लूका 4 - काँगड़ी

यीशु दी परीक्षा

¹ यीशु बपतिस्मा लैणे ते बाद पवित्र आत्मा नैं भरोई करी, यरदन नदिया ते बापस आया; कने चाल़ी दिन तिकर पवित्र आत्मा दे सखाणे ते सैह़ सुनसाण जगाह च फिरदा रेह्आ।

² कने सैतान तिसदी परख करदा रेह्आ। तिन्हां चाल़ी दिनां च तिन्हीं कुच्छ नीं खादा, कने जाह़लू सैह़ दिन पूरे होये, ताह़लू तिस जो भुख लग्गी।

³ भिरी सैतान तिस नैं ग्लाणा लग्गा, “जे तू परमात्मे दा पुत्तर ऐ, तां इस पत्थरे नैं ग्ला, कि रोटी बणी जा।”

⁴ यीशुयैं तिस जो जवाब दित्ता, “पवित्रशास्त्रे च लिख्या ऐ कि, ‘माणु सिर्फ रोटिया नैं ई जिन्दा नीं रैंह्गा’।”

⁵ भिरी इबलीस सैतान यीशुये जो बड़ी ऊचिया जगाह च लेई गेआ, कने पल भर च संसारे दा राजपाठ दस्सी करी,

⁶ तिस नैं ग्लाणा लग्गा, “मैं इस संसारे दा हक्क, कने राजपाठ तिज्जो दिंदा, क्जोकि एह़ सब मिन्जो दित्या ऐ, कने मैं जिसियो चां तिसियो देई सकदा ऐ।

⁷ जे तू मिन्जो गांह झुकी नैं प्रणांम कने भक्ति करैं, तां एह़ सब कुच्छ तेरा होई जांगा।”

⁸ यीशुयैं तिस जो जवाब दित्ता, “पवित्रशास्त्रे च लिख्या ऐ, तू अपणे प्रभु परमात्मे दे गांह ई झुकी नैं प्रणांम कर; कने तिसदी भक्ति कर;।”

⁹ ताह़लू सैतान तिसियो यरूशलेम सैहरे जो लेई गेआ कने मंदरे दिया चुंडिया पर खरेड़ी करी ग्लाणा लग्गा, “जे तू परमात्मे दा पुत्तर ऐ, तां अप्पु जो ऐत्थु ते थल्लैं सट्टी दे।

¹⁰ क्जोकि पवित्रशास्त्रे च लिख्या ऐ, सैह़ तेरे बारे च अपणे सुअर्गदूतां जो हुक्म दिंगा, कि सैह़ तेरी हिफाजत करन।

¹¹ कने तिन्हां तिज्जो हत्थां पर चुक्की लैणां, कने इआं होणा कि तेरे पैरां च पत्थरे नैं ठोकर भी नीं लगणी।”

¹² यीशुयैं तिसियो जवाब दित्ता, “पवित्रशास्त्रे च एह़ भी लिख्या ऐ, ‘तू प्रभु अपणे परमात्मे जो मत परखदा’।”

¹³ जाह़लू सैतान यीशुये दी परख करी बैठा, ताह़लू अगले मौके दिया निहाल़पा च कुच्छ बग्त तांई तिसियो छड्डी करी चली गेआ।

यीशुये दे गलील प्रदेसे च सेवा दे कम्मां दी सुरुआत

¹⁴ भिरी यीशु पवित्र आत्मा दिया सामर्थी नैं भरोई करी गलील प्रदेस जो बापस आया, कने तिसदी चर्चा अक्खे-बक्खे दे सारे सैहरे च फैली गेई।

¹⁵ कने सैह़ तिन्हां दे ई आराधनालयां च सिक्षा दिंदा रेह्आ, कने सब तिसदी महिमा करदे थे।

नासरत सैहरे च यीशुये दा अपमान

¹⁶ यीशु नासरत सैहरे च बापस आया, जित्थु तिसदा पालण पोसण होएया था; कने अपणी रीति रिवाजां मताबक बिस्रामे आल़े दिनैं आराधनालय च गेआ कने पवित्रशास्त्रे जो पढ़णे तांई खड़ोता।

¹⁷ ताह़लू तिन्हां यशायाह भविष्यवक्ता दी कताब तिसियो पढ़णे तांई दित्ती, कने तिन्हीं कताब खोली करी एह़ पढ़ी करी सणाया कि

¹⁸ “प्रभु दा पवित्र आत्मा मिन्जो पर ऐ, तिन्हीं मिन्जो पर अभिषेक कित्ता कि मैं गरीबां जो सुसमाचार सणाणा, कने तिन्हीं मिन्जो इसतांई घल्लेया कि कैदियां जो छुटकारे दा कने अन्नेयां जो तिन्हां दी अखीं खोलणे दा सुसमाचार प्रचार करैं कने लोकां दे सतायां जो छड्डां।

¹⁹ कने प्रभु परमात्मे दे पास्से ते अहां पर दया करणे दा बग्त आई गेआ ऐ।”

²⁰ तां इतणा पढ़णे दे बाद यीशुयैं कताब बंद करी नैं दासां दे हत्थे च देई दित्ती कने बैठी गेआ; कने आराधनालय दे सारे लोकां दी नजर तिस पर लगियो थी।

²¹ ताह़लू यीशु तिन्हां नैं ग्लाणा लग्गा, “अज्ज तुहां दे सुणने ते ई पवित्रशास्त्रे दा एह़ वचन पूरा होएया।

²² सारे माणु तिसदी तारीफ करा दे थे कने तिसदे मुँऐ ते निकल़दे दया दे वचनां जो सुणी करी हरान होये; कने ग्लाणा लग्गे, क्या एह़ यूसुफे दा पुत्तर नीं ऐ?”

²³ यीशुयैं तिन्हां नैं ग्लाया, “मिन्जो पता तुहां मिन्जो पर एह़ टोंट जरूर कसणा कि ‘हे बैदा, पैहल्लैं अपणे आप्पे जो ठीक तां करी लै। अहां सुणेयां कि जेह्ड़ा कुच्छ कफरनहूम सैहरे च कित्या ऐ, सैह़ ऐत्थु अपणे सैहरे च भी कर’।”

²⁴ कने तिन्हीं ग्लाया, “मैं तुहां नैं सच्च ग्लांदा ऐ कोई भविष्यवक्ता अपणे लाक्के च कदी भी आदर मान नीं पाई सकदा।

²⁵ कने सुणा, मैं तुहां नैं सच्च ग्लांदा ऐ, कि एलिय्याह भविष्यवक्ता दे दिनां च जाह़लू साढे तीनां साल्लां तिकर तित्थु बरखा नीं होई, कने बरखा नीं होणे दिया बज़ाह ते सारे इस्राएल देसे च बड़ा अकाल पेआ, कने तिस देसे च मतिआं बिधवा थियां।

²⁶ अपर एलिय्याह भविष्यवक्ता जो सिदोन प्रदेसे दे सारफत सैहरे दिया इक्की बिधवा जो छड्डी नैं होर कुसी अल्ल नीं घल्लेया।

²⁷ कने एलिशा भविष्यवक्ता दे बग्त इस्राएल देसे च मते भरी कोढ़ी थे, अपर परमात्मे सीरिया देसे दे इक्क नामान नांऐ दे कोढ़ी जो छड्डी करी होर कोई खरा नीं कित्ता।”

²⁸ एह़ गल्लां सुणदे ई जितणे भी आराधनालय च थे, सब गुस्से होई गै।

²⁹ कने उठी करी यीशुये जो अपणे पाहड़ी सैहरे ते बाहर कड्डी करी, तिसदे कनारे पर लेई गै तांजे तित्थु ते तिसियो थल्लै रड़काई करी मारी दैन।

³⁰ अपर यीशु तिन्हां दे बिच्चे ते निकल़ी करी चली गेआ।

दुष्टआत्मां दे सताये जो ठीक करणा

³¹ भिरी यीशु गलील प्रदेसे दे कफरनहूम सैहरे जो गेआ; कने बिस्रामे आल़े दिनैं लोकां जो सिक्षा दै दा था।

³² सैह़ तिसदिया सिक्षा ते हरान होई गै क्जोकि तिसदा वचन हक्के सौगी हुंदा था।

³³ आराधनालय च इक्क माणु था, जिसदे अंदर दुष्टआत्मा थी। सैह़ जोरे नैं डड्डी करी ग्लाणा लग्गा,

³⁴ “हे यीशु नासरी, तू अहां ते क्या चांह़दा, क्या तू अहां दा नास करणा आया ऐ? मैं तिज्जो जाणदा ऐ, तू कुण ऐ, तू परमात्मे दा घल्लेया पवित्र पुत्तर ऐ।”

³⁵ यीशुयैं तिसा दुष्टआत्मा जो झिड़की नैं ग्लाया, “चुप रैह्, कने इस माणु ते निकल़ी जा।” तां तिस माणुये जो दुष्टआत्मा सबना माणुये दे सामणै मरोड़ी करी थल्लै सट्टी दित्ता कने कोई नकसान कित्यो बगैर तिसदे अंदरे ते निकल़ी गेई।

³⁶ एह़ दिक्खी करी सबना जो हरानी होई, कने सैह़ अप्पु च गल्लां करणा लग्गे, कि “एह़ कितणे ताकतवर कने सामर्थी वचन हन, क्जोकि सैह़ अधिकारे नैं कने सामर्थी सौगी दुष्टआत्मां जो हुक्म दिंदा ऐ, कने सैह़ निकल़ी जांदियां हन।”

³⁷ इस तरीके नैं यीशु दी चर्चा अक्खे-बक्खे दे सारे लाक्के च होणा लग्गी।

पतरसे दिया सस्सु जो कने होरनी लोकां जो ठीक करणा

³⁸ यीशु आराधनालय ते निकल़ी करी शमौने दे घरे जो गेआ। तिस बग्त शमौने दी सस्सु जो बड़ा भरी बुखार चढ़ेया था, तां तिन्हां तिसा तांई तिस नैं विणती कित्ती।

³⁹ तिन्हीं तिसादे बक्खे खड़ोई करी बुखारे जो फटकार लगाई कने बुखार उतरी गेआ, कने सैह़ तिसी बग्त उठी नैं तिन्हां दी आदर-खातर करणा लग्गी।

⁴⁰ संझा दे बग्त, जिस कुसी दे घरे च कोई भी बमारियां दे बमार माणु थे, सैह़ सबना जो तिस अल्ल लेई आये, कने तिन्हीं इक्की-इक्की माणु पर हत्थ रखी करी तिन्हां जो खरा कित्ता।

⁴¹ कने दुष्टआत्मां भी डड्डदियां कने एह़ ग्लांदियां कि, “तू परमात्मे दा पुत्तर ऐ,” मते माणुआं ते निकल़ी गियां। अपर यीशु तिन्हां जो झिड़कदा कने ग्लाणा नीं दिंदा था, क्जोकि सैह़ जाणदियां थियां कि यीशु परमात्मे दा पुत्तर मसीह ऐ।

आराधनालयां च प्रचार करणा

⁴² जाह़लू भ्याग होई तां यीशु तित्थु ते निकल़ी करी सुनसाण जगाह जो गेआ, भिरी भी माणुआं दी भीड़ तिसियो तोपदी-तोपदी तिसदे पचांह़ चली आई, कने तिस जो एह़ ग्लाई करी रोकणा लग्गी, कि अहां जो छड्डी करी मत जा।

⁴³ अपर यीशुयैं तिन्हां नैं ग्लाया, “मिन्जो दूयेयां सैहरां च भी परमात्मे दे राज्जे दा सुसमाचार सणाणा जरूरी ऐ, क्जोकि मिन्जो इस कम्मे तांई ई घल्लेया ऐ।”

⁴⁴ कने सैह़ गलील प्रदेसे दे आराधनालयां च प्रचार करदा रेह्आ।