लूका 18 - काँगड़ी

अधर्मी हाकमे दा कने बिधवा दा उदारण

¹ भिरी यीशुयैं अपणे चेलेयां नैं ग्लाया, कि लगातार प्रार्थना करणी कने हिम्मत नीं हारनी चाइदी, तिसते बाद तिन्हां नैं एह़ उदारण ग्लाया:

² “कुसी सैहरे च इक्क न्यायी रैंह्दा था, जेह्ड़ा ना परमात्मे ते डरदा था कने ना कुसी माणुआं दी परवाह करदा था।

³ तिस सैहरे च इक्क बिधवा भी रैंह्दी थी, जेह्ड़ा तिस अल्ल आई नैं ग्ला करदी थी, ‘मेरा न्याय चुकाई नैं मिन्जो मेरे दुश्मणे ते बचा।’

⁴ मतेआं दिनां तिकर तां सैह़ नीं मन्नेया अपर अन्त च सोची नैं ग्लाया, ‘कने मैं ना परमात्मे ते डरदा, कने ना माणुआं दी कुच्छ परवाह करदा ऐ,

⁵ तमी एह़ बिधवा मेरे प्राणा खांदी रैंह्दी ऐ, इसतांई मैं तिसादा न्याय चुकांगा, कुत्थी इआं ना होयैं कि पल्लैं-पल्लैं आई नैं अन्त च मेरे नक्के च दम करी दैं’।”

⁶ प्रभु यीशुयैं ग्लाया, “ध्याने नैं सोचा, एह़ अधर्मी न्यायी क्या ग्लांदा ऐ?

⁷ इसतांई क्या परमात्मा अपणे चुणेयां दा न्याय नीं चुकांगा, जेह्ड़े दिन-रात तिसदी दुहाई दिंदे रैंह्दे हन? क्या सैह़ तिन्हां दे बारे च देर करगा?

⁸ अपर मैं तुहां नैं सच्च ग्लांदा ऐ, सैह़ तौल़ी तिसदा न्याय चुकांगा। तमी मैं माणु दा पुत्तर जाह़लू बापस ओंगा, तां क्या धरतिया पर इक्क भी माणु मिलगा जेह्ड़ा मिन्जो बसुआस करगा?”

फरीसी कने चुंगी लैणे आल़े दा उदारण

⁹ कने यीशुयैं तिन्हां नैं जेह्ड़े अपणे आप्पे पर भरोसा रखदे थे, कि अहां धर्मी हन, कने दूयेयां जो नीच समझदे थे, एह़ उदारण ग्लाया:

¹⁰ “दो माणु मंदरे च प्रार्थना करणा गै; इक्क फरीसी था कने दूआ चुंगी लैणे आल़ा।

¹¹ फरीसी खड़ोई नैं अपणे मने च प्रार्थना इआं करणा लग्गा, ‘हे परमात्मा, मैं तेरा धन्यावाद करदा ऐ कि मैं दूयेयां माणुआं साइआं बुरे कम्म करणे आल़ा कने अन्यायी कने ब्यभिचारी नीं ऐ, कने ना इस चुंगी लैणे आल़े साइआं ऐ।

¹² मैं हफ्ते च दो बरी ब्रत रखदा ऐ; मैं अपणिया सारिया कमाईया दा दसमा हिस्सा भी तिज्जो दिंदा ऐ।’

¹³ “अपर चुंगी लैणे आल़े दूर खड़ोई नैं, सुअर्गे पास्से दिक्खणा भी खरा नीं समझेया, अपर अपणी छातिया पीटी-पीटी नैं ग्लाया, ‘हे परमात्मा मिन्जो पापिये पर दया कर।’

¹⁴ मैं तुहां नैं ग्लांदा ऐ, कि सैह़ फरीसी नीं, अपर ऐई माणु जेह्ड़ा चुंगी लैणे आल़ा धर्मी होएया, कने अपणे घरेयो गेआ; क्जोकि जेह्ड़ा कोई अपणे आप्पे जो बड्डा बणांगा, सैह़ छोटा कित्ता जांगा; कने जेह्ड़ा अपणे आप्पे जो छोटा बणांगा, सैह़ बड्डा कित्ता जांगा।”

जागतां जो आशीर्वाद

¹⁵ भिरी माणु भी अपणे बच्चेयां जो भी तिस अल्ल लेयोणा लग्गे कि सैह़ तिन्हां पर हत्थ रखैं; अपर चेलेयां दिक्खी नैं तिन्हां जो झिड़केया।

¹⁶ यीशुयैं बच्चेयां जो अप्पु अल्ल सद्दी नैं ग्लाया, “जागतां जो मिन्जो अल्ल औणां देआ, कने इन्हां जो मत रोका, क्जोकि परमात्मे दा राज ऐदेयां दा ई ऐ।

¹⁷ मैं तुहां नैं सच्च ग्लांदा ऐ, कि जेह्ड़ा कोई परमात्मे दे राज्जे जो जागतां साइआं मन्नी नीं लैंगा, ताह़लू सैह़ सुअर्गे दे राज्जे च पुज्जी नीं सकदा ।”

अमीर माणु कने सदा दी ज़िन्दगी

¹⁸ इक्की सरदारैं तिसते पुछया, “हे उत्तम गुरू, सदा दी ज़िन्दगिया दा अधिकारी होणे तांई मैं क्या करैं?”

¹⁹ यीशुयैं तिस नैं ग्लाया, “तू मिन्जो भला क्जो ग्लांदा ऐ? परमात्मे जो छड्डी नैं कोई भला नीं ऐ।

²⁰ तू हुक्मां जो तां जाणदा ऐ, कि मूसा दिया व्यबस्था च क्या लिख्या ऐ, ब्यभिचार मत करणा, हत्या मत करणा, कने चोरी मत करणा, झूठी गवाही नीं दैणी, अपणे बुढ़े दी कने अपणिया माँऊ दी इज्जत करणा।”

²¹ तिन्हीं ग्लाया, “मैं तां तिन्हां सबना जो जुआनिया ते ई मनदा आया ऐ।”

²² एह़ सुणी नैं यीशु तिस नैं ग्लाणा लग्गा, “तिज्जो च हुण भी इक्की गल्ला दी कमी ऐ, अपणा सब कुच्छ बेची करी गरीबां जो बंडी दे; कने तिज्जो सुअर्गे च धन दौलत मिलगी, कने आई नैं मिन्जो पचांह़ चली पौ।”

²³ सैह़ एह़ सुणी नैं बड्डा उदास होएया, क्जोकि सैह़ बड़ा भरी अमीर था।

²⁴ यीशुयैं तिसियो दिक्खी नैं ग्लाया, “अमीरां दा परमात्मे दे राज्जे च पुज्जणा कितणा औखा ऐ।

²⁵ जिंआं ऊँटे दा सूईया दे नक्के ते निकल़णा औखा ऐ, तिंआं ई अमीर माणुये दा परमात्मे दे राज्जे च प्रवेश करणा बड़ा औखा ऐ।”

²⁶ इस गल्ला पर सुणने आल़ेआं ग्लाया, “तां भिरी कुसदा उद्धार होई सकदा ऐ?”

²⁷ यीशुयैं ग्लाया, “जेह्ड़ा माणुये तांई बड़ा औखा ऐ, सैह़ परमात्मे ते होई सकदा ऐ।”

²⁸ पतरसैं ग्लाया, “दिक्खा, अहां तां घर-बार छड्डी नैं तिज्जो पचांह़ चली पैयो हन।”

²⁹ तिन्हीं तिन्हां नैं ग्लाया, “मैं तुहां नैं सच्च ग्लांदा ऐ कि ऐदेया कुण हन? जिन्हीं परमात्मे दे राज्जे तांई घरे जो, कने लाड़िया जो या भाऊये जो, या माँऊ-बुढ़े जो, या बाल-बच्चेयां जो छड्डी दित्या होयैं;

³⁰ कने इस बग्त कई गुणा जादा नीं पां; अपर परलोक च सदा दी ज़िन्दगी जरूर मिलणी ऐ।”

अपणिया मौत्ती दे बारे च त्री बरी यीशुये दी भविष्यवाणी

³¹ भिरी तिन्हीं अपणे बारांह चेलेयां जो सौगी लेईआ कने जाई करी तिन्हां नैं ग्लाणा लग्गा, “दिक्खा अहां यरूशलेम सैहरे जो चलेयो हन, कने जितणियां गल्लां माणु दे पुत्तरे तांई भविष्यवक्ता दे जरिये लिखियां हन, सैह़ सारियां पूरियां होन।

³² क्जोकि सैह़ होरनी जातिआं दे हत्थां च दित्ता जांगा, कने सैह़ तिसियो मजाके च लैंगे, कने तिसदा अपमान करगे, कने तिस पर थुकगे,

³³ कने तिसियो कोड़े मारगे, कने तिसियो जान्नी ते मारी दिंगे; कने सैह़ त्रीये दिने मरेयां ते जिन्दा हुंगा।”

³⁴ अपर तिन्हां जो इन्हां गल्लां च कोई भी गल्ल समझ नीं आई; कने एह़ गल्ल तिन्हां ते छुपी रेई, कने जेह्ड़ा ग्लाया था सैह़ तिन्हां दी समझा च नीं आया।

अन्ने भिखारिये जो ठीक करणा

³⁵ जाह़लू सैह़ यरीहो सैहरे अल्ल पुज्जा, तां इक्क अन्ना सड़का कनारे बेई करी भिख मंगा दा था।

³⁶ सैह़ माणु भीड़ा दे चलणे दी उआज़ सुणी नैं पुछणा लग्गा, “एह़ क्या होएया दा ऐ?”

³⁷ तिन्हां दस्सेया, “यीशु नासरी जा दे हन।”

³⁸ ताह़लू तिन्हीं जोरे नैं ग्लाया, “हे यीशु, दाऊदे दे वंश, मिन्जो पर दया कर।”

³⁹ जेह्ड़ा गांह-गांह जा दे थे, सैह़ तिसियो झिड़कणा लग्गे कि चुप रैह्; अपर सैह़ होर डड्डणा लग्गा, “हे दाऊदे दे वंश, मिन्जो पर दया कर।”

⁴⁰ ताह़लू यीशुयैं खड़ोई नैं हुक्म दित्ता कि तिसियो मिन्जो अल्ल लेई ओआ, कने जाह़लू सैह़ यीशु अल्ल आया तां यीशुयैं तिसते पुछया,

⁴¹ “तू क्या चांह़दा ऐ कि मैं तिज्जो तांई करैं?” तिन्हीं ग्लाया, “हे प्रभु, एह़ कि मैं दिक्खणा लग्गी पोयैं।”

⁴² यीशुयैं तिसियो ग्लाया, “दिक्खणा लग्गी पौ; तेरे बसुआसैं तिज्जो खरा करी दित्ता ऐ।”

⁴³ सैह़ ताह़लू ई दिक्खणा लग्गी पेआ कने परमात्मे दी महिमा करदा-करदा तिसदे पचांह़ चली पेआ; कने सारे लोकां दिक्खी करी परमात्मे दी स्तुति कित्ती