यूहन्ना 2 - काँगड़ी

गलील प्रदेसे दे काना सैहरे च पैहल्ला चमत्कारे दा कम्म

¹ भिरी त्रीये दिनैं गलील प्रदेसे दे काना सैहरे च कुसकी दा ब्याह था, कने यीशु दी माँ भी तित्थु ई थी।

² यीशु कने तिसदे चेले भी तिस ब्याह च सद्देयो थे।

³ जाह़लू अंगूरा दा रस मुक्की गेआ, तां यीशु दी माँऊ तिसियो ग्लाया, “इन्हां अल्ल अंगूरा दा रस खत्म होई गेआ।”

⁴ यीशुयैं तिसायो ग्लाया, “हे नारी तू मिन्जो नैं क्जो ग्ला दी ऐ? अह्ल्ली तिकर मेरा अपणे आप्पे जो प्रगट करणे दा बग्त नीं आया।”

⁵ अपर तिसदिया माँऊ दासां नैं ग्लाया, जेह्ड़ा कुच्छ यीशु तुहां नैं ग्लांगा सैई करनेयो।

⁶ तित्थु यहूदी अगुआं दी धार्मिक व्यबस्था दे मताबक पवित्रता दा रिवाज था, कने इस रिवाजे जो पूरा करणे तांई तित्थु छे पत्थरे दे बड्डे-बड्डे चाट्टे रखेयो थे, जिन्हां च दो-दो कने त्रै-त्रै मण ओंदा था।

⁷ यीशुयैं तिन्हां जो ग्लाया, “इन्हां चाट्टेयां च पाणी भरी देआ।” ताह़लू चेलेयां तिन्हां चाट्टेयां च पाणी मुँऐ तिकर भरी दित्ता।

⁸ ताह़लू तिन्हीं दासां नैं ग्लाया, “हुण थोड़ा देहया पाणी चाट्टेयां ते कड्डी करी धामा दे मुखिये अल्ल लेई जा।” कने सैह़ लेई गै।

⁹ जाह़लू धामा दे मुखियें सैह़ पाणी चखेया, जेह्ड़ा अंगूरा दा रस बणी गेआ था कने तिसियो पता नीं चलेया कि सैह़ कुत्थू ते आया ऐ, (अपर दासां जो पता था जिन्हां पाणी कड्डेया था,) तां धामा दे मुखियें लाड़ेयो सद्दी करी तिस नैं ग्लाया,

¹⁰ हर इक्क माणु पैहल्लैं खरिया किस्मा दा अंगूरा दा रस दिंदा ऐ, कने जाह़लू परोणे पी नैं मतवाल़े होई जांदे हन, ताह़लू तू घटिया किस्मा दिंदा ऐ; अपर तैं खरिया किस्मा दा ताजा अंगूरा दा रस अह्ल्ली तिकर बचाई करी रखेया ऐ,

¹¹ यीशुयैं गलील प्रदेसे दे काना सैहरे च अपणा एह़ पैहल्ला चमत्कार दस्सी नैं अपणी महिमा जो प्रगट कित्ता, कने तिसदेयां चेलेयां तिस पर बसुआस कित्ता, कि सच्ची च ऐई मसीह ऐ।

¹² इसते बाद सैह़ कने तिसदी माँ, तिसदे भाऊ कने तिसदे चेले, कफरनहूम सैहरे जो गै कने तित्थु कुच्छ दिन रैह्।

यरूशलेम सैहरे दे मंदरे ते बपारियां जो बाहर कड्डणा

¹³ यहूदियां दा फसह दा त्योहार नेड़े था कने यीशु यरूशलेम सैहरे जो गेआ।

¹⁴ तिन्हीं मंदरे च दांदा जो, भेड्डां कने कबूतर बेचणे आल़े बपारियां जो कने अड़तिआं जो बैठेया दिख्या।

¹⁵ ताह़लू तिन्हीं रस्सियां दा कोड़ा बणाई नैं, सारियां भेड्डां कने दांदा जो मंदरे ते कड्डी दित्ता, कने अड़तिआं दे पैसे रंगाड़ी दित्ते कने बैठणे आल़े दियां चौकिआं पलटी दित्तियां।

¹⁶ कने कबूतर बेचणे आल़ेआं नैं ग्लाणा लग्गा, “इन्हां जो ऐत्थु ते लेईआ। मेरे पिता दे मंदरे जो बपारे दा मंदर मत बणा।”

¹⁷ ताह़लू तिसदे चेलेयां जो याद आई कि पवित्रशास्त्रे च लिख्या ऐ, “तेरे मंदरे दी फिकर मेरे अंदर अग्गी साइआं जल़ा दी ऐ।”

¹⁸ इसा गल्ला पर यहूदी तिस नैं ग्लाणा लग्गे, “तू जेह्ड़ा एह़ करदा ऐ तां अहां जो कुण देआ चमत्कार दस्सदा ऐ?”

¹⁹ यीशुयैं तिन्हां जो जवाब दित्ता, “इस मंदरे जो ढाई देआ, कने मैं इसियो त्रीं दिनां च भिरी बणाई दिंगा”

²⁰ यहूदियां ग्लाया, “इस मंदरे जो बणाणेयो छत्ताली साल लगेयो हन, कने क्या तू इसियो त्रीं दिनां च भिरी बणाई सकदा ऐ?”

²¹ अपर तिन्हीं अपणे सरीरे दे मंदरे दे बारे च ग्लाया था।

²² जाह़लू सैह़ मरी करी जिन्दा होई गेआ तां तिसदेयां चेलेयां जो एह़ गल्ल याद आई कने तिन्हां तिस पवित्रशास्त्रे दे वचनां कने यीशु मसीह दी ग्लाईयां गल्लां पर बसुआस कित्ता।

यीशु माणुआं दे मनां जो जाणदा ऐ

²³ जाह़लू यीशु यरूशलेम सैहरे च फसह दे त्योहारे च था, तां मतेआं लोकां तिन्हां चमत्कारां जो जेह्ड़ा सैह़ दस्सदा था दिक्खी नैं तिस पर बसुआस कित्ता।

²⁴ अपर यीशुयैं अपणे आप्पे जो तिन्हां दे भरोसे पर नीं छड्डेया, क्जोकि सैह़ सबना जो जाणदा था।

²⁵ कने तिसियो जरूरत नीं थी कि माणु दे बारे च कोई गवाही दैं, क्जोकि सैह़ अप्पु ई जाणदा था कि माणु दे मने च क्या ऐ?