लूका 21 - काँगड़ी

गरीब बिधवा दा दान

¹ भिरी यीशुयैं अखीं चुक्की नैं अमीरां जो अपणा-अपणा दान दानपात्रे च पांदे दिख्या।

² तिन्हीं इक्क गरीब बिधवा जो भी तिस च दो दमड़ियां पांदे दिख्या।

³ ताह़लू यीशुयैं ग्लाया, “मैं तुहां नैं सच्च ग्लांदा ऐ कि इन्नै गरीब बिधवा तां सबना ते जादा पाया ऐ।

⁴ क्जोकि तिन्हां सबना अपणिया-अपणिया कमाईया दा थोड़ा हिस्सा दाने च पाया ऐ, अपर इन्नै अपणिया गरीबिया च अपणी सारी कमाई पाई दित्ती ऐ।”

मंदरे दे विनाश दी भविष्यवाणी

⁵ जाह़लू कुच्छ माणु मंदरे दे बारे च ग्ला दे थे कि सैह़ कदेय छैल़ पत्थरां नैं कने दान कित्तियां चीज्जां नैं सजाया ऐ, तां तिन्हीं ग्लाया,

⁶ “सैह़ दिन ओंगे, जिन्हां च एह़ सब कुच्छ जेह्ड़ा तुहां दिक्खदे हन, तिन्हां च ऐत्थु कुसी भी इक्की पत्थरे पर दूआ पत्थर नीं टिकगा। अपर इक्क-इक्क पत्थर ढाई दित्ता जांगा।”

मुसीबत कने दुख

⁷ तिन्हां तिसते पुछया, “हे गुरू, एह़ सब काह़लू हुंगा? कने एह़ गल्लां जाह़लू पूरियां होणे पर हुंगियां, तां तिस बग्त दा क्या नसाण हुंगा?”

⁸ तिन्हीं ग्लाया, “चौकन्ने रेह्आ कि भरमाये नीं जान, क्जोकि मते भरी मेरे नांऐ ते आई नैं ग्लांगे, मैं सैई ऐ, कने एह़ भी कि, ‘बग्त आई रेह्आ ऐ।’ तुहां तिसदे पचांह़ मत चली जांदे।

⁹ जाह़लू तुहां लड़ाईयां कने हंगामे दी चर्चा सुणगे तां घबराई मत जांदे, क्जोकि तिन्हां दा पैहल्लैं होणा जरूरी ऐ; अपर तिस बग्त इकदम अन्त नीं हुंगा।”

¹⁰ ताह़लू तिन्हीं तिन्हां नैं ग्लाया, “जातिआं पर जाति कने राज्जे पर राज्ज चढ़ाई करगा,

¹¹ कने बड्डे-बड्डे हिल्लण हुंगे, कने जगाह-जगाह पर अकाल कने महामारियां पोंगियां, कने अम्बरे च बुरिआं गल्लां कने बड्डे-बड्डे नसाण प्रगट हुंगे।

¹² अपर इन्हां सारियां गल्लां होणे ते पैहल्लैं मेरे नांऐ दिया बज़ाह ते तुहां जो पकड़गे, कने सतांगे, आराधनालय च घसीटगे, जेलां च करी दिंगे, राजेयां कने हाकमां सामणै लेई जांगे।

¹³ अपर एह़ तुहां तांई गवाही दैणे दा मौका होई जांगा।

¹⁴ इसतांई अपणे-अपणे मने च ठाणी लेआ कि अहां पैहल्लैं ई जवाब दैणे दी फिकर नीं करगे।

¹⁵ क्जोकि मैं तुहां जो ऐदेय सब्द कने अक्ल दिंगा कि तुहां दे सब बरोधी सामणा या बरोध नीं करी सकगे।

¹⁶ तुहां दे माँ-बुढ़े, कने भाऊ, कने रिस्तेदार, कने साथी भी तुहां जो पकड़ुआंगे; ऐत्थु तिकर कि तुहां च कुच्छ लोकां जो मारी दिंगे।

¹⁷ मेरे नांऐ दी खातर सारे माणु तुहां नैं बैर रखगे।

¹⁸ अपर तुहां दे सिरे दा इक्क बाल़ भी बांका नीं हुंगा।

¹⁹ अपणे सबरे नैं तुहां अपणे प्राणा जो बचाई रखगे।

यरूशलेम सैहरे दे विनाशे दी भविष्यवाणी

²⁰ “जाह़लू तुहां यरूशलेम सैहरे जो सेना नैं घिरेया दिक्खगे, तां जाणी लैनेयों कि तिसदा उजड़णा नेड़े ऐ।

²¹ तिस बग्त जेह्ड़े यहूदिया च होन, सैह़ प्हाड़ां पर नठ्ठी जान; कने जेह्ड़े यरूशलेम सैहरे च होन सैह़ दूये सैहरे जो ना जान; कने जेह्ड़े ग्रांऐ च होन सैह़ दूये ग्रांऐ च ना जान।

²² क्जोकि एह़ बदला लैणे दे ऐदेय दिने हुंगे, जिन्हां च लिखियां सारियां गल्लां पूरियां होई जागियां।

²³ तिन्हां जणासां तांई खतरनाक बग्त हुंगा, जेह्ड़ियां गर्भवती कने बच्चेयां जो दुद पिलाणे आल़िआं हुंगी, तिस बग्त तिन्हां तांई नठणा बड़ा औखा होई जांगा। क्जोकि देसे च बड़ा सताव कने तिन्हां लोकां पर बड़ा प्रकोप हुंगा।

²⁴ सैह़ लोक तलवारा दिया धारा नैं मौत्ती दी घाट उतारे जांगे, कने दूये देसे लोक तिन्हां जो च कैदी बणाई नैं लेई जांगे; यरूशलेम सैहर होरनी जातिआं दे जरिये ताह़लू तिकर रौंदेया जांगा। जाह़लू तिकर होरनी जातिआं दा बग्त पूरा नीं होई जां।

माणुये दे पुत्तरे दा औणां

²⁵ “सूरजे च कने चन्द्रमे च कने तारेयां च नसाण दुस्सगे; कने धरतिया पर सारे देसां दे लोकां जो मुसीबत हुंगी, क्जोकि सैह़ समुंदरे दी गरजणा नैं कने लैहरां दिया उआज़ा नैं घबराई जांगे।

²⁶ डरे दिया बज़ाह ते कने संसारे पर ओणे आल़ी मुसीबतां दा इन्तजार करदे-करदे लोकां दे जी च जी नीं रैंह्गा, क्जोकि अम्बरे दियां सक्तियां हिलाईयां जाणियां हन।

²⁷ ताह़लू सैह़ मिन्जो, माणुये दे पुत्तरे जो सामर्थ कने बड़ी महिमा सौगी बदल़े पर ओंदे दिक्खगे।

²⁸ जाह़लू एह़ गल्लां होणा लगियां, तां सिध्धे होई नैं अपणे सिरे ऊपर चुकनेयों; क्जोकि तुहां दा छुटकारा नेड़े हुंगा।”

धूड़े दे रूखे दा उदारण

²⁹ तिन्हीं तिन्हां नैं इक्क उदारण भी ग्लाया, “धूड़े दे रूखे कने सारेयां रूखां जो दिक्खा।

³⁰ जिंआं तिन्हां च कुम्बलू निकल़दे हन, तां तुहां दिक्खी नैं अप्पु ई जाणी लैंदे हन कि गर्मिया दा मौसम ओणे आल़ा ऐ।

³¹ तिस तरीके नैं जाह़लू तुहां इन्हां गल्लां जो हुंदे दिक्खगे, ताह़लू तुहां जाणी लेआ कि परमात्मे दा राज्ज ओणे आल़ा ऐ।

³² मैं तुहां नैं सच्च ग्लांदा ऐ, कि इसा पीढ़िया दे लोकां दा अन्त ताह़लू तिकर नीं हुंगा, जाह़लू तिकर एह़ सारियां गल्लां पूरियां नीं होई जान।

³³ अम्बर कने धरती टल़ी सकदे हन, अपर मेरियां गल्लां कदी नीं टली सकदियां।

जागदे रेह्आ

³⁴ “इस बज़ाह ते चौकन्ने रेह्आ, कुत्थी इआं नीं होयैं कि तुहां दे मने च खुमार, कने मतवाल़ापन, कने इसा ज़िन्दगिया दी फिकर करी नैं सुस्त होई जान, कने सैह़ दिन तुहां पर गल़फाये साइआं चाणचक आई पोयैं।

³⁵ क्जोकि सैह़ सारे धरतिया पर रैहणे आल़ेआं पर इस तरीके नैं आई पोंगा।

³⁶ इसतांई जागदे रेह्आ कने हर बग्त प्रार्थना करदे रेह्आ कि तुहां इन्हां सब ओणे आल़िआं मुसीबता ते बची करी रैह़न कने माणुये सामणै खड़ोणे जोग्गा तां बणा।”

³⁷ सैह़ हर दिन मंदरे च सिक्षा दिंदा था, कने रातियो बाहर जाई नैं जैतून नांऐ दे प्हाड़े पर रैंह्दा था;

³⁸ कने भ्यागा तड़कैं ई सारे माणु तिसदी सुणने तांई मंदरे च तिस अल्ल ओंदे थे।