मत्ती 10 - काँगड़ी

यीशुये दे बाराह चेले

¹ भिरी यीशुयैं अपणे बारांह चेलेयां जो अप्पु अल्ल सद्देया कने तिन्हां जो दुष्टआत्मां पर हक्क दित्ता कि तिन्हां जो कड्डी सकन कने हर किस्मां दियां बमारियां कने हर किस्मां दियां कमजोरियां जो दूर करन।

² इन्हां बाराह प्रेरितां दे नां एह़ हन पैहल्ला शमौन, जेह्ड़ा पतरस नांऐ ते जाणेयां जांदा ऐ, कने तिसदा भाऊ अन्द्रियास कने जबदिये दा पुत्तर याकूब, कने तिसदा लोक्का भाऊ यूहन्ना,

³ फिलिप्पुस, कने बरतुल्मै, थोमा कने चुंगी लैणे आल़ा मत्ती, हलफईये दा पुत्तर याकूब, कने तद्दै,

⁴ शमौन कनानी, कने यहूदा इस्करियोती जिन्हीं बादे च यीशुये जो पकड़ुआई भी दित्ता।

खास बारांह चेलेयां दे सेवा दे कम्म

⁵ इन्हां बारांह चेलेयां जो यीशुयैं एह़ हुक्म देई नैं घल्लेया, “होरनी जातिआं दे पास्से मत जांदे, कने सामरियां दे कुसी भी सैहरे दे अंदर मत जांदे।

⁶ अपर इस्राएल दे परवारे दियां गुआचिआं भेड्डां अल्ल जान्नेयों।

⁷ कने चलदे-चलदे एह़ प्रचार करी नैं ग्ला, सुअर्गे दा राज्ज नेड़े आई गेआ ऐ।

⁸ बमारां कने कोढ़ियां जो ठीक करा, मरेयां जो जिन्दा करा, दुष्टआत्मां जो कड्डा। तुहां मुफ्ते च पाया कने मुफ्ते च देआ।

⁹ अपणेयां झोल़ुयां च ना तां सोन्ना, कने ना तां धन दौलत, कने ना तां तांबा रखा;

¹⁰ रस्ते तांई ना झोल़ा रखा, ना दो कपड़ेयां दी जोड़ी, ना जूते कने ना सोठी लेआ, क्जोकि मजदूरे जो तिसदी मजदूरी मिलणी चाइदा।

¹¹ “जिस कुसी सैहरे या ग्रांऐ च जा, तां पता करा कि तित्थु कुण नेक माणु ऐ। कने जाह़लू तिकर औत्थू ते तुहां नीं निकल़न, तिस अल्ल ई परोणा बणी नैं रेह्आ।

¹² कने घरे च अंदर जांदे बग्त तिसियो आसीष दिनेयों।

¹³ जे तिस घरे दे माणु नेक हुंगे तां परमात्मे दी सांति तिन्हां पर पुज्जगी, जे तिस घरे च कोई माणु जेह्ड़ा परमात्मे ते सांति पाणा चांह़दा ऐ, तां सैह़ सांति तिस पर हुंगी, नीं तां तुहां अल्ल बापस आई जांगी।

¹⁴ कने जेह्ड़ा कोई तुहां दा आदर ना करैं कने तुहां दियां गल्लां नीं सुणे, तिस घरे या तिस सैहरे ते निकल़दे ई अपणे पैरां दिया धूड़ी झाड़ी देआ।

¹⁵ मैं तुहां नैं सच्च ग्लांदा ऐ, कि न्याय दे दिन तिस देसे दे लोकां दी हालत सदोम कने अमोरा देसां दे लोकां दी हालत जादा झेलणे जोग्गी होणी ऐ।

ओणे आल़ी मुसीबत

¹⁶ “दिक्खा, मैं तुहां जो भेड्डां साइआं भेड़ियां दे बिच्च घल्लदा ऐ, इसतांई सर्पां साइआं अक्लमंद कने कबूतरां साइआं भोल़े बणा।

¹⁷ अपर लोकां ते चौकन्ने रेह्आ, क्जोकि सैह़ तुहां जो पंचायती दे हुआलैं करगे, कने अपणे आराधनालयां च तुहां जो कोड़े मारगे।

¹⁸ तुहां मिन्जो तांई हाकमां कने राजेयां साइआं तिन्हां पर, कने होरनी जातिआं दे लोकां पर गवाह होणे तांई पेस कित्ते जांगे।

¹⁹ जाह़लू सैह़ तुहां जो पकड़ुआंगे तां एह़ फिकर मत करदे कि अहां किंआं क्या ग्लांगे क्जोकि जेह्ड़ा कुच्छ तुहां जो ग्लाणा हुंगा, सैह़ तिसी बग्त तुहां जो दस्सी दित्ता जांगा।

²⁰ क्जोकि ग्लाणे आल़े तुहां नीं हन, अपर तुहां दे पिता परमात्मे दा आत्मा तुहां च ग्लांदा ऐ।

²¹ “भाऊ भाऊये जो कने पिता जागते जो मारने तांई हुआलैं करगे, कने बच्चे माँऊ-बुढ़े दे खलाफ उठी नैं तिन्हां जो मरवाई दिंगे।

²² मेरे नांऐ दे खातर सारेयां लोकां तुहां नैं बैर रखणा, अपर जेह्ड़ा आखरी तिकर सबर रखगा तिसदा उद्धार होणा ऐ।

²³ जाह़लू सैह़ तुहां जो इक्की सैहरे च सतांगे, तां दूये जो नठ्ठी जान्नेयों। मैं तुहां नैं सच्च ग्लांदा ऐ, जाह़लू तिकर तुहां इस्राएल देसे दे सारेयां सैहरां च नीं घूमी लैंगे, तां मैं माणुये दा पुत्तर आई जांगा।

²⁴ “चेला अपणे गुरुये ते बड्डा नीं हुंदा, कने ना दास अपणे मालके ते।

²⁵ चेले तांई अपणे गुरुये साइआं कने दासे दा मालके साइआं बणना ई काफी ऐ। जाह़लू लोकां घरे दे मालके जो बालजबूल सैतान ग्लाया तां सैह़ तिसदे घरे आल़ेआं जो क्या कुच्छ नीं ग्लांगे।

परमात्मे ते डरा?

²⁶ “इसतांई लोकां ते मत डरदे, क्जोकि कुच्छ ढकेया नीं जेह्ड़ा कुआड़ेया नीं जांगा, कने ना कुच्छ छुपेया ऐ जेह्ड़ा जाणेयां नीं जांगा।

²⁷ जेह्ड़ा मैं तुहां नैं नेहरे च ग्लांदा ऐ, तिसियो तुहां लौई च ग्ला, कने जेह्ड़ा तुहां कंन्न लगाई नैं सुणदे हन, तिसियो छत्ती पर चढ़ी नैं प्रचार करा।

²⁸ जेह्ड़े सरीरे जो मारदे हन, अपर सैह़ आत्मा जो नीं मारी सकदे। तिन्हां ते मत डरदे, अपर परमात्मे ते डरा, जेह्ड़ा आत्मा कने सरीर दून्नी जो नरके च नास करी सकदा ऐ।

²⁹ क्या पैसेयां च दो चिड़ियां नीं बिकदियां? भिरी भी तुहां दे पिता दी मर्जिया बगैर तिन्हां च इक्क भी धरतिया पर नीं पेई सकदी।

³⁰ परमात्मा तुहां दिया ज़िन्दगिया दी हर इक्की गल्ला दा ध्यान रखदा ऐ, ऐत्थु तिकर तिन्हीं तुहां दे सिरे दा इक्क-इक्क बाल़ गिणेयां ऐ।

³¹ इसतांई डरा मत; तुहां मतिआं चिड़ियां ते बधी नैं हन।

यीशुये जो मन्ना चाऐ मत मन्ना

³² “जेह्ड़ा कोई माणुआं सामणै मिन्जो अपनाई लैंगा, तिसियो मैं भी अपणे सुअर्गीय पिता दे सामणै अपनाई लैंगा।

³³ अपर जेह्ड़ा कोई माणुआं दे सामणै मिन्जो नकारी दिंगा, तिसियो मैं भी अपणे सुअर्गीय पिता दे सामणै नकारी दिंगा।

यीशुये दे ओणे दा सबूत

³⁴ “एह़ मत समझा कि मैं धरतिया पर लोकां बिच्च मेल-जोल करवाणा आया ऐ। मैं मेल-जोल करवाणा नीं आया, अपर तलवार चलवाणा आया।

³⁵ मैं तां आया ऐ कि माणुये जो तिसदे बुढ़े ते, कने कुड़िया जो तिसा दिया माँऊ ते, कने नुआं जो तिसा दिया सस्सु ते लग्ग करी दैं,

³⁶ माणुये दे बैरी तिसदे घरे दे ई लोक हुंगे।

³⁷ “जेह्ड़ा माँऊ या बुढ़े जो मिन्जो ते जादा प्यारा जाणदा ऐ, सैह़ मेरा चेला बणने जोग्गा नीं, कने जेह्ड़ा जागते या कुड़िया जो मिन्जो ते जादा प्यारा जाणदा ऐ, सैह़ मेरा चेला बणने जोग्गा नीं ऐ।

³⁸ कने जेह्ड़ा मेरा चेला बणना चांह़दा ऐ, तां सैह़ अपणिया सूल़िया चुक्की नैं मिन्जो पचांह़ चली औयें सैह़ मिन्जो जोग्गा ऐ।

³⁹ जेह्ड़ा अपणे प्राणा जो बचांदा ऐ, सैह़ अपणे प्राणा गुआंगा; कने जेह्ड़ा मेरिया बज़ाह ते अपणे प्राणा गुआंदा ऐ सैह़ अपणे प्राणा बचांगा।

इनाम

⁴⁰ “जेह्ड़ा तुहां जो अपनांदा ऐ, सैह़ मिन्जो अपनांदा ऐ, कने जेह्ड़ा मिन्जो अपनांदा ऐ, सैह़ मेरे घल्लणे आल़े जो अपनांदा ऐ।

⁴¹ जेह्ड़ा भविष्यवक्ता जो भविष्यवक्ता जाणी करी ग्रहण करैं, सैह़ भविष्यवक्ता साइआं परमात्मे ते प्रतिफल़ पांगा। कने जेह्ड़ा धर्मी जो धर्मी जाणी नैं ग्रहण करैं, सैह़ धर्मिये साइआं परमात्मे ते प्रतिफल़ पांगा।

⁴² जेह्ड़ा कोई इन्हां छोटेयां च इक्की जो मेरा चेला जाणी नैं सिर्फ इक्क ग्लास ठंडा पांणिये दा पियां, तां मैं तुहां नैं सच्च ग्लांदा ऐ, तिसियो तिसदा प्रतिफल़ जरूर मिलगा।”