सैह़ ऐ जेह्ड़ा योने ते भी बड्डा ऐ।

⁴² दक्षिण देसे दी राणी न्याय दे दिन इस जुगे दे लोकां सौगी उठी नैं तिन्हां जो अपराधी ठैहरांगी, क्जोकि सैह़ सुलेमान राजे दा ज्ञान सुणने तांई धरतिया दे दूये बन्ने ते आईयो थी। कने दिक्खा, ऐत्थु सैह़ ऐ जेह्ड़ा सुलेमाने ते भी बड्डा ऐ।”

अधुरा सुधार मुसीबता दा घर

⁴³ “जाह़लू दुष्टआत्मा तिस माणुये ते निकल़ी जांदी ऐ, तां सैह़ अराम करणे जो सुनसाण जगाह तोपदी फिरदी ऐ, अपर जाह़लू जगाह नीं मिलदी।

⁴⁴ ताह़लू सैह़ अप्पु जो ग्लांदी ऐ, कि जिस माणुये ते मैं निकल़ियो थी, भिरी तिस च चली जांगी, कने बापस आई नैं तिस माणुये दिया ज़िन्दगिया जो इक्क साफ सुथरा कने सजे-सजायो घरे साइआं पांदी ऐ।

⁴⁵ ताह़लू सैह़ दुष्टआत्मा जाई नैं अपणे ते भी बुरी सत होर दुष्टआत्मां जो अप्पु सौगी लेई जांदी ऐ, कने सैह़ तिस माणुये दे अंदर समाई नैं तित्थु वास करदियां हन, कने तिस माणुये दी हालत पैहल्ले ते भी बुरी होई जांदी ऐ। इस जुगे दे बुरे लोकां दी हालत भी ऐदई होणी ऐ।”

यीशु दी माँ कने भाऊ

⁴⁶ जाह़लू यीशु भीड़ा नैं गल्लां करा दा था, ताह़लू यीशु दी माँ कने भाऊ बाहर खड़ोत्यो थे कने तिस नैं मिलणा चांह़दे थे।

⁴⁷ कने भीड़ा दे लोकां च इक्की माणुये यीशुये नैं ग्लाया, “दिक्ख तेरी माँ कने तेरे भाऊ बाहर खड़ोत्यो हन, कने तिज्जो नैं मिलणा चांह़दे हन।”

⁴⁸ एह़ सुणी नैं तिन्हीं ग्लाणे आल़े जो जवाब दित्ता, “कुण ऐ मेरी माँ? कने कुण हन मेरे भाऊ।”

⁴⁹ कने अपणे चेलेयां दे पास्से अपणा हत्थ गांह करी नैं ग्लाणा लग्गा, “दिक्खा, मेरी माँ कने मेरे भाऊ एह़ हन।

⁵⁰ क्जोकि जेह्ड़ा कोई मेरे सुअर्गीय पिता दी इच्छा पर चलगा, सैई मेरा भाऊ, बैहण, कने मेरी माँ ऐ।”