लूका 8 - काँगड़ी

यीशु दी सिष्यायें

¹ इसते बाद यीशु सैहरे-सैहरे कने ग्रांऐ-ग्रांऐ च प्रचार करदा होएया कने परमात्मे दे राज्जे दा सुसमाचार सणांदा-सणांदा फिरणा लग्गा, कने बारांह चेले तिस सौगी सौगी थे,

² कने कुच्छ जणासां भी थियां जेह्ड़ियां दुष्टआत्मां नैं कने बमारियां नैं छड्डाईयां थियां, कने सैह़ एह़ हन, मरियम जेह्ड़ी मगदलीनी कैहलांदी थी, जिसाते सत दुष्टआत्मां कड्डियां थियां,

³ कने हेरोदेस राजे दे भण्डारी खुजे दी लाड़ी जिसा दा नां योअन्ना एह़ सैह़ भी तिन्हां सौगी थी, कने सूसन्नाह कने मतिआं होर जणासां थियां। एह़ अपणिया धन-दौलता नैं यीशु कने तिसदे चेलेयां दी सेवा करदियां थियां।

बीई बाणे आल़े दा उदारण

⁴ जाह़लू बड़ी बड्डी भीड़ किठ्ठी होई, कने सैहरे-सैहरे दे माणु तिस अल्ल चली ओंदे थे, तां तिन्हीं उदारण देई नैं ग्लाया:

⁵ “इक्क किसान बीई बाणा निकल़ेया। बांदे बग्त कुच्छ बीई रस्ते पर पै, कने रूल़दे गै, कने अम्बरे दे पंछियां आई नैं तिन्हां जो चुगी लेआ।”

⁶ कने कुच्छ बीई चट्टाना पर पै, कने लूंगे, अपर नमी ना मिलणे ते सुकी गै।

⁷ कुच्छ बीई झुड़ां-बसुन्टां च पै, कने झुड़ां-बसुन्टां सौगी-सौगी बधी नैं तिन्हां जो दब्बी दित्ता।

⁸ “कुच्छ बीई खरिया जमीना पर पै, कने लूंगी करी सौ गुणा फल़ दित्ता।” एह़ गल्लां दस्सी करी तिन्हीं जोरे नैं ग्लाया, “जेह्ड़े समझी सकदे हन, तिसियो ध्याने नैं सुणन कने मन्नी भी लैन।”

उदारणा दा मकसद

⁹ यीशुये दे चेलेयां तिसते पुछया कि “इस उदारणे दा क्या मतलब ऐ?”

¹⁰ तिन्हीं ग्लाया, “तुहां जो परमात्मे दे राज्जे दे भेतां दी समझ दित्ती गेई ऐ, अपर होरनी जो उदारणा च सणाया जांदा ऐ, इसतांई कि, ‘सैह़ दिक्खदे तां हन, अपर तिन्हां जो कुच्छ नीं दुस्सदा, कने सैह़ सुणदे तां हन अपर समझी नीं पांदे।’

बीई बाणे आल़े उदारणे दा मतलब

¹¹ “उदारणे दा मतलब एह़ ऐ, बीई परमात्मे दा वचन ऐ।

¹² रस्ते पर पैयो बीई सैह़ माणु हन, जिन्हां वचन तां सुणेया; अपर ताह़लू सैतान आई करी तिन्हां दे मने दे वचनां जो चुक्की लेई जांदा ऐ, कि इआं ना होयैं कि सैह़ बसुआस करी नैं उद्धार पाई लैन।

¹³ चट्टाना दे बीई सैह़ माणु हन, जेह्ड़े वचन तां सुणदे हन, कने ताह़लू खुसी नैं वचने जो ग्रहण भी करदे हन, अपर जड़ ना पकड़णे दिया बज़ाह ते थोड़ी देर तां बसुआस रखदे हन, अपर परीक्षा दे बग्त भटकी जांदे हन।

¹⁴ जेह्ड़े बीई झुड़ां बसुन्टां च पैयो हन, एह़ सैह़ माणु हन, जेह्ड़े वचन सुणदे तां हन, अपर गांह चली करी फिकर, कने धन, कने ज़िन्दगिया दे सुख विलासे च फंसी जांदे हन, कने तिन्हां दा फल़ नीं पकदा।

¹⁵ अपर जेह्ड़े बीई खरिया जमीना दे सैह़ माणु हन, जेह्ड़े वचनां जो सुणी करी भले कने खरे मने च सम्भाल़ी करी पक्के बसुआसी बणदे हन।

दीय्ये दा उदारण

¹⁶ “कोई दीय्ये बाल़ी करी टोकरुये नैं नीं ढकदा, कने ना मंजोल़ूये थल्लैं रखदा ऐ, अपर वरैक्टा पर रखदा ऐ कि अंदर ओणे आल़े लौ पान।

¹⁷ क्जोकि जेह्ड़ा कुच्छ भी छुपेया ऐ सैह़ हमेसा छुपेया नीं रैंह्गा, क्जोकि जेह्ड़ा कुच्छ भी गुप्त च ऐ, सैह़ हमेसा गुप्त नीं रैंह्गा।

¹⁸ इसतांई चौकन्ने रेह्आ कि तुहां कुस तरीके नैं सुणदे हन? क्जोकि जिन्हां अल्ल ऐ तिन्हां जो दित्ता जांगा, कने जिन्हां अल्ल नीं ऐ तिन्हां ते भी लेई लेआ जांगा, जिसियो सैह़ अपणा समझदा ऐ।”

यीशु दी माँ कने भाऊ

¹⁹ यीशु दी माँ कने भाऊ तिस अल्ल आये, अपर भीड़ा दिया बज़ाह ते तिस नैं मिल्ली नीं सके।

²⁰ तिस नैं ग्लाया, “तेरी माँ कने तेरे भाऊ बाहर खड़ोत्यो हन, कने तिज्जो नैं मिलणा चांह़दे हन।”

²¹ तिन्हीं इसदे जवाबे च तिन्हां नैं ग्लाया, “मेरी माँ कने मेरे भाऊ एह़ हन, जेह्ड़े परमात्मे दे वचने जो सुणदे कने मनदे हन।”

तफाने जो सांत करणा

²² भिरी इक्क दिन यीशु कने तिसदे चेले किस्तिया पर चढ़े, कने सैह़ तिन्हां जो ग्लाणा लग्गा, “ओआ, झीला दे पारली तरफ चलण।”

²³ अपर जाह़लू किस्ती चलियो थी, तां यीशु सोई गेआ, कने झीला च तफान आई गेआ, कने किस्ती पांणिये नैं भरोणा लग्गी कने सैह़ खतरे च थे।

²⁴ ताह़लू चेलेयां बक्खे आई करी यीशुये जो जगाया, कने ग्लाया, “मालक। मालक। अहां डुबी चलेयो हन।” ताह़लू तिन्हीं उठी करी तफाने कने पांणिये दियां लैहरां जो झिड़केया कने सैह़ रुकी गै कने सांत होई गै।

²⁵ ताह़लू यीशुयैं तिन्हां नैं ग्लाया, “तुहां दा बसुआस कुत्थू था?” अपर सैह़ डरी गै कने हरान होई नैं अप्पु च ग्लाणा लग्गे, “एह़ कुण ऐ जेह्ड़ा तफान कने पांणिये दियां लैहरां कने दुष्टआत्मां जो भी हुक्म दिंदा ऐ, कने सैह़ तिसदा हुक्म मनदे हन?”

दुष्टआत्मां दे सतायो माणुये जो ठीक करणा

²⁶ भिरी यीशु कने तिसदे चेले गिरासेनियां दे प्रदेसे च पुज्जे, जेह्ड़ा तिस पार गलील प्रदेसे दे सामणै ऐ।

²⁷ जाह़लू सैह़ झीला दे कनारे पर लुत्था तां तिस सैहरे दा इक्क माणु मिल्ला जिस च दुष्टआत्मां थियां। सैह़ मतेआं दिनां ते ना कपड़े लगांदा था कने ना घरैं रैंह्दा था अपर कब्रां च रैंह्दा था।

²⁸ सैह़ यीशुये जो दिक्खी करी डड्डेया कने तिस सामणै पेई करी जोरे नैं डड्डी करी ग्लाया, “हे परम प्रधान परमात्मे दे पुत्तर यीशु। तिज्जो मिन्जो नैं क्या कम्म? मैं तिज्जो नैं विणती करदा ऐ, मिन्जो दुखी मत कर।”

²⁹ क्जोकि सैह़ तिसा दुष्टआत्मा जो तिस माणुये ते निकल़णे दा हुक्म दे दा था, इसतांई सैह़ बार-बार हावी हुंदी थी। माणु तिसियो संगल़ां कने बेड़ियां नैं बन्नदे थे तमी सैह़ बन्धनां जो तोड़ी दिंदा था, कने दुष्टआत्मा तिसियो सुनसाण जगाह च नठांदी थी।

³⁰ यीशुयैं तिसा दुष्टआत्मा ते पुछया, “तेरा क्या नां ऐ?” तिन्नै आत्मा ग्लाया, “सेना,” क्जोकि मतिआं दुष्टआत्मां तिस च समाई गियां थियां।

³¹ तिन्हां दुष्टआत्मां तिस नैं विणती कित्ती कि अहां जो अथाह कुंडे च जाणा मत देआ।

³² औत्थू प्हाड़े पर इक्क मते सूअरां दा झुंड चुगा था, इसतांई तिन्हां तिस नैं विणती कित्ती कि अहां जो तिन्हां च समाणा दे। तिन्हीं तिन्हां जो जाणा दित्ता।

³³ ताह़लू दुष्टआत्मां तिस माणुये ते निकल़ी नैं सूअरां अंदर समाई गियां कने सैह़ सूअर खड़िया भेठी ते रिड़की नैं झीला च जाई पै कने डुबी करी मरी गै।

³⁴ सूअरां दे गुआले एह़ जेह्ड़ा होएया था दिक्खी करी नठ्ठी गै, कने सैहरे च कने ग्रांऐ च जाई नैं तिसदी खबर फैलाई दित्ती।

³⁵ माणु एह़ जेह्ड़ा होएया था तिसियो दिक्खणा आये, कने यीशु अल्ल आई करी जिस माणुये ते दुष्टआत्मां कड्डियां थियां, तिसियो यीशुये दे पैरां अल्ल कपड़े पैहनी करी कने ठीक हालता च बैठेया दिक्खी नैं डरी गै,

³⁶ कने दिक्खणे आल़ेआं तिन्हां जो दस्सेया कि सैह़ माणु दुष्टआत्मां दा सताया होएया कुस तरांह खरा होएया।

³⁷ ताह़लू गिरासेनियां सैहरे दे अक्खे-बक्खे दे सारे लोकां यीशुये नैं विणती कित्ती कि अहां दे इस लाक्के ते चली जा; क्जोकि तिन्हां पर बड़ा भरी डर छाई गेआ था। कने सैह़ किस्तिया च बेई करी चली गेआ।

³⁸ जिस माणु च दुष्टआत्मां कड्डियां थियां सैह़ यीशुये नैं विणती करणा लग्गा, कि मिन्जो अप्पु सौगी औणां दे, अपर यीशुयैं तिसियो बापस घल्ली दित्ता कने ग्लाया,

³⁹ “अपणे घरेयो चलिया कने लोकां नैं दस्स कि परमात्मैं तिज्जो तांई कितणे बड्डे-बड्डे कम्म कित्ते।” सैह़ जाई नैं सारे सैहरे च प्रचार करणा लग्गा कि यीशुयैं मिन्जो बासती कदेय बड्डे-बड्डे कम्म कित्ते।

याईरे दी मरियो कुड़ी कने इक्क बमार जणांस

⁴⁰ जाह़लू यीशु बापस आया तां माणु तिस सौगी खुसिया नैं मिल्ले, क्जोकि सैह़ सारे तिसदी राह दिक्खा दे थे।

⁴¹ इतणे च याईर नांऐ दा इक्क माणु जेह्ड़ा आराधनालय दा सरदार था आया कने यीशुये दे पैरां च पेई करी तिस नैं विणती करणा लग्गा कि मेरे घरेयो चल,

⁴² क्जोकि तिसदी बारांह साल्लां दी इक्क लौती कुड़ी थी, कने सैह़ मरना लगियो थी। जाह़लू सैह़ जा दा था, ताह़लू माणु तिस परालैं पेई जांदे थे।

⁴³ इक्की जणासा जिसा जो बारांह साल ते खून चलणे दी बमारी थी, कने तिन्नै अपणी सारी कमाई बैदां-हकीम्मां पर लगाई दित्तियो थी, भिरी भी तिसा जो कुसी ते भी फायदा नीं होएया,

⁴⁴ पचांह़ ते आई करी तिसदे कपड़े दे पल्ले जो छुता, कने तिसी बग्त तिसादा खून चलणा बंद होई गेआ।

⁴⁵ यीशुयैं पुछया, “मिन्जो कुणी छुता?” जाह़लू सारे मुकरना लग्गे, तां पतरसे कने तिसदे साथियां ग्लाया, “हे मालक, तुहां जो तां भीड़ दबा दी ऐ कने तुहां परालैं पेई जांदी ऐ।”

⁴⁶ अपर यीशुयैं ग्लाया, “कुणकी मिन्जो तां छुता ऐ, क्जोकि मैं जाणी लेआ ऐ कि मिन्जो ते सामर्थ निकल़ी ऐ।”

⁴⁷ जाह़लू तिन्नै जणासा दिख्या कि मैं लुक्की नीं सकदी, तां कम्मदी होई तिसदेयां पैरां च पेई नैं सारेयां लोकां जो दस्सेया कि तिन्नै कुसा बज़ाह ते तिसियो छुत्या, कने किंआं तौल़ी खरी होई गेई।

⁴⁸ यीशुयैं तिसा जो ग्लाया, “बच्चा, तेरे बसुआसैं तिज्जो खरा कित्ता ऐ, खुसिया नैं चली जा।”

⁴⁹ सैह़ एह़ ग्ला दा ई था कि, कि आराधनालय दे सरदारे दे घरे ते इक्क माणु आई नैं ग्लाणा लग्गा, “हुण गुरू जो तकलीफ मत दे, क्जोकि तेरी कुड़ी तां मरी गियो ऐ।”

⁵⁰ यीशुयैं एह़ सुणी करी तिस जो जवाब दित्ता, “मत डर; सिर्फ बसुआस रख, तां सैह़ बची जांगी।”

⁵¹ घरे च आई करी तिन्हीं पतरसे जो, कने यूहन्ने जो, कने याकूबे जो, कने कुड़िया दे माँऊ-बुढ़े जो छड्डी करी कने कुसियो भी अप्पु सौगी अंदर औणां नीं दित्ता।

⁵² सारे माणु तिसा तांई रोआ दे थे, अपर तिन्हीं ग्लाया, “रोआ मत; सैह़ मरियो नीं अपर सैह़ सुतियो ऐ।”

⁵³ सैह़ एह़ सुणी करी, कि सैह़ मरी गियो ऐ यीशु पर हंसणा लग्गे।

⁵⁴ अपर यीशुयैं तिसादा हत्थ पकड़ेया, कने जोरे नैं ग्लाया, “हे कुड़िये उठ।”

⁵⁵ ताह़लू तिसादे प्राण हटी आये कने सैह़ ताह़लू ई उठी बैठी। भिरी तिन्हीं हुक्म दित्ता कि इसा कुड़िया जो कुच्छ खाणे जो देआ।

⁵⁶ तिसादे माँ बुढ़े हरान होये, अपर यीशुयैं तिन्हां जो चतौणी दित्ती कि एह़ जेह्ड़ा होएया ऐ कुसी नैं मत दस्सदे।