यूहन्ना 17 - काँगड़ी

यीशु दी महायाजकीय प्रार्थना अप्पु तांई

¹ यीशुयैं अपणे चेलेयां नैं एह़ गल्लां ग्लाणे ते बाद सुअर्गे पास्से दिक्खी नैं ग्लाया, “हे पिता, सैह़ बग्त आई रेह्आ ऐ; अपणे पुत्तरे दी महिमा कर कि पुत्तर भी तेरी महिमा करैं,

² क्जोकि तैं तिसियो सारे लोकां पर हक्क दित्या, कि जिन्हां जो तैं तिसियो दित्या ऐ तिन्हां सारेयां जो सैह़ सदा दी ज़िन्दगी दैं।

³ कने सदा दी ज़िन्दगी एह़ ऐ कि सैह़ तिज्जो इकमात्र सच्चे परमात्मे जो कने यीशु मसीह जो, जिसियो तैं घल्लेया ऐ, जाणन।

⁴ जेह्ड़ा कम्म तैं मिन्जो करणे जो दित्या था, तिसियो पूरा करी नैं मैं धरतिया पर तेरी महिमा कित्ती ऐ।

⁵ हुण हे पिता, तू अप्पु सौगी मेरी महिमा तिसा महिमा नैं कर जेह्ड़ी महिमा संसारे दिया सृष्टिया ते पैहल्ले, तिज्जो सौगी थी।

अपणे चेलेयां तांई

⁶ “मैं तेरा नां तिन्हां माणुआं दे सामणै प्रगट कित्ता ऐ जिन्हां जो तैं संसारे च मिन्जो तांई दित्ता। सैह़ तेरे थे कने तैं तिन्हां जो मिन्जो तांई दित्ता, कने तिन्हां तेरे वचने जो मन्नी लेआ ऐ।

⁷ हुण सैह़ जाणी गियो हन कि जेह्ड़ा कुच्छ तैं मिन्जो दित्या ऐ सैह़ सब कुच्छ तेरे पास्से ते ऐ।

⁸ क्जोकि जेह्ड़े वचन तैं मिन्जो दित्यो, मैं सैह़ वचन तिन्हां अल्ल पज्जाई दित्ते; कने तिन्हां वचनां जो अपनाई लेआ, कने सच्च-सच्च जाणी लेआ ऐ कि मैं तेरे पास्से ते आया, कने बसुआस करी लेआ ऐ कि तैंईं मिन्जो घल्लेया।

⁹ मैं तिन्हां तांई विणती करदा ऐ, जिन्हां जो तैं मिन्जो दित्या ऐ, क्जोकि सैह़ तेरे हन; अपर संसारे दे लोकां तांई विणती नीं करदा जेह्ड़े संसारे दे हन,

¹⁰ कने जेह्ड़ा कुच्छ मेरा ऐ सैह़ सब तेरा ऐ, कने जेह्ड़ा तेरा ऐ सैह़ मेरा ऐ, कने इन्हां ते मेरी महिमा प्रगट होई ऐ।

¹¹ मैं हुण संसारे च नीं रैहणा, अपर इन्हां संसारे च रैहणा, कने मैं तिज्जो अल्ल ओआ दा। हे पवित्र पिता, अपणे तिस नांऐ ते जेह्ड़ा तैं मिन्जो दित्या ऐ, तिन्हां दी रक्षा कर कि सैह़ भी अहां साइआं इक्क होन।

¹² जाह़लू मैं तिन्हां सौगी था, तां मैं तेरे तिस नांऐ ते, जेह्ड़ा तैं मिन्जो दित्या ऐ तिन्हां दी रक्षा कित्ती। मैं तिन्हां दी चौकसी कित्ती, कने विनाश दे पुत्तरे जो छड्डी तिन्हां च होर कोई नास नीं होएया, इसतांई कि पवित्रशास्त्रे च जेह्ड़ा लिख्या सैह़ पूरा होयैं।

¹³ अपर हुण मैं तिज्जो अल्ल ओआ दा ऐ, कने एह़ गल्लां संसारे च ग्लांदा ऐ, तांजे सैह़ मेरी खुसिया च भरोई जान।

¹⁴ मैं तेरा वचन तिन्हां अल्ल पज्जाई दित्ता ऐ; कने संसारे दे लोकां तिन्हां नैं बैर कित्ता, क्जोकि जिंआं मैं संसारे दा नीं ऐ; तिंआं ई सैह़ भी संसार दे नीं हन।

¹⁵ मैं एह़ विणती नीं करदा ऐ, कि तू तिन्हां जो संसारे ते चुक्की लेआ, अपर एह़ कि तिन्हां जो तिस सैताने ते बचाई रख।

¹⁶ जिंआं मैं संसारे दा नीं ऐ, तिंआं ई सैह़ भी संसारे दे नीं हन।

¹⁷ तेरे वचनां च सच्चाई ऐ, कने सच्चाईया नैं तिन्हां जो पवित्र कर।

¹⁸ जिंआं तैं मिन्जो संसारे च घल्लेया, तिंआं ई मैं भी तिन्हां जो संसारे च घल्लेया;

¹⁹ कने तिन्हां तांई मैं अप्पु जो पवित्र करदा, तांजे सैह़ भी सच्चाईया नैं पवित्र कित्ते जान।

सारे बसुआसियां तांई

²⁰ “मैं सिर्फ इन्हां तांई विणती नीं करदा, अपर तिन्हां तांई भी जेह्ड़े इन्हां दे वचनां दे जरिये मिन्जो पर बसुआस करगे,

²¹ कि सैह़ सारे इक्क होन; जिंआं तू हे पिता मिन्जो च ऐ, कने मैं तिज्जो च, तिंआं ई सैह़ भी अहां च होन, जिसते संसारे सारे लोक बसुआस करन कि तैंईं मिन्जो घल्लेया ऐ।

²² सैह़ महिमा जेह्ड़ी तैं मिन्जो दित्ती मैं तिन्हां जो दित्ती ऐ, कि सैह़ तिंआं ई इक्क होन जिंआं कि अहां इक्क हन,

²³ मैं तिन्हां च कने तू मिन्जो च कि सैह़ सिद्ध होई नैं इक्क होई जान कने संसार जाणे कि तैंईं मिन्जो घल्लेया, कने जिंआं तैं मिन्जो नैं प्यार रखेया तिंआं ई तिन्हां नैं प्यार रखेया।

²⁴ हे पिता, मैं चांह़दा कि जिन्हां जो तैं मिन्जो दित्या ऐ, जित्थु मैं ऐ तित्थु सैह़ भी मिन्जो सौगी होन, कि सैह़ मेरी तिसा महिमा जो दिक्खन जेह्ड़ी तैं मिन्जो दित्ती ऐ, क्जोकि तैं संसारे दी सृष्टिया ते पैहल्ले मिन्जो नैं प्यार रखेया।

²⁵ हे धार्मिक पिता, संसारे दे लोकां मिन्जो नीं जाणेया, अपर मैं तिज्जो जाणेया; कने इन्हां भी जाणेया कि तैंईं मिन्जो घल्लेया ऐ।

²⁶ मैं तेरा नां तिन्हां पर प्रगट कित्ता कने प्रगट करदा रैंह्गा कि जेह्ड़ा प्यार तिज्जो मिन्जो नैं था सैह़ तिन्हां च बणी रैंह्, कने मैं तिन्हां च बणी रैंह्।”