यूहन्ना 6 - काँगड़ी

पंज हज़ार लोकां जो रोटी खुआणा

¹ इन्हां गल्लां ते बाद यीशु गलील प्रदेसे दिया इक्की झीला मतलब तिबिरियास झीला दे पारले पास्सेयो चली गेआ।

² कने लोकां दी इक्क बड़ी बड्डी भीड़ तिसदे पचांह़ चलियो थी क्जोकि जेह्ड़े चमत्कार दे कम्म सैह़ बमारां पर करदा था सैह़ तिन्हां जो दिक्खदे थे।

³ ताह़लू यीशु प्हाड़े पर गौई करी अपणे चेलेयां सौगी तित्थु बेई गेआ।

⁴ यहूदी अगुआं दे फसह दा त्योहार नेड़े था।

⁵ जाह़लू यीशुयैं अपणी नजरा चुक्की नैं इक्क मती सारी भीड़ा जो अपणे अल्ल ओंदे दिख्या, तां फिलिप्पुसैं ग्लाया, “अहां इन्हां जो खाणे तांई कतांह ते रोटी खरीदी नैं लेयोन?”

⁶ तिन्हीं एह़ गल्ल तिसियो परखणे तांई ग्लाई, क्जोकि तिसियो पता था कि तिन्हीं क्या करणा।

⁷ फिलिप्पुसैं तिस जो जवाब दित्ता, “दो सौ दीनारां दियां रोटियां भी तिन्हां तांई पूरियां नीं होणियां कि तिन्हां सबना जो थोड़ी-थोड़ी मिल्ली जां।”

⁸ तिसदे चेलेयां च शमौन पतरसे दे भाऊयें अन्द्रियासैं यीशुये नैं ग्लाया,

⁹ “ऐत्थु इक्क मुँडू ऐ जिस अल्ल जौआं दियां पंज रोटियां कने दो मच्छियां हन; अपर इतणे भरी लोकां तांई सैह़ क्या हन?”

¹⁰ यीशुयैं ग्लाया, “लोकां जो इक्क-इक्क पंगत लगाई नैं बठाल़ी देआ।” तिसा जगाह बड़ा भरी घाह था; कने तिन्हां च लगभग पंज हज़ार मरद तित्थु बेई गै।

¹¹ ताह़लू यीशुयैं सैह़ पंज रोटियां लेईआं, कने परमात्मे दा धन्यावाद करी नैं बैठणे आल़ेआं जो बंडी दित्तियां; कने तिंआं ई मच्छियां भी जितणियां सैह़ चांह़दे थे बंडी दित्तियां।

¹² जाह़लू सैह़ खाई नैं रज्जी गै तां तिन्हीं अपणे चेलेयां नैं ग्लाया, बचेयो टुकड़ेयां बटोल़ी लेआ तांजे कुच्छ भी बरबाद नीं होयैं।

¹³ तां तिन्हां बटीणे कने जौआं दियां पंज रोटियां दे टुकड़ेयां जो जेह्ड़े खाणे आल़ेआं ते बाद भी बचेयो रोटियां दे बाराह टोकरु भरे।

¹⁴ जाह़लू जेह्ड़ा कम्म तिन्हीं करी नैं दस्सेया तिसियो सैह़ माणु दिक्खी नैं ग्लाणा लग्गे, “सच्ची च एह़ सैई भविष्यवक्ता ऐ जेह्ड़ा संसारे च ओणे आल़ा था।”

¹⁵ भिरी यीशुये जो पता लग्गी गेआ कि सैह़ मिन्जो राजा बणाणे तांई पकड़ुआणा चांह़दे हन, कने भिरी सैह़ प्हाड़े पर किल्ला चली गेआ।

यीशुये दा पांणिये ऊपर चलणा

¹⁶ जाह़लू संझ होई, तां तिसदे चेले झीला कनारे गै।

¹⁷ कने कफरनहूम सैहरे जो जाणे तांई तिसदे चेले किस्तिया पर चढ़ी नैं झीला पार करणा लग्गे। तिस बग्त नेहरा होई गेआ था, कने यीशु अह्ल्ली तिकर तिन्हां अल्ल नीं आया था।

¹⁸ तिसी बग्त तेज तफाने दिया बज़ाह ते झीला च लैहरां उठणा लगियां।

¹⁹ जाह़लू सैह़ किस्तिया चलाई नैं लगभग तीन चार मील गांह निकल़ी गै तां तिन्हां यीशुये जो झीला पर चलदे कने किस्तिया नेड़े ओंदे दिख्या कने डरी गै।

²⁰ अपर तिन्हीं तिन्हां नैं ग्लाया, मैं ऐ डरा मत।

²¹ ताह़लू सैह़ किस्तिया पर चढ़ाई लेआ कने झटपट किस्ती तिसा जगाह पर पज्जाई दित्ती जित्थु सैह़ चलेयो थे।

लोकां दा यीशुये जो तोपणा

²² दूँये दिने लोकां दिया तिसा भीड़ा जेह्ड़ी झीला दी पारले पास्से रेई गियो थी, एह़ दिख्या कि ऐत्थु इक्की जो छड्डी होर कोई किस्ती नीं ऐ; कने यीशु अपणे चेलेयां सौगी तिसा किस्तिया पर बेई करी नीं गेआ था, अपर सिर्फ तिसदे चेले किस्तिया च गियो थे।

²³ ताह़लू होर किस्तियां तिबिरियासे ते तिसा जगाह दे नेड़े आईआं, जित्थु तिन्हां प्रभु दा धन्यावाद करणे दे बाद रोटी खादी थी।

²⁴ इसतांई जाह़लू भीड़ा दिख्या कि ऐत्थु ना यीशु ऐ कने ना तिसदे चेले, तां सैह़ भी किस्तियां पर चढ़ी नैं यीशुये जो तोपदे-तोपदे कफरनहूम सैहरे च आई पुज्जे।

यीशु ज़िन्दगिया दी रोटी

²⁵ जाह़लू तिन्हां यीशुये जो झीला दे इस पार दिख्या, तां तिस नैं ग्लाया, “हे गुरू तू ऐत्थु काह़लू आया?”

²⁶ यीशुयैं तिन्हां जो जवाब दित्ता, “मैं तुहां नैं सच्च-सच्च ग्लांदा ऐ, तुहां मिन्जो इसतांई नीं तोपा दे हन कि तुहां चमत्कार दिख्या, अपर इसा गल्ला तांई कि तुहां रोटियां खादियां कने रज्जी गै।

²⁷ तिस खाणे तांई मेहनत मत करा जेह्ड़ा नास होई जांदा ऐ, अपर तिस खाणे तांई मेहनत करा जेह्ड़ा सदा दी ज़िन्दगिया तिकर बणी रैंह्गा, जिसियो मैं माणुये दा पुत्तर तुहां जो दिंगा, क्जोकि पिता परमात्मैं मिन्जो इसियो दैणे दा हक्क दित्या ऐ।”

²⁸ तिन्हां यीशुये नैं ग्लाया, “परमात्मे दे कम्मां करणे तांई अहां क्या करन?”

²⁹ यीशुयैं तिन्हां जो जवाब दित्ता, “परमात्मे दा कम्म एह़ ऐ, कि जिसियो तिन्हीं घल्लेया ऐ, तुहां तिस पर बसुआस करा।”

³⁰ ताह़लू तिन्हां यीशुये नैं ग्लाया, “भिरी तू कुण देहया चमत्कार दस्सदा कि अहां तिसियो दिक्खी नैं तेरा बसुआस करन? तू कुण देहया कम्म दस्सदा ऐ?

³¹ अहां दे पूर्वजां सुनसाण जगाह च मन्ना (सुअर्गे दी रोटी) खादा; जिंआं पवित्रशास्त्रे च लिख्या ऐ, परमात्मे तिन्हां जो खाणे तांई सुअर्गे ते रोटी दित्ती।”

³² यीशुयैं तिन्हां नैं ग्लाया, “मैं तुहां नैं सच्च-सच्च ग्लांदा ऐ, कि मूसैं तुहां जो सैह़ रोटी सुअर्गे ते नीं दित्ती, अपर मेरा पिता तुहां जो सच्ची रोटी सुअर्गे ते दिंदा ऐ।

³³ क्जोकि परमात्मे दी रोटी सैई ऐ, जेह्ड़ी सुअर्गे ते लौई करी संसारे दे लोकां जो ज़िन्दगी दिंदी ऐ।”

³⁴ ताह़लू तिन्हां तिस नैं ग्लाया, “हे प्रभु एह़ रोटी अहां जो हमेसा देआ कर।”

³⁵ यीशुयैं तिन्हां नैं ग्लाया, “मैं सैह़ रोटी ऐ, जेह्ड़ी सदा दी ज़िन्दगी दिंदी ऐ, जेह्ड़ा मिन्जो अल्ल ओंदा ऐ सैह़ कदी भुखा नीं रैंह्गा, कने जेह्ड़ा मिन्जो पर बसुआस करदा ऐ, सैह़ कदी प्यासा नीं हुंगा।

³⁶ अपर मैं तुहां नैं पैहल्ले ग्लाया, कि तुहां मिन्जो दिक्खी भी लेआ ऐ, भिरी भी बसुआस नीं करदे।

³⁷ जेह्ड़ा कुच्छ पिता मिन्जो दिंदा ऐ, सैह़ सब कुच्छ मिन्जो अल्ल ओंगा, कने जेह्ड़ा कोई मिन्जो अल्ल ओंगा तिसियो मैं अप्पु सौगी रखगा।

³⁸ क्जोकि मैं अपणी इच्छा नीं अपर अपणे पिता जिन्हीं मिन्जो घल्लेया ऐ, तिसदी इच्छा पूरी करणे तांई सुअर्गे ते आया।

³⁹ कने मेरे पिता दी इच्छा एह़ ऐ, कि जेह्ड़ा कुच्छ तिन्हीं मिन्जो दित्या ऐ, सैह़ सब कुच्छ मैं अप्पु अल्ल रखैं, अपर तिसियो आखरी दिनैं भिरी जिन्दा करैं।

⁴⁰ क्जोकि मेरे पिता दी इच्छा एह़ ऐ, कि जेह्ड़ा कोई पुत्तरे जो दिक्खगा कने तिस पर बसुआस करगा, सैह़ सदा दी ज़िन्दगी पांगा; कने मैं तिसियो आखरी दिनैं भिरी जिन्दा करगा।”

⁴¹ एह़ सुणी करी यहूदी लोक तिस पर बुड़बुड़ाणा लग्गे, क्जोकि तिन्हीं ग्लाया था, “जेह्ड़ी रोटी सुअर्गे ते लुत्थियो सैह़ मैं ऐ।”

⁴² कने तिन्हां ग्लाया, “क्या एह़ यूसुफे दा जागत यीशु नीं, जिसदे माँऊ बुढ़े जो अहां जाणदे हन? तां हुण एह़ किंआं ग्ला दा ऐ कि मैं सुअर्गे ते लुत्थेया?”

⁴³ यीशुयैं तिन्हां जो जवाब दित्ता, “अप्पु च मत कुड़कुड़ा।

⁴⁴ मिन्जो अल्ल मेरे पिता दी इच्छा बगैर कोई नीं आई सकदा, जिन्हीं मिन्जो घल्लेया ऐ, जाह़लू तिकर पिता तिसियो लेई नीं औयें; कने मैं तिसियो आखरी दिने भिरी जिन्दा करगा।

⁴⁵ भविष्यवक्तां दे लेखां च एह़ लिख्या ऐ; ‘सैह़ सारे परमात्मे दे पास्से ते सखाऐयो हुंगे।’ जिन्हीं कुणी भी पिता ते सुणेया कने सिखया ऐ, सैह़ मिन्जो अल्ल ओंदा ऐ।

⁴⁶ कुणी भी पिता जो नीं दिख्या ऐ, अपर मैं जेह्ड़ा परमात्मे दे पास्से ते घल्लेया ऐ, सिर्फ मैंई पिता जो दिख्या ऐ।

⁴⁷ मैं तुहां नैं सच्च-सच्च ग्लांदा ऐ, कि जेह्ड़ा कोई बसुआस करदा ऐ, सदा दी ज़िन्दगी तिसदी ऐ।

⁴⁸ मैं सैह़ रोटी ऐ, जेह्ड़ी सदा दी ज़िन्दगी दिंदी ऐ।

⁴⁹ तुहां देयां पूर्वजां सुनसाण जगाह च मन्ना खादा कने मरी गै।

⁵⁰ एह़ सैह़ रोटी ऐ जेह्ड़ी सुअर्गे ते लौंदी ऐ, तांजे माणु तिसते खान कने नीं मरन।

⁵¹ सदा दी ज़िन्दगी दी रोटी मैं ऐ, जेह्ड़ी सुअर्ग ते लुत्थियो। जे कोई इसा रोटिया च खां, तां सैह़ सदा जिन्दा रैंह्गा; कने जेह्ड़ी रोटी मैं संसारे दे लोकां जो सदा दी ज़िन्दगिया तांई दैणी, सैह़ मेरा सरीर ऐ।”

⁵² इसा गल्ला पर यहूदी लोक एह़ ग्लाई नैं अप्पु च बुड़बुड़ाणा लग्गे, “एह़ माणु किंआं अहां जो अपणा सरीर खाणे जो देई सकदा ऐ?”

⁵³ यीशुयैं तिन्हां नैं ग्लाया, “मैं तुहां नैं सच्च-सच्च ग्लांदा ऐ, कि जाह़लू तिकर तुहां माणु दे पुत्तरे दा सरीर नीं खान, कने तिसदा खून नीं पीन, ताह़लू तिकर तुहां जो सदा दी ज़िन्दगी नीं मिलगी।

⁵⁴ जेह्ड़ा मेरा सरीर खांदा कने मेरा खून पींदा ऐ, सदा दी ज़िन्दगी तिसदी ऐ; कने मैं तिसियो आखरी दिने च भिरी जिन्दा करगा।

⁵⁵ क्जोकि मेरा सरीर तां सच्चा खाणा ऐ, कने मेरा खून सच्ची च पीणे दी चीज्ज ऐ।

⁵⁶ जेह्ड़ा मेरा सरीर खांदा कने मेरा खून पींदा ऐ सैह़ मिन्जो च बणी रैंह्दा ऐ, कने मैं तिस च।

⁵⁷ जिंआं जिन्दे पितैं मिन्जो घल्लेया, कने मैं पिता दिया बज़ाह ते जिन्दा ऐ, तिंआं ई सैह़ भी जेह्ड़ा मेरे सरीरे खांगा मेरिया बज़ाह ते जिन्दा रैंह्गा।

⁵⁸ जेह्ड़ी रोटी सुअर्गे ते लुत्थियो ऐई ऐ, तिस मन्ने साइआं नीं जेह्ड़ा पूर्वजां खादा कने मरी गै; जेह्ड़ा कोई एह़ रोटी खांगा, सैह़ हमेसा जिन्दा रैंह्गा।”

⁵⁹ यीशुयैं एह़ सारियां गल्लां ताह़लू ग्लाईयां, जाह़लू कफरनहूम सैहरे दे इक्की आराधनालय च सिक्षा दै दा था।

सदा दी ज़िन्दगिया दे वचन

⁶⁰ तिसदे चेलेयां च मतेआं एह़ सुणी नैं ग्लाया, एह़ सक्त बोल ऐ; “इसियो कुण सुणी सकदा ऐ?”

⁶¹ यीशुयैं अपणे मने च एह़ जाणी लेआ कि मेरे चेले अप्पु च इसा गल्ला पर बुड़बुड़ांदे हन, तिन्हीं तिन्हां ते पुछया, “क्या एह़ गल्ल तुहां जो बसुआस करणे ते रोकदी ऐ?

⁶² जे तुहां माणुये दे पुत्तरे जो सुअर्गे जांदे दिक्खगे, जित्थु सैह़ पैहल्ले था, तां क्या हुंगा?

⁶³ परमात्मे दा आत्मा ई ऐ, जेह्ड़ा सदा दी ज़िन्दगी दैणे आल़ा ऐ, अपर सरीर नीं देई सकदा; जेह्ड़े वचन मैं तुहां नैं ग्लाये सैह़ आत्मिक भी हन, कने सदा दी ज़िन्दगी भी दिंदे हन।

⁶⁴ अपर तुहां च कुच्छ देहय् भी हन जेह्ड़े बसुआस नीं करदे।” क्जोकि यीशु सुरू ते जाणदा था कि बसुआस नीं करणे आल़े कुण हन, कने सैह़ कुण ऐ; कने कुणी मिन्जो पकड़ुआणा।

⁶⁵ कने यीशुयैं ग्लाया, “इसतांई मैं तुहां नैं ग्लाया था कि कोई मिन्जो अल्ल ताह़लू तिकर नीं आई सकदा, जाह़लू तिकर तिसियो पिता दे पास्से ते एह़ वरदान नीं दित्ता जां।”

पतरसे दा बसुआस

⁶⁶ इसा गल्ला दा परणाम एह़ होएया कि तिसदे मते चेले उल्टे पैरां पचांह़ हटी गै कने भिरी तिस सौगी नीं चल्ले।

⁶⁷ ताह़लू यीशुयैं तिन्हां बारांह चेलेयां नैं ग्लाया, “क्या तुहां भी चली जाणा चांह़दे हन?”

⁶⁸ शमौन पतरसैं तिस जो जवाब दित्ता, “हे प्रभु अहां कुस अल्ल जान? तेरियां गल्लां तां सदा दी ज़िन्दगी दिंदियां हन।

⁶⁹ कने अहां तुहां पर बसुआस कित्ता कने जाणी लेआ ऐ, कि परमात्मे दे घल्लेयो पवित्र जण तुहां ई हन।”

⁷⁰ यीशुयैं तिन्हां जो जवाब दित्ता, “क्या मैं तुहां बारांह जणेयां जो नीं चुणेया? भिरी भी तुहां च इक्क माणु सैताने दे बसे च ऐ।”

⁷¹ एह़ गल्ल तिन्हीं शमौन इस्करियोती दे जागते यहूदा दे बारे च ग्लाईयो थी, क्जोकि एह़ सैई जेह्ड़ा बारांह चेलेयां च इक्क था, यीशुये जो धोखा दैणे आल़ा ऐ।