लूका 23 - काँगड़ी

पिलातुस कने यीशु

¹ ताह़लू सारी सभा उठी नैं तिसियो पिलातुसे अल्ल लेई गेई।

² सैह़ एह़ ग्लाई नैं यीशु पर दोस लगाणा लग्गे, “अहां इसियो लोकां जो भकांदे कने कैसरे जो कर दैणे ते मना करदे, कने अपणे आप्पे जो मसीह, राजा ग्लांदे सुणेया ऐ।”

³ पिलातुसैं तिसते पुछया, “क्या तू यहूदियां दा राजा ऐ?” तिन्हीं तिसियो जवाब दित्ता, “तू अप्पु ई तां ग्ला दा ऐ।”

⁴ ताह़लू पिलातुसैं प्रधान याजकां कने लोकां नैं ग्लाया, “मैं इस माणुये च कोई दोस नीं पांदा।”

⁵ अपर सैह़ होर भी जोरे-जोरे नैं ग्लाणा लग्गे, “एह़ गलील प्रदेसे ते लेई करी ऐत्थु तिकर, सारे यहूदिया प्रदेसे च सिक्षा देई नैं लोकां जो भकांदा ऐ।”

⁶ एह़ सुणी नैं पिलातुसैं पुछया, “क्या एह़ माणु गलील प्रदेस ते ऐ?”

⁷ कने एह़ जाणी नैं कि सैह़ हेरोदेस राजे रियासता दा ऐ, तिसियो हेरोदेस अल्ल घल्ली दित्ता, क्जोकि तिन्हां दिनां च सैह़ भी यरूशलेम सैहरे च था।

हेरोदेस कने यीशु

⁸ हेरोदेस यीशुये जो दिक्खी नैं बड़ा खुस होएया, क्जोकि सैह़ मतेआं दिनां ते यीशुये जो दिक्खणा चांह़दा था; इसतांई कि तिसदे बारे च सुणेया था, कने तिसते कुच्छ चमत्कार दिक्खणे दी आस रखदा था।

⁹ सैह़ तिसते मतिआं गल्लां पुछदा रेह्आ, अपर तिन्हीं तिसियो कुच्छ भी जवाब नीं दित्ता।

¹⁰ प्रधान याजक कने सास्त्री खड़ोई करी पूरा जोर लगाई नैं तिस पर आरोप लगांदे रैह्।

¹¹ ताह़लू हेरोदेसैं अपणे सपाईयां सौगी तिसदी बेइज्जती करी नैं मजाक कित्ता कने भड़कीले कपड़े लौआई करी तिसियो पिलातुसे अल्ल घल्ली दित्ता।

¹² तिस दिने पिलातुस कने हेरोदेस साथी बणी गै। तिसते पैहल्लैं सैह़ इक्की दूये दे बैरी थे।

पिलातुसे दिया बज़ाह ते यीशुये जो मौत्ती दी सज़ा

¹³ पिलातुसैं प्रधान याजकां कने सरदारां कने लोकां सद्दी नैं तिन्हां नैं ग्लाणा लग्गा,

¹⁴ “तुहां इस माणुये जो लोकां दे भकाणे आल़ा दस्सी नैं मिन्जो अल्ल लेई आएयो हन, कने दिक्खा, मैं तुहां सामणै तिसदी जांच कित्ती, अपर जिन्हां गल्लां दा तुहां तिस पर दोस लगा दे हन, तिन्हां गल्लां दे बारे च मैं तिस च कुच्छ भी दोस नीं पाया ऐ।

¹⁵ कने ना ई हेरोदेस राजे तिस पर दोस पाया, क्जोकि तिन्हीं तिसियो अहां अल्ल बापस घल्ली दित्ता ऐ। कने सुणा, इन्हीं माणुये ऐदेया कोई गलत कम्म नीं कित्ता, कि जिसदिया बज़ाह ते इसियो मौत्ती दी सज़ा दित्ती जां।

¹⁶ इसतांई मैं इसियो कोड़े लगुआई करी छड्डी दिंदा ऐ।”

¹⁷ पिलातुस यहूदी लोकां दे फसह दे त्योहारे दे बग्त तिन्हां तांई इक्क कैदिये जो छड्डी दिंदा था।

¹⁸ ताह़लू सारे लोक मिल्ली नैं ग्लाणा लग्गे, “इसदा कम्म तमाम कर, कने अहां तांई बरअब्बा जो छड्डी दे।”

¹⁹ सैह़ कुसी हंगामे दिया बज़ाह ते जेह्ड़ा सैहरे च होआ दा था, कने हत्या दिया बज़ाह ते जेला च बंद कित्या था।

²⁰ अपर पिलातुसैं यीशुये जो छड्डणे दी इच्छा ते लोकां जो भिरी ते समझाया,

²¹ अपर तिन्हां जोरे नैं ग्लाया, “इसियो सूल़िया पर टूंगा, सूल़िया पर।”

²² तिन्हीं त्री बरी तिन्हां नैं ग्लाया, “क्जो, तिन्हीं कुण देहया गुनाह कित्या ऐ? मैं तिस च मौत्ती दी सज़ा जोग्गी कोई गल्ल नीं पाई। इसतांई मैं तिसियो मार दुआई नैं छड्डी दित्ता ऐ।”

²³ अपर सैह़ जोरे-जोरे नैं डड्डी-डड्डी करी पचांह़ पेई गै, कि सैह़ सूल़िया पर टूंगेया जां, कने तिन्हां दा रौल़ा इतणा बधी गेआ।

²⁴ कने तां पिलातुसैं हुक्म दित्ता कि तिन्हां दी विणतिया मताबक कित्ता जां।

²⁵ तिन्हीं तिस माणुये जो हंगामे कने हत्या दिया बज़ाह ते जेला च था, कने जिसियो सैह़ मंगदे थे, छड्डी दित्ता; कने यीशुये जो तिन्हां दी इच्छा मताबक हुआलैं करी दित्ता।

यीशुये जो सूल़िया पर टुंगणा

²⁶ जाह़लू सैह़ यीशुये जो लेई नैं जा दे थे, तां तिन्हां शमौन नांऐ दे इक्की कुरेनी माणुये जो जेह्ड़ा ग्रांऐ ते ओआ दा था, पकड़ी नैं तिस पर सूल़ी चकाई दित्ती कि तिसियो यीशुये पचांह़-पचांह़ लेई चल्ले।

²⁷ लोकां दी बड्डी भीड़ तिसदे पचांह़ चली पेई कने तिसा भीड़ा च मतिआं जणासां भी थियां जेह्ड़ियां यीशु तांई छातिया पीटी करी रौआ दियां थियां।

²⁸ यीशुयैं तिन्हां दे पास्से दिक्खी नैं ग्लाया, “हे यरूशलेम सैहरे दी कुड़ियो, मिन्जो तांई मत रौआ; अपर अपणे कने अपणे जागतां तांई रौआ।

²⁹ क्जोकि सुणा, दुखां दिन ओआ दे हन, जिन्हां च माणु ग्लांगे, ‘धन हन सैह़ जणासां जेह्ड़ियां बाँझ हन, जिन्हां कुसी बच्चे जो जन्म नीं दित्ता, ना तिन्हां दा पालण पोसण कित्ता।’

³⁰ तिस बग्त, ‘लोक प्हाड़ां नैं ग्लांगे, कि अहां पर पो , कने टिलेयां नैं ग्लांगे, अहां जो ढक्की लेआ।’

³¹ “क्जोकि जाह़लू सैह़ सैले रूखां सौगी इआं करदे हन, तां सुक्केयां रूखां सौगी क्या कुच्छ नीं कित्ता जांगा?”

³² सैह़ होर दूँ माणुआं जो भी जेह्ड़े बुरे कम्म करदे थे यीशु सौगी सूल़िया पर टूंगणे तांई लेई गै।

³³ जाह़लू सैह़ तिसा जगाह च पुज्जे, जिसा जो खोपड़ी दी जगाह ग्लांदे हन, तां तिन्हां तित्थु तिसियो कने तिन्हां बुरे कम्म करणे आल़ेआं जो भी, इक्की जो सज्जे पास्से कने दूये जो खब्बे पास्से सूल़िया पर टंगाई दित्ता।

³⁴ ताह़लू यीशुयैं ग्लाया, “हे पिता, इन्हां जो माफ कर, क्जोकि एह़ नीं जाणदे कि क्या करा दे हन?” कने तिन्हां पर्चियां पाई नैं तिसदे कपड़े बंडी लै।

³⁵ माणु खड़ोई करी दिक्खा दे थे, कने सरदार भी मजाक करी नैं ग्लांदे थे, “इन्हीं होरनी माणुआं जो तां बचाया, जे एह़ परमात्मे दा मसीह ऐ, कने तिसदा चुणेया ऐ, तां अपणे आप्पे जो बचाई लै।”

³⁶ सपाई भी आई नैं सिरका देई नैं तिसदा मजाक करी नैं ग्लांदे थे,

³⁷ “जे तू यहूदियां दा राजा ऐ, तां अपणे आप्पे जो बचा।”

³⁸ कने तिसदा दोसपत्र तिसदे ऊपर सूल़िया पर लगाई दित्ता, कि “एह़ यहूदियां दा राजा ऐ।”

मने बदलणे आल़ा बुरा माणु

³⁹ जेह्ड़े बुरे कम्म करणे आल़े टूंगेयो थे तिन्हां च इक्क तिसदी निंदा करी नैं ग्लाणा लग्गा, “क्या तू मसीह नीं? तां अपणे आप्पे जो कने अहां जो भी बचा,”

⁴⁰ इसा गल्ला पर दूँये तिसियो झिड़की नैं ग्लाया, “क्या तू परमात्मे ते भी नीं डरदा? तू भी तां सैई सज़ा पा दा ऐ,

⁴¹ अहां तां कानूने मताबक सज़ा पा दे हन, अपर इन्हीं तां कोई बुरा कम्म नीं कित्या।”

⁴² ताह़लू तिन्हीं ग्लाया, “हे यीशु, जाह़लू तू अपणे राज्जे च राजे साइआं ओंगा, तां मिन्जो याद रखेयां।”

⁴³ तिन्हीं तिस नैं ग्लाया, “मैं तुहां नैं सच्च ग्लांदा ऐ कि अज्जे ते ई तू मिन्जो सौगी सुअर्गलोके च हुंगा।”

यीशुये दा प्राण छड्डणा

⁴⁴ कने लगभग दोपैरा बाराह बजे ते लेई नैं दोपैरा त्रै बजे तिकर सारे देसे च नेहरा छाई रेह्आ,

⁴⁵ कने सूरजे दा परगड़ा चली गेआ, कने मंदरे दा पड़दा बिच्चे ते फटी गेआ,

⁴⁶ कने यीशुयैं जोरे नैं डड्डी नैं ग्लाया, “हे पिता, मैं अपणिया आत्मा तेरे हत्थां च दिंदा ऐ।” कने एह़ ग्लाई नैं प्राण छड्डी दित्ते।

⁴⁷ सूबेदारैं, जेह्ड़ा कुच्छ होएया था दिक्खी नैं परमात्मे दी महिमा कित्ती, कने ग्लाया, “सच्च-बिच्च एह़ माणु धर्मी था।”

⁴⁸ कने भीड़ा दे लोक जेह्ड़े एह़ दिक्खणे जो किठ्ठे होएयो थे, तिसा घटनां जो दिक्खी नैं छाती पीटदे-पीटदे अपणे घरां बापस चली गै।

⁴⁹ अपर यीशुये दे सारे जाण पणछैणा आल़े, कने जेह्ड़ियां जणासां गलील प्रदेसे ते तिस सौगी आईआं थियां, दूर खड़ोई एह़ सब कुच्छ दिक्खा दियां थियां।

यीशुये जो कब्रा च रखणा

⁵⁰ कने दिक्खा तित्थु यूसुफ नांऐ दा इक्क माणु था, जेह्ड़ा महासभा दा सदस्य था कने सज्जण कने धर्मी मरद भी था।

⁵¹ कने तिन्हां दी योजना कने तिन्हां दे तिस कम्मे ते खुस नीं था। सैह़ यहूदियां दे सैहर अरिमतिया सैहरे दा रैहणे आल़ा कने परमात्मे दे राज्जे दा इन्तजार करणे आल़ा था।

⁵² तिन्हीं पिलातुसे अल्ल जाई नैं यीशु दी लाह्स दफनाणे तांई मंगी।

⁵³ कने यीशुये जो लौआई नैं मलमले दी चादरा च लपेटया, कने लाह्सा जो इक्की कब्रा च रखेया, जेह्ड़ी चट्टाना च कोरियो थी; तिसा च कोई भी कदी नीं रखेया था।

⁵⁴ सैह़ त्यारिया दा दिन था, कने बिस्रामे आल़ा दिन सुरू होणे आल़ा था।

⁵⁵ जेह्ड़ियां जणासां यीशुये सौगी गलील प्रदेसे ते आईआं थियां, तिन्हां यूसुफे दे पचांह़-पचांह़ जाई नैं तिसा कब्रा जो दिख्या, कने एह़ भी दिख्या, कि तिसदी लाह्स किंआं रखियो ऐ।

⁵⁶ ताह़लू तिन्हां अपणे घर बापस आई नैं खुसबु आल़िआं चीज्जां कने इत्तर त्यार कित्ता, कने बिस्रामे आल़े दिनैं तिन्हां मूसा दिया व्यबस्था मताबक अराम कित्ता।